2 Mpanjaka

Toko faha-14

¹¹ Kanefa tsy nanaiky i Amatsia. Koa dia niakatra hiady i Joasy mpanjakan'i Israely avaratra; ka ny tafiny sy ny an'i Amatsia mpanjakan'i Joda dia nifanandrina tao Bety-Semesy tananan'i Joda.

¹² Resin'ny tafik'i Israely ny tafik'i Joda; ka samy nandositra ho any an-tranony avy ny miaramila jodeanina.

¹³ Tao Bety-Semesy no voasambotr'i Joasy mpanjakan'i Israely i Amatsia mpanjakan'i Joda sy zanakalahin'i Joasy ary zafikelin'i Ahazia; ary dia nankany Jerosalema i Joasy ka nandravany tokony ho roanjato metatra ny mandan'ny tanana teo anelanelan'ny vavahadin'i Efraima sy ny vavahadin'ny Zoro.

¹⁴ Dia nalainy avokoa ny volamena sy ny volafotsy ary ny zava-tsarobidy izay hita tao an-tranon'ny TOMPO sy tao amin'ny raki-tsoan'ny lapan'ny mpanjaka; ary nisy ihany koa olona nalainy ho takalon'aina. Izay izy vao niverina nankany Samaria.

¹⁵ Ny sisa tamin'ny tantaran'i Joasy ary koa ny zavatra hafa rehetra nataony sy ny herimpo nasehony ary ny ady nifanaovany tamin'i Amatsia mpanjakan'i Joda, dia voasoratra ao amin'ny boky milohateny hoe Asan'ireo mpanjakan'i Israely.

¹⁶ Rehefa lasa nodimandry any amin'ny razany i Joasy, dia nalevina tao amin'ny fasan'ny mpanjakan'i Israely tao Samaria; ary i Jerobohama zanany lahy no nanjaka nandimby azy.

¹⁷ Taorian'ny nahafatesan'i Joasy mpanjakan'i Israely, dia mbola naharitra 15 taona i Amatsia mpanjakan'i Joda.

¹⁸ Ny sisa amin'ny tantaran'i Amatsia dia voasoratra ao amin'ny boky milohateny hoe Asan'ireo mpanjakan'i Joda.

¹⁹ Ary tao Jerosalema dia nisy olona nikomy tamin'i Amatsia, ka nahatonga azy nandositra tany Lakisy; fa nampanaraka azy anefa ireto mpikomy ka nampamono azy ho faty tany an-toerana.

²⁰ Dia nampodina an-kalesy tarihin-tsoavaly tany Jerosalema ny fatiny ka nalevina tao amin'ny fasam-pianakaviana tao an-Tananan'i Davida.

²¹ Vao 16 taona i Hazaria no nalain'ny vahoaka Jodeanina rehetra ka notendreny ho mpanjaka handimby an'i Amatsia rainy.

²² Rehefa lasa nodimandry any amin'ny razany kosa ity rainy, dia i Hazaria no namerina ny seranana Elata ho an'ny fanjakan'i Joda sy nanamboatra azy indray.

²³ Tamin'ny taona faha-15 nanjakan'i Amatsia, zanakalahin'i Joasy sady mpanjakan'i Joda, no tonga mpanjakan'i Israely tao Samaria i Jerobohama zanakalahin'i Joasy, ary naharitra 41 taona no nanjakany tao.

²⁴ Nanao izay ratsy eo imason'ny TOMPO izy, satria tsy nialany ny fahotana rehetra izay nitarihan'i Jerobohama zanakalahin'i Nebata ireo Israelita.

²⁵ Izy no namerina indray ny tanin'i Israely hatreo Lebo-Hamata any avaratra ka hatrany amin'ny Ranomasina Maty any atsimo araka ny nambaran'ny TOMPO Andriamanitr'i Israely tamin'ny alalan'i Jona mpaminany zanakalahin'i Amitahy avy any Gata-Hefera.

²⁶ Fa hitan'ny TOMPO ny havesatry ny fahorian'i Israely satria tsy nisy olona afa-namonjy azy na andevo izany na olona afaka.

²⁷ Tsy mbola nilaza ny hamono ny anaran'i Israely tsy ho eo ambanin'ny lanitra anefa ny TOMPO; koa dia tamin'ny alalan'i Jerobohama zanakalahin'i Joasy no namonjeny azy.

²⁸ Ny sisa tamin'ny tantaran'i Jerobohama ary koa ny zavatra hafa rehetra nataony sy ny herimpo nasehony tamin'ny ady namerenany indray tamin'i Israely ny tananan'i Damasy sy i Hamata izay an'i Joda fahiny, dia voasoratra ao amin'ny boky milohateny hoe Asan'ireo mpanjakan'i Israely.

²⁹ Rehefa lasa nodimandry any amin'ny razany i Jerobohama, dia nalevina tao amin'ny fasan'ny mpanjakan'i Israely tao Samaria; ary i Zakaria zanany lahy no nanjaka nandimby azy.

Toko faha-15

¹ Tamin'ny taona faha-27 nanjakan'i Jerobohama tamin'i Israely no tonga mpanjakan'i Joda i Hazaria zanakalahin'i Amatsia;

² feno 16 taona izy fony vao nanjaka, ary naharitra 52 taona no nanjakany tao Jerosalema. Ny anaran-dreniny dia i Jekolia izay avy ao Jerosalema ihany.

³ Nanao izay mahitsy eo imason'ny TOMPO i Hazaria, tahaka izay rehetra nataon'i Amatsia rainy;

⁴ nefa tsy mba nofoanany ny toeram-panasinana, ka mbola nanao sorona sy nandoro azy hanetona teny ihany ny olona.

⁵ Namely ny mpanjaka tamin'ny aretina ny TOMPO; ka tonga boka mandra-pahafatiny izy ary voatery nitoka-monina tao amin'ny trano anankiray. Ka dia i Jotama, zanany lahy sady efa mpifehy ny tao an-dapa no nitondra ny tany sy ny fanjakana.

⁶ Ny sisa amin'ny tantaran'i Hazaria ary koa ny zavatra hafa rehetra nataony dia voasoratra ao amin'ny boky milohateny hoe Asan'ireo mpanjakan'i Joda.

⁷ Rehefa lasa nodimandry any amin'ny razany i Hazaria, dia nalevina tao amin'ny fasam-pianakaviany tao an-Tananan'i Davida; ary i Jotama zanany lahy no nanjaka nandimby azy.

⁸ Tamin'ny taona faha-38 nanjakan'i Hazaria tamin'i Joda no tonga mpanjakan'i Israely tao Samaria i Zakaria zanakalahin'i Jerobohama; ary enim-bolana ihany no nanjakany tao.

⁹ Nanao izay ratsy eo imason'ny TOMPO tahaka ny nataon'ireo razany izy, satria tsy nialany ny fahotana izay nitarihan'i Jerobohama zanakalahin'i Nebata ireo Israelita.

¹⁰ Fa nikomy taminy kosa i Saloma zanakalahin'i Jabesa ka nahafaty azy tao Jiblehama ary nanjaka nandimby azy.

¹¹ Ny sisa amin'ny tantaran'i Zakaria dia voasoratra ao amin'ny boky milohateny hoe Asan'ireo mpanjakan'i Israely.

¹² Izany ilay nolazain'ny TOMPO tamin'i Jeho hoe: Hitoetra eo amin'ny sezafiandrianan'i Israely hatramin'ny taranaka fahefatra ny taranakao, ka dia tanteraka.

¹³ Tamin'ny taona faha-39 nanjakan'i Hazaria tamin'i Joda no tonga mpanjakan'i Israely i Saloma zanakalahin'i Jabesa; ary iray volana ihany no nanjakany tao Samaria.

¹⁴ Fa tonga tao Samaria avy any Tiritsa kosa i Menahema zanakalahin'i Gady ka nahafaty an'i Saloma tao, ary dia nandrombaka ny fahefana.

¹⁵ Ny sisa amin'ny tantaran'i Saloma ary koa ny fiokoany nanohitra an'i Zakaria dia voasoratra ao amin'ny boky milohateny hoe Asan'ireo mpanjakan'i Israely.

¹⁶ Tamin'izay no niala tao Tiritsa i Menahema ka nanafika ny tananan'i Tifsa, ary nandringana ny mponina tao sy nandrava ny faritaniny manontolo. Rehefa misy tanana tsy amohana vavahady an'i Menahema, dia tafihiny; ary tatahany koa ny kibon'ny vehivavy bevohoka rehetra ao.

¹⁷ Tamin'ny taona faha-39 nanjakan'i Hazaria tamin'i Joda no tonga mpanjakan'i Israely i Menahema zanakalahin'i Gady; ary naharitra folo taona no nanjakany tao Samaria.

¹⁸ Nandritra ny androm-piainany rehetra, dia nanao izay ratsy eo imason'ny TOMPO izy, fa tsy nialany ny fahotana izay nitarihan'i Jerobohama zanakalahin'i Nebata ireo Israelita.

¹⁹ Niditra an-keriny tao amin'ny tanin'i Israely i Pola mpanjakan'i Asiria; ka nomen'i Menahema volafotsy telopolo taonina izy mba hanampiany azy hanamafy orina ny fahefam-panjakany.

²⁰ Mba hahazoana izany volafotsy izany, dia nampandoavin'i Menahema hetra ny mpanankarena rehetra tany Israely, dia sekela volafotsy dimampolo avy mba homena ny mpanjakan'i Asiria. Rehefa nandray izany izy, dia niverina nody fa tsy nijanona teo amin'ny tany.

²¹ Ny sisa amin'ny tantaran'i Menahema ary koa ny zavatra hafa rehetra nataony dia voasoratra ao amin'ny boky milohateny hoe Asan'ireo mpanjakan'i Israely.

²² Rehefa lasa nodimandry any amin'ny razany izy, dia i Pekahia zanany lahy no nanjaka nandimby azy.

²³ Tamin'ny taona fahadimampolo nanjakan'i Hazaria tamin'i Joda no tonga mpanjakan'i Israely tao Samaria i Pekahia zanakalahin'i Menahema; ary roa taona ihany no nanjakany tao.

²⁴ Nanao izay ratsy eo imason'ny TOMPO izy, satria tsy nialany ny fahotana izay nitarihan'i Jerobohama zanakalahin'i Nebata ireo Israelita.

²⁵ Ary nikomy tamin'i Pekahia i Peka dekany sady zanakalahin'i Remalia, ka nanafika azy mbamin'i Argoba sy Aria tao amin'ny tilikambon'ny tranon'ny mpanjaka; tamin'izay i Peka dia nomban'ny vatan-dehilahy dimampolo taranaky ny Gilehadita; rehefa avy namono an'i Pekahia ho faty izy, dia nanjaka nandimby azy.

²⁶ Ny sisa amin'ny tantaran'i Pekahia ary koa ny zavatra hafa rehetra nataony dia voasoratra ao amin'ny boky milohateny hoe Asan'ireo mpanjakan'i Israely.

²⁷ Tamin'ny taona faha-52 nanjakan'i Hazaria tamin'i Joda no tonga mpanjakan'i Israely i Peka zanakalahin'i Remalia; ary naharitra roapolo taona no nanjakany tao Samaria.

²⁸ Nanao izay ratsy eo imason'ny TOMPO izy, satria tsy nialany ny fahotana izay nitarihan'i Jerobohama zanakalahin'i Nebata ireo Israelita.

²⁹ Tamin'ny andro nanjakan'i Peka tamin'i Israely no nahatongavan'i Tiglata-Pilesera mpanjakan'i Asiria haka ny tananan'i Hiona sy i Abela-Bety-Mahaka mbamin'i Janoka sy i Kedesa ary i Hatsora; nalainy koa i Gilehada sy i Galilea mbamin'ny tanin'i Naftaly manontolo, ary dia nataony sesitany tany Asiria ny mponin'ireo.

³⁰ Fa nikomy tamin'i Peka zanakalahin'i Remalia i Hosea zanakalahin'i Ela ka nahafaty azy; ary nanjaka nandimby azy izy tamin'ny taona faharoapolo nanjakan'i Jotama zanakalahin'i Hozia.

³¹ Ny sisa amin'ny tantaran'i Peka ary koa ny zavatra hafa rehetra nataony dia voasoratra ao amin'ny boky milohateny hoe Asan'ireo mpanjakan'i Israely.