2 Mpanjaka
Toko faha-8
22 Hatreo dia nanohitra ny fahefana jodeanina ny Edomita mandraka androany. Tamin'izay fotoana izay koa no nikomian'ny tananan'i Libna.23 Ny sisa amin'ny tantaran'i Jorama ary koa ny zavatra hafa rehetra nataony dia voasoratra ao amin'ny boky milohateny hoe Asan'ireo mpanjakan'i Joda.
24 Rehefa lasa nodimandry any amin'ny razany i Jorama, dia nalevina tao amin'ny fasam-pianakaviany tao an-tananan'i Davida; ary i Ahazia zanany lahy no nanjaka nandimby azy.
25 Tamin'ny taona faha-12 nanjakan'i Jorama zanakalahin'i Ahaba sady mpanjakan'i Israely no tonga mpanjakan'i Joda i Ahazia zanakalahin'i Jorama.
26 Feno 22 taona i Ahazia fony vao nanjaka, ary herintaona ihany no nanjakany tany Jerosalema. Hatalia no anaran-dreniny izay vavimatoan'i Homry mpanjakan'i Israely.
27 Ny toetran'ireo taranak'i Ahaba no narahin'i Ahazia; ka nanao izay ratsy eo imason'ny TOMPO tahaka ny nataon'ireo izy sady vinanton'ny taranak'i Ahaba ihany.
28 Niara-dia tamin'i Jorama zanakalahin'i Ahaba izy mba hiady amin'i Hazaela mpanjakan'i Siria tany Ramota Gilehada kanjo naratran'ny Sirianina i Jorama.
29 Ary niverina tao Jizrehela i Jorama mpanjaka mba hotsaboina tamin'ny ratra nahavoa azy tany Ramota, fony izy niady tamin'i Hazaela mpanjakan'i Siria. Dia nankany Jizrehela i Ahazia, zanakalahin'i Jorama sady mpanjakan'i Joda, mba hamangy an'i Jorama zanakalahin'i Ahaba noho izy narary.
Toko faha-9
1 Indray andro i Elisa mpaminany dia niantso tovolahy iray anisan'ny andia-mpaminany ka nanao taminy hoe: Mivonona ianao handeha, ka ento ity tavoara feno menaka ity, ary mankanesa any Ramota-Gilehada.2 Rehefa mby any ianao, dia ataovy izay hahitana an'i Jeho zanakalahin'i Josafata sady zafikelin'i Nimsy. Antsoy hiala amin'ny namany izy, dia ento any amin'ny efitrano anatiny indrindra.
3 Ary horaisinao ny tavoara ka hararakao eo ambony lohany ny menaka sady hombanao teny hoe: Izao no lazain'ny TOMPO: Manosotra anao ho mpanjakan'i Israely aho! Dia hovohanao avy eo ny varavarana mba handosiranao avy hatrany.
4 Koa dia nankany Ramota-Gilehada ilay tovolahy mpaminany.
5 Nony tonga tany izy, dia ireo filohan-tafik'i Israely niara-nivory no hitany ary nitenenany hoe: Manan-javatra hambara aminao aho, ry filoha! Ka hoy i Jeho: Iza aminay ireto moa izany? Dia hoy ny navalin'ilay tovolahy: Aminao ihany, ry filoha o!
6 Dia nitsangana i Jeho ka niditra tao amin'ny efitrano; ary nandraraka ny menaka teo an-dohany ny mpaminany sady nanao hoe: Izao no lazain'ny TOMPO Andriamanitr'i Israely: Manosotra anao ho mpanjakan'i Israely vahoakako Aho.
7 Ianao no handringana ny taranak'i Ahaba tomponao fahiny, mba hamaliako ny ran'ireo mpanompoko rehetra izay nalatsak'i Jezebela, na mpaminany izy na olon-kafa.
8 Eny, ho fongotra avokoa ny fianakavian'i Ahaba; ary haringako ny lehilahy rehetra eo aminy na kely na lehibe,
9 ka ny taranany hataoko tahaka ny nanaovako ny taranak'i Jerobohama zanakalahin'i Nebata sy ny taranak'i Bahasa zanakalahin'i Ahia.
10 Fa i Jezebela kosa tsy hisy handevina, satria hohanin'ny alika ao amin'ny sahan'i Jizrehela ny fatiny. Rehefa avy nilaza izany ilay tovolahy mpaminany, dia namoha ny varavarana ka lasa nandositra.
11 Ary nivoaka ny efitrano i Jeho, dia niverina nankeo amin'ny manamboninahitra hafa ka nanontanian'ireo hoe: Tsara ihany ve ianao? Fa inona no notadiavin'ilay adala iny taminao? Hoy kosa ny navalin'i Jeho azy: Fantatrareo ihany iny lehilahy iny sy ny redirediny.
12 Fa hoy indray ireo: Mandainga ianao. Ambarao aminay izay tena marina. Dia novaliany hoe: Ireto avy no teny nataony tamiko: Izao no lazain'ny TOMPO: Manosotra anao ho mpanjakan'i Israely Aho!
13 Dia samy nanala faingana ny akanjobeny avy ny manamboninahitra rehetra ka namelatra azy teo amin'ny faratampon'ny tohatra anankiray mba hipetrahan'i Jeho. Ary notsofin'ny mpiangaly azy ny anjomara fa ny besinimaro teo kosa niantsoantso hoe: I Jeho no mpanjaka.
14 Tamin'izany fotoana izany, ny tafik'i Israely manontolo dia niaro ny tananan'i Ramota-Gilehada tamin'ny fanafihan'i Hazaela mpanjakan'i Siria. Kanjo raha niady tamin'i Hazaela i Jorama mpanjaka, dia naratran'ny Sirianina. Koa dia nankao Jizrehela izy hotsaboina tamin'ny ratra nahavoa azy. Ary nioko tamin'i Jorama i Jeho zanakalahin'i Josafata sady zafikelin'i Nimsy ka niteny tamin'ireo manamboninahitra hafa hoe: Raha vonona hanohana ahy ianareo, dia aza avela hisy olona hiala ny tanana ka handeha hilaza izao zava-nitranga teto izao any Jizrehela.
16 Dia nitaingina ny kalesiny i Jeho ka nankany Jizrehela izay nisy an'i Jorama notsaboina sy i Ahazia mpanjakan'i Joda tonga namangy azy. 17 Nahatazana olona betsaka tamy niaraka tamin'i Jeho ilay mpitily izay teo an-tampon'ny tilikambon'i Jizrehela, ka nilaza tamin'ny mpanjaka hoe: Mahatazana olona betsaka aho. Dia hoy i Jorama: Mandefasa mpitaingin-tsoavaly hitsena azy ireo ka hanontany azy hoe: Fihavanana ve no ahatongavanareo?
18 Dia lasa ny mpitaingin-tsoavaly iray nitsena ireo olona ireo ka niteny hoe: Izao no lazain'ny mpanjaka: Fihavanana ve no ahatongavanareo? Ary hoy ny navalin'i Jeho: Ahoanao inona izay fihavanana? Fa mankanesa ato aoriako ianao. Tamin'izay kosa ilay mpitily no nilaza hoe: Tonga teo amin-dry zareo ny iraka, nefa tsy niverina.
19 Nandefa mpitaingin-tsoavaly faharoa indray i Jorama, ka nony tonga teny amin-dry zareo io, dia nanao hoe: Izao no tenin'ny mpanjaka: Fihavanana ve no ahatongavanareo? Ary hoy ny navalin'i Jeho: Ahoanao inona izay fihavanana? Fa mankanesa ato aoriako ianao!
20 Tamin'izay kosa ilay mpitily no nilaza indray hoe: Tonga teo amin-dry zareo koa ny iraka faharoa, nefa tsy niverina. Saingy fantatro izao i Jeho zafikelin'i Nimsy, araka ny fampiriotran-kalesiny: mampiriotra kalesy hoatra ny olona adala manko izy.
21 Nasain'i Jorama novononina ny kalesin-tsoavaliny; dia natao izany. Dia samy niainga nitaingina ny kalesiny avy i Jorama mpanjakan'i Israely sy i Ahazia mpanjakan'i Joda, ka lasa nitsena an'i Jeho, ary tojo azy teo amin'ny sahan'i Nabota avy any Jizrehela.
22 Raha vao nahita an'i Jeho i Jorama, dia nanontany azy hoe: Fihavanana ve no ahatongavanao, ry Jeho? Fa hoy ny navaliny: Tsy hisy fihavanana, raha mbola manompo ireo andriamani-tsiizy sy manao majika i Jezebela reninao.
23 Dia nihodina i Jorama ka nandositra sady niteny tamin'i Ahazia hoe: Famadihana io, ry Ahazia!
24 Noraisin'i Jeho ny tsipikany, dia nitifitra izy ka nahavoa an'i Jorama teo anelanelan'ny sorony; ary tafavoaka ny zana-tsipika rehefa niboroaka tamin'ny fony. Dia maty nikorosy tao anaty kalesiny i Jorama.
25 Ary hoy i Jeho tamin'i Bidkara dekany: Raiso ny fatiny ka atsipazo ao amin'ny sahan'i Nabota avy any Jizrehela. Tsarovy fa, fony isika roa lahy niara-nitondra kalesy nanaraka an'i Ahaba rain'i Jorama, dia izao no nambaran'ny TOMPO tamin'i Ahaba:
26 Hitako tokoa ny namonoanao ho faty an'i Nabota sy ireo zanany omaly; koa Izaho TOMPO no manao teny hentitra fa hamaly anao eto amin'ity saha ity. Noho izany, ry Bidkara, dia raiso ny fatiny ka atsipazo ao amin'io saha io araka ny tenin'ny TOMPO.
27 Raha nahita izany i Ahazia mpanjakan'i Joda, dia nandositra tamin'ny lalan'i Bety-Gany; kanefa nanenjika azy i Jeho sady nibaiko namana hoe: Asio ihany koa iny. Dia nasian'ireo izy iny nitondra ny kalesiny teo am-piakaran'i Gora akaikin'i Jiblehama iny. Ary afa-nandositra nankany Megidao i Ahazia ka maty tao.
28 Dia nentin'ny mpanompony tamin'ny kalesiny ho any Jerosalema izy ka nalevina tao amin'ny fasam-pianakaviany tao an-Tananan'i Davida.
29 Tamin'ny faha-11 taona nanjakan'i Jorama zanakalahin'i Ahaba no tonga mpanjakan'i Joda i Ahazia.
30 Dia tonga tany Jizrehela i Jeho. Ary raha nandre izany i Jezebela dia nanao manjamaso sady nandravaka ny lohany ka nankeo am-baravarankely.
31 Koa raha niditra ny vavahady i Jeho, dia hoy i Jezebela: Fihavanana ve no ahatongavanao, ry karazan'i Zimry mpamono ny tompony?
32 Ary niandrandra ny varavarankely i Jeho sady nanontany hoe: Iza no momba ahy? Iza? Ary nisy tandapa roa na telo nitsirika azy.
33 Ka hoy izy taminy: Azerao avy eny io vehivavy io! Dia natosiny avy eny am-baravarankely i Jezebela ka nianjera, ary nifantsitsitra tamin'ny rindrina sy ny soavaly ny rany; ka dia nohitsahin'i Jeho tamin'ny kalesiny izy.
34 Ary niditra tao an-dapa i Jeho ka nihinana sy nisotro; avy eo izy nilaza tamin'ny namany hoe: Ndeha karakarao ny fandevenana an'io vehivavy voaozona io, fa mba zanaka mpanjaka ihany izy.
35 Dia lasa ireo mba handevina azy; kanjo tsy nisy afa-tsy ny karandohany sy ny tongotra aman-tanany sisa no hitany teo.
36 Ary niverina ireo ka nanambara izany tamin'i Jeho, izay loa-bolana hoe: Izao mihitsy no nampilazain'ny TOMPO an'i Elia avy any Tisbe sady mpanompony hoe: Ao amin'ny sahan'i Jizrehela no hihinanan'ny alika ny nofon'i Jezebela.
37 Ary ny fatiny kosa haely amin'ity saha ity toy ny zezika aparitaka amin'ny tany, ka tsy hisy afaka hilaza hoe i Jezebela iny.
Toko faha-10
1 Nanan-taranaka fitopolo lahy izay nipetraka tany Samaria i Ahaba. Fa nanoratra taratasy i Jeho mba halefa any Samaria ho an'ireo lehibe mpifehy ny tanana mbamin'ireo loholona sy ireo mpanabe ny taranak'i Ahaba. Ka hoy i Jeho tamin'ny taratasiny:2 Eo aminareo ny taranaky ny tomponareo sy ny kalesy aman-tsoavaly ary ny fiadiana; sady tananamimanda no onenanareo.
3 Vantany vao voarainareo ity taratasy ity, dia jereo izay tsara sy mendrika indrindra amin'ny fianakavian'ny tomponareo ka apetraho eo amin'ny sezafiandrianan-drainy, ary miadia ho an'ny fianakavian'ny tomponareo.
4 Raiki-tahotra avokoa ireo olon-drehetra ireo, ka nifampilaza hoe: Hataontsika ahoana ny hahatohitra an'i Jeho, nefa mpanjaka roa aza tsy nahatohitra azy?
5 Dia nampitondra izao valin-teny izao ho an'i Jeho ilay lehiben'ny tandapa sy ilay mpanapaka ny tanana mbamin'ireo loholona sy ireo mpanabe nanao hoe: Mpanomponao izahay ka vonon-kanao izay rehetra andidianao anay; ary tsy hanangana olona ho mpanjaka izahay, koa ataovy izay sitrakao.
6 Dia nanoratra taminy fanindroany i Jeho nanao hoe: Raha momba ahy tokoa ianareo ary mankato ny baikoko, dia tapaho avokoa ny lohan'ireo taranaky ny tomponareo, ka ento aty amiko aty Jizrehela rahampitso toy izao. Izy fitopolo lahy taranaky ny mpanjaka dia voatsinjara tamin'ireo olom-baventin'ny tanana izay nitaiza azy avy.
7 Vao voarain'ireo mpitondra ireo ny taratasy, dia nampiantsoiny izy fitopolo lahy taranaky ny mpanjaka ka novonoiny ho faty; ary nafatrany an-tsobika ny lohany ka nalefany tany amin'i Jeho tany Jizrehela.