Genesỳ
Toko faha-29
8 Fa novalian'ireo hoe: -Tsy azonay atao izany, raha tsy efa tafangona avokoa ny andiany rehetra; amin'izay dia hoesorina ny vato eo amin'ny vava fantsakana, ary hampisotro ny ondry aman'osy izahay.9 Raha mbola niresaka tamin'ireo i Jakoba, dia tonga i Rahely niaraka tamin'ny ondrin-drainy, fa mpiandry ondry izy.
10 Ary rehefa nahita an'i Rahely zanakavavin'i Labana anadahin-dreniny sy ireo ondry aman'osiny i Jakoba, dia nanatona nanaisotra ny vato teo amin'ny vava fantsakana, ka nampisotro ireo ondry aman'osin'ny anadahin-dreniny.
11 Dia nanoroka an'i Rahely i Jakoba sady nitomany.
12 Notantarain'i Jakoba tamin'i Rahely fa havan-drainy izy ary zanakalahin'i Rebeka. Dia nihazakazaka i Rahely ka nitantara izany tamin-drainy.
13 Rehefa nandre ny amin'i Jakoba zanak'anabaviny kosa i Labana, dia nihazakazaka nitsena azy, ka namihina sady nanoroka azy ary nitondra azy ho any an-tranony. Notantarain'i Jakoba tamin'i Labana avokoa ny zava-nitranga,
14 ka hoy i Labana taminy: -Marina tokoa fa havako ianao, ary iray ra amiko. Dia nipetraka iray volana tao aminy i Jakoba.
15 Indray andro dia hoy i Labana tamin'i Jakoba: -Noho ny maha havako anao ve dia hanompo ahy maimaim-poana ianao? Koa lazao amiko, inona no ho karamanao?
16 Nanana zanakavavy roa anefa i Labana; ilay zokiny dia nantsoina hoe Lea ary ilay zandriny natao hoe Rahely.
17 I Lea dia malefa-pijery, fa i Rahely kosa tsara tarehy sady bikana.
18 Ary tia an'i Rahely i Jakoba ka niteny tamin'i Labana hoe: -Hanompo anao fito taona aho mba hahazoako manambady an'i Rahely faravavinao.
19 Dia namaly azy i Labana hoe: -Aleoko homena anao izy toy izay ho an'olon-kafa, fa mitoera eto amiko.
20 Koa mba hahazoany an'i Rahely, dia nanompo an'i Labana fito taona i Jakoba; nefa toy ny andro vitsivitsy nandalo izany teo imasony, satria tena tiany razazavavy.
21 Rehefa afaka izany, dia hoy i Jakoba tamin'i Labana: -Aiza amin'izay ny vadiko hampakariko, fa efa tapitra ny fe-potoana.
22 Dia nasain'i Labana ho amin'ny sakafom-panambadiana ny olona rehetra teo an-toerana.
23 Nony hariva dia nalain'i Labana i Lea zanany vavy ka nentiny tany amin'i Jakoba ary nandry taminy izy.
24 Nomen'i Labana an'i Lea zanany vavy kosa i Zilpa mba ho mpanompovavy hanampy azy.
25 Nony maraina vao gaga i Jakoba fa hay i Lea no tao aminy, ka hoy izy tamin'i Labana: -Inona izao nataonao tamiko izao? Fa angaha tsy i Rahely no nanompoako anao, koa nahoana ianao no namitaka ahy?
26 Dia namaly i Labana hoe: -Tsy fomban-tany aty aminay ny mampanambady ny zandriny alohan'ny zokiny.
27 Vitao aloha ny herinandron'ny volantantely amin'ny zokiny, dia homenay anao koa ny zandriny raha manompo ahy fito taona hafa indray ianao.
28 Dia nataon'i Jakoba izany, ka novitainy ny herinandron'ny volantantely tamin'i Lea; avy eo dia nomen'i Labana azy koa i Rahely ho vadiny.
29 Nomen'i Labana an'i Rahely i Bileha mba ho mpanompovavy hanampy azy.
30 Dia nandry tany amin'i Rahely koa i Jakoba ka tiany lavitra noho i Lea izy. Ary nanompo an'i Labana fito taona hafa koa i Jakoba.
31 Ary rehefa hitan'ny TOMPO fa tsy tiana noho i Rahely i Lea, dia nataony mitoe-jaza izy; fa i Rahely kosa nataony momba.
32 Dia bevohoka i Lea, ka tera-dahy ary ny anarany nataony hoe Reobena, satria hoy izy hoe: -Ny TOMPO efa nijery ny fahoriako, ary ankehitriny dia ho tia ahy ny vadiko.
33 Ary bevohoka indray izy ka tera-dahy, dia niteny hoe: -Efa ren'ny TOMPO fa tsy tiana aho, ka nomeny an'ity indray koa. Dia nataony hoe Simehona ny anarany.
34 Mbola bevohoka indray izy ka tera-dahy fanintelony, dia nanao hoe: -Ankehitriny dia hifikitra amiko ny vadiko, satria efa niteraka telo lahy ho azy aho. Noho izany dia nataony hoe Levy ny anarany.
35 Fa mbola bevohoka indray izy, dia niteraka zazalahy fahefatra, ka nanao hoe: -Amin'ity kosa dia hidera ny TOMPO aho. Dia nataony hoe Joda ny anarany. Dia nitsahatra tsy niteraka intsony izy.
Toko faha-30
1 Ary rehefa hitan'i Rahely fa tsy niteraka izy, dia nialonany ny rahavaviny ka hoy izy tamin'i Jakoba hoe: -Mba omeo zanaka aho! Fa raha tsy izany, dia aleoko maty!2 Tezitra taminy i Jakoba ka namaly hoe: -Izaho angaha no solon'Andriamanitra Izay nisakana ny kibonao tsy hiteraka?
3 Fa hoy i Rahely taminy: -Io ary i Bileha mpanompovaviko; ndeha mandry aminy, dia hiteraka zaza hatsangako izy, ary hanan-janaka avy aminy aho.
4 Dia nomeny an'i Jakoba ny mpanompovaviny ho vadiny, ka dia nandry taminy izy.
5 Ary bevohoka i Bileha ka niteraka zazalahy tamin'i Jakoba.
6 Dia hoy i Rahely hoe: -Andriamanitra efa nanome rariny ahy ka nihaino ny fangatahako, ary nanome ahy zanakalahy. Dia nataony hoe Dana ny anarany.
7 Mbola bevohoka indray i Bileha ka niteraka zazalahy faharoa tamin'i Jakoba,
8 dia hoy i Rahely hoe: -Efa niady mafy tamin'ny rahavaviko aho, ka nandresy! Dia nataony hoe Naftaly ny anarany.
9 Ary nony hitan'i Lea fa nitsaha-jaza izy, dia nalainy i Zilpa mpanompovaviny ka nomeny hovadin'i Jakoba.
10 Ary i Zilpa niteraka zazalahy tamin'i Jakoba,
11 ka hoy i Lea hoe: -Manan-jara aho! Dia nataony hoe Gada ny anarany.
12 Fa mbola niteraka zazalahy faharoa tamin'i Jakoba i Zilpa,
13 ka hoy i Lea hoe: -Hasambarana tsy misy toy izany! Fa ankehitriny dia holazain'ny vehivavy hoe sambatra aho. Dia nataony hoe Asera no anarany.
14 Indray andro tamin'ny fotoam-pararano iny, dia nandeha nitsangatsangana tany an-tsaha i Reobena ary nahita mandragora. Nentiny tany amin'i Lea reniny izany, ka hoy i Rahely tamin'i Lea: -Mba omeo kely amin'ireo mandragoran'ny zanakao aho, azafady!
15 Fa novalian'i Lea hoe: -Moa tsy ampy anao ve ny nakanao ny vadiko ka tianao halaina koa ankehitriny ny mandragoran-janako? Dia hoy i Rahely hoe: -Aleo ary handry any aminao i Jakoba anio alina ho takalon'ny mandragoran-janakao.
16 Rehefa tonga avy tany an-tsaha i Jakoba ny hariva, dia nivoaka hitsena azy i Lea sady nanao taminy hoe: -Ato amiko no handrianao anio ho takalon'ny mandragoran-janako. Dia nandry tany aminy i Jakoba iny alina iny.
17 Ary nohenoin'Andriamanitra ny vavak'i Lea, ka bevohoka izy ary niteraka zazalahy fahadimy tamin'i Jakoba.
18 Dia hoy ny filazan'i Lea hoe: -Efa novalian'Andriamanitra soa aho satria efa nomeko hovadin'ny vadiko ny ankizivaviko. Koa nataony hoe Jisakara ny anarany.
19 Ary mbola bevohoka indray i Lea ka niteraka zazalahy fahenina tamin'i Jakoba.
20 Dia nilaza izy hoe: -Efa nanome zava-tsoa ahy Andriamanitra; ary amin'ity indray mandeha ity dia hanaja ahy ny vadiko, satria efa niteraka enin-dahy ho azy aho. Dia nataony hoe Zebolona ny anarany.
21 Taorian'izany dia mbola niteraka zazavavy koa izy, ka nataony hoe Dina ny anarany.
22 Ary Andriamanitra nahatsiaro an'i Rahely ka nihaino ny fangatahany, dia nampitoe-jaza azy.