2 Samoela

Toko faha-16

¹² Angamba ho hitan'ny TOMPO ny fahantrako, ka hampodiny ho fanambinana ny fanozonany ahy androany.

¹³ Fa raha mbola nanohy ny diany i Davida sy ny olony, dia nandroso tsy lavitra azy ireo tamin'ny tehezan-tendrombohitra kosa i Simehy, sady mbola nanozona sy nitora-bato ary namafy vovoka.

¹⁴ Reraka mafy ny mpanjaka sy ny olona rehetra tafaraka taminy raha tonga teo amoron'i Jordana, koa dia naka aina teo.

¹⁵ Tonga tao Jerosalema i Absaloma sy ny vahoaka Israelita isan-karazany; ary tafaraka taminy koa i Ahitofela.

¹⁶ Rehefa mby teo amin'i Absaloma i Hosay, ilay Arkita sakaizan'i Davida, dia niantsoantso hoe: Ho ela velona anie ny mpanjaka! Ho ela velona anie ny mpanjaka!

¹⁷ Fa hoy i Absaloma tamin'i Hosay: Izao va no fitiavanao an'i Davida sakaizanao? Nahoana ianao no tsy mba nandeha niaraka taminy?

¹⁸ Ary hoy i Hosay tamin'i Absaloma: Tsy niaraka taminy aho, satria ny tiako hiarahana dia ianao ilay nofidin'ny TOMPO sy nofidin'ireto vahoaka ireto izany hoe ny Israelita isan-karazany; ka ao aminao no hitoerako.

¹⁹ Faharoa manaraka izany, iza ianao hotompoiko izao, moa tsy ny zanakalahin'ilay sakaizako ihany va? Tahaka izay efa nanompoako an-drainao no hanompoako anao koa.

²⁰ Hoy i Absaloma tamin'i Ahitofela: Mifampidiniha ianareo ny amin'izay tokony hataontsika:

²¹ Dia hoy kosa i Ahitofela tamin'i Absaloma: Mandehana mandry amin'ny vadikelin-drainao izay nasainy niandry ny trano. Ho fantatry ny Israelita rehetra fa nanao izay nahafa-baraka an-drainao ianao, ka dia hahery ny tanan'izay rehetra mpomba anao.

²² Nananganan'ny olona lay teo an-tampon-trano i Absaloma, ka nandry tamin'ny vadikelin-drainy tao teo imason'ny Israelita rehetra izy. 23 Tamin'izay ny torohevitr'i Ahitofela dia natao ho tahaka ny tenin'Andriamanitra; ary toy izany avokoa ny torohevitra nataony na tamin'i Davida na tamin'i Absaloma.

Toko faha-17

¹ Hoy i Ahitofela tamin'i Absaloma: Aoka aho hifidy lehilahy 12 000 hoentiko hanenjika an'i Davida anio alina.

² Hotampohiko amin'ilay mbola sasatra sy reraka iny izy ka hampihorohoroiko. Handositra ny olona rehetra tafaraka taminy, ary ny mpanjaka irery no hovonoiko ho faty.

³ Dia haveriko ho aty aminao ny vahoaka rehetra; satria miankina amin'ny fahazoana io lehilahy tadiavinao io ny hiverenan'ny besinimaro aminao ka hiadanan'ny vahoaka rehetra.

⁴ Nahafaly an'i Absaloma sy ny loholon'i Israely rehetra izany hevitra izany.

⁵ Kanefa hoy i Absaloma hoe: Antsoy koa i Hosay, ilay Arkita, mba handrenesantsika izay teniny.

⁶ Rehefa tonga teo amin'i Absaloma i Hosay, dia nilazany hoe: Izao no notenenin'i Ahitofela, ka harahintsika ve ny teniny? Raha tsy sitrakao izany, dia mitenena ianao.

⁷ Fa hoy ny navalin'i Hosay an'i Absaloma: Tamin'ity dia tsy tsara ny torohevitr'i Ahitofela.

⁸ Ka hoy aho hoe: Fantatrao tsara ny rainao sy ireo olony; fa kalaza ireo sady masiaka tahaka ny orsa very anaka any an-tsaha. Ary ny rainao dia lehilahy mpiady ka tsy mba miara-mitoetra amin'ny vahoaka nony alina.

⁹ Indro izy ankehitriny fa miery any an-davabato na any an-toeran-kafa any. Raha manomboka misy voa amintsika, izay mandre ny vaovao dia hanao hoe: Nahafatesana ny olona mpanaraka an'i Absaloma.

¹⁰ Koa na dia izay be herimpo indrindra toy ny liona aza dia hivalaketraka, satria fantatry ny Israelita rehetra fa kalaza ny rainao ary mahery fo ireo tafaraka aminy.

¹¹ Izao ary no mba torohevitro: Vorio eto aminao ny miaramila israelita rehetra, hatrany Dana ka hatrany Beera-Seba ka ho toy ny fasika amoron-dranomasina ny hamaroany; ary ny tenanao mihitsy no hiantafika miaraka aminy.

¹² Ho tonga any amin'izay itoeran'i Davida isika, ka hilatsaka aminy toy ny filatsaky ny ando amin'ny tany; ary tsy hasiantsika miangana na dia iray akory aza izy mbamin'ny olona rehetra tafaraka aminy.

¹³ Fa raha mitsoaka mankamin'ny tanana iray izy, dia hitondran'i Israely manontolo tady mahazaka izany tanana izany, ka hotarihintsika hivarina any amin'ny ranon-driaka mandra-pahafoana azy tsy hisy vato kely iray hita ao intsony.

¹⁴ Ary hoy i Absaloma sy ny lehilahy israelita rehetra hoe: Tsara noho ny torohevitr'i Ahitofela ny an'i Hosay, ilay Arkita! Efa nataon'ny TOMPO manko izay tsy hampahomby ny torohevitr'i Ahitofela, na dia tsara aza, mba hampidirany loza amin'i Absaloma.

¹⁵ Hoy i Hosay tamin'i Tsadoka sy i Abiatara mpisorona: Izany sy izany no torohevitra nomen'i Ahitofela an'i Absaloma sy ireo loholon'i Israely, ary dia izay sy izay kosa ny torohevitra nomeko.

¹⁶ Ankehitriny, maniraha haingana hampandre an'i Davida; lazao izy tsy hijanona amin'ny lemak'i Jordana rahalina fa mita faingana raha tsy te ho ringana na ny tenany na ireo olona rehetra tafaraka aminy.

¹⁷ Dia niandry tao Haina-Rogela i Jonatana sy i Ahimahatsa; ary nisy ankizivavy nilaza tamin'izy roa lahy mba hahafahany kosa mampandre an'i Davida mpanjaka, satria natahotra ny hisy mpahita izy raha miditra ny tanana.

¹⁸ Nefa nisy tovolahy iray nahita azy roa lahy ireo ka nanambara tamin'i Absaloma; fa nandositra faingana izy roa lahy ary tonga tany Bahorima tao an-tranon'ny lehilahy iray, izay nisy lava-pantsakana teo an-tokotaniny. Dia nidina tao ireo.

¹⁹ Naka labasy ny vadin'ilay rangahy tompon-trano ka narakony teo am-bavan'ny lava-pantsakana sy nanahazany voan-javatra mba tsy hanampoizana na inona na inona.

²⁰ Ary niditra tao an-tranon'ilay ramatoa ny mpanompon'i Absaloma ka nanao hoe: Aiza i Ahimahatsa sy i Jonatana? Dia hoy ny navalin'ilay vehivavy taminy: Nita ny rano izy ireo. Rehefa nitady ihany ireto mpanompon'i Absaloma ka tsy nahita, dia niverina nankany Jerosalema.

²¹ Nony lasa ireo, dia niakatra avy tao an-dava-pantsakana izy roa lahy ka lasa nanambara tamin'i Davida mpanjaka ny torohevitra nataon'i Ahitofela hamelezana ny tenany sy ny mpomba azy, ary nilaza hoe: Miainga, ka mita faingana ny rano.

²² Ary lasa i Davida sy ireo mpanaraka azy niampita ny ranon'i Jordana; ka nony maraina ny andro, dia tsy nisy tsy tafita an'i Jordana na dia olona iray aza.

²³ Nony hitan'i Ahitofela fa tsy narahina ny heviny, dia nasiany lasely ny borikiny, ary lasa izy nody tany an-tanana fonenany. Rehefa avy nanafatra ny ankohonany izy, dia nananton-tena ary maty ka nalevina tao amin'ny fasan-drainy.

²⁴ Tonga tao Mahanaima i Davida, raha nita an'i Jordana i Absaloma mbamin'ny miaramila rehetra amin'i Israely.

²⁵ Notendren'i Absaloma ho lehiben'ny tafika hisolo an'i Joaba i Hamasa. Io Hamasa io dia zanakalahin'ilay Israelita atao hoe Jitra, ilay niray tamin'i Abigaila zanakavavin'i Nahasy ary rahavavin'i Tseroia, renin'i Joaba.

²⁶ Nitoby tao amin'ny faritany Gilehada i Absaloma sy ny Israelita.

²⁷ Rehefa tonga tao Mahanaima i Davida, dia indreo tamy i Soby zanakalahin'i Nahasy avy any Raba renivohitry ny Hamonita, sy i Makira zanakalahin'i Hamiela avy any Lo-Debara, ary i Barzilay izay Gilehadita avy any Rogelima.

²⁸ Izy telo lahy ireo dia nitondra ho an'i Davida sy ny olona tafaraka taminy fitaovam-pandriana, lamba volonondry, lovia bakoly sy vilany tany, ary sakafo isan-karazany: varimbazaha, orza, lafarinina, lango, tsaramaso, voanemba,

²⁹ tantely, rononomandry, ary hena ondry sy hena omby; fa hoy izy telo lahy hoe: Matin-kanoanana sy main'ny hetaheta ary sasatry ny dia tany an-taniefitra ireo olona ireo.

Toko faha-18

¹ Nampilaharin'i Davida ny miaramila izay niaraka taminy ka nanendreny mpifehy arivo sy mpifehy zato hibaiko azy.

² Nasain'i Davida hiainga ny tafiny; ka ny ampahatelony nofehezin'i Joaba, ny ampahatelony hafa nofehezin'i Abisay zanakalahin'i Tseroia sady rahalahin'i Joaba, ary ny ampahatelo farany nofehezin'i Itahy izay avy any Gata. Dia hoy ny mpanjaka tamin'ireto miaramila: Izaho koa dia handeha hiaraka aminareo.

³ Fa hoy kosa ny miaramila hoe: Tsy mahazo mandeha ianao. Satria raha mandositra izahay, dia tsy hisy fahavalo hiraharaha akory; ary na dia maty avokoa aza ny antsasakay, dia tsy hahoany. Fa ianao kosa dia toy ny iray alina eo aminay; koa tsaratsara kokoa raha avy aty an-tanana ianao no mandefa famonjena ho anay.

⁴ Ary hoy ny mpanjaka taminy: Izay sitrakareo ihany no hataoko. Dia nitsangana teo am-bavahady ny mpanjaka, raha nivoaka tsizatozato sy tsiarivoarivo ny tafiny manontolo.

⁵ Nandidy an'i Joaba sy Abisay ary Itahy ny mpanjaka hoe: Noho ny amiko, dia aoka ianareo tsy hikasi-tanana ny zatovolahy Absaloma. Ary ny miaramila rehetra dia samy nandre ny nanomezan'ny mpanjaka didy momba an'i Absaloma.

⁶ Nivoaka nankeny an-tsaha ny miaramilan'i Davida hifanehatra amin'ny Israelita hafa ka rafitra tao amin'ny alan'i Efraima ny ady.

⁷ Nilavo lefona teo anatrehan'ny mpanompon'i Davida ny tafik'i Israely. Navesatra loatra ny faharesena tamin'io andro io fa nahatratra 20 000 ny olona maty.

⁸ Nitatra eran'ny firenena ny ady, ka be ny maty tany an'ala tamin'izay noho ny maty an'ady.

⁹ Nifanehatra tampoka tamin'ny miaramilan'i Davida i Absaloma raha iny nitaingina boriky iny izy. Nitsofoka tany an-tsefatsefaky ny rantsan'ny hazo terebinta lehibe ilay ampondra, ka voasaringotry ny terebinta ny lohan'i Absaloma; ary lasa nanohy dia ilay boriky, fa izy kosa nihantona teo anelanelan'ny lanitra sy ny tany.

¹⁰ Nahita azy ny lehilahy iray ka nilaza tamin'i Joaba hoe: Hitako mihantona amin'ny terebinta i Absaloma.