2 Samoela
Toko faha-21
9 Natolotr'i Davida teo an-tanan'ny Gibehonita izy fito lahy ka nahanton'ireo teo an-kavoana iray teo anatrehan'ny TOMPO. Niara-maty avokoa izy fito lahy, satria samy novonoina ho faty tamin'ny fiandohan'ny vaninandro fijinjana orza.10 Naka ny lamba gony fisaonana i Ritsepa zanakavavin'i Aia, ka novelariny teo ambony vatolampy; dia nitoetra teo izy nanomboka tamin'ny fiandoham-pijinjana ka mandra-pilatsaky ny orana avy any an-danitra tamin'ireo faty ireo. Tsy navelany hipetrahan'ny voromanidina teo aminy tamin'ny antoandro; ny bibidia kosa no tsy navelany hankeo tamin'ny alina.
11 Nisy nanambara tamin'i Davida izay nataon'i Ritsepa zanakavavin'i Aia sady vaditsindranon'i Saoly.
12 Koa dia nalain'i Davida ny taolambalon'i Saoly sy i Jonatana zanany tamin'ny mponin'i Jabesa any Gilehada; ireo manko no nangalatra azy tao an-kianjan'i Bety-Seana, toerana nanantonan'ny Filistinina azy tamin'ny andro namonoan'ny Filistinina an'i Saoly tao Gilboa.
13 Dia nentin'i Davida avy tany ny taolambalon'i Saoly sy i Jonatana zanany, ary nangoniny koa ny taolan'ireto fito lahy voahantona.
14 Nalevin'ny olona tany amin'ny tanin'i Benjamina, tao Tsela, tao amin'ny fasan'i Kisy rain'i Saoly ireo taolambalo rehetra ireo; ary vitany avokoa izay nandidian'ny mpanjaka. Rehefa izany, vao nanambina ny tany Andriamanitra.
15 Nipoaka indray ny ady teo amin'ny Filistinina sy ny Israelita. Dia nidina nanafika ny Filistinina i Davida sy ireo miaramila niaraka taminy; ary nahatsiaro reraka i Davida.
16 Koa nihevitra ny hahafaty an'i Davida i Jisby-Benoba isan'ny taranak'i Harafa, izay nanana lohan-defona halimo milanja telo kilao mahery sy fiadiana vaovao.
17 Fa tonga nanampy azy i Abisay zanakalahin'i Tseroia ka namely ary nahafaty an'ilay Filistinina. Tamin'izay ireo olon'i Davida dia nianiana taminy hoe: Tsy hiara-miainga aminay intsony ianao ho amin'ny ady, mba tsy hamono anao ho faty ny fahazavan'i Israely.
18 Rehefa izany dia mbola nisy ady indray tamin'ny Filistinina tao Goba; tamin'izay i Sibekay avy any Hosa no namono ho faty an'i Safa isan'ny taranak'i Harafa.
19 Mbola nisy ady hafa tao Goba, ary tamin'izay i Elehanana zanakalahin'i Jahiry-Oregima sady avy any Betlehema, no namono ho faty an'i Goliata avy any Gata, izay nanana zaran-defona vaventy tahaka ny voditenon'ny mpanenona.
20 Dia mbola nisy ady koa tany Gata; ary tao dia nisy olona raindahiny nanana rantsan-tanana enina sy rantsan-tongotra enina, izany hoe efatra amby roapolo no fitambarany. Ilehio koa dia taranak'i Harafa.
21 Nihaika ny Israelita izy ka matin'i Jonatana zanakalahin'i Simeha izay rahalahin'i Davida.
22 Ireo miaramila filistinina efa-dahy ireo, izay samy taranak'i Harafa sady tao Gata, dia lavo noho ny famelezan'i Davida sy ny miaramilany azy.
Toko faha-22
1 Dia nanao izao tononkira izao ho an'ny TOMPO i Davida tamin'ny andro izay nanafahany azy tamin'ireo fahavalony rehetra, indrindra tamin'i Saoly.2 Ka hoy izy hoe: Ny TOMPO no harambato fierena azo antoka ho ahy.
3 Izy no Andriamanitro sy vatolampy ialofako, ampinga fiarovana sy herim-pandresena ho ahy. Sady toeram-pamaharana fandosirako Izy, no mpamonjy mahafaka ahy amin'ny fampahoriana.
4 Hoderaina anie ny TOMPO! Fa niantso Azy aho, dia voavonjy ho afaka amin'ny fahavaloko.
5 Toy ny onja manototra ahy ny fahafatesana sady nampitahotra ahy toa riaka mandrava;
6 toy ny fatotra ahodidina ahy ny toeran'ny maty, toa harato amandrihana ahy ny fahafatesana.
7 Tao an-katerena aho no velon-taraina sy niantso vonjy tamin'ny TOMPO Andriamanitro, ka tany an-Tempoliny Izy no nandre ny feoko ary koa nihaino izany antsoantsoko.
8 Tamin'izay dia nihovitrovitra mafy ny tany; nikorosy ny fiorenan'ny lanitra, ka nihozongozona ireny fa tezitra ny TOMPO.
9 Nisy setroka nidonaka avy teo an'orony ary afo mandevona avy teo am-bavany, ka narahina tselatra mandoro izany.
10 Dia nandetsy ny lanitra ny TOMPO ka nidina; rahona matevina no teo ambany tongony,
11 ka toy ny kerobima nitaingenany izany; dia nanidina sy nisosa Izy ka teo amin'ny elatry ny rivotra no niseho.
12 Tao anaty raho-mainty Izy no niery ka voahodidina rahona miavosa izay vesaran'ny rano mamonto azy.
13 Manoloana Azy nisy hazavam-be izay niteraka afo mitselatra.
14 Tany an-danitra ny TOMPO Avo Indrindra no nampitalakotroka ny varatra sy nampanakoako izany feony;
15 nalefany ny tselatra ka nipariaka toy ny zana-tsipika nifanaretsaka.
16 Noho ny fandrahonan'ny TOMPO mbamin'ny fifofofofon'ny hatezerany, dia niseho ny fanambanin'ny ranomasimbe, niharihary ny fanorenan'izao tontolo izao.
17 Avy eny an-danitra ambony Izy no naninji-tanana handray ahy sy nisintona ahy hiala tamin-dranobe;
18 ka afaka aho tamin'ny fahavaloko matanjaka, dia tamin'ireo mpandrafy mahery noho izaho.
19 Tamin'ny androm-pahoriako no nanafika ahy ireo nefa tonga ny TOMPO ka nanohana ahy;
20 navoakany ho eo an-kalalahana aho ary nafahany satria tena tiany.
21 Soa no ataon'ny TOMPO ahy satria marina aho; izany no avaliny ahy satria madio ny toetrako,
22 fa voatandriko ny sori-dalan'ny TOMPO ary tsy ivadihako ilay Andriamanitro;
23 ankatoaviko avokoa ny fitsipiny ary tsy mba ialako ireo didiny.
24 koa tsy manan-tsiny aho aminy fa nitandrin-tena tsy ho diso.
25 Eny, soa tokoa no navalin'ny TOMPO ahy satria marina aho sy hitany madio toetra.
26 TOMPO o, mahatoky Ianao amin'izay matoky Anao; tsy manan-tsiny koa Ianao amin'izay tsy manan-tsiny;
27 madio Ianao amin'izay madio, miolakolaka kosa amin'izay mpiolikolika.
28 Ianao mihitsy no mamonjy ny vahoaka ory, fa mampitanondrika an'ireo mpiavonavona.
29 TOMPO o, jiro mirehitra ho ahy Ianao; eny, TOMPO o, Ianao no manazava izany haiziko.
30 Noho Ianao Andriamanitro, na hady aza itsambikinako, na manda aza ihoarako.
31 Lavorary ny sori-dalan'Andriamanitra, azo antoka ny torohevitry ny TOMPO; toy ny ampinga fiarovana Izy ho an'izay rehetra mialoka aminy.
32 Fa iza moa no Andriamanitra afa-tsy ny TOMPO ihany? Ary iza no vatolampy ho anay afa-tsy ilay Andriamanitray?
33 Izy no mpiaro mahery ho ahy sy mampizotra ahy lalana lavorary;
34 Ataony kinga toy ny gazela aho ary ajorony amin'ny toerana avo;
35 Izy no manofana ahy ho amin'ny ady ka ahaizako manenjana tsipika varahina.
36 Ny ampingam-pandresenao no atolotrao ahy, Tompo o; mamaly ny antsoko Ianao ary koa manandratra ahy.