2 Samoela
Toko faha-19
29 Olona mendrika ny ho faty avokoa ny fianakavian-draiko teo anatrehanao, kanefa ianao nandray ahy mpanomponao ho isan'ny mpiray latabatra aminao. Koa zo inona indray no mbola ananako hangatahana tombontsoa hafa aminao?30 Ary hoy ny mpanjaka taminy: Ahoana indray no mbola ilazanao izany? Ambarako fa ianao sy i Tsiba no hifampizara ny tanin'i Saoly.
31 Hoy kosa i Mefiboseta tamin'ny mpanjaka: Aoka ho azy avokoa ny tany rehetra, fa efa tafaverina tsy maty fo aman'aina ihany ianao, ry andriamanjaka.
32 Nidina avy tany Rogelima i Barzilay izay Gilehadita. Niara-nita an'i Jordana tamin'ny mpanjaka izy mba hanao veloma azy ery am-pitan'ny rano.
33 Lahy antitra efa valopolo taona i Barzilay; mpanankarena izy ka nanome sakafo ny mpanjaka izay nisitaka tany Mahanaima.
34 Ary hoy ny mpanjaka tamin'i Barzilay: Andao hanaraka ahy any Jerosalema ianao fa hataoko tsara karakara tokoa.
35 Fa hoy i Barzilay tamin'ny mpanjaka: Firy taona sisa hahavelomako no hiara-miakatra aminao any Jerosalema aho!
36 Efa valopolo taona aho izao; ary tsy ho haiko intsony ny manavaka ny tsara sy ny ratsy, na ny mahatsapa ny tsiron'izay haniko sy sotroiko, na koa ny mankafy ny feon'ny lehilahy sy vehivavy mpihira. Koa nahoana indray izaho mpanomponao no ho enta-mavesatra ho anao, ry andriamanjaka?
37 Zara raha afaka hiampita an'i Jordana miaraka aminao aho; koa nahoana no hanehoanao amiko fankasitrahana toy izany?
38 Aoka aho mpanomponao hody ihany ary aoka aho ho faty ao an-tananako eo anilan'ny fasan'ny raiko sy ny reniko. Fa indro i Kimihama zanako lahy; aoka izy no hiaraka aminao ry andriamanjaka, ary hanaovanao izay sitrakao.
39 Dia hoy ny mpanjaka: Aoka ary hiaraka amiko i Kimihama, ka hanaovako izay sitrakao; ary ny zavatra rehetra hangatahinao amiko, dia hataoko ho anao.
40 Nita an'i Jordana ny vahoaka rehetra, rehefa tafita ny mpanjaka; dia norohan'i Davida sy notsofiny rano i Barzilay, vao lasa nody any amin'ny fonenany.
41 Nandroso nankany Gilgala kosa ny mpanjaka, ary niarahan'i Kimihama. Nanara-dia ny mpanjaka ny Jodeanina rehetra sy ny antsasak'ireo Israelita avaratra.
42 Ary indreo nankeo amin'ny mpanjaka avokoa ny lehilahy israelita, ka nanao taminy hoe: Nahoana ireo lehilahy jodeanina rahalahinay no naka an-keriny anao, ry Davida mpanjaka, mba hitondra ny tenanao sy ny fianakavianao hiampita an'i Jordana, nefa dia tafaraka taminao ny miaramilanao rehetra.
43 Namaly ny lehilahy israelita kosa ny lehilahy jodeanina rehetra ka nanao hoe: Satria havana akaiky aminay ny mpanjaka! Koa ahoana no mahatezitra anareo amin'izany? Mba nihinan-javatra avy tamin'ny mpanjaka va izahay? Na mba nanome zavatra anay akory va izy?
44 Fa hoy indray ny lehilahy israelita tamin'ireo lehilahy jodeanina: Impolo heny amin'ny anareo ny zonay amin'ny mpanjaka; eny, manana anjara mihoatra noho ianareo amin'i Davida izahay. Koa nahoana ianareo no nanao tsinontsinona anay? Tsy izahay va no niteny voalohany hamerina ny mpanjakanay! Fa lozaloza kokoa noho ny tenin'ireo israelita ny an'ireo lehilahy jodeanina.
Toko faha-20
1 Fa nisy olona tena ratsy fanahy teo natao hoe Seba, zanakalahin'i Bikry sady Benjaminita. Nitsoka anjomara izy sady nanao hoe: Tsy manana anjara amin'i Davida isika ary tsy misy zavatra iombonantsika amin'io zanakalahin'i Jisay io! Samia mody any amin'ny fonenany avy, ry Israelita o!2 Ary nandao an'i Davida avokoa ny lehilahy israelita avaratra, ka nanaraka an'i Seba zanakalahin'i Bikry. Fa ny lehilahy jodeanina kosa nifikitra tamin'ny mpanjakany ihany, ka tafaraka taminy hatreo Jordana ka hatrany Jerosalema.
3 Raha vao tonga tao an-tranony tany Jerosalema i Davida mpanjaka, dia naka ireo vaditsindrano folo izay najanony hiandry ny trano, ka nametraka azy tamin'ny trano iray tsara ambina. Nokojakojainy sy novelominy izy ireo saingy tsy niraisany intsony. Nahibony tao mandra-pahafatiny ireo, ka tonga mpitondratena velom-bady.
4 Hoy ny mpanjaka tamin'i Hamasa: Vorio ho eto amiko ato anatin'ny telo andro ny miaramila jodeanina rehetra, ary aoka mba ho eto koa ianao.
5 Dia lasa i Hamasa namory ny tafika jodeanina; nefa dia taran'ny fe-potoana izay nomen'i Davida azy izy.
6 Ka hoy i Davida tamin'i Abisay: Ankehitriny dia efa mampidi-doza antsika mihoatra noho i Absaloma i Seba zanakalahin'i Bikry. Koa ento ny miaramila mpiambina ahy, dia enjeho izy, fandrao mahazo tanana mimanda, ka ho dify ny masontsika.
7 Nivoaka an'i Jerosalema nanaraka an'i Abisay koa ny olon'i Joaba sy ny Keretita ary ny Peletita, izany hoe ny kalaza rehetra, ka nanenjika an'i Seba zanakalahin'i Bikry.
8 Rehefa tonga teo amin'ilay vato lehibe tao Gibehona kosa ireo, dia avy nitsena azy i Hamasa. Tamin'izay ny nanaovan'i Joaba dia ny akanjo miaramila nisy ilay fehikibo nihanton'ny sabatra mbamin'ny tranony; ka nony nandroso izy, dia latsaka ilay sabatra.
9 Ary hoy i Joaba tamin'i Hamasa: Manahoana ianao, ry rahalahy? Noraisin'i Joaba tamin'ny tanany ankavanana ny volombavan'i Hamasa mba horohany.
10 Tsy nahatandrina ny sabatra izay noraisin'ny tanan-kavian'i Joaba anefa i Hamasa; kanjo nasian'i Joaba tamin'ny kibony izy, ka nivaroraka tamin'ny tany ny tsinainy. Ary matin'izany izy, fa tsy nasian'i Joaba fanindroany akory. Dia lasa i Joaba sy i Abisay mirahalahy nanenjika an'i Seba zanakalahin'i Bikry.
11 Nisy miaramilan'i Joaba iray nijanona teo akaikin'ny fatin'i Hamasa ka nanao hoe: Izay mpomba an'i Joaba sy mpiandany amin'i Davida, dia aoka izy hanaraka an'i Joaba!
12 Amin'izany i Hamasa dia nihosin-dra teo afovoan-dalana. Rehefa hitan'ilay miaramila fa nijanona ny olona rehetra, dia nesoriny teo amin'ny lalana ny fatin'i Hamasa ka notarihiny ho any an-tsaha sy norakofany lamba, satria tsikariny fa izay rehetra tonga teo aminy dia nijanona avokoa.
13 Vao nesoriny teo amin'ny lalana izany, dia lasa nanaraka an'i Joaba ny tsirairay mba hanao haza lambo an'i Seba zanakalahin'i Bikry.
14 Notetezin'i Seba avokoa ny fokon'i Israely avaratra, hatrany Abela-Bety-Mahaka; ary ny Berita rehetra dia nivory ka niditra nanaraka azy tao koa.
15 Tonga kosa ry i Joaba nanao fahirano an'i Seba tao Abela-Bety-Mahaka, ary nanangana tovon-tany mitovy haavo amin'ny manda ivelan'ny tanana. Dia nanomboka nandrava ny manda ny tafika manontolo izay niaraka tamin'i Joaba mba handrodana izany.
16 Fa nisy vehivavy hendry niantsoantso avy tao an-tanana nanao hoe: Henoy! Henoy kely e! Mba lazao i Joaba hanatona ety fa te hiresaka aminy aho.
17 Rehefa nanatona an-dravehivavy izy, dia nilazany hoe: Ianao va no Joaba? Ka novaliany hoe: Eny, izaho no izy. Ary hoy indray ravehivavy taminy: Mba henoy teny aho mpanompovavinao. Ka hoy i Joaba: Mihaino anao aho.
18 Dia hoy ravehivavy taminy: Fitenin'ny olona taloha ny hoe: Anontanio ny mponin'i Abela, dia ho vita mora ny raharaha
19 Amiko dia anisan'ny tia fihavanana sy mahatoky indrindra amin'i Israely ny mponina eto; kanefa dia tadiavinao ho ravana ity tanana anisan'ny lehibe amin'i Israely ity. Nahoana no holevoninao ny fananan'ny TOMPO?
20 Namaly kosa i Joaba hoe: Sanatria dia sanatria amiko ny handevona sy handrava na inona na inona.
21 Tsy izany mihitsy, fa misy lehilahy iray avy any amin'ny tendrombohitr'i Efraima, atao hoe Seba zanakalahin'i Bikry izay efa nikomy hamely an'i Davida mpanjaka. Izy ihany no atolory ahy dia hiala amin'ny tanana aho. Dia hoy ravehivavy tamin'i Joaba: Ao ary fa hatsipinay aminao ankoatra ny manda ny lohany.
22 Nikabarian-dravehivavy tamim-pahendrena avokoa ny mpiray tanana, dia notapahina ny lohan'i Seba zanakalahin'i Bikry ka natsipy teny amin'i Joaba. Notsofin'i Joaba ny anjomara, dia tsy nanao fahirano ny tanana intsony ny miaramilany ary samy namonjy ny fonenany avy. I Joaba kosa mbola niverina tany Jerosalema ho eo amin'ny mpanjaka.
23 I Joaba no filohan'ny tafika manontolo tamin'i Israely; i Benaia zanakalahin'i Joiada no lehiben'ny Keretita sy Peletita mpiambina an'i Davida;
24 i Adorama no tonian'ny asam-panompoana; i Josafata zanakalahin'i Ahiloda no mpitahiry ny raki-tsoratra;
25 i Seva no mpitantsoratra; i Tsadoka sy i Abiatara no mpisorona;
26 ary i Hira, ilay Jairita, no mpanolotsain'i Davida.
Toko faha-21
1 Nisy mosary naharitra telo taona misesy tamin'ny andron'i Davida. Nanontany ny TOMPO momba izany i Davida ka novaliany hoe: Avy amin'i Saoly sy ny fianakaviany lian-dra izao, satria i Saoly no namono nahafaty ny Gibehonita.2 Nampiantso ny Gibehonita ny mpanjaka mba hiresahany. Ny Gibehonita moa tsy mba isan'ny Israelita, fa sisa tsy maty tamin'ny Amorita. Efa nianiana taminy manko ny Israelita fa tsy haninona azy; nefa i Saoly, noho ny fitiavany an'i Israely sy i Joda, dia nitady hamongotra azy.
3 Ka hoy i Davida tamin'ny Gibehonita: Inona no hataoko ho anareo! Ahoana no hanonerako ny ratsy izay nihatra taminareo, mba hitsofanareo rano ny vahoakan'ny TOMPO?
4 Dia hoy ny Gibehonita taminy: Tsy vitana volafotsy na volamena, na koa fahafatesan'ny Israelita iray ny adinay amin'i Saoly sy ny fianakaviany. Ka hoy i Davida: Koa lazao ary izay tianareo hataoko, fa hotanterahiko.
5 Dia hoy ireo tamin'ny mpanjaka: I Saoly no nikasa handripaka anay sy hamongotra anay tsy hisy tavela eo amin'ny tanin'i Israely manontolo;
6 ka avelao hisy fito lahy amin'ny taranany hatolotra anay mba hahantonay eo anatrehan'ny TOMPO ao Gibeha tananan'i Saoly ilay mpanjaka voafidin'ny TOMPO. Ka hoy ny mpanjaka: Hatolotro ireo.
7 Notsimbinin'ny mpanjaka manokana i Mefiboseta, zanakalahin'i Jonatana sady zafikelin'i Saoly, noho ny fianianana nataon'i Davida sy i Jonatana tamin'ny anaran'ny TOMPO.
8 Fa nalain'ny mpanjaka i Armony sy i Mefiboseta zanakalahin'i Ritsepa izay zanakavavin'i Aia, ka izy roa lahy ireo dia naterany tamin'i Saoly; ary nalainy koa izy dimy lahy zanak'i Mikala izay zanakavavin'i Saoly, ka ireo dia naterany tamin'i Adriela zanakalahin'i Barzilay avy any Mehola.