2 Samoela

Toko faha-13

²⁰ Ary hoy Absaloma anadahiny taminy: Nanaovan'i Amnona anadahinao an-keriny angaha ianao? Mangina aloha, ranabavy, fa anadahinao izy ary aza malahelo amin'izany. Koa nitoetra irery nalahelo tao an-tranon'i Absaloma anadahiny i Tamara.

²¹ Rehefa ren'i Davida mpanjaka izany, dia tezitra mafy izy; kanefa tsy nomeny tsiny i Amnona satria lahimatoany sady tiany loatra.

²² Ary tsy nifampiteny intsony tamin'i Amnona i Absaloma, satria halan'i Absaloma izy noho ny nanaovany an-keriny an'i Tamara anabaviny.

²³ Roa taona taorian'izany, dia nampanety ondry tao Bahala-Hatsora akaikin'i Efraima i Absaloma. Nasain'i Absaloma avokoa ny zanakalahin'ny mpanjaka.

²⁴ Nankao amin'ny mpanjaka i Absaloma ka nanao hoe: Indro hampanety ondry aho, ry mpanjaka; koa mba tongava any amiko ny tenanao sy ireo minisitrao.

²⁵ Fa hoy ny mpanjaka tamin'i Absaloma: Tsia, anaka, aoka tsy handeha avokoa izahay sao dia hanahirana anao. Nikiry ihany i Absaloma, nefa tsy nety nandeha ny mpanjaka fa nitsodrano azy fotsiny.

²⁶ Dia hoy i Absaloma: Raha tsy mety kosa ary ianao, dia aoka i Amnona rahalahiko no handeha hiaraka aminay. Ary hoy ny mpanjaka taminy: Fa ahoana izy no handeha hiaraka aminao?

²⁷ Mbola nikiry hatrany i Absaloma, ka farany navelan'ny mpanjaka handeha hiaraka aminy ihany i Amnona sy ireo zanakalahiny hafa rehetra. Dia nanomana fanasana tahaka ny fanasa-mpanjaka i Absaloma.

²⁸ Izao kosa no baiko nomeny an'ireo mpanompony: Jereo tsara, fa rehefa falin-divay ny fon'i Amnona ka milaza aminareo aho hoe: Asio i Amnona!, dia vonoy ho faty izy. Aza matahotra. Moa tsy izaho va no nanome baiko anareo? Koa sahia ary misehoa ho mahery fo!

²⁹ Dia notanterahin'ny mpanompon'i Absaloma tamin'i Amnona araka izay baikon'i Absaloma izany. Dia nitsangana avokoa ny zanakalahin'ny mpanjaka hafa ka samy nitaingina ny borikiny ary nandositra.

³⁰ Fa raha mbola teny an-dalana izy ireo, dia efa ren'i Davida ny vaovao hoe: Novonoin'i Absaloma ho faty avokoa ny zanakalahinao, ka tsy nisy niangana na dia iray aza.

³¹ Dia nitsangana ny mpanjaka ka nandriatra ny akanjony ary nandry tamin'ny tany. Nijoro teo koa ny minisitra rehetra, samy rovitra akanjo avokoa.

³² Fa i Jonadaba zanakalahin'i Simeha izay rahalahin'i Davida kosa nandray fitenenana ka nanao hoe: Aoka ianao, ry andriamanjaka, tsy hihevitra fa maty avokoa ny tovolahy rehetra zanakao. Tsia, i Amnona ihany no maty; ary izany dia fanapahan-kevitr'i Absaloma hatramin'ny andro nanaovan'i Amnona an-keriny an'i Tamara anabaviny.

³³ Koa aoka ianao, ry andriamanjaka, tsy hieritreritra fa maty avokoa ny zanakalahinao; tsia, i Amnona ihany no maty,

³⁴ ary nandositra i Absaloma. Fa raha niandrandra ny mpanompo izay nasaina niambina, dia nahita andian'olona marobe nidina ny tendrombohitra tamin'ny lalan'i Horonaima. Dia nankany amin'ny mpanjaka ilehio ka nitantara izay zavatra hitany.

³⁵ Hoy i Jonadaba tamin'ny mpanjaka: Indreo tokoa, araka izay efa voalazako taminao, fa tonga ireo zanakalahinao.

³⁶ Vao tapitra ny teniny, dia indreo tonga ny zanakalahin'ny mpanjaka samy nigogogogo nitomany; ary mba nanao ranomaso havozona koa ny mpanjaka sy ny minisitra rehetra.

³⁷ I Absaloma dia nandositra nankany amin'i Talmay zanakalahin'i Hamihoda sady mpanjakan'i Gesora ka nijanona tany telo taona. Nisaona an-janany hatrany kosa i Davida nandritra izany fotoana izany.

³⁹ Ary natsahatr'i Davida mpanjaka ny fanenjehany an'i Absaloma fa efa nionona ny alahelony tamin'ny nahafatesan'i Amnona.

Toko faha-14

¹ Tsapan'i Joaba zanakalahin'i Tseroia fa tezitra tamin'i Absaloma ny fon'ny mpanjaka.

² Nampiantso vehivavy fetsy iray avy any Tekoa i Joaba ka nilazany hoe: Manaova sari-misaona ianao ka mitafia akanjo fisaonana; aza mihosotra ilomanitra, fa manaova toy ny vehivavy efa ela nisaonana olona maty iray.

³ Mankanesa any amin'ny mpanjaka, ka lazao aminy araka izao. Dia nambaran'i Joaba taminy izay teny hoteneniny.

⁴ Rehefa niteny tamin'ny mpanjaka ary ilay vehivavy avy any Tekoa, dia niankohoka tamin'ny tany ho fanajana azy ary nanao hoe: Mba vonjeo aho, ry mpanjaka o!

⁵ Ary hoy ny mpanjaka taminy: Fa maninona ianao? Ka novaliany hoe: Indrisy mpitondratena aho fa maty ny vadiko.

⁶ Nanan-janaka roa lahy aho; niady tany an-tsaha izy ireo ka maty ilay iray satria tsy nisy nampisaraka.

⁷ Nitsangana hanohitra ahy ny fianakaviana manontolo ka nanao tamiko hoe: Atolory anay ilay mpamono ny rahalahiny, fa hataonay maty koa izy satria nahafaty ny rahalahiny, ka dia hovonoinay ho faty koa ny mpandova. Araka izany dia tian'izy ireo hofongorana ilay tapa-porohana sisa ato amiko mba tsy hahafahany hamelo-maso ny anaran-drainy eto an-tany.

⁸ Ary hoy ny mpanjaka tamin-dravehivavy: Modia fa hanome baiko hitsinjovana anao aho.

⁹ Hoy kosa ilay vehivavy avy any Tekoa taminy: Ry andriamanjaka o, aoka ho ahy sy ho an'ny fianakavian-draiko ny fahadisoana fa tsy manan-tsiny akory ianao sy ny sezafiandriananao.

¹⁰ Dia hoy ny mpanjaka hoe: Raha mbola misy olona miteny anao, dia ento aty amiko, fa tsy hamerina izany intsony aminao izy.

¹¹ Hoy ihany ravehivavy taminy: Ry andriamanjaka o, mangataha amin'ny TOMPO Andriamanitrao mba tsy hampian'ny mpamaly faty intsony ny fandripahana, fandrao matiny ny zanako. Ka novalian'ny mpanjaka hoe: Velona ny TOMPO ka mianiana aminao aho fa tsy hisy hanohintohina na dia ny singam-bolon'ny zanakao aza.

¹² Dia hoy indray ravehivavy taminy: Ry andriamanjaka o, mamela ahy mbola hiteny kely indraim-bava aminao. Ary hoy izy hoe: Ento ny teninao.

¹³ Ka hoy ravehivavy taminy: Nahoana ianao no nisaina zavatra toy izany tamin'ny vahoakan'Andriamanitra? Fa araka izay voalazanao teo, dia manameloka ny tenanao ianao satria tsy nampody ilay noroahinao.

¹⁴ Eny, tsy maintsy ho faty isika rehetra, ka ho tahaka ny rano raraka an-tany tsy azo raofina intsony. Saingy tsy mbola izany no irin'Andriamanitra ho an'i Absaloma izao; ny heveriny kosa dia mba tsy ho lavitra Azy ilay voaroaka.

¹⁵ Koa raha tonga hilaza izany rehetra izany aminao aho, ry andriamanjaka, dia satria nisy olona nampitahotra ahy; kanefa hoy aho anakampoko hoe: Hiteny amin'ny mpanjaka aho, fa angamba hanao izay holazaiko ihany izy;

¹⁶ dia hoekeny ny hamonjy ahy ho afaka amin'ny tanan'ny lehilahy izay te hamongotra ahy sy ny zanako tsy ho anisan'ilay vahoaka fananan'Andriamanitra.

¹⁷ Ary hoy koa aho anakampoko hoe: Hampitony anie ny tenin'ny andriamanjaka. Fa tahaka ny anjelin'Andriamanitra izy ka mahalala ny tsara sy ny ratsy. Hiaraka aminao anie ny TOMPO Andriamanitrao.

¹⁸ Ary hoy ny mpanjaka namaly an-dravehivavy: Aza misy afenina ahy izay zavatra hanontaniako anao. Dia hoy ravehivavy hoe: Aoka ianao hiteny, ry andriamanjaka.

¹⁹ Ary hoy ny mpanjaka nanontany azy: Moa i Joaba va no nampirisika anao tamin'izany rehetra izany? Dia hoy ny navalin-dravehivavy hoe: Veloma ny ainao, ry andriamanjaka, fa marina tsy azo iolakolahana izay rehetra voalazanao. Eny, i Joaba mpanomponao no nandidy sy nampiteny ahy izay hoteneniko.

²⁰ Hampivadika ny toe-draharaha no nanaovan'i Joaba mpanomponao izany zavatra izany. Fa hendry toy ny anjelin'Andriamanitra ianao, tompoko, ka mahafantatra izay rehetra miseho eto ambonin'ny tany.

²¹ Ary hoy ny mpanjaka tamin'i Joaba: Indro efa narahiko ny torohevitrao; koa ndeha alao i Absaloma zatovolahy ka ampodio eto.

²² Niankohoka hatreo amin'ny tany i Joaba ka nisaotsaotra ny mpanjaka nanao hoe: Fantatro izao fa nahita fitia teo imasonao aho, ry andriamanjaka, tamin'ny nanarahanao ny torohevitro.

²³ Dia niarina i Joaba ka nankany Gesora, ary nitondra an'i Absaloma hody any Jerosalema.

²⁴ Fa hoy ny mpanjaka hoe: Aoka hody any an-tranony izy, ary aoka tsy hahita ny tavako! Koa nody tany aminy i Absaloma ary tsy mba nahita tava ny mpanjaka.

²⁵ Tamin'i Israely manontolo dia tsy nisy lehilahy tsara tarehy sy nodokafana fatratra tahaka an'i Absaloma; fa hatrany am-paladiany ka hatrany an-tampon-dohany dia tsy nisy tsiny izy.

²⁶ Isaky ny mifarana ny taona dia hetezany ny volon-dohany satria mavesatra loatra aminy. Koa rehefa lanjainy izany dia mahatratra roa kilao araka ny fandanjan'ny mpanjaka.

²⁷ Nanan-janakalahy telo sy zanakavavy iray natao hoe i Tamara i Absaloma. Tsara tarehy aoka izany ilay zazavavy.

²⁸ Nipetraka roa taona tao Jerosalema tsy nahita tava ny mpanjaka i Absaloma.

²⁹ Nampiantso an'i Joaba i Absaloma mba halefany any amin'ny mpanjaka, fa tsy nety nankany aminy izy. Mbola naniraka azy fanindroany i Absaloma fa tsy nety ihany izy.

³⁰ Koa hoy i Absaloma tamin'ny mpanompony: Hitanareo ilay sahan'i Joaba mifanakaiky amin'ny ahy, ary misy orza! Mandehana doroy. Dia nodoran'ny mpanompon'i Absaloma ny saha.

³¹ Niainga i Joaba ka nankany an-tranon'i Absaloma ary nanao taminy hoe: Fa nahoana no nodoran'ny mpanomponao ny sahako?