2 Samoela

Toko voalohany

¹² Mandra-paharivan'ny andro izy ireo dia nitomany sy nifady hanina ary nisaona an'i Saoly sy i Jonatana zanany mbamin'ny Israelita izay maty an'ady ka anisan'ny vahoakan'ny TOMPO.

¹³ Ary hoy i Davida tamin'ilay zatovo mpilaza vaovao: Fa mba iza moa ianao? Ka novaliany hoe: Zanaky ny Hamalekita mpifindra monina aho, tompoko.

¹⁴ Dia hoy i Davida taminy: Ahoana no nahasahianao naninji-tanana ka nahafaty ny mpanjaka voafidin'ny TOMPO?

¹⁵ Ary niantso ny mpanompony anankiray i Davida ka nibaiko azy hoe: Mandehana vonoy any ilehio! Dia nasiany izy ka maty.

¹⁶ Ary hoy i Davida taminy: Nandrora mitsilany ianao izao ka nahavoa tena. Ny vavanao ihany no nanameloka anao ho faty raha nanao hoe: Izaho no namono ho faty ny mpanjaka voafidin'ny TOMPO.

¹⁷ Namorona izao hira fisaonana an'i Saoly sy i Jonatana zanany izao i Davida,

¹⁸ ka nasainy nampianarina ny mponin'i Joda. Indro ny Hira fisaonana atao hoe Tsipika araka ny voasoratra ao amin'ny Bokin'ilay Marina.

¹⁹ Ry Israely o, ireo mpiady reharehanao dia mitsitra eny an-tampon-kavoanao. Indrisy fa maty ireo mahery fo!

²⁰ Aza aely any Gata izany vaovao izany na torina eny an-dalamben'i Askelona, fandrao hifalian'ny vehivavin'ny Filistinina na hibitahan'ny tovovavin'ny mpanompo sampy.

²¹ Ianareo tendrombohitr'i Gilboa, aza misy ando na orana intsony eo aminareo na koa saha be vokatra hangalam-panatitra, satria teo no nahafa-baraka ny ampingan'ny mahery fo, dia ny ampingan'i Saoly tsy hihoso-diloilo intsony.

²² Teo anoloan'ny ran'ireo Filistinina nitsitra, ny tsipikan'i Jonatana tsy mba nihemotra; teo anoloan'ny hatomadin'ireo fahavalo mahery fo, ny sabatr'i Saoly tsy niveri-maina.

²³ I Saoly sy i Jonatana dia nifankatia tokoa fahavelony, ary tsy nosarahina na dia tamin'ny nahafatesany aza; mailaka noho ny voromahery izy mianaka ary mahery fo mihoatra noho ny liona.

²⁴ Ianareo vehivavy israelita, mitomania an'i Saoly izay nampitafy jaky kanto anareo sady nandravaka volamena ny fitafianareo.

²⁵ Indrisy fa maty an'ady ireo maherifo ary i Jonatana mitsitra eny an-tampon-kavoanao!

²⁶ Malahelo anao aho, ry Jonatana rahalahiko; eny, nankamamiko fatratra ianao. Mahatalanjona ahy ny fitiavanao, fa sarobidy noho ny fitiavan'ny vehivavy.

²⁷ Indrisy fa maty ireo maherifo, ary very ny fitaovam-piadianay

Toko faha-2

¹ Taorian'izany dia nanontany ny TOMPO i Davida hoe: Handeha ho any amin'ny tanana iray any Joda ve aho? Ka novalian'ny TOMPO hoe: Eny, mandehana! Dia hoy indray i Davida: Aiza no handehanako? Ka hoy ny TOMPO hoe: Any Hebrona.

² Dia nankany i Davida niaraka tamin'ny vadiny roa, dia i Ahinohama avy any Jizrehela sy i Abigaila vady navelan'i Nabala avy any Karmela.

³ Nentin'i Davida koa ireo namany nombam-pianakaviany avy, ka nonina tao amin'ireo tanana kely akaikin'i Hebrona izy rehetra.

⁴ Ary tonga tao ny vahoakan'i Joda, ka nanosotra an'i Davida ho mpanjakan'i Joda. Nisy nanambara tamin'i Davida fa ny mponin'i Jabesa any Gilehada no nandevina an'i Saoly;

⁵ dia nandefa iraka hankany amin'ny mponin'i Jabesa izy hilaza hoe: Hitahy anareo anie ny TOMPO noho izao mari-pitiavana nasehonareo tamin'ny nandevenanareo an'i Saoly tomponareo izao.

⁶ Ka ny TOMPO anie haneho fitiavana sy toetra mahatoky aminareo; ary izaho koa dia hamaly soa anareo noho ny nanaovanareo izany zavatra izany.

⁷ Ary ankehitriny, mahereza sy matanjaha; fa efa maty i Saoly tomponareo, ka izaho no natokan'ny vahoakan'i Joda ho mpanjaka eo aminy.

⁸ Fa nentin'i Abinera zanakalahin'i Nera sady lehiben'ny tafik'i Saoly nankany Mahanaima i Isboseta zanakalahin'i Saoly,

⁹ ka nataony mpanjaka tamin'ny faritr'i Gilehada sy ny Asorita mbamin'i Jizrehela sy i Efraima sy i Benjamina ary i Israely manontolo.

¹⁰ Efapolo taona i Isboseta zanakalahin'i Saoly raha nanjaka tamin'i Israely, ary roa taona no nanjakany. Ny fokon'i Joda ihany no nanaiky an'i Davida.

¹¹ Fito taona sy tapany no nanjakan'i Davida tamin'ny fokon'i Joda tao Hebrona.

¹² Niala tao Mahanaima i Abinera zanakalahin'i Nera sy ny mpanompon'i Isboseta zanakalahin'i Saoly ka nankany Gibehona.

¹³ Dia niainga koa i Joaba zanakalahin'i Tseroia sy ny mpanompon'i Davida; ka tafahoana teo akaikin'ny dobo tao Gibehona ny roa tonta ary samy naka toerana nifanatrika teo amoron'ny dobo.

¹⁴ Ary hoy i Abinera tamin'i Joaba: Aoka hitsangana ireo zatovontsika mba hifampitsapa hery eto anatrehantsika. Dia novalian'i Joaba hoe: Aoka ary izy hitsangana.

¹⁵ Dia nisy nitsangana ireo ary niroso hoisaina, ka 12 lahy tamin'i Benjamina mpomba an'i Isboseta zanakalahin'i Saoly ary 12 lahy koa tamin'ny mpanompon'i Davida.

¹⁶ Samy nifampihazon-doha avy ny mpifaninana sady nifanindron-tehezana tamin'ny sabatra ka dia samy niara-davo. Izany no nanaovana io toerana ao Gibehona io hoe Sahan-tsaba-maranitra.

¹⁷ Nafotaka tokoa ny ady tamin'io andro io. Nilavo lefona teo anoloan'ny mpanompon'i Davida i Abinera sy ny olon'i Israely.

¹⁸ Nanatrika teo koa ny zanak'i Tseroia telo lahy dia i Joaba sy i Abisay ary i Asahela; ity Asahela ity dia fangaim-pandeha toy ny gazela any an-taniefitra,

¹⁹ ka nanenjika an'i Abinera sady tsy nivilivily mihitsy na tamin'ny ankavia na tamin'ny ankavanana.

²⁰ Niherika kosa i Abinera ka nanontany azy hoe: Ianao ve io, ry Asahela? Dia hoy ny navaliny: Eny, izaho ihany ity.

²¹ Ary hoy i Abinera taminy: Aza manenjika ahy ianao, fa mivilia amin'ny ankavanana na amin'ny ankavia ka sambory ny iray amin'ireo tovolahy ary alaivo ho anao izay fitaovana eny aminy. Tsy nety nivily anefa i Asahela fa nanenjika azy ihany.

²² Ka hoy indray i Abinera tamin'i Asahela: Mivilia ianao fa aza manenjika ahy intsony, fandrao dia hatrosiko amin'ny tany ho faty! Kanefa hataoko ahoana ny hahajery an'i Joaba rahalahinao?

²³ Mbola tsy nety nivily ihany anefa i Asahela, koa dia nasian'i Abinera tamin'ny vody lefona ny kibony ka tafagorobaka tany an-damosiny. Nitrosina tamin'ny tany izy ary maty tsy tra-drano teo. Izay rehetra tonga teo amin'ny toerana nahafatesan'i Asahela dia nijanona avokoa.

²⁴ Fa i Joaba sy i Abisay nanenjika an'i Abinera. Maty masoandro izy ireo raha tonga tao Gibeha-Ama izay eo atsinanan'i Giha amin'ny lalan'ny taniefitr'i Gibehona.

²⁵ Niangona ho antoko iray teo amin'i Abinera ny miaramilan'i Benjamina ka nijanona teo an-tampon-kavoana iray.

²⁶ Ary niantso mafy an'i Joaba i Abinera hoe: Handripaka tsy hisy farany ve ny sabatra? Tsy mba fantatrao ve fa hampalahelo ny ho vokatr'izany? Koa mandra-pahoviana no hilazanao ny olonao hampitsahatra izao fanenjehana ifamonoan'ny mpirahalahy izao?

²⁷ Dia hoy i Joaba: Velona Andriamanitra ka manizingizina aho fa raha tsy noho ny teninao dia tsy ho nampitsahatra izao fifamonoan'ny mpirahalahy izao akory ny oloko alohan'ny rahampitso maraina.

²⁸ Dia notsofin'i Joaba ny anjomara, ka nijanona tsy nanenjika ny Israelita intsony ny miaramilany rehetra; ary nitsahatra ny ady.

²⁹ Nandritra ny alina dia nitety ny lemak'i Araba i Abinera sy ny olony ka nita an'i Jordana, namaky an'i Bitrona iray manontolo ary tonga tao Mahanaima.

³⁰ Rehefa nijanona tsy nanenjika an'i Abinera i Joaba, dia namory ny tafiny manontolo; koa tamin'ireo mpanompon'i Davida, dia miaramila 19 sy Asahela ihany no tsy teo.

³¹ Fa ny mpanompon'i Davida kosa nahafaty 360 lahy tamin'ny Benjaminita sy miaramila hafan'i Abinera.

³² Nentina ny fatin'i Asahela ka nalevina tao amin'ny fasan-drainy tao Betlehema. Ary i Joaba sy ny olony nanao lava alina, dia tonga tany Hebrona tamin'ny mazava ratsy.

Toko faha-3

¹ Naharitra ela ny adin'ny mpomba an'i Saoly sy ny mpomba an'i Davida. Nihanahery hatrany anefa i Davida fa tsy nitsaha-nikorosy kosa ny taranak'i Saoly.

² Zanakalahy maro no naterak'i Davida tao Hebrona. Ny voalohany tamin'izany dia i Amnona zanany tamin'i Ahinohama avy any Jizrehela; 3 ny faharoa dia i Kilaba tamin'i Abigaila vadin'i Nabala avy any Karmela; ny fahatelo dia i Absaloma zanakalahin'i Maheka zanakavavin'i Talmay, mpanjakan'i Gesora;