Deoterônômy
Toko faha-12
21 Raha lavitra anareo loatra ny toerana hofidin'ny TOMPO Andriamanitrareo hipetrahan'ny voninahiny, dia azonareo amonoana ny omby sy ondry aman'osy nomen'ny TOMPO anareo, araka izay efa nandidiako anareo, ary hohaninareo ao an-tanananareo araka izay tianareo izany.22 Eny, tahaka ny ahazoana mihinana gazela sy ombimanga no hahazoanareo mihinana amin'izany; na ny olona maloto ara-pivavahana na madio, dia samy mahazo mihinana azy.
23 Kanefa tandremo mafy mba tsy hohaninareo ny ran'ilay biby, fa ny ra no aina; ary tsy azonareo hanina ny aina amin'ny tena.
24 Aza haninareo ny rany fa araraho amin'ny tany toy ny rano.
25 Eny, aza haninareo izany mba ho sambatra ianareo sy ny taranaka amam-paranareo, satria izay mahitsy eo imason'ny TOMPO no hataonareo.
26 Kanefa ny zava-masinareo sy ny zavatra nataonareo voady dia ento mankany amin'ny toerana hofidin'ny TOMPO.
27 Raha sorona dorana manontolo izany, dia atolory eo amin'ny alitaran'ilay TOMPO Andriamanitrareo ny henany sy ny rany; raha sorom-pihavanana kosa izany, dia araraho eo amin'ny alitaran'ilay TOMPO Andriamanitrareo ny rany, fa ny henany hohaninareo.
28 Henoy sy tandremo ireo didy rehetra izay ampitaiko aminareo ireo, mba ho sambatra lalandava ianareo sy ny taranaka amam-paranareo, satria izay tsara sy mahitsy eo imason'ny TOMPO Andriamanitrareo no hotanterahinareo.
29 Rahatrizay ny TOMPO Andriamanitrareo dia handringana eo anoloanareo ireny firenena natao horesenareo any amin'ny tany izay hidiranareo ireny; handresy azy ianareo ary honina eo amin'ny taniny.
30 Rehefa voaringana eo anoloanareo ireny, dia mitandrema fandrao ho voafandrika hanaraka ny fanaony ianareo; mitandrema fandrao hamotopototra ny amin'ny andriamaniny ianareo sy hanontany izay fomba nanompoany azy mba hanaovanareo toy izany koa.
31 Aza anaovanareo fomba toy izany ilay TOMPO Andriamanitrareo, satria zavatra mahatsiravina sy halan'ny TOMPO no nataon-dry zareo tamin'ny andriamaniny fa hatramin'ny zanany lahy sy vavy aza dia nodorany forehitra tao anaty afo hanajana ny andriamaniny!
Toko faha-13
1 Imasoy hotanterahina avokoa ny didy izay ampitaiko aminareo ka aza anampiana izany ary aza anesorana.2 Mety hisy mpaminany na mpahita mipoitra eo anivonareo ka hilaza famantarana na zava-mahagaga aminareo.
3 Na dia tanteraka aza ny famantarana na zava-mahagaga nolazainy taminareo, kanefa avy eo izy manainga anareo hanaraka sy hanompo andriamani-kafa saingy andriamanitra tsy fantatrareo,
4 dia aza henoinareo ny tenin'izany mpaminany na mpanonofy izany. Mizaha toetra anareo manko ny TOMPO Andriamanitrareo hahalalany raha tia Azy TOMPO Andriamanitra amin'ny fonareo manontolo sy amin'ny fanahinareo manontolo ianareo.
5 Ilay TOMPO Andriamanitrareo no harahinareo sy hohajainareo; ny didiny no hotandremanareo, ny feony no hohenoinareo, ary aoka Izy no hotompoinareo sy hifikiranareo.
6 Izany mpaminany na mpahita izany kosa ataovy maty, satria efa nanao teny mampikomy anareo amin'ny TOMPO Andriamanitrareo. Izy TOMPO no efa nitondra anareo hiala tany Ejipta ka nanavotra anareo tamin'ny toera-nanandevozana anareo. Ataovy maty izany olona izany satria mitaona anareo hiala amin'ny sori-dalana izay nasain'ny TOMPO Andriamanitrareo hizoranareo. Dia izany no hanesoranareo ny fanao ratsy ho fongotra eo anivonareo.
7 Mety misy aminareo hotaomin'ny mpiray tampo na zanaka na vady na sakaiza tsy foy, ka hataony hoe: Andeha isika hanompo andriamani-kafa! Tsy fantatrareo na ny razambenareo ireny andriamani-kafa ireny,
8 dia ny andriamanitry ny firenena manodidina anareo, na ny akaiky na ny lavitra, manomboka amin'ny faravodilanitra ankilany ka miafara amin'ny faravodilanitra andaniny.
9 Koa aza manaiky na mihaino ny havana aman-tsakaiza toy ireny ianareo. Ary aza mba angorahana izy na amindrana fo na arovana,
10 fa vonoy ho faty mihitsy; ny tanan'izay olona notaominy no hiainga voalohany hamely torabato azy, vao ny tanan'ny vahoaka rehetra.
11 Torahy vato izy ho faty, satria efa nitady hitaona anareo hiala amin'ny TOMPO Andriamanitrareo, Izay namoaka anareo tany Ejipta toera-nanandevozana anareo.
12 Ary handre izany ny Israelita rehetra, dia hatahotra ka tsy hanao ratsy toy izany intsony.
13 Mety anankiray amin'ny tanana nomen'ny TOMPO Andriamanitrareo honenanareo, no holazaina hoe:
14 Nisy olona tena ratsy fanahy mpiray firenena aminareo ka nahataona ny mponina tao an-tananany hanompo andriamani-kafa!. Tsy fantatrareo ireny andriamani-kafa ireny; ka raha misy filazana toy izany,
15 dia dinihonareo sy anontanio ary fotory tsara. Raha nisy marina ka natao teo anivonareo izany zavatra mahatsiravina izany,
16 dia asio amin'ny sabatra ho faty ny mponina sy ny biby fiompy amin'io tanana io ka ataovy levona tanteraka ny tanana sy izay rehetra eo aminy:
17 angony eo afovoan'ny kianja ny entana rehetra voababo, ka dory avokoa na ny tanana sy ireo entana ireo mba hafoy ho an'ny TOMPO Andriamanitra; dia ho tanana aolo lalandava izany tanana izany ka tsy haorina intsony.
18 Aoka tsy hisy hataon'ny tananao fihi-mamba ny zavatra efa nafoy holevonina, mba hitsaharan'ny TOMPO amin'ny fahatezerany mirehitra; dia hamindrany fo tokoa ianareo ary hohamaroiny araka ny nampanantenainy ombam-pianianana tamin'ny razambenareo,
19 raha hohenoinareo ny feon'ny TOMPO Andriamanitrareo ka hotandremanareo ny didy rehetra izay ampitaiko aminareo mba hanatanterahana izay mahitsy eo imasony.
Toko faha-14
1 Zanak'ilay TOMPO Andriamanitrareo ianareo, koa aza mitetika ny tenanareo na manaratra ny volon-doha eo ambonin'ny handrinareo noho ny amin'ny maty.2 Ianareo manko dia vahoaka voatokana ho an'ny TOMPO Andriamanitrareo; ianareo no efa nofidiny tamin'ny firenena rehetra ambonin'ny tany mba ho vahoaka fananany sarobidy indrindra.
3 Aza mihinan-javatra maloto na inona na inona.
4 Izao no biby ho fihinanareo: ny omby, ny ondry aman'osy,
5 ny diera, ny gazela, ny kapreola, ny osidia, ny ombimanga, ny antilopa ary ny ropikapra;
6 izany hoe ny biby rehetra mivaky kitro sady mandinika.
7 Kanefa ny biby mandinika fotsiny na mivaky kitro fotsiny dia tsy hohaninareo, fa maloto aminareo ireny, ohatra: ny rameva sy ny bitro ary ny hiraka, satria mandinika ihany ireo saingy tsy mba mivaky kitro;
8 ary ny kisoa koa, satria mivaky kitro ihany izy saingy tsy mba mandinika. Koa aza haninareo ny henan'ireo biby ireo ary aza kasihinareo akory ny fatiny.
9 Amin'ny biby rehetra ao anaty rano dia izao no ho fihinanareo: ny biby rehetra misy vombony sy kirany.
10 Tsy ho fihinanareo kosa izay tsy misy vombony na kirany, fa ho maloto aminareo.
11 Ny vorona madio rehetra dia ho fihinanareo.
12 Kanefa ireto kosa no vorona tsy fihinanareo: ny voromahery sy ankoay isan-karazany;
13 ny fanindry sy papango isan-karazany;
14 ny goaika isan-karazany;
15 ny vorombe, ny tararaka, ny vorondriaka, ny hitsikitsika isan-karazany,
16 ny vorondolo, ny vorondolobe, ny gisabe,
17 ny sama, ny arosy, ny manarana,
18 ny takatra, ny vano isan-karazany, ny takodara ary ny ramanavy.
19 Ny bibikely rehetra manana elatra dia ho maloto aminareo ka tsy ho fihinanareo,
20 afa-tsy ny bibikely manana elatra saingy madio.