Deoterônômy

Toko faha-19

⁷ Koa izany no andidiako anareo hoe: Manokana tanana telo ho fialofanareo!.

⁸ Raha imasoanareo hotanterahina manontolo izao didy ampitaiko aminareo anio izao ka hotiavinareo ny TOMPO Andriamanitrareo ary hizoranareo mandrakariva ny sori-dalany, dia hitarin'ny TOMPO Andriamanitrareo ny faritaninareo, araka izay nampanantenainy ombam-pianianana tamin'ny razambenareo. Ary amin'izay, dia hampianareo tanana fialofana telo indray iretsy telo iretsy.

¹⁰ Izany no tsy hisian'ny famonoana olona tsy manan-tsiny eo amin'ny tany izay omen'ny TOMPO Andriamanitrareo ho fanananareo; ka tsy ho meloka amin'ny famonoana olona tsy manan-tsiny ianareo.

¹¹ Fa mety misy olona mankahala ny namany ka manotrika hamely azy, dia miantoraka aminy sy mamono mahafaty azy, ary avy eo mandositra ho ao amin'ny anankiray amin'ireo tanana fialofana ireo.

¹² Amin'izay kosa ny loholona amin'ny tanana fiaviany dia haniraka haka azy ao ary hanolotra azy eo an-tanan'ny mpamaly faty mba hovonoiny ho faty;

¹³ tsy hangorahanareo izy. Izany no hanesoranareo amin'i Israely ny famonoana olona tsy manan-tsiny ary izany koa no hahitanareo soa.

¹⁴ Ao amin'ny tany izay omen'ny TOMPO Andriamanitrareo ho fanananareo, dia aza mamindra ny orim-bato mamaritra ny tanin'ny namanareo, orim-bato izay efa vitan'ny razana tamin'ny zaratany azonareo.

¹⁵ Raha vavolombelona iray monja, dia aoka tsy hitsangana hiampanga olona ny amin'izay heloka na ota nataony na inona na inona; fa amin'ny tenin'ny vavolombelona roa na telo no hitombenan'ny raharaha.

¹⁶ Raha misy vavolombelona mijoro hanendrikendrika olona ho nanao ratsy,

¹⁷ dia hankeo anoloan'ny Toeramasin'ny TOMPO izy roa lahy miady ka hiseho eo anatrehan'ireo mpisorona sy ireo mpitsara tompon'anjara amin'izany andro izany.

¹⁸ Ary hanao famotorana lalina ny mpitsara; ka raha hitany fa vavolombelona mandainga ilay vavolombelona noho izy miampanga lainga ny namany,

¹⁹ dia araka izay nokasainy hatao amin'io namany io no hataonareo aminy. Izany no hanesoranareo ny fanao ratsy ho fongotra eo anivonareo.

²⁰ Ary handre izany ny olona hafa rehetra, dia hatahotra ka tsy hanao ratsy toy izany intsony.

²¹ Tsy hangorahanareo akory ilay mpanendrikendrika; fa aina no hataonareo solon'ny aina, maso no solon'ny maso, nify no solon'ny nify, tanana no solon'ny tanana, tongotra no solon'ny tongotra.

Toko faha-20

¹ Raha miainga hanafika fahavalo ianareo, ka mahita soavaly sy kalesy ary tafika maro noho ny anareo, dia aza matahotra azy; satria ny TOMPO Andriamanitrareo, Ilay nampiakatra anareo avy tany Ejipta, no momba anareo.

² Iny vonon-kanafika iny ianareo, dia hohatonin'ny mpisorona ka hilazany hoe:

³ Mihainoa, ry miaramila israelita! Efa hanafika fahavalo ianareo izao, koa aza rera-po na matahotra na mikoropaka foana na mangorohoro eo anatrehany.

⁴ Fa ny TOMPO Andriamanitrareo no miara-mandeha aminareo hiady ho anareo amin'ny fahavalonareo mba hampandresy anareo.

⁵ Avy eo dia hiteny amin'ny miaramila ireo manamboninahitra mpamory azy ka hanao hoe: Iza aminareo no nahavita trano vaovao nefa mbola tsy nitokanany? Aoka hiverina any an-tranony izy fandrao maty any amin'ny ady, ka olon-kafa no hitokana ny tranony.

⁶ Ary iza aminareo no efa namboly voaloboka nefa tsy mbola nioty vokatra taminy? Aoka hiverina any an-tranony izy fandrao maty any amin'ny ady, ka olon-kafa no hioty ny vokatra.

⁷ Ary iza aminareo no manana fofombady nefa tsy mbola nampakatra azy? Aoka hiverina any an-tranony izy, fandrao maty any amin'ny ady, ka olon-kafa no hampakatra ny vadiny.

⁸ Dia mbola hiteny amin'ny miaramila ireo manamboninahitra mpamory azy ka hanao hoe: Iza aminareo no matahotra ka rera-po? Aoka hiverina any an-tranony izy, fandrao ho rera-po tahaka azy koa ny namany.

⁹ Rehefa tapi-niteny tamin'ny miaramila ireo manamboninahitra ireo, dia hanendry mpifehy hitarika antoko miaramila.

¹⁰ Rehefa mby akaikin'ny tanana hiadiana ianareo, dia taomy hanao raharaham-pihavanana ny mponina.

¹¹ Raha manaiky ireo ka mampandroso anareo, dia ho mpandoa hetra ho anareo sy ho mpanomponareo ny olona rehetra ao.

¹² Raha tsy manaiky hanao raharaham-pihavanana kosa ireo, fa hiady aminareo, dia ataovy fahirano.

¹³ Ary rehefa atolotry ny TOMPO Andriamanitrareo eo an-tananareo ilay tanana, dia hovonoinareo amin'ny lelan-tsabatra ny lehilahy rehetra ao.

¹⁴ Fa hoentinareo ho anareo kosa ny babo rehetra ao, dia ny zaza amam-behivavy sy ny biby fiompy mbamin'izay rehetra ao an-tanana; ary hitompoanareo ny babo azo tamin'ny fahavalonareo, satria omen'ny TOMPO Andriamanitrareo ho anareo.

¹⁵ Toy izany no hataonareo amin'ny tanana rehetra tena lavitra anareo, ka tsy tananan'ireto firenena ho lasanareo tany ireto.

¹⁶ Fa ny tananan'ireto firenena ireto, tanana izay omen'ny TOMPO Andriamanitrareo ho fanananareo, dia tsy havelanareo hisy miangana izay olona sy mananaina rehetra ao.

¹⁷ Hataonareo ringana tanteraka ireto firenena ireto, dia ny Hetita sy ny Amorita ary ny Kanahanita mbamin'ny Perizita sy ny Hivita ary ny Jebosita; hataonareo ringana tanteraka ireo, araka izay nandidian'ny TOMPO Andriamanitrareo anareo,

¹⁸ mba tsy hampianarany anareo hanao ny zavatra mahatsiravina rehetra fanaony amin'ny andriamaniny, ka tsy hanotanareo amin'ilay TOMPO Andriamanitrareo.

¹⁹ Raha ela no hanaovanareo fahirano ny tanana izay tafihinareo halaina, dia aza simbana kapaina amin'ny famaky ny hazo fihinam-boa eny manodidina, fa hisy voany hohaninareo; koa aza kapaina, fa tsy olona natao hiadiana tsy akory ny hazo fihinam-boa any an-tsaha.

²⁰ Saingy ny hazo izay fantatrareo fa tsy fihinam-boa dia ho azonareo kapaina ihany ka hanamboaranareo fitaovana hamelezana ny tanana izay miady aminareo, mandra-paharesiny.

Toko faha-21

¹ Eo amin'ny tany izay omen'ny TOMPO Andriamanitrareo ho fanananareo, dia mety hisy maty novonoin'olona hita miampatra any an-tsaha saingy tsy fantatra izay namely nahafaty azy.

² Amin'izay, dia hiainga ny loholona ama-mpitsaranareo ka handrefy ny elanelan'ireo tanana manodidina sy ilay toerana misy ny faty,

³ mba hahafantarana ny tanana izay akaikin'ny faty indrindra. Ary ny loholon'io tanana io dia haka vantotr'ombivavy iray izay tsy mbola nampiasaina na novesaran-jioga hitarihany;

⁴ ka ireo ihany no hitondra azy midina amina-lohasaha tsy voaasa na voafafy sady misy renirano tsy ritra; ary ao anatin'io renirano io no hamolahan'ireto loholona ny vozon'ilay vantotr'ombivavy.

⁵ Dia hanatona eo ny mpisorona taranak'i Levy, satria izy no voafidin'ny TOMPO Andriamanitrareo hanompo AZY sy hitsodrano amin'ny anarany; koa araka ny tenin'ny mpisorona no handaminana ny ady sy vonoana isan-karazany.

⁶ Ny loholona rehetra amin'izany tanana tena akaikin'ny faty izany kosa dia hanasa ny tanany amin'ny renirano, eo ambonin'ilay vantotr'ombivavy izay efa voafolaka ny vozony;

⁷ dia hiloa-bava ireo ka hanao hoe: Ny tananay tsy nandatsaka aina an'io olona io, ary ny masonay tsy nahita ny zava-nitranga.

⁸ TOMPO o, afaho andraikitra amin'izany ilay Israely vahoaka navotanao, ary aoka ny famonoana olona tsy manan-tsiny mba tsy havelanao hanjaka eo anivony. Dia ho afaka andraikitra amin'izany famonoana olona izany ireo.

⁹ Izany no hialanareo andraikitra amin'ny famonoana olona tsy manan-tsiny, satria nanao izay mahitsy eo imason'ny TOMPO ianareo.

¹⁰ Raha miainga hanafika fahavalo ianareo ary atolotry ny TOMPO Andriamanitrareo ho eo an-tananareo izy ka voababonareo,

¹¹ dia mety hisy aminareo hahita vehivavy anankiray tsara tarehy amin'ireo babo ka ho raiki-pitia azy sy haniry hanambady azy.

¹² Hoentin'io lehilahy io ho ao an-trano ravehivavy, ka hiharatra volon-doha sy hanala hoho,

¹³ hanaisotra ny fitafiany tamin'ny nahababo azy sy hiova akanjo, ary hitoetra ao amin-dralehilahy. Mandritra ny iray volana dia hisaona ny ray aman-dreniny ravehivavy; aorian'izany ralehilahy vao hahazo manatona azy sy hampakatra azy ary hanana azy ho vady.

¹⁴ Fa raha avy izay tsy itiavany an-dravehivavy intsony dia halefany handeha araka izay sitrapony izy; fa tsy azony amidy hatao vola aman-karena izy na andevoziny, satria efa novinadiny.

¹⁵ Mety hisy lehilahy mampirafy roa, ka ny iray tiany bebe kokoa ary ny iray tiany kelikely kokoa. Samy niteraka zazalahy aminy izy roa vavy; ary ny zanak'ilay vehivavy tiany kelikely kokoa no lahimatoa.

¹⁶ Amin'ny andro handidiany fananana ho an'ireo zanany lahy, dia tsy azon-dralehilahy atao lahimatoa ny zanak'ilay vehivavy tiany bebe kokoa, raha mbola eo ihany ny zanak'ilay vehivavy tiany kelikely kokoa, satria io no tena lahimatoany.