Deoterônômy

Toko faha-9

³ Ho tsapanareo anio fa ny TOMPO Andriamanitrareo no efa hiampita eo alohanareo tahaka ny afo mandevona, ka Izy mihitsy no handringana ireny firenena ireny sy hampietry azy eo anoloanareo; dia handroaka azy ianareo ka hamongotra azy faingana, araka izay nampanantenain'ny TOMPO taminareo.

⁴ Rehefa voatosiky ny TOMPO Andriamanitrareo teo anoloanareo ireny firenena ireny, dia aoka ianareo tsy hanao anakampo hoe: <Ny fahamarinanay no nampidiran'ny TOMPO anay haka ity tany ity ho fanananay! Tsy izany, fa ny haratsiam-panahin'ireo no nandroahan'ny TOMPO azy teo anoloanareo.

⁵ Tsy ny fahamarinanareo na ny hitsimponanareo no mahamendrika anareo hiditra haka ny taniny ho fanananareo; fa ny haratsiam-panahin'ireo firenena ireo no handroahan'ny TOMPO Andriamanitrareo azy eo anoloanareo, ary koa mba hahato ny fampanantenana izay nianianan'ny TOMPO tamin'i Abrahama sy i Itsehaka ary i Jakoba razambenareo.

⁶ Koa aoka ho fantatrareo fa tsy ny fahamarinanareo no anomezan'ny TOMPO Andriamanitrareo izany tany soa izany ho fanananareo. Vahoaka mafy hatoka manko ianareo.

⁷ Tsarovy ny nampahatezeranareo ny TOMPO Andriamanitrareo; aza hadinoinareo mihitsy izany! Hatreo amin'ny andro nialanareo tany Ejipta ka hatramin'izao nahatongavanareo teto amin'ity toerana ity izao, dia tsy nitsahatra niodina tamin'ny TOMPO ianareo.

⁸ Tany Horeba aza, dia nampahatezitra mafy ny TOMPO tokoa ianareo ka saiky haringany.

⁹ Niakatra tao an-tendrombohitra manko aho handray ny takela-bato, dia ireo takela-bato anankiroa nirakitra ny fanekempihavanana nataon'ny TOMPO taminareo; ary nitoetra efapolo andro sy efapolo alina tao aho, tsy nihinan-kanina na nisotro rano.

¹⁰ Dia nomen'ny TOMPO ahy ny takela-bato anankiroa, voasoratry ny rantsan-tanan'Andriamanitra ka nirakitra ny didy rehetra nolazain'ny TOMPO taminareo; avy tao anatin'ny afo no nilazany an'ireny tao an-tendrombohitra fony ianareo vory ho fivondronambe.

¹¹ Tapitra ny efapolo andro sy efapolo alina, vao nomen'ny TOMPO ahy ny takela-bato anankiroa, izany hoe ireo takela-bato nirakitra ny fanekempihavanana.

¹² Tamin'izay dia hoy ny TOMPO tamiko: <Miala teto ianao, ka ndeha midina faingana; fa nihasimba ilay vahoaka izay nafahanao avy tany Ejipta, nalaky nivily niala tamin'ny sori-dalana efa nasaiko nizorany ka nanao sarin-tsampy ho azy tamin'ny metaly nempoina!

¹³ Dia hoy koa ny TOMPO tamiko: <Efa hitako fa vahoaka mafy hatoka ity vahoaka ity!

¹⁴ Avelao Aho handringana azy ka hanafoana ny fahatsiarovana azy eto amin'izao tontolo izao, fa ianao kosa no hataoko firenena mahery sy lehibe noho ity vahoaka ity.

¹⁵ Dia nihodina aho nidina niala teo amin'ny tendrombohitra izay toa nirehitra afo. Teny an-tanako roa ireo takela-bato anankiroa nirakitra ny fanekempihavanana.

¹⁶ Nijery aho ka indreo tokoa fa nanota tamin'ny TOMPO ianareo, satria nanao ombilahikely tamin'ny metaly nempoina mba ho sampinareo ary nalaky nivily niala tamin'ny sori-dalana izay efa nasain'ny TOMPO nizoranareo.

¹⁷ Noho izany, dia noaingako mafy ireo takela-bato anankiroa ka nazerako avy teny an-tanako ho vakivaky teo imasonareo.

¹⁸ Ary niankohoka teo anatrehan'ny TOMPO efapolo andro sy efapolo alina tahaka ny teo aloha indray aho, tsy nihinan-kanina na nisotro rano. Ny fahotana rehetra vitanareo tamin'ny nanaovanareo izay ratsy teo imason'ny TOMPO ka nampahatezeranareo Azy no anton'izany.

¹⁹ Fa natahotra aho nahita ny fahatezerana sy fahavinirana nirehetan'ny TOMPO taminareo ka saika handringanany anareo; saingy mbola nihaino ahy indray IZY tamin'izany andro izany.

²⁰ Tezitra mafy tamin'i Aharona koa ny TOMPO ka saika handringana azy; saingy nifona ho an'i Aharona koa aho tamin'izany andro izany.

²¹ Ary nalaiko ny fahotana vitanareo, dia ilay ombilahikely volamena, ka nodorako dia notorotoroiko sy nomontsamontsaniko mandra-pahatongany ho vovoka; ary ny vovony dia nariako teo amin'ny ranon-driaka izay midina avy any amin'ny tendrombohitra.

²² Tao Tabehera sy Masa ary Kibroty-Taava dia nampahatezitra ny TOMPO koa ianareo.

²³ Ary fony nampandehanin'ny TOMPO niala tao Kadesy-Barnea ianareo ka nataony hoe: <Miakara ka alaovy ho fanananareo ny tany izay omeko anareo, dia nolavinareo ny tenin'ny TOMPO; fa tsy nino Azy ianareo na nihaino ny feony.

²⁴ Eny, hatramin'ny andro nahalalako anareo no ho mankaty, dia niodina tamin'ny TOMPO hatrany ianareo.

²⁵ Noho ny TOMPO efa nilaza handringana anareo, dia niankohoka teo anatrehany aho ary tsy nitsahatra mihitsy nandritra izany efapolo andro sy efapolo alina izany.

²⁶ Nifona tamin'ny TOMPO aho ka nanao hoe: <Ry Tompo ANDRIANANAHARY o, aza aringanao ny vahoaka fanananao, izay navotanao tamin'ny fahalehibiazanao sy navoakanao avy tany Ejipta tamin'ny fiarovanao mahery.

²⁷ Tsarovy i Abrahama sy i Itsehaka ary i Jakoba mpanomponao; fa aza jerenao ny ditran'ity vahoaka ity na ny haratsiam-panahiny na ny fahotany,

²⁸ fandrao izay monina any amin'ilay tany namoahanao anay hanao hoe: <Tsy hain'ny TOMPO ny nampiditra azy any amin'ny tany nampanantenainy azy; tsy tiany velively ireo, ka izany no namoahany azy mba hahafaty azy any an-taniefitra.

²⁹ Kanefa, Tompo o, ireo no vahoaka fanananao, izay navoakanao avy tany Ejipta tamin'ny herinao lehibe sy fahefanao tsy hay tohaina.

Toko faha-10

¹ Tamin'izany andro izany no nilazan'ny TOMPO tamiko hoe: <Manamboara takela-bato anankiroa tahaka ny teo, ary manaova koa vatahazo anankiray; dia miakara ho aty amiko aty an-tendrombohitra.

² Hosoratako amin'ireo takela-bato ireo ny didy voasoratra tamin'ny takela-bato nomontsaninao; ka hataonao ao anatin'ny vata ireo takela-bato ireo.

³ Dia nanao vata tamin'ny hazo akasia aho sy nanamboatra takela-bato anankiroa tahaka ny teo, ary niakatra tao an-tendrombohitra ka nitondra ny takela-bato anankiroa teny an-tanako.

⁴ Dia nosoratan'ny TOMPO teo amin'ireo takela-bato ireo izay voasoratra tamin'ny takela-bato teo aloha, dia ny didy folo nampitain'ny TOMPO taminareo; tao an-tendrombohitra, avy tao anatin'ny afo, no nilazany an'ireny taminareo fony ianareo vory ho fivondronambe; dia nomen'ny TOMPO ahy ireo takela-bato ireo.

⁵ Nihodina aho ka nidina niala teo amin'ny tendrombohitra; ary napetraka tao anatin'ilay vata efa nataoko ireo takela-bato ireo, ka dia mbola ao ihany araka izay nandidian'ny TOMPO ahy.

⁶ (Niainga teo amin'ny fantsakan'i Bene-Jahakana ny Israelita ka nankany Mosera. Tao no nahafatesan'i Aharona sy nandevenana azy; ary i Elehazara zanany no tonga mpisorona nandimby azy.

⁷ Nony niala teo ny Israelita, dia nankany Godgoda; avy eo nankany Jotbata, faritra be lohasahan-driaka.

⁸ Tamin'izay ny fokon'i Levy no natokan'ny TOMPO hanao ireto raharaha ireto: hitondra ny vata mirakitra ny fanekempihavanan'ny TOMPO; hitoetra eo anatrehan'ny TOMPO; hanao fanompoam-pivavahana aminy; hanome tsodrano amin'ny anarany. Mbola ataon'ny levita ireo raharaha ireo mandraka androany.

⁹ Izany no tsy ananan'ny levita zaratany na anjara eo amin'ny Israelita namany; fa ny TOMPO no anjarany, araka izay nampanantenain'ny TOMPO Andriamanitrareo taminy.)

¹⁰ Efapolo andro sy efapolo alina tahaka ny teo aloha ihany no nitoerako tany an-tendrombohitra; ary mbola nihaino ahy koa ny TOMPO tamin'ity indray maka ity, ka tsy sitrany hofongorana ianareo.

¹¹ Dia hoy ny TOMPO tamiko: <Miainga, ndeha mialoha lalana ny vahoaka; aoka ireo hiditra haka ny tany, izay nianianako tamin'ny razambeny homena azy!

¹² Ary ankehitriny, ry Israelita, inona moa no andrandrain'ny TOMPO Andriamanitrareo aminareo, afa-tsy ny hanajanareo AZY sy ny hizoranareo amin'ny lalana rehetra soritany ary ny hitiavanareo sy hanompoanareo AZY amin'ny fonareo manontolo sy amin'ny fanahinareo manontolo.

¹³ Andrandrain'ny TOMPO aminareo ny hitandremanareo ny didy aman-dalany, izay ampitaiko aminareo anio mba hahasambatra anareo. 14 Indro fa an'ny TOMPO Andriamanitrareo ny lanitra midadasika ary ny tany mbamin'izay rehetra eo aminy.

¹⁵ Kanefa ny razambenareo ihany no niraiketan'ny TOMPO hotiavina ka nifidianany anareo taranany mihoatra noho ny firenena hafa rehetra, araka izao hitanareo anio izao.

¹⁶ Noho izany, aoka ny fonareo ho voatokana tanteraka ho an'ny TOMPO, fa aza mafy hatoka intsony ianareo.

¹⁷ Ilay TOMPO Andriamanitrareo no Andriamanitry ny andriamanitra sy Tompon'ny tompo, Andriamanitra lehibe sy mahery ary mahatahotra, tsy mba mizaha tavan'olona na mandray kolikoly;

¹⁸ manome rariny ny kamboty sy ny mpitondratena Izy, sady tia ny vahiny ka manome azy hanina sy fitafiana.

¹⁹ Koa tiavo ny vahiny eo aminareo, fa efa mba vahiny tany Ejipta ianareo.

²⁰ Ilay TOMPO Andriamanitrareo no hohajainareo, Izy no hotompoinareo sy hifikiranareo, ary ny anarany no hianiananareo.

²¹ Izy no fideranareo, Izy no Andriamanitrareo, dia Ilay nanao ho anareo ireny zavatra lehibe sy mahatahotra efa hitan'ny masonareo ireny.

²² Olona fitopolo ny razambenareo no nidina tany Ejipta; ankehitriny kosa efa nataon'ny TOMPO Andriamanitrareo maro tahaka ny kintana eny ana habakabaka ianareo.

Toko faha-11

¹ Tiava ny TOMPO Andriamanitrareo, ka tandremo isan'andro izay asainy tandremana, dia ny lalanany sy ny fitsipiny ary ny didiny.

² Tsy ny zanakareo no itenenako izao fa ianareo. Tsy ny zanakareo manko fa ianareo no nahalala sy nahita ny fomba nitantanan'ny TOMPO Andriamanitrareo fahizany, dia ny fahalehibiazan'ny TOMPO sy ny fiarovany mahery ary ny fahefany tsy hay tohaina