Deoterônômy

Toko faha-11

³ mbamin'ny famantarana sy asa nataony. Teo ny nataon'ny TOMPO tany Ejipta hamelezana ny Farao mpanjakan'ny Ejiptianina sy hamelezana ny taniny manontolo;

⁴ teo ny nataon'ny TOMPO hamelezana ny tafika ejiptianina sy ny soavaliny aman-kalesiny, dia ny nanaronany azy tao amin'ny Ranomasin'ny Volotara fony nanenjika anareo izy ka voaringana tsy hisy intsony;

⁵ ary teo ny nataony hanasoavana anareo taty an-taniefitra mandra-pahatonganareo amin'izao toerana izao.

⁶ Teo koa ny namelezan'ny TOMPO an'i Datana sy i Abirama izay samy zanakalahin'i Eliaba, taranak'i Reobena; teo afovoan'ny Israelita rehetra no nisokafan'ny tany sy nitelemany azy roa lahy mbamin'ny ankohonany sy ny lainy ary ny olona rehetra mpomba azy.

⁷ Eny, efa nahita maso ireny asa lehibe rehetra nataon'ny TOMPO ireny ianareo.

⁸ Koa tandremo avokoa ny didy izay ampitaiko aminareo anio mba hahery ianareo ka haka ho fanananareo ilay tany izay hiampitanareo sy hidiranareo,

⁹ ary mba ho maro andro ianareo any amin'io tany io izay nianianan'ny TOMPO tamin'ny razambenareo homena azy sy ny taranany, dia tany izay tondra-dronono sy tantely.

¹⁰ Ny tany izay hidiranareo mba halainareo ho fananana azy manko dia tsy mba tahaka an'i Ejipta izay nialanareo. Tany Ejipta, rehefa namafy voan-javatra ianareo, dia nampiasa ny tongotrareo hampidiran-drano hanondrahana azy tahaka ny fanao amin'ny voly anana.

¹¹ Fa ny tany, izay hiampitanareo mba halainareo ho fananana, dia tany be tendrombohitra sy lohasaha sady vonton'ny ranonoran-danitra,

¹² tany izay voakarakaran'ny TOMPO Andriamanitrareo sady tsinjovin'ny masony mandrakariva hatreo amin'ny fiandohan'ny taona ka hatrany amin'ny fiafarany.

¹³ Raha tena hankatoavinareo ny didy izay ampitaiko aminareo anio, ka ny fonareo manontolo sy ny fanahinareo manontolo no hitiavanareo sy hanompoanareo Ahy TOMPO Andriamanitrareo,

¹⁴ dia halatsako eo amin'ny taninareo ny ranonorana amin'ny fotoanandrony, izany hoe ny loha-orana sy ny fara-orana, mba hanangonanareo vary sy divay ary menaka.

¹⁵ Hampaniriko ahitra koa ny sahanareo ho an'ny biby fiompinareo; ary hihinan-kanina ianareo ka ho voky.

¹⁶ Mitandrema ianareo fandrao ho voafitaka ny fonareo ka hivily hanompo andriamani-kafa ianareo sy hiankohoka eo anatrehany.

¹⁷ Dia hirehetan'ny fahatezeran'ny TOMPO ianareo, ka hanampina ny lanitra Izy mba tsy hisy ranonorana; ary tsy hahavokatra intsony ny tany, dia ho lany ringana ianareo any amin'ny tany soa izay homen'ny TOMPO anareo.

¹⁸ Koa alatsaho ao amin'ny fo amam-panahinareo ireto didiko ireto; ary mba ho marika fampahatsiahivana azy anareo, dia ataovy anaty boaty famehy eny amin'ny hato-tananareo na eny an-kandrinareo.

¹⁹ Ampianaro ny zanakareo izany ary resaho na mipetraka ao an-tranonareo ianareo na mandeha eny an-dalana, na mandry ianareo na mifoha;

²⁰ ary soraty eo amin'ny tolam-baravaran'ny tranonareo sy eo amin'ny vavahadin'ny tanananareo.

²¹ Dia ho maro andro ianareo sy ny taranakareo eny amin'ny tany izay nianianan'ny TOMPO tamin'ny razambenareo homena azy; eny, ho maro andro tahaka ny aharetan'ny lanitra eo ambonin'ny tany.

²² Fa raha tena imasoanareo hotanterahina avokoa izao didy ampitaiko aminareo izao ka hotiavinareo sy hifikiranareo ny TOMPO Andriamanitrareo ary hizoranareo ny sori-dalany rehetra,

²³ dia horoahin'ny TOMPO ny firenena rehetra manoloana anareo ka ho voaroakanareo ny firenena maro izay lehibe sy mahery noho ianareo.

²⁴ Ho anareo avokoa ny toerana rehetra hodiavin'ny tongotrareo: ny faritaninareo dia hanomboka amin'ny taniefitra any atsimo ka hiafara any Libano any avaratra, ary hanomboka amin'ny ony Eofrata any atsinanana ka hiafara amin'ny Ranomasina Mediteranea any andrefana.

²⁵ Tsy hisy hahatohitra anareo fa hataon'ny TOMPO Andriamanitrareo ho azon'ny tahotra sy horohoro anareo ny tany rehetra hodiavin'ny faladian-tongotrareo, araka ny nampanantenainy anareo.

²⁶ Indro aho Mosesy mametraka fitahiana sy ozona hisafidiananareo anio.

²⁷ Hotahina ianareo raha mankato ireo didin'ny TOMPO Andriamanitrareo, izay ampitaiko aminareo anio;

²⁸ ho voaozona kosa ianareo raha tsy mankato ireo didin'ny TOMPO Andriamanitrareo fa mivily hiala ny lalana izay soritako ho anareo ka hanaraka andriamani-kafa tsy fantatrareo.

²⁹ Rahatrizay ny TOMPO Andriamanitrareo hahatafiditra anareo any amin'ny tany izay hidiranareo mba halainareo ho fananana, dia ny fitahiana no tonony eo an-tendrombohitra Gerizima, ary ny ozona kosa tonony ao an-tendrombohitra Hebala.

³⁰ (I Gerizima sy i Hebala dia tendrombohitra roa any an-dafy andrefan'ny ony Jordana, any amparan'ny lalana miankandrefana, eo amin'ny tanin'ireo Kanahanita monina ao amin'ny faritr'i Haraba; ireo tendrombohitra roa ireo dia eo akaikin'ny oakan'i Mora, tandrifin'i Gilgala ).

³¹ Efa hiampita an'i Jordana ianareo ka hiditra haka ny tany izay omen'ny TOMPO Andriamanitrareo anareo; ary hahazo azy ho fanananareo ianareo ka honina eo.

³² Koa imasoy hotanterahina avokoa ny lalana amam-pitsipika izay apetrako eo anoloanareo anio.

Toko faha-12

¹ Ireto no lalana amam-pitsipika izay himasoanareo hotanterahina any amin'ny tany izay homen'ny TOMPO, Andriamanitry ny razambenareo, ho fanananareo; amin'ny andro rehetra hiainanareo eto an-tany no himasoanareo hotanterahina ireo lalana amam-pitsipika ireo.

² Hopotehinareo mihitsy ny toerana fanompoan-tsampy rehetra eny an-tendrombohitra sy eny an-tampon-kavoana ary eny am-bodihazo maitso rehetra eny; amin'ireny toerana ireny manko ireo firenena horoahinareo no manompo ny andriamaniny.

³ Dia horavanareo ny alitarany, hovakivakinareo ny tsangambaton-tsampiny, hodoranareo ny tsato-kazo fanajany an'i Asera, ary hokapainareo ny sarin-tsampy voasokitra izay andriamaniny; ka hofoananareo ny fahatsiarovana ireny andriamanitra sampy ireny eo amin'izany toerana izany.

⁴ Aza anaovanareo fomba toy ireny ny TOMPO Andriamanitrareo;

⁵ satria ilay toerana hofidiny eo amin'ny fokonareo rehetra mba honenany sy hipetrahan'ny voninahiny no hitadiavanareo Azy, ao ihany no halehanareo.

⁶ Ao no hitondranareo ny sorona dorana manontolo sy ny sorom-pihavanana ataonareo, ny fahafolon-karenareo, ny fitia tsy mba hetra foinareo, ny fanalam-boadinareo, ny fanati-tsitraponareo, ary ny voalohan-teraky ny omby sy ondry aman'osinareo.

⁷ Ao ianareo sy ny ankohonanareo no hanao sakafo sy hifaly eo anoloan'ny Toeramasin'ilay TOMPO Andriamanitrareo noho ny fiharian-karena rehetra nitahiany anareo.

⁸ Aza anaovanareo fomba toy izao ataontsika ankehitriny izao ny TOMPO, ka ny tsirairay no samy manao izay heveriny ho mety.

⁹ Ianareo manko tsy mbola tonga any amin'ny toeram-pitsaharana, izay omen'ny TOMPO Andriamanitrareo ho fanananareo.

¹⁰ Fa rehefa tafita an'i Jordana ianareo ka honina any amin'ny tany izay omen'ny TOMPO Andriamanitrareo ho fanananareo, dia homeny fitsaharana ianareo ka tsy hisotasotan'ny fahavalo manodidina anareo fa handry feizay.

¹¹ Amin'izay, ilay toerana hofidin'ny TOMPO Andriamanitrareo hipetrahan'ny voninahiny no hitondranareo ny zavatra rehetra nandidiako anareo: dia ny sorona dorana manontolo sy ny sorom-pihavanana ataonareo, ny fahafolon-karenareo, ny fitia tsy mba hetra foinareo, ny zavatra rehetra voafantinareo mba hanalana ny voadinareo tamin'ny TOMPO.

¹² Dia hifaly eo anoloan'ny Toeramasin'ilay TOMPO Andriamanitrareo ianareo mbamin'ny zanakareo sy ny mpanomponareo ary koa ny Levita izay ao an-tanananareo, satria tsy mba manana zaratany na anjara miaraka aminareo ny Levita.

¹³ Mitandrema mba tsy hanolotra sorona dorana manontolo eny amin'ny toeram-pivavahana rehetra hitanareo;

¹⁴ fa ilay toerana nofidin'ny TOMPO amin'ny fokonareo anankiray ihany no hanoloranareo ireny, sady hanaovanareo koa ny zavatra rehetra nandidiako anareo.

¹⁵ Kanefa, eny amin'ny tanana rehetra onenanareo, dia mahazo mamono biby amin'izay fotoana tianareo ianareo sy mihinana ny henany, arakaraka ny fitahiana nomen'ny TOMPO anareo; na ny olona maloto ara-pivavahana na ny madio, dia samy mahazo mihinana amin'izany, tahaka ny ahazoany mihinana gazela sy ombimanga.

¹⁶ Saingy ny ran'ilay biby no aza haninareo, fa araraho amin'ny tany toy ny rano.

¹⁷ Tsy azonareo hanina ao an-tanananareo ny ampahafolon'ny vary sy divay ary menaka novokarinareo, ny voalohan-teraky ny omby sy ondry aman'osinareo, ny zavatra rehetra nataonareo voady, ny fanati-tsitraponareo ary ny fitia tsy mba hetra foinareo.

¹⁸ Fa eo anoloan'ny Toeramasina, ao amin'ny faritra nofidian'ilay TOMPO Andriamanitrareo, no hihinana izany ianareo mbamin'ny zanakareo sy ny mpanomponareo ary koa ny Levita izay ao an-tanananareo; eny, hifaly eo anoloan'ny Toeramasin'ilay TOMPO Andriamanitrareo ianareo amin'izay fiharian-karena rehetra nataonareo.

¹⁹ Mitandrema mba tsy hanao tsirambina ny Levita ianareo amin'ny andro rehetra hiainanareo amin'ny taninareo.

²⁰ Rehefa hitarin'ny TOMPO Andriamanitrareo ny faritaninareo araka ny nampanantenainy taminareo, raha maniry mafy hihinan-kena ianareo, dia mahazo mihinana araka izay tianareo.