Deoterônômy

Toko faha-2

²² Toy izany koa no nataon'ny TOMPO ho an'ny Edomita taranak'i Hesao, izay nonina tany Sehira, fa naringany tsy ho eo anoloan'ny Edomita ireo Horita; dia nandroaka ny Horita ny Edomita ka nonina nisolo azy mandraka androany.

²³ Ny amin'ny Havita izay nonina tamin'ireo tanana mipaka hatrany Gaza kosa, dia ny Kaftorita avy tany Kaftora no nandringana azy ka nonina nisolo azy.)

²⁴ Avy eo dia hoy ny TOMPO hoe: Mitsangana ianareo, miainga ka mita ny lohasahan-driaka Arnona. Jereonareo fa hatolotro eo an-tananareo i Sihona, mpanjaka amorita ao Hesbona, mbamin'ny taniny. Santaro ny fakana izany tany izany, ka tafiho i Sihona!

²⁵ Manomboka anio, dia hataoko mahazo ny firenena rehetra ambany lanitra ny horohoro sy tahotra anareo; ka vantany vao reny ny lazanareo, dia hangovitra sy hipararetra noho ny aminareo izy.

²⁶ Avy teo an-taniefitra Kedemota no nandefasako iraka hankany amin'i Sihona, mpanjaka tao Hesbona, omban'ny teny fihavanana hoe:

²⁷ Aoka mba hamaky ny taninao izahay; ny lalambe ihany no halehanay ka tsy hivilivily ho amin'ny ankavanana na ho amin'ny ankavia izahay.

²⁸ Hamidinao vola aminay ny hanin-kohaninay; hatakalonao vola aminay ny rano hosotroinay; ary handalo fotsiny mandeha an-tongotra izahay.

²⁹ Efa navelan'ireo taranak'i Hesao monina any Sehira sy ireo Moabita monina any Hara hanao toy izany izahay. Handalo fotsiny izahay mandra-pahatonganay eo amin'ny toerana hitanay ny ony Jordana ho any amin'ny tany izay omen'ny TOMPO Andriamanitray anay.

³⁰ Tsy nety namela antsika hamaky ny taniny anefa i Sihona mpanjaka tao Hesbona; fa ilay TOMPO Andriamanitrareo efa nahatonga azy hidrikina sy ho mafy fo mba hanolorany azy eo an-tananareo, tamin'izany andro izany.

³¹ Dia niteny tamiko ny TOMPO hoe: Jereo fa manomboka nanolotra an'i Sihona sy ny taniny aminareo Aho. Santaro ny fakana izany tany izany mba hanananareo azy.

³² Dia niainga i Sihona mbamin'ny tafiny manontolo hiady amintsika tao Jahatsa,

³³ fa natolotry ny TOMPO Andriamanitsika ho eo ambany fahefantsika ry i Sihona sy ny zanany lahy mbamin'ny tafiny manontolo ka noresentsika.

³⁴ Ary afatsika tamin'izay ny tananany rehetra, ka noravantsika tanteraka; naringantsika ny lehilahy mbamin'ny zaza amam-behivavy isan-tanana ka tsy nasiantsika niangana na iray akory aza.

³⁵ Ny biby fiompiny sy ny fananany, tao amin'ny tanana izay afatsika ihany, no nobabointsika.

³⁶ Manomboka hatreo Harohera izay amoron'ny lohasahan-driaka Arnona sy ilay tanana hafa anatin'io lohasaha io ihany, ka miafara any Gilehada, dia tsy nisy tanana tsy afatsika; fa natolotry ny TOMPO Andriamanitsika eo ambany fahefantsika ny tanana rehetra.

³⁷ Kanefa ny tanin'ny Hamonita kosa tsy nakekezintsika, dia ny faritra rehetra manamorona ny lohasahan-driaka Jaboka sy ireo tanana ao amin'ny havoana, toy ny toerana rehetra nosakanan'ny TOMPO Andriamanitsika tsy hakekezintsika.

Toko faha-3

¹ Dia nihodina niakatra tamin'ny lalana mankany Basana isika; ary niainga hiady amintsika tao Edrehy i Hoga mpanjakan'i Basana, mbamin'ny tafiny manontolo.

² Tamin'izay, dia hoy ny TOMPO tamiko: Aza matahotra an'i Hoga ianareo, fa efa natolotro eo an-tananareo izy sy ny tafiny manontolo mbamin'ny taniny; ary ny hataonareo amin'i Hoga dia araka izay nataonareo tamin'i Sihona mpanjaka amorita, izay nonina tao Hesbona.

³ Dia natolotry ny TOMPO Andriamanitsika eo an-tanantsika koa i Hoga, mpanjakan'i Basana, mbamin'ny tafiny manontolo; noresentsika ireo ka tsy nisy niangana na iray akory aza.

⁴ Afatsika tamin'izay ny tananany enimpolo izay nanjakan'i Hoga manerana ny faritany Argoba manontolo tao Basana.

⁵ Tananamimanda avokoa ireo tanana ireo ka samy nisy manda avo sy vavahady voahidy mafy; ankoatra ireo, dia nisy tanana kely maro dia maro.

⁶ Noravantsika tanteraka ireny tanana ireny ary naringantsika ny lehilahy mbamin'ny zaza amam-behivavy isan-tanana, toy ny nataontsika tamin'ny tananan'i Sihona mpanjaka tao Hesbona.

⁷ Fa ny biby fiompy rehetra sy ny fananana tamin'ireo tanana ireo no nobabointsika.

⁸ Koa tamin'izany andro izany, dia nalaintsika tamin'ny mpanjaka amorita anankiroa ny tany izay any an-dafin'i Jordana, manomboka amin'ny lohasahan-driaka Arnona ka miafara amin'ny tendrombohitra Hermona,

⁹ (dia i Hermona izay nataon'ny Tsidonianina hoe Siriona ary nataon'ny Amorita kosa hoe Senira).

¹⁰ Nalaintsika ny tanana rehetra amin'ny lembalemba, nalaintsika i Gilehada sy i Basana manontolo hatrany Salka sy Edrehy izay tanana nanjakan'i Hoga tany Basana.

¹¹ I Hoga mpanjakan'i Basana manko no hany sisa tavela tamin'ny Refaita. Mbola hita ao Raba, renivohitry ny Amorita, ny vatam-paty misy azy, dia vatam-paty natao tamin'ny vato vy voapaika ka efatra metatra sy sasany ny halavany ary roa metatra ny sakany araka ny refy mahazatra.

¹² Tamin'izany andro izany tokoa no nahazoantsika io tany io. Ny antsasaky ny tany havoanan'i Gilehada mbamin'ny tanana eo, manomboka any Harohera izay eo amoron'ny lohasahan-driaka Arnona, dia nomeko ny Reobenita sy ny Gadita.

¹³ Ny sisa tamin'i Gilehada sy i Basana manontolo, izay nanjakan'i Hoga, dia nomeko ny antsasa-pokon'i Manase. (Ny faritany Argoba miaraka amin'i Basana manontolo dia natao koa hoe tanin'ny Refaita.

¹⁴ Ireo terak'i Jairo zanakalahin'i Manase no nahazo ny faritany Argoba manontolo, mipaka amin'ny sisintanin'ny Gesorita sy Mahekatita; dia nantsoina hoe Havota-Jairo izany faritra izany araka ny anarana entiny mandraka androany.)

¹⁵ Ny terak'i Makira kosa nomeko faritany Gilehada.

¹⁶ Ny Reobenita sy ny Gadita dia nomeko ny ampahan'i Gilehada miafara amin'ny lohasahan-driaka Arnona (ka tao afovoan'io lohasahan-driaka io no sisintany), sy miafara amin'ny lohasahan-driaka Jaboka izay sisin-tany mampisaraka amin'ny Hamonita;

¹⁷ nomeko azy ireo koa i Haraba, ka ny ony Jordana no sisintany, manomboka ao Kinereta ka miafara amin'ny Ranomasin'i Haraba, dia ny Ranomasina Maty, eo am-bodin'ny tendrombohitra Pisga izay ao atsinanany.

¹⁸ Tamin'izany andro izany, dia nomeko baiko ireo ka nataoko hoe: Efa nomen'ny TOMPO Andriamanitrareo ho fanananareo ity faritany ity; ka ndeha mita eo alohan'ny Israelita hafa havanareo ianareo lehilahy mahery fo rehetra samy efa voaoman-kiady.

¹⁹ Fa ny vadinareo sy ny zanakareo madinika ary ny biby fiompinareo, (fantatro fa be biby fiompy ianareo), dia hitoetra ao amin'ireo tanana izay nomeko anareo.

²⁰ Ampio ny Israelita hafa mandra-panomen'ny TOMPO azy fitsaharana tahaka ny nataony taminareo, ka hananany ny tany izay omen'ny TOMPO Andriamanitrareo azy any andafin'i Jordana; dia samy hiverina any amin'ny zaratany izay nomeko anareo avy ianareo.

²¹ Tamin'izany andro izany koa dia nomeko baiko i Josoa ka nilazako hoe: Efa hitanao maso izay rehetra nataon'ny TOMPO Andriamanitrareo tamin'ireo mpanjaka roa lahy; dia toy izany no hataon'ny TOMPO amin'ny mpanjaka rehetra hatrehinao eny ampita.

²² Aza matahotra azy ianareo satria ny TOMPO Andriamanitrareo mihitsy no hiady ho anareo.

²³ Tamin'izany andro izany, dia nitaraina tamin'ny TOMPO aho ka nanao hoe:

²⁴ Ry Tompo ANDRIANANAHARY o, vao nanehoanao ny fahalehibeazanao sy ny fiarovanao mahery aho mpanomponao. Fa, na any an-danitra na eto an-tany, aiza no misy andriamanitra mahay manao araka ny asanao sy ny zava-dehibe vitanao?

²⁵ Aoka mba hahazo mita aho ka hahita izany tany soa any andafin'i Jordana izany, dia ilay faritra be tendrombohitra tsara sy i Libano.

²⁶ Fa tezitra tamiko ny TOMPO noho ny aminareo, ka tsy nihaino ahy sady nilaza tamiko hoe: Aoka izay fa aza teneninao amiko intsony izany zavatra izany.

²⁷ Miakara eo an-tampon'i Pisga ianao ary atopazy miankandrefana sy mianavaratra ary mianatsimo sy miantsinanana ny masonao, dia aoka hijery; satria tsy hahazo mita izany Jordana izany ianao.

²⁸ Fa i Josoa no omeo baiko, dia ampaherezo sy hatanjaho, satria izy no hiampita eo alohan'ity vahoaka ity sady hampahazo azy ny tany izay ho hitanao.

²⁹ Dia nijanona teo an-dohasaha tandrifin'i Bety-Pehora isika.

Toko faha-4

¹ Ary hoy indray i Mosesy hoe: Ankehitriny, ry Israelita, henoy ny lalana amam-pitsipika izay ampianariko anareo hotanterahinareo, mba ho velona ianareo ka hiditra sy hanana ny tany izay omen'ny TOMPO Andriamanitry ny razambenareo anareo.

² Aza ampianareo ny teny izay andidiako anareo ary aza anesorana; fa tandremo ny didin'ny TOMPO Andriamanitrareo, izay ampitaiko aminareo.

³ Efa nahita maso izay nataon'ny TOMPO noho ny amin'ilay Bahala tao Pehora ianareo; fa ny olona rehetra nanompo an'io Bahala io taminareo, dia naringan'ny TOMPO Andriamanitrareo tsy ho eo aminareo intsony.

⁴ Fa ianareo nifikitra tamin'ny TOMPO Andriamanitrareo kosa dia samy velona avokoa izao anio izao.

⁵ Araka izay nandidian'ny TOMPO Andriamanitro ahy, indro ianareo efa nampianariko lalana amam-pitsipika hotanterahinareo any amin'ny tany izay efa hidiranareo mba halainareo ho fananana.