Nomerỳ

Toko faha-33

⁴⁹ Teo amoron'i Jordana, tanelanelan'i Bety-Jesimota sy Abela-Sitima tao amin'ny lemak'i Moaba, no nitobian'ny Israelita.

⁵⁰ Tao amin'ny lemak'i Moaba, teo amoron'i Jordana tandrifin'i Jerikao, no nitenenan'ny TOMPO tamin'i Mosesy

⁵¹ mba hamepetra ny Israelita hoe: Rehefa tafita an'i Jordana ianareo ka tonga any amin'ny tany Kanahana,

⁵² dia horoahinareo avokoa ny mponina rehetra eo amin'ny tany, hopotehinareo ny sary vato sy sary metaly rehetra mampiseho ny andriamaniny, ary horaranareo avokoa ny toeram-pivavahany.

⁵³ Halainareo ny tany ka honenanareo, fa ianareo no nomeko azy ho lovanareo.

⁵⁴ Antsapaka no hizaranareo ny tany araka ny tarikareo avy; izay maro an'isa no homenareo zara tany bebe kokoa, ary izay vitsy kosa dia homenareo zara tany kelikely kokoa. Antsapaka ihany no hamaritana ny toerana hisy ny anjaran'ny tarika tsirairay; ary araka ny fokon-drainareo avy no hahazoanareo zara tany.

⁵⁵ Fa raha tsy roahinareo ny mponina rehetra amin'ny tany ao, dia ho lay amin'ny masonareo sy ho tsilo amin'ny tehezanareo izay olona sisa tavela ka hampijaly anareo eo amin'ny tany honenanareo.

⁵⁶ Ary dia hataoko aminareo izay efa nokasaiko hatao aminy.

Toko faha-34

¹ Niteny tamin'i Mosesy koa ny TOMPO

² mba hamepetra ny Israelita hoe: Rehefa tafiditra any amin'ny tany Kanahana ianareo, dia izao no tany izay ho anjara lovanareo araka ireto sisin-tany ireto:

³ Any atsimo, ny taninareo dia voafaritry ny taniefitra Tsina sy ny tanin'i Edoma. Izany dia manomboka avy eo atsinanana ao amin'ny tendrony atsimon'ny Ranomasina Maty;

⁴ avy eo dia miolaka eo atsimon'ny fiakaran'i Akrabima, dia mandalo an'i Tsina, dia mahazo ny atsimon'i Kadesy-Barnea sy mipaka any Hatsara, ary mitohy hatrany Hatsemona;

⁵ avy eo Hatsemona, dia miolaka any amin'ny lohasahan-driakan'i Ejipta ary miafara amin'ny Ranomasina Mediteranea.

⁶ Any andrefana dia ny Ranomasina Mediteranea no mamaritra ny taninareo.

⁷ Any avaratra dia hofaritanareo ny sisin-tany manomboka amin'ny Ranomasina Mediteranea ka hatrany amin'ny tendrombohitra Hora.

⁸ Avy eo an-tendrombohitra Hora, dia ny lalana mankany Lebo-Hamata no hamaritanareo azy, ary hipaka any Tsedada.

⁹ Dia hitohy hatrany Zifrona izany ka hiafara any Hatsara-Heinana. Izany no sisin-taninareo any avaratra.

¹⁰ Any atsinanana dia hofaritanareo ny sisin-tany manomboka eo Hatsara-Heinana ka hatrany Sefama.

¹¹ Avy eo dia mahazo an'i Ribla atsinanan'i Haina, dia midina mipaka amin'ny sisiny atsinanan'ny farihin'i Kinereta,

¹² ka hitsontsorika hatrany Jordana ary hiafara any amin'ny Ranomasina Maty. Izany no taninareo araka ny sisin-tany manodidina azy.

¹³ Dia namepetra ny Israelita i Mosesy ka nanao hoe: Izany no tany izay nandidian'ny TOMPO fa hozarainareo antsapaka ho an'ny foko sivy sy sasany.

¹⁴ Fa ny foko robenita sy ny foko gadita ary koa ny antsasaky ny fokon'i Manase dia efa samy nahazo ny zara taniny,

¹⁵ dia aty an-dafy atsinanan'i Jordana tandrifin'i Jerikao manatrika ny fiposahan'ny masoandro.

¹⁶ Dia niteny tamin'i Mosesy indray ny TOMPO ka nanao hoe:

¹⁷ I Elehazara mpisorona sy i Josoa zanakalahin'i Nona no hisahana ny fizarana ny tany.

¹⁸ Hisy tompon'andraikitra iray avy isam-poko hotendrenareo hanampy azy amin'izany.

¹⁹ Izao avy ny anaran'izy ireo: ho an'ny fokon'i Joda dia i Kaleba zanakalahin'i Jefone;

²⁰ ho an'ny fokon'i Simehona, dia i Semoela zanakalahin'i Hamihoda;

²¹ ho an'ny fokon'i Benjamina, dia i Elidada zanakalahin'i Kislona;

²² ho an'ny fokon'i Dana, dia i Boky zanakalahin'i Jogly;

²³ ho an'ny fokon'i Manase zanak'i Josefa, dia i Haniela zanakalahin'i Efoda;

²⁴ ho an'ny fokon'i Efraima zanak'i Josefa, dia i Kemoela zanakalahin'i Siftana;

²⁵ ho an'ny fokon'i Zebolona, dia i Elitsafana zanakalahin'i Parnala;

²⁶ ho an'ny fokon'i Jisakara, dia i Paltiela zanakalahin'i Hazana;

²⁷ ho an'ny fokon'i Asera, dia i Ahihoda zanakalahin'i Selomy;

²⁸ ho an'ny fokon'i Naftaly, dia i Pedahela zanakalahin'i Hamihoda.

²⁹ Ireo no olona nodidian'ny TOMPO hisahana ny fizarana ny tany Kanahana ho an'ny Israelita.

Toko faha-35

¹ Tao amin'ny lemak'i Moaba, teo amoron'i Jordana tandrifin'i Jerikao ihany, no nitenenan'ny TOMPO tamin'i Mosesy mba hamepetra ny Israelita hoe:

² Aoka ianareo hanome tanana eo amin'ny zara tany fanananareo avy ho an'ny Levita mba honenany. Homenareo azy koa ny tany manodidina hiandrasany ny bibiny.

³ Ny tanana dia ho azy mba honenany, fa ny tany kosa ho an'ny biby fiompiny sy ny fitaovany ary ny bibiny hafa rehetra.

⁴ Koa ny tany manodidina ny tanana izay homenareo ny Levita dia dimanjato metatra miala avy eo amin'ny rindrin'ny tanana amin'ny lafiny efatra.

⁵ Handrefy faritra efamira ivelan'ny tanana ianareo ka arivo metatra ny lafiny atsinanana, arivo metatra ny lafiny atsimo, arivo metatra ny lafiny andrefana ary arivo metatra ny lafiny avaratra; dia ho eo anivon'io faritra io ny tanana. Izany no ho tanin'ny Levita manodidina ny tanana.

⁶ Ny tanana homenareo ny Levita dia ny tanana enina fialokalofana, izay hataonareo fandosiran'izay nahafaty olona, ary tanana hafa 42 ihany koa.

⁷ Ka ny fitambaran'ny tanana rehetra izay homenareo ny Levita dia 48, miaraka amin'ny tany manodidina hiandrasany ny bibiny.

⁸ Ary momba ireo tanana izay halainareo avy amin'ny tanin'ny Israelita, dia izay foko lehibe no hanalanareo maro kokoa, fa izay foko kely kosa dia hanalanareo vitsy kokoa; eny, samy hanome tanana ho an'ny Levita araka ny zara tany azony avy ny foko tsirairay.

⁹ Niteny tamin'i Mosesy indray ny TOMPO

¹⁰ mba hamepetra ny Israelita hoe: Rehefa tafita an'i Jordana ka tafiditra amin'ny tany Kanahana ianareo,

¹¹ dia hifidy tanana izay hataonareo tanana fialokalofana, mba hialokalofan'izay nahafaty olona tsy nahy.

¹² Ireo tanana ireo no ho fialokalofana mba hahafahanareo mandositra ny mpamaly faty; ka tsy ho faty izay nahafaty olona alohan'ny hisehoany fitsarana eo anatrehan'ny fiangonana.

¹³ Hisy tanana enina havahanareo ho fialokalofana,