Nomerỳ

Toko faha-22

15 Nefa mbola nandefa olo-manan-kaja hafa maro kokoa sady malaza noho ny teo aloha i Balaka.

16 Rehefa tonga tany amin'i Balahama ireo, dia nanao taminy hoe: Izao no lazain'i Balaka, zanakalahin'i Tsipora: Aoka re mba tsy holavinao ny hankanesanao aty amiko e!

17 Fa hitafotafo mihitsy ny voninahitra izay homeko anao, ary hataoko avokoa izay holazainao amiko rehetra. Koa mba tongava aty re ianao hanozona io vahoaka io.

18 Fa hoy i Balahama namaly ireo mpanompon'i Balaka: Na dia homen'i Balaka volafotsy sy volamena mahafeno ny tranony aza aho, dia tsy afaka hanao zavatra na kely na lehibe izay mifanohitra amin'ny tenin'ny TOMPO Andriamanitro.

19 Nefa mijanona ihany aty anio alina, hahafantarako sao mbola misy holazain'ny Tompo amiko.

20 Tamin'ny alina, dia nankao amin'i Balahama Andriamanitra ka nanao taminy hoe: Raha haka anao no nahatongavan'ireo olona ireo, dia mandehana miaraka aminy; kanefa izay holazaiko aminao ihany no hataonao.

21 Ny ampitso maraina dia nanisy lasely ny borikivaviny i Balahama ka niainga niaraka tamin'ireo olo-manan-kajan'i Moaba.

22 Tezitra mafy tamin'i Balahama Andriamanitra raha nahita azy nandeha ihany; ary nijanona teo an-dalana hisakana azy ny anjelin'ny TOMPO raha iny izy nizotra nitaingina ny borikiny sady narahin'ny mpanompony roa lahy iny.

23 Hitan'ny boriky ilay anjelin'ny TOMPO nijanona teo amin'ny lalana sady nitana sabatra; dia nivily lalana ny boriky ka namantana tany amin'ny saha. Nokapohin'i Balahama ilay boriky mba hiverina amin'ny lalana.

24 Ary ilay anjelin'ny TOMPO nijanona indray teo amin'ny lempona iray teo anelanelan'ny tanimboaloboka voafefy andaniny roa.

25 Nony nahita ilay anjelin'ny TOMPO ity boriky dia nitampify teo amin'ny rindrina ka nanery ny tongotr'i Balahama teo. Dia nikapoka azy indray izy.

26 Mbola nihoatra azy ireo fanindroany ilay anjelin'ny TOMPO ka nijanona teo amin'ny lalan-tery tsy ahafahana mivily na miankavanana na miankavia.

27 Nony nahita ilay anjelin'ny TOMPO ity boriky, dia nandry teo ambanin'i Balahama. Vinitra aok'izany i Balahama ka nikapoka ny boriky tamin'ny tehina.

28 Dia nampitenenin'ny TOMPO ilay boriky ka nilaza tamin'i Balahama hoe: Fa inona loatra no nataoko taminao no dia nokapohinao intelo aho?

29 Ka hoy ny navalin'i Balahama azy: Satria namazivazy ahy ianao; fa raha nisy sabatra tety amiko, dia efa novonoiko ho faty teo no ho eo ihany ianao!

30 Ary hoy ilay boriky tamin'i Balahama: Boriky fitainginao hatramin'izay nanananao ahy aho, ka mba fanaoko ve ny manao toy izao aminao? Dia hoy izy hoe: Tsy fanaonao izany!

31 Tamin'izay dia nosokafan'ny TOMPO ny mason'i Balahama hahita ilay anjelin'ny TOMPO izay nijanona teo amin'ny lalana sady mitana sabatra. Dia niondrika i Balahama ka niankohoka tamin'ny tany.

32 Fa hoy ilay anjelin'ny TOMPO taminy: Nahoana no nokapohinao intelo ny borikinao? Tonga aho hisakan-dalana anao, satria heveriko fa mankamin'ny fahaverezana ny dianao.

33 Nahita ahy ny boriky ka intelo nivily ahy. Fa raha toa ka tsy nivily ahy izy, dia ianao no ho novonoiko ho faty teo no ho eo, fa izy kosa notsimbiniko ny ainy.

34 Dia hoy i Balahama tamin'ilay anjelin'ny TOMPO: Nanota aho satria tsy nahafantatra fa ianao no nisakan-dalana ahy. Koa ankehitriny raha tsy tianao ny hankanesako any, dia hiverina hody aho.

35 Fa hoy ny navalin'ilay anjelin'ny TOMPO azy: Tsia! Mandehana ihany miaraka amin'ireo olona ireo, saingy izay teny asaiko lazainao ihany no holazainao. Dia nanohy ny diany niaraka tamin'ireo irak'i Balaka i Balahama.

36 Rehefa ren'i Balaka fa tamy i Balahama, dia lasa izy nitsena azy tany Hiry-Moaba izay tanana teo amin'ny sisin-tany voafaritr'i Arnona.

37 Ary hoy i Balaka taminy: Nahoana no tsy tonga ianao tamin'ireo iraka voalohany izay nalefako? Sao dia heverinao tsy ho haiko ny hanome voninahitra anao!

38 Dia hoy i Balahama tamin'i Balaka: Indro aho efa tonga eto aminao ankehitriny. Nefa inona moa no azoko lazaina aminao afa-tsy izay teny hataon'Andriamanitra ao am-bavako ihany?

39 Dia lasa niaraka tamin'i Balaka nankany Kiriata-Hotsota i Balahama.

40 Namono omby aman'ondry hatao sorona i Balaka, ka nampanaterany ho an'i Balahama sy ireo olo-manan-kaja niaraka taminy.

41 Nony maraina dia nalain'i Balaka i Balahama ka nentiny niakatra ho ao Bamota-Bahala izay nahatazanana ampahan'ny vahoaka israelita.

Toko faha-23

1 Ary hoy i Balahama tamin'i Balaka: Manangana alitara fito eto ho ahy ary manomana vantotr'ombilahy fito sy ondrilahy fito eo.

2 Nataon'i Balaka izay nolazain'i Balahama; avy eo izy roa lahy dia niara-nanatitra vantotr'ombilahy sy ondrilahy iray isan'alitara.

3 Dia hoy i Balahama tamin'i Balaka: Mijanona ihany eto akaikin'ny sorona dorana manontolo natolotrao, fa izaho kosa hihataka kely hijery raha ho avy hihaona amiko ny TOMPO na tsia; koa izay hasehony amiko dia hambarako anao. Ary lasa i Balahama nankany amin'ny tendrombohitra anankiray mangadihady.

4 Nisehoan'Andriamanitra teo i Balahama ka nilaza taminy hoe: Efa voatsangako ireo alitara fito ary efa voaatitro koa ny vantotr'ombilahy sy ny ondrilahy iray avy isan'alitara.

5 Nanisy teny tao am-bavan'i Balahama ny TOMPO, ary dia nanasa azy hiverina any amin'ny mpanjaka mba hilaza izany aminy.

6 Dia niverina tany amin'i Balaka izy, ka nahita azy nijoro teo akaikin'ny sorona nataony sady tafaraka tamin'ireo olo-mana-kaja moabita rehetra.

7 Dia nanao izao tononkalo manaraka izao i Balahama: I Balaka, mpanjakan'i Moaba, dia nampaka ahy avy any Siria, avy any amin'ny tendrombohitra amin'ny ilany atsinanan'izany tany izany. Avia, hoy izy tamiko, hanozona ny taranak'i Jakoba; avia handrahona ny Israelita.

8 Hataoko ahoana anefa no fanozona izay tsy mba nozonin'Andriamanitra? Ary hataoko ahoana koa no fandrahona izay tsy mba norahonan'ny TOMPO?

9 Rehefa jereko avy eto an-tampon'ny vatolampy ary rehefa tazaniko avy eto an-tampon-kavoana izany vahoaka israelita izany, dia vahoaka mitoka-monina no fahitako azy, sady miavaka amin'ny firenen-kafa rehetra.

10 Zovy no mahisa ny taranak'i Jakoba izay marobe tahaka ny vovotany na mahisa ny ampahefatry ny Israelita? Enga anie ny fahafatesako ho toy ny fahafatesan'ireo olo-marina ireo, ary enga anie ny fiafarako ho toy ny fiafaran'ny vahoaka israelita!

11 Dia hoy i Balaka tamin'i Balahama: Fa inona izao nataonao tamiko izao? Hanozona ny fahavaloko no nitondrako anao aty, kanefa dia ny nitsodrano azy indray no nataonao!

12 Fa novalian'i Balahama hoe: Moa tsy ny hilaza izay teny nataon'ny TOMPO tao am-bavako ihany ve no andraikitro.

13 Dia hoy indray i Balaka tamin'i Balahama: Andeha hiaraka amiko any amin'ny toeran-kafa izay hahitanao ny Israelita rehetra. Ampahany ihany mantsy no hitanao teto fa tsy ny vahoaka manontolo. Ka avy eo amin'izany toerana izany no hanozonanao azy.

14 Dia nentin'i Balaka teo amin'ny saha Tsofima tao an-tampon'i Pisga i Balahama; nanorina alitara fito teo ny mpanjakan'i Moaba ka nanatitra vantotr'ombilahy iray sy ondrilahy iray isan'alitara.

15 Ary hoy i Balahama tamin'i Balaka: Mijanona eto akaikin'ny sorona dorana manontolo natolotrao, fa izaho hankery hihaona amin'Andriamanitra.

16 Nisehoan'ny TOMPO i Balahama ka nilazany izay teny hampitainy amin'i Balaka; ary nasainy hiverina any amin'ny mpanjaka izy mba hanambara izany aminy.

17 Dia lasa izy niverina tany amin'i Balaka izay mbola teo anilan'ny sorona nataony sady tafaraka tamin'ny olo-manan-kaja moabita. Ary hoy i Balaka taminy: Inona no nolazain'ny TOMPO?

18 Dia nanao izao tononkalo manaraka izao indray i Balahama: Mitsangana, ry Balaka zanakalahin'i Tsipora, atongilano amiko ny sofinao, ka mihainoa.

19 Andriamanitra tsy mba olona ka handainga, na taranak'olombelona ka hanenina. Izay nolazainy dia hoefainy; izay nampanantenainy dia hotanterahiny.

20 Efa nekeko ny hitsodrano ity vahoaka ity; ary efa nitsodrano azy rahateo ny TOMPO ka tsy afaka hanova na inona na inona aho.

21 Tsy nahita tsiny tamin'ny taranak'i Jakoba ny TOMPO na faharatsiana teo amin'ny vahoaka israelita. Ny Tompo Andriamaniny no momba azy, ka anaovany fihobiana toy ny mpanjakany.

22 Nentin'Andriamanitra niala tany Ejipta izany vahoaka izany ka manan-kery tsy hay tohaina tahaka ny an'ny omby dia.

23 Tsy mba misy fanaovan-tsikidy eo amin'ny taranak'i Jakoba; tsy mba misy fankatovana eo amin'ny vahoaka israelita. Fa amin'izay fotoana sahaza no hampahafantarana azy ny zavatra ataon'Andriamanitra.

© Eugene Heriniaina - serasera.org 1999 - 2025 - page load 0.9097