Nomerỳ

Toko voalohany

²⁴ Ny fokon'i Simehona: 59 300

³⁴ Ny fokon'i Manase zanakalahin'i Josefa: 32 200

³⁶ Ny fokon'i Benjamina: 35 400

³⁸ Ny fokon'i Dana: 62 700

⁴⁰ Ny fokon'i Asera: 41 500

⁴² Ny fokon'i Naftaly: 53 400

⁴⁴ Ireo no vokatry ny fanisam-bahoaka izay nataon'i Mosesy sy i Aharona ary izy roambinifolo lahy filoham-pianakaviana solotenan'ny fokony avy.

⁴⁵ Ka ny lehilahy israelita voaisa, feno roapolo taona no ho miakatra ka mahatam-piadiana,

⁴⁶ dia 603 550 no fitambarany.

⁴⁷ Fa tsy mba natao fanisana niaraka tamin'ny Israelita hafa ny Levita.

⁴⁸ Hoy manko ny TOMPO tamin'i Mosesy:

⁴⁹ Aza isaina ny fokon'i Levy, ary aza anaovana fanisana miaraka amin'ny Israelita hafa izy.

⁵⁰ Fa ampiandraiketo azy kosa ny fitandremana ny Fonena-masina izay nametrahana ny raki-tsoratry ny fanekempihavanana ary koa ny fanaka sy ny kojakoja rehetra momba azy. Ireo no hitondra ny Fonena-masina mbamin'ny fanaka rehetra momba azy sy hanao fanompoam-pivavahana ao aminy ary hitoby manodidina azy.

⁵¹ Rehefa hiainga kosa ny Fonena-masina, dia ny Levita no hangorona azy; ary rehefa hijanona ny Fonena-masina, dia ny Levita no hanangana azy. Fa izay olon-kafa mitady hanatona eo dia hatao maty.

⁵² Ny Israelita dia samy hitoby eo amin'ny tobiny avy sy eo akaikin'ny vondron-tafiny avy.

⁵³ Fa ny Levita kosa dia hitoby manodidina ny Fonena-masina mba tsy hirehitra amin'ny fiangonan'ny Israelita ny fahatezerako.

⁵⁴ Notanterahin'ny Israelita avokoa izany, araka izay efa nandidian'ny TOMPO an'i Mosesy.

Toko faha-2

¹ Niteny tamin'i Mosesy sy i Aharona ny TOMPO nanao hoe:

² Ny Israelita dia samy hitoby eo akaikin'ny vondron-tafiny sy ny fanevan'ny fokony avy. Ny toby dia tsy maintsy manodidina ny Tranolay fihaonana kanefa lavidavitra azy.

³ Amin'ny lafiny atsinanana no hisy ireo tafika lohalaharana mivondrona ao anatin'ny tobin'i Joda, ka ahitana mifanila ny tafika jodeanina sy jisakarita ary zebolonita. Ny vatan-dehilahy voaisa ho afa-mitam-piadiana dia hotarihin'ny filoha anankiray avy amin'ny fokony araka izao: ho an'ny fokon'i Joda dia i Nahasona zanakalahin'i Haminadaba, miaraka amin'ny vatan-dehilahy 74 600; ho an'ny fokon'i Jisakara dia i Natanaela, zanakalahin'i Tsohara, miaraka amin'ny vatan-dehilahy 54 400; ho an'ny fokon'i Zebolona dia i Eliaba zanakalahin'i Helona, miaraka amin'ny vatan-dehilahy 57 400.

⁹ Ny vatan-dehilahy ao anatin'ny tobin'i Joda dia mitontaly 186 400. Ireo no mpialoha lalana ny vahoaka israelita.

¹⁰ Amin'ny lafiny atsimo no hisy ireo tafika mivondrona ao anatin'ny tobin'i Reobena, ka ahitana mifanila ny tafika reobenita sy simehonita ary gadita. Ny vatan-dehilahy voaisa ho afa-mitam-piadiana dia hotarihin'ny filoha anankiray avy amin'ny fokony araka izao: ho an'ny fokon'i Reobena dia i Elitsora zanakalahin'i Sedeora miaraka amin'ny vatan-dehilahy 46 500; ho an'ny fokon'i Simehona dia i Selomiela zanakalahin'i Tsorisaday miaraka amin'ny vatan-dehilahy 59 300; ho an'ny fokon'i Gada dia i Eliafasa zanakalahin'i Dehoela miaraka amin'ny vatan-dehilahy 45 650.

¹⁶ Ny vatan-dehilahy ao anatin'ny tobin'i Reobena dia mitontaly 151 450. Ireo no mandeha faharoa.

¹⁷ Dia handroso ny Tranolay fihaonana sy ny andian'ny Levita eo anelanelan'ny vondron-tafika roa mialoha sy ny vondron-tafika roa manaraka. Handroso araka ny filaharany eo amin'izay itobiany ihany ny levita, ka hanaraka ny fanevan'ny tarika misy azy avy.

¹⁸ Amin'ny lafiny andrefana no hisy ireo tafika mivondrona ao amin'ny tobin'i Efraima, ka ahitana ny tafika efraimita sy manasita ary benjaminita. Ny vatan-dehilahy voaisa ho afa-mitam-piadiana dia hotarihin'ny filoha anankiray avy amin'ny fokony araka izao: ho an'ny fokon'i Efraima dia i Elisama zanakalahin'i Hamihoda miaraka amin'ny vatan-dehilahy 40 500; ho an'ny fokon'i Manase dia i Gamaliela zanakalahin'i Pedahatsoro miaraka amin'ny vatan-dehilahy 32 200; ho an'ny fokon'i Benjamina dia i Abidana zanakalahin'i Gidehony miaraka amin'ny vatan-dehilahy 35 400.

²⁴ Ny vatan-dehilahy ao anatin'ny tobin'i Efraima dia mitontaly 108 100. Ireo no mandeha fahatelo.

²⁵ Amin'ny lafiny avaratra kosa no hisy ireo tafika mivondrona ao anatin'ny tobin'i Dana, izay ahitana mifanila ny tafika danita sy aserita ary naftalita. Ny vatan-dehilahy voaisa ho afa-mitam-piadiana dia hotarihin'ny filoha anankiray avy amin'ny fokony araka izao: ho an'ny fokon'i Dana dia i Ahihezera zanakalahin'i Hamisaday miaraka amin'ny vatan-dehilahy 62 700; ho an'ny fokon'i Asera dia i Pagihiela zanakalahin'i Hokrana miaraka amin'ny vatan-dehilahy 41 500; ho an'ny fokon'i Naftaly dia i Ahira zanakalahin'i Henana miaraka amin'ny vatan-dehilahy 53 400.

³¹ Ny vatan-dehilahy ao anatin'ny tobin'i Dana dia mitontaly 157 600. Ireo kosa no ho vodilaharana. Dia samy handeha miaraka amin'ny fanevany avy ireo vondron-tafika efatra ireo.

³² Ny vatan-dehilahy israelita voaisa araka ny foko sy araka ny toby nisy ireo tafika dia tafakatra 603 550 ny fitambarany.

³³ Ny Levita ihany no tsy natao fanisana niaraka tamin'ny Israelita hafa araka izay efa nandidian'ny TOMPO an'i Mosesy.

³⁴ Notanterahin'ny Israelita izany, araka ny nandidian'ny TOMPO an'i Mosesy; ka araka ny fanevany avy no nitobiany ary araka ny foko sy ny tarika nisy azy avy no niaingany.

Toko faha-3

¹ Ireto avy ny taranak'i Aharona sy i Mosesy tamin'ny andro nitenenan'ny TOMPO tamin'i Mosesy teo an-tendrombohitra Sinay.

² Nanan-janaka efatra mirahalahy i Aharona, ka i Nadaba no lahimatoa, ny sisa dia i Abiho sy i Elehazara ary i Itamara.

³ Ireo no anaran'ny zanakalahin'i Aharona izay samy mpisorona voahosotra sy voatokana hanao ny fisoronana.

⁴ Maty teo anatrehan'ny TOMPO anefa i Nadaba sy Abiho fony nandoro vovo-javamanitra tsy sahaza Azy tany an-taniefitr'i Sinay. Samy tsy niteraka izy mirahalahy, koa dia i Elehazara sy i Itamara ihany no sisa nanao ny fisoronana teo anatrehan'i Aharona rainy.

⁶ Asaivo manatona ny fokon'i Levy ka apetraho eo ambany fahefan'i Aharona mpisorona mba hanampy azy.

⁷ Eo anoloan'ny Tranolay fihaonana no hanatanterahany ny asany ho an'i Aharona sy ho an'ny fiangonana manontolo, ka hanaovany ny fanompoana ao amin'ny Fonena-masina.

⁸ Hiandraikitra ny fanaka rehetra momba ny Tranolay fihaonana izy ary ho vonona hanompo ny Israelita ka hanatanteraka izany ao amin'ny Tranolay.

⁹ Koa homenao an'i Aharona sy ny zanany ny Levita; eny, homenao azy marina tokoa avy amin'ny Israelita ireo.

¹⁰ Hatsanganao hitandrina ny asa fisoronana i Aharona sy ny zanany; fa izay tsy mpisorona mitady hanatona kosa dia hatao maty.

¹¹ Mbola niteny tamin'i Mosesy indray ny TOMPO ka nanao hoe:

¹² Indro Aho efa nifidy ny Levita tamin'ny Israelita rehetra ho solon'ny lahimatoa rehetra voalohan-teraka aminy; koa dia Ahy ny Levita,

¹³ satria Ahy ny voalohan-teraka rehetra. Tamin'ny andro namelezako ny voalohan-teraka rehetra tany Ejipta no nanokanako ny voalohan-teraka rehetra tamin'ny Israelita ho Ahy, na olona izay na biby fiompy: Ahy ireo. Izaho no TOMPO.

¹⁴ Niteny tamin'i Mosesy tany an-taniefitr'i Sinay ny TOMPO ka nanao hoe:

¹⁵ Ataovy ny fanisana ny taranak'i Levy isam-pianakaviana sy isan-tarika avy, ka ny Levita lahy rehetra feno iray volana no ho miakatra no hoisainao.

¹⁶ Dia nataon'i Mosesy ny fanisana azy ireo, araka izay nandidian'ny TOMPO azy.

¹⁷ Ireto avy ny anaran'ny zanakalahin'i Levy: i Gersona, i Kehata ary i Merary.

¹⁸ Indreto kosa ny anaran'ny zanakalahin'i Gersona: i Libny sy i Simehy ka izy roa lahy no razan'ny tarika avy aminy.

¹⁹ Ary ny anaran'ny zanakalahin'i Kehata dia ireto avy: i Hamrama sy i Jitsehara ary i Hebrona sy i Hoziela ka izy efa-dahy no razan'ny tarika avy aminy.

²⁰ Ary ny zanakalahin'i Merary dia i Mahily sy i Mosy ka izy roa lahy no razan'ny tarika avy aminy. Izy valo lahy ireo no ipoiran'ny tariky ny Levita araka ny fianakaviambeny avy.