Levitîka

Toko faha-23

²⁵ Aza manao ny raharaha andavanandro ianareo fa manolora sorona levonina amin'ny afo ho Ahy TOMPO.

²⁶ Dia niteny tamin'i Mosesy ny TOMPO nanao hoe:

²⁷ Ny andro fahafolon'ny volana fahafito kosa dia andro fankalazana ny Famelan-keloka; hisy fanompoam-pivavahana hivorianareo amin'izany, ary hifady hanina ianareo sady hanatitra sorona levonina amin'ny afo ho Ahy TOMPO.

²⁸ Aza manao raharaha amin'io andro io, satria fankalazana ny Famelan-keloka io, ka hanaovanareo eo anatrehako TOMPO Andriamanitrareo ny fombam-pivavahana famelan-keloka ho anareo.

²⁹ Fa ny olona rehetra, izay tsy mety mifady hanina amin'io andro io, dia hofongorana tsy ho anisan'ny vahoaka israelita.

³⁰ Ary ny olona rehetra, izay manao raharaha amin'io andro io, dia holevoniko tsy ho eo anivon'ny vahoaka israelita

³¹ ka aza anaovan-draharaha io andro io: ho fepetra raikitra hatrany hatrany izany ho anareo, na aiza na aiza honenanareo.

³² Ho tena fitsaharana ho anareo io andro io, ary hifadianareo hanina; miantomboka amin'ny harivan'ny andro fahasivin'ny volana ka miafara amin'ny ampitso hariva no hitandremanareo io fitsaharanareo io.

³³ Dia niteny tamin'i Mosesy ny TOMPO

³⁴ mba hamepetra ny Israelita hoe: Ny andro faha-15, amin'ny volana fahafito, no hiantombohan'ny fankalazana ny Tranotomboka, ho fanajana Ahy TOMPO mandritra ny fito andro.

³⁵ Ny andro voalohany, dia hisy fanompoam-pivavahana hivorianareo ka aza manao ny raharaha andavanandro ianareo.

³⁶ Isan'andro, mandritra ireo fito andro ireo, dia sorona levonina amin'ny afo no haterinareo ho AHY. Ny andro fahavalo dia hisy indray fanompoam-pivavahana hivorianareo ka mbola hanateranareo sorona levonina amin'ny afo koa ho AHY; andro lehibe famaranana ny fankalazana izany, ka aza anaovana ny raharaha andavanandro.

³⁷ Ireo ary no fankalazana manetriketrika naraikitro, ka hasiana fanompoam-pivavahana hivorianareo sy hanateranareo sorona levonina amin'ny afo ho AHY, dia sorona dorana manontolo omban'ny fanatitra vokatry ny tany, na sorom-pihavanana omban'ny fanatitra araraka, samy amin'ny fotoanandrony avy.

³⁸ Ireo sorona ireo dia ankoatra ny zavatra fanolotrareo Ahy TOMPO: izany hoe ny sorona fanao amin'ny andro sabata sy ny fanomezana ary ny zavatra rehetra fanalam-boady sy an-tsitrapo.

³⁹ Ny andro faha-15, amin'ny volana fahafito, rehefa voaangonareo ny vokatry ny tany, dia hanao fankalazana ianareo, ho fanajana Ahy TOMPO mandritra ny fito andro; ka ny andro voalohany sy fahavalo dia ho andro fitsaharana.

⁴⁰ Hatreo amin'ny andro voalohany, dia haka izay voankazo tsara indrindra sy sampan-drofia ary rantsan'ny hazo mikirindro na rantsan'ny hazo malahelo eny amoron-drenirano ianareo, ka haneho hafaliana mandritra ny fito andro eo anatrehako TOMPO Andriamanitrareo.

⁴¹ Eny, hankalazainareo isan-taona izany, mandritra ny fito andro amin'ny volana fahafito, ho fanajana AHY: ho lalana raikitra hatrany hatrany izany ho anareo.

⁴² Mandritra ny fito andro, dia Tranotomboka no hilasianareo Israelita teratany rehetra tsy an-kanavaka,

⁴³ mba hahafantaran'ny taranakareo fa tranotomboka no nampilasiako ny razany, fony Aho namoaka azy hiala tany Ejipta. Izaho no TOMPO Andriamanitrareo.

⁴⁴ Toy izany no nameperan'i Mosesy ny Israelita ny amin'ireo fankalazana manetriketrika naraikitry ny TOMPO.

Toko faha-24

¹ Dia niteny tamin'i Mosesy ny TOMPO

² mba hamepetra ny Israelita hoe: Mitondra menaka oliva madio tsara ianareo, mba hampirehetana ny jiro isan-kariva ka maharitra tontolo alina.

³ Ao anatin'ny Tranolay fihaonana, eo anoloan'ny efitra lamba izay manakona ilay Vatamasina mirakitra ny Fanekempihavanana, no hametrahan'i Aharona ny fitoeran-jiro; ka hirehitra lalandava eo anatrehako TOMPO ireo jiro ireo, manomboka ny hariva ka mandra-maraina: ho lalana raikitra hatrany hatrany izany ho anareo.

⁴ Eo ambonin'io fitoeran-jiro volamena madio io no hametrahan'i Aharona ireo jiro izay hirehitra tontolo alina eo anatrehako.

⁵ Lafarinina tsara no alaonao ary mofo 12 samy milanja enina kilao no endaso.

⁶ Dia apetraho mifanongoa eo ambonin'ny latabatra volamena madio eo anatrehako TOMPO ireo, ka ataovy antontany anankiroa misy mofo enina avy.

⁷ Hasianao vovoka zava-manitra madio eo ambonin'ny isan'antonta; dia izany vovoka zava-manitra izany no hatao solon'ny mofo ka holevonina amin'ny afo mba ho fanati-pahatsiarovana ho AHY.

⁸ Isaky ny sabata, mitohy tsy tapaka, no hapetraka mifanongoa eo anatrehako TOMPO ireny mofo avy amin'ny Israelita ireny: ho lamim-panekempihavanana raikitra hatrany hatrany izany ho an'ny Israelita.

⁹ Ny mofo dia ho an'i Aharona sy ny taranany ka eo amin'ny faritra voatokana ho an'izany no hihinanany azy. Zava-masina dia masina ho an'ny mpisorona izany, satria ambin'ilay fanati-pahatsiarovana levonina amin'ny afo ho AHY: anjara raikitra hatrany hatrany izany ho azy.

¹⁰ Nisy lehilahy anankiray nivoaka ny toeram-ponenany hankeo amin'ny Israelita. Ejiptianina ny rainy; fa Israelita ny reniny izay atao hoe Selomita, zanakavavin'i Dibry, avy amin'ny fokon'i Dana.

¹¹ Vao mby teo amin'ny Israelita ralehilahy, dia niady tamina lehilahy israelita anankiray sady nanevateva sy niteny ratsy ny anaran'Andriamanitra ka nentina tany amin'i Mosesy.

¹² Dia nambenana io zanakalahin'i Selomita io, mandra-paneho mazava ny baikon'ny TOMPO.

¹³ Dia niteny tamin'i Mosesy ny TOMPO nanao hoe:

¹⁴ -Avoahy ho eny ivelan'ny toby io lehilahy niteny ratsy Ahy io; ka izay rehetra nandre ny fanevatevany Ahy, dia aoka hametra-tanana eo an-dohan-dralehilahy; ary aoka ny Israelita rehetra tafangona eto hamono azy amin'ny torabato.

¹⁵ Ireto didy ireto kosa no ampitao amin'ny Israelita: Na iza na iza niteny ratsy ilay Andriamaniny, dia itambesaran-keloka.

¹⁶ Koa izay manevateva ny anaran'ny TOMPO, dia hatao maty tokoa: hamono azy amin-torabato ny Israelita rehetra tafangona. Na vahiny izy na tompontany, rehefa manevateva ny anaran'Andriamanitra, dia hatao maty tokoa.

¹⁷ Izay mahafaty olona, dia hatao maty tokoa.

¹⁸ Fa izay mahafaty biby fiompy kosa, dia hanonitra azy: biby velona no solon'ny biby maty.

¹⁹ Raha misy olona nampahazo takaitra ny namany, dia toy izay nataony no hatao aminy:

²⁰ tapaka efain-tapaka, maso efai-maso, nify efai-nify; tahaka ny takaitra nampahazoany olona no hatao aminy koa.

²¹ Izay mahafaty biby fiompy, dia hanonitra azy; fa izay mahafaty olona kosa, dia hatao maty.

²² Fitsipika tokana no hitondrana anareo, na vahiny na tompontany, fa Izaho no TOMPO Andriamanitrareo.

²³ Rehefa voalazan'i Mosesy tamin'ny Israelita izany, dia nanao araka izay didy nomen'ny TOMPO an'i Mosesy ireo: navoakany tany ivelan'ny toby ilay lehilahy niteny ratsy an'Andriamanitra, ka novonoiny tamin-torabato.

Toko faha-25

¹ Teo an-tendrombohitra Sinay, dia niteny tamin'i Mosesy ny TOMPO

² mba hamepetra ny Israelita hoe: Rehefa tafiditra ny tany izay omeko anareo ianareo, dia aoka ny tany volena homenareo fialan-tsasatra mitsingerina mba ho mari-panajana Ahy TOMPO.

³ Enin-taona no hamafazanareo ny tanimbarinareo sy handrantsananareo ny voalobokareo ka hanangonanareo vokatra.

⁴ Fa ny taona fahafito kosa dia fialan-tsasatra tanteraka no homenareo ny tany volenareo mba ho mari-panajana AHY: aza amafazana ny tanimbarinareo, ary aza rantsanana ny voalobokareo;

⁵ tsy hojinjanareo akory aza izay vokatry ny voa nihintsana tamin'ny fararano lasa, ary tsy hotoazanareo akory ny sampaho vokatry ny voaloboka tsy norantsananareo, fa aoka ho taona fialan-tsasatra ho an'ny tany volena izany.

⁶ Izay zava-maniry voajanahary, mandritra ny fialan-tsasatry ny tany volena, dia azo hanina ho anareo sy ny mpanomponareo mbamin'ny mpikarama sy vahiny tafaraka aminareo;

⁷ ny biby fiompianareo sy ny bibidia izay eo amin'ny taninareo koa aza, dia ny zavatra rehetra voajanahary vokatry ny tany no hohaniny.