Galatianina

Toko voalohany

¹⁰ Olombelona ve ankehitriny no ilako sitraka? Tsia, fa Andriamanitra no ilako sitraka! Sa ny ho mamy hoditra amin'ny olombelona no tadiaviko? Raha mbola ny ho mamy hoditra amin'ny olombelona no tadiaviko, dia tsy mpanompon'i Kristy aho.

¹¹ Ampahafantariko anareo, ry havana, fa ny Vaovao Mahafaly notoriko taminareo dia tsy zavatra novolavolain'olombelona.

¹² Tsy hoe olombelona no nandraisako azy na nianarako azy, fa i Jesoa Kristy no nanambara azy tamiko.

¹³ Eny, efa renareo ny fomba fiainako fahiny fony aho mbola nanaraka ny fivavahana jiosy: nanenjika lozantany ny Fiangonan'Andriamanitra aho ary nilofo handrava azy.

¹⁴ Nandroso tokoa aho tamin'ny fivavahana jiosy ary nihoatra ny ankamaroan'ireo indray nihira tamiko teo amin'ny fireneko sady fatra-pitana kokoa noho izy ireo ny fampianarana nampitain'ny razako.

¹⁵ Kanefa natokan'Andriamanitra dieny hatrany am-bohoka aho ary nantsoiny hanompo Azy noho ny fahasoavany.

¹⁶ Ary rehefa sitrak'Andriamanitra ny nanambara ny Zanany tato anatiko, mba hitoriako ny Vaovao Mahafaly momba azy amin'ny hafa firenena, dia tsy naka saina tamin'olombelona osa sy malemy aho,

¹⁷ ary tsy niakatra tany Jerosalema hanatona ireo apostoly talohako; fa lasa aho nankany Arabia ary dia niverina tany Damasy indray.

¹⁸ Telo taona taorian'izany vao niakatra tany Jerosalema aho mba hifankahita amin'i Petera ary dia nitoetra tapa-bolana niaraka taminy.

¹⁹ Tsy nahita apostoly hafa aho; fa ny hitako dia i Jakoba rahalahin'ny Tompo.

²⁰ Momba izao zavatra soratako aminareo izao, dia ijoroako eto anatrehan'Andriamanitra fa tsy mandainga aho!

²¹ Taorian'izany, dia lasa nankany amin'ny faritany Siria sy Silisia aho.

²² Nandritra izany fotoana izany, dia tsy mbola nisy nahita tava ahy ireo anisan'ny Fiangonana kristianina tany Jodea.

²³ Fa nandre fotsiny izy ireo hoe: Ilay mpanenjika antsika fahiny dia indro ankehitriny mitory ny finoana izay nilofosany horavana fahiny!

²⁴ Ary dia nanome voninahitra an'Andriamanitra ry zareo noho ny amiko.

Toko faha-2

¹ Niakatra tany Jerosalema indray aho, 14 taona taty aoriana, ka nomban'i Barnaba sady nitondra an'i Tito niaraka tamiko.

² Niakatra aho satria nasehon'Andriamanitra tamiko fa tsy maintsy ataoko izany. Nihaonako manokana ireo tompon'andraikitra ka namelabelarako ny Vaovao Mahafaly izay toriko any amin'ny hafa firenena, fandrao herim-po very maina ny asa efa notontosaiko sy ny mbola tontosaiko.

³ Kanefa i Tito izay niaraka tamiko, na dia Grika aza, dia tsy noterena hoforana,

⁴ na teo aza ireo rahalahy sandoka tafasisika an-tsokosoko teo anivonay. Ireo rahalahy sandoka ireo dia niditra an-tsokosoko mba hitsikera ny fahafahana anananay tafaray amin'i Kristy Jesoa, hahazoany manao izay hanandevozana anay.

⁵ Fa tsy nikoy mihitsy izahay taminy, na indray mihelina aza, mba ho Vaovao Mahafaly marim-pototra no voatana ho anareo.

⁶ Ireo noheverina ho tena tompon'andraikitra kosa, na ahoana na ahoana fahefany, dia tsy mampaninona ahy izany, satria Andriamanitra tsy mba mizaha tavan'olona! , ireo tompon'andraikitra dia tsy nandidy ahy hampihatra fepetra hafa na inona na inona.

⁷ Hitany aza fa adidy nankinin'Andriamanitra tamiko ny mitory ny Vaovao Mahafaly amin'ireo hafa firenena, tahaka ny itorian'i Petera izany amin'ny Jiosy:

⁸ eny, Andriamanitra Izay niasa tao amin'i Petera hahatonga azy ho apostolin'ny Jiosy, dia niasa tao amiko ihany koa hahatonga ahy ho apostolin'ny hafa firenena.

⁹ I Jakoba sy i Petera ary i Johany, izay samy noheveriko ho filoha, dia niaiky izany tombon-tsoa nomen'Andriamanitra ahy izany ary nandray tanana ahy sy nandray tanana an'i Barnaba ho mariky ny fiombonana. Koa nifanarahana fa izaho sy i Barnaba dia hiasa any amin'ny hafa firenena, ary izy ireo kosa hiasa eo amin'ny Jiosy.

¹⁰ Ny hany zavatra nangatahin'izy telo lahy taminay dia ny hahatsiarovanay ireo mahantran'ny Fiangonana tao Jerosalema; ary nahazoto ahy rahateo ny hanao izany.

¹¹ Kanefa nony tonga tany Antiokia i Petera, dia notoheriko ampahibemaso satria tsy mety ny nataony.

¹² Fa talohan'ny nahatongavan'ireo olona vitsivitsy naman'i Jakoba, dia niara-nihinana tamin'ny mpino hafa firenena i Petera. Saingy nony tonga ireo, dia nihataka i Petera ka niala tamin'ny hafa firenena, noho izy natahotra ireo anisan'ny voafora.

¹³ Ary ireo Jiosy mpino sasany dia niara-nihatsaravelatsihy tamin'i Petera, ka i Barnaba avy aza no voataonan'ny fihatsarambelatsihin-dry zareo.

¹⁴ Kanefa nony hitako fa tsy nandeha mahitsy araka ny Vaovao Mahafaly marim-pototra izy ireo, dia hoy aho tamin'i Petera teo anatrehan'ny olona rehetra: Raha ianao Jiosy aza miaina araka ny fanaon'ny hafa firenena fa tsy araka ny fanaon'ny Jiosy, ahoana no anerenao ny hafa firenena hanaraka ny fanaon'ny Jiosy?

¹⁵ Ary hoy aho aminareo: Jiosy ara-pirazanana izahay, fa tsy mba mpanota avy amin'ny hafa firenena.

¹⁶ Saingy fantatray fa ny olombelona dia ankatoavin'Andriamanitra ho marina, tsy avy amin'ny fanatanterahana ny lalana fa noho ny finoana niainan'i Jesoa Kristy. Izany no nahatonga anay hino an'i Kristy Jesoa mba hankatoavan'Andriamanitra anay ho marina, noho ny finoana niainan'i Kristy fa tsy avy amin'ny fanatanterahana ny lalana.

¹⁷ Raha mitady hiray amin'i Kristy izahay mba hankatoavin'Andriamanitra ho marina, dia hita fa mpanota koa izahay, kanefa mpanompon'ny fahotana ve i Kristy? Sanatria!

¹⁸ Raha ny zavatra efa noravako manko no ajoroko indray, dia asehoko miharihary ny maha pandika lalana ahy.

¹⁹ Fa izaho, dia tamin'ny alalan'ny lalana no nahafatesako raha ny amin'ny lalana mba hahavelomako ho an'Andriamanitra. Niara-nohomboana tamin'i Kristy teo amin'ny hazofijaliana aho;

²⁰ ary tsy izaho intsony no velona fa i Kristy no velona ato anatiko. Koa izao ahavelomako ankehitriny amin'ny fiaina-mandalo izao, dia ivelomako amin'ny finoana niainan'ilay Zanak'Andriamanitra, Ilay efa tia ahy sy nanolo-tena hamonjy ahy:

²¹ tsy ataoko very maina ny fahasoavan'Andriamanitra! Eny, raha ny lalana no mahatonga ho marina eo imason'Andriamanitra, dia maty tsy amin'antony i Kristy.

Toko faha-3

¹ Tsy misaina ianareo, ry Galatianina! Iza moa no nanodoka anareo? Kanefa dia i Jesoa Kristy voahombo tamin'ny hazofijaliana no naseho mazava teo imasonareo.

² Izaho ihany no tiako ho fantatra avy aminareo: noho ianareo nanatanteraka ny lalana ve nandraisanareo ny Fanahy Masina sa noho ianareo nihaino sy nino ny Vaovao Mahafaly?

³ Tsy misaina mihitsy ve ianareo no dia nanomboka tamin'ny herin'ny Fanahy Masina kanefa ankehitriny miafara amin'ny maha olombelona osa sy malemy?

⁴ Dia ho very maina foana ve ny nahatsapanareo zava-dehibe toy ireny, raha ohatra ka ho very maina foana tokoa izany?

⁵ Rehefa manome anareo ny Fanahy Masina sy manefa asa mahery eo anivonareo ary Andriamanitra, moa ve noho ianareo manatanteraka ny lalana no mahatonga izany sa noho ianareo mihaino sy mino ny Vaovao Mahafaly?

⁶ Izao no voalazan'ny Soratra Masina: Nino an'Andriamanitra i Abrahama ary nankatoavan'Andriamanitra azy ho marina izany!

⁷ Koa fantaro fa izay velona noho ny finoana no tena zanak'i Abrahama.

⁸ Tsinjon'ny Soratra Masina rahateo fa ny finoana no hankatoavan'Andriamanitra ny hafa firenena ho marina; noho izany, dia nambaran'ny Soratra Masina mialoha tamin'i Abrahama izao hafatra mahafaly izao: Ao aminao no homban'Andriamanitra fitahiana ny firenen-drehetra!

⁹ Nino i Abrahama ary nomban'Andriamanitra fitahiana; ary izay velona noho ny finoana dia homban'Andriamanitra fitahiana tahaka azy koa.

¹⁰ Fa izay rehetra miantehitra amin'ny fanatanterahana ny lalana dia ianjadian'ny ozona, satria izao no voalazan'ny Soratra Masina: Voaozona izay rehetra tsy maharitra manatanteraka ny zavatra rehetra voasoratra ao amin'ny bokin'ny lalana.

¹¹ Miharihary koa fa, raha amin'ny lalana, dia tsy misy olona eken'Andriamanitra ho marina, satria hoy ny Soratra Masina hoe: Ny olo-marina noho ny finoana dia ho velona!

¹² Ny lalana kosa dia tsy miantehitra amin'ny finoana fa izao no tenin'ny Soratra Masina: Izay manatanteraka ny didy amam-pitsipika dia ho velona amin'izany.

¹³ I Kristy dia nanavotra anay Jiosy ho afaka amin'ny ozona tanisain'ny lalana; fa nanjary niharan'ny ozona Izy ho famonjena anay satria hoy ny Soratra Masina hoe: Voaozona izay rehetra mihantona amin'ny hazo!

¹⁴ Izany no nihatra tamin'i Kristy dia mba hahatafita amin'ireo hafa firenena tafaray amin'i Kristy Jesoa ny fitahiana efa nampombain'Andriamanitra an'i Abrahama ary koa mba handraisantsika roa tonta, amin'ny alalan'ny finoana, ilay Fanahy Masina nampanantenain'Andriamanitra antsika!