Jôhany

Toko faha-21

¹² Ary hoy i Jesoa tamin'izy fito lahy: Avia hisakafo! Ny mpianatra izany tsy nisy na iray aza sahy nanontany Azy hoe: Iza moa Ianao?, satria fantany ihany fa ny Tompo io.

¹³ Ary nanatona i Jesoa dia nandray ny mofo ka natolony azy ireo; ary nataony toy izany koa ny trondro.

¹⁴ Izany no fisehoan'i Jesoa fanintelony tamin'ny mpianany, fony Izy tafatsangana velona avy any amin'ny maty.

¹⁵ Rehefa avy nisakafo ireo mpianatra, dia hoy i Jesoa tamin'i Simona Petera: Ry Simona zanakalahin'i Johany, moa tia Ahy mihoatra noho ny itiavan'ireto Ahy ve ianao? Ka novaliany hoe: Eny, ry Tompo, fantatrao fa tiako Ianao. Dia hoy Izy taminy: Fahano ireo zanakondriko.

¹⁶ Ary hoy indray i Jesoa tamin'i Petera fanindroany: Ry Simona zanakalahin'i Johany, moa tia Ahy ve ianao? Ka novaliany hoe: Eny, ry Tompo, fantatrao fa tiako Ianao. Dia hoy Izy taminy: Aoka ianao ho mpiandry ireo ondriko.

¹⁷ Ary hoy indray i Jesoa tamin'i Petera fanintelony: Ry Simona zanakalahin'i Johany, moa tia Ahy ve ianao? Dia nalahelo i Petera fa nataon'i Jesoa fanintelony hoe: Moa tia Ahy ve ianao?, ka hoy ny navaliny Azy: Ianao, ry Tompo, no mahalala ny zavatra rehetra, ka fantatrao fa tiako Ianao. Dia hoy Izy taminy: Fahano ireo ondriko.

¹⁸ Lazaiko marina dia marina aminao fa fony mbola tanora ianao, dia nahasikin-tena sy nandeha tamin'izay tianao haleha; fa rehefa antitra kosa ianao, dia hatsotranao ny tananao, ka olon-kafa no hanikina anao sy hitondra anao amin'izay tsy tianao haleha.

¹⁹ (Izany voalazan'i Jesoa izany, dia manambara ny karazam-pahafatesana hanomezan'i Petera voninahitra an'Andriamanitra). Avy nilaza izany i Jesoa, dia nanao taminy hoe: Avia hiaraka amiko!

²⁰ Dia nitodika i Petera ka hitany manaraka azy ireo ilay mpianatra tian'i Jesoa, ilay mpianatra izay nirona teo amin'ny tratran'i Jesoa tamin'ny fisakafoana ka nanontany Azy hoe: Tompo o, iza moa ilay efa hanolotra Anao?

²¹ Rehefa nahita an'ilay mpianatra i Petera, dia niteny tamin'i Jesoa hoe: Ary izy io, ry Tompo, mba inona no ho anjarany?

²² Dia hoy i Jesoa tamin'i Petera: Raha tiako haharitra mandra-piaviko izy, ahoanao izany? Fa ianao, avia hiaraka amiko!

²³ Noho izany teny izany, dia niely tamin'ireo havana mpino fa hoe tsy ho faty io mpianatra io; kanefa i Jesoa tsy niteny tamin'i Petera hoe: Tsy ho faty izy, fa hoe Raha tiako haharitra mandra-piaviko izy, ahoanao izany?

²⁴ Io mpianatra io no vavolombelona manambara izany zavatra izany sy nanoratra azy; ary fantatray fa azo antoka ny fijoroany ho vavolombelona.

²⁵ Misy zavatra maro hafa koa izay nataon'i Jesoa; ka raha izany no voasoratra tsirairay, dia ataoko fa na izao tontolo izao aza dia tsy ho omby ny boky voasoratra.

Asan'ny Apôstôly

Toko voalohany

¹ Any ianao ry Teofily, Ilay boky voalohany dia nanoratako ny zavatra rehetra nataon'i Jesoa sy nampianariny, hatrany am-panombohany

² ka hatramin'ny andro nampiakarana Azy ho any an-danitra. Talohan'ny nampiakarana Azy, dia namelany baiko tamin'ny herin'ny Fanahy Masina ireo nofidiny ho apostoly.

³ Porofo maro no nentin'i Jesoa nanambara tena fa velona Izy taorian'ny nahafatesany: niseho tamin'ny apostoly Izy nandritra ny efapolo andro sady nidinidinika taminy momba ny Fanjakan'Andriamanitra.

⁴ Ary indray andro i Jesoa dia niara-nisakafo taminy ka nanafatrafatra azy hoe: Aza miala eto Jerosalema, fa andraso ilay fanomezana nampanantenain'ny Ray, izay efa renareo tamiko.

⁵ I Johany dia nanao batisa tamin'ny rano; fa ianareo kosa, rehefa afaka andro vitsivitsy, dia hatao batisa amin'ny Fanahy Masina.

⁶ Koa izay tafangona teo amin'i Jesoa dia nanontany Azy hoe: Tompo o, izao ve no fotoana hanarenanao indray ny fanjakana ho an'i Israely?

⁷ Fa novalian'i Jesoa hoe: Tsy anjaranareo ny mahalala ny fotoana na ny vaninandro voatendrin'ny Ray araka ny fahefany manokana.

⁸ Fa hahazo hery ianareo rehefa hilatsahan'ny Fanahy Masina, ka ho vavolombelona hanambara Ahy eto Jerosalema sy eran'i Jodea mbamin'i Samaria ary hatrany amin'ny faran'ny tany.

⁹ Nony avy nilaza izany i Jesoa, dia nakarina any an-danitra teo imason'izy ireo; ary nisy rahona nanakona an'i Jesoa ka tonga tsy hitan'izy ireo intsony Izy.

¹⁰ Raha mbola nibanjina ny lanitra niakaran'i Jesoa teo iny izy ireo, dia indreo nisy roa lahy nanao fitafiana fotsy tafajoro tampoka teo anilany

¹¹ ka nanao taminy hoe: Ry lehilahy galileanina, nahoana no mijanona eto mijery ny lanitra ianareo? Iny Jesoa Izay nalaina teo aminareo hakarina any an-danitra iny, dia mbola ho avy indray tahaka ny nahitanareo Azy nankany an-danitra.

¹² Dia niverina nankany Jerosalema ny apostoly, rehefa niala teo amin'ilay tendrombohitra atao hoe Analanoliva, tendrombohitra akaiky an'i Jerosalema tokony ho iray kilaometatra (halaviran-dalana azo aleha amin'ny sabata).

¹³ Ka nony tonga tao an-tanana izy ireo, dia niakatra tao amin'ny efitrano ambony rihana fitoerany: dia i Petera, i Johany, i Jakoba, i Andrea, i Filipo, i Toma, i Bartolomeo, i Matio, i Jakoba zanakalahin'i Halfeo, i Simona Zelota ary i Jodasy zanakalahin'i Jakoba.

¹⁴ Niray fo izy rehetra sady nazoto nivavaka niaraka tamin'ny vehivavy mpino sy i Maria renin'i Jesoa mbamin'ireo rahalahin'i Jesoa.

¹⁵ Andro vitsivitsy taorian'izany nony tafavory ny mpino miisa tokony ho 120, dia nitsangana teo afovoan'izy rehetra i Petera ka nanao hoe:

¹⁶ Ry havako, tsy maintsy notanterahina izay nambaran'ny Fanahy Masina mialoha ao amin'ny Soratra Masina; fa niteny tamin'ny alalan'i Davida Izy ny amin'i Jodasy izay tonga mpitarika ireo nisambotra an'i Jesoa;

¹⁷ anisanay apostoly ihany i Jodasy ary nandray anjara tamin'izao fanompoanay izao.

¹⁸ Koa izany lehilahy izany dia efa nahavidy saha ho an'ny tenany tamin'ny vola azony, tambin'ny heloka vitany; potraka nihohoka izy, nipoaka ny kibony ka nivaroraka daholo ny tsinainy.

¹⁹ Fantatry ny mponina rehetra eto Jerosalema izany, hany ka io saha io dia nantsoin-dry zareo amin'ny fiteniny hoe Hakeldama, izany hoe Sahan-dra.

²⁰ Fa izao no voalazan'ny Soratra Masina ao amin'ny bokin'ny Salamo: Aoka ho lao ny tranony, ary aoka tsy honenan'olona akory! Ary izao koa: Aoka ho lasan'olon-kafa ny andraikiny!

²¹ Ao ireo lehilahy mpiara-dia taminay nandritra ny andro rehetra nifaneraseran'i Jesoa Tompo taminay,

²² hatramin'ny andro nanaovan'i Johany batisa an'i Jesoa ka hatramin'ny andro nanalana Azy taminay sy nampiakarana Azy any an-danitra. Koa amin'ireo no tokony hisy anankiray ho namanay mba ho vavolombelona hanambara fa nitsangana velona i Jesoa Tompo.

²³ Nisy roa lahy natokana hifidianana, dia i Josefa atao hoe Barsabasy, izay nampiana anarana hoe Imarina, sy i Matia.

²⁴ Ary niara-nivavaka izy rehetra nanao hoe: Ianao no mahalala ny fon'ny olona tsy an-kanavaka, Tompo o, ka asehoy izay nofidinao tamin'izy roa lahy ireto,

²⁵ handray ny toerana amin'izao fanompoana maha apostoly izao, fa nilaozan'i Jodasy izany hankanesany any amin'ny toerany manokana.

²⁶ Dia nanaovana antsapaka izy roa lahy, ary voatendrin'ny antsapaka i Matia, ka dia izy no lany ho naman'ny apostoly 11 lahy.

Toko faha-2

¹ Nony tonga ny andro Pentekosta, dia tafangona teo amin'io efitrano io ihany ny mpino rehetra.

² Ary nisy feo avy tany an-danitra tonga tampoka tahaka ny rivo-mahery mifofofofo ka nanenika ny trano nitoerany.

³ Ary nisy lela maro mitarehin'afo niseho tamin'ny mpivory ka nizarazara nipetraka teny ambonin'ny tsirairay avy.

⁴ Dia feno Fanahy Masina avokoa izy rehetra ary niteny fiteny samihafa araka izay nampitenenan'ny Fanahy azy avy.

⁵ Tamin'izay dia nisy Jiosy mpivavaka tsara, zanaka am-pielezana avy tamin'ny firenen-tsamihafa ambanin'ny lanitra, tafatoetra tao Jerosalema.

⁶ Vao nanomboka ilay feo, dia nirohotra nanatona ny besinimaro sady sanganehana fatratra satria nandre ny mpino nampiasa ny fiteny manokana mahazatra azy mpihaino tsirairay avy.

⁷ Talanjona sy gaga izy rehetra sady vaky vava hoe: Fa tsy avy any Galilea avokoa ve ireo miteny ireo?

⁸ Ka ahoana no andrenesantsika tsirairay avy ny fiteny manokana nahabe antsika?

⁹ Misy amintsika avy any Partia, Media, Elama ary misy mponina any Mezopotamia; misy mponina eto Jodea; misy koa ny any Kapadosia, Ponto, Azia,

¹⁰ Frijia sy Pamfilia; ao koa ny avy any Ejipta mbamin'ny faritanin'i Sirena any Libia; ary misy ny mpivahiny avy any Roma;