Lioka

Toko faha-20

²⁷ Ireo Tsadoseanina, izay milaza fa tsy misy fitsanganan'ny maty ho velona, dia mba nisy koa nanatona an'i Jesoa, ka nanontany Azy

²⁸ hoe: Mpampianatra o, izao no didy voasoratra nomen'i Mosesy antsika: Raha misy lehilahy maty mbola velom-bady nefa tsy nanan-taranaka, dia aoka ny rahalahiny hampakatra an-dravehivavy, ka hiteraka hamela solofo ho an'ny maty.

²⁹ Koa nisy ary olona fito mirahalahy. Nampaka-bady ny lahimatoa, kanjo maty tsy nanan-taranaka.

³⁰ Nampakatra an-dravehivavy ny faharoa,

³¹ ary koa ny fahatelo; torak'izany avokoa izy fito mirahalahy, samy maty tsy namela taranaka.

³² Farany maty koa ravehivavy.

³³ Amin'ny fitsanganan'ny maty ho velona ary, mba ho vadin'iza ravehivavy fa efa samy nanambady azy avokoa izy fito mirahalahy?

³⁴ Dia hoy i Jesoa tamin'ireo Tsadoseanina: Ny olona amin'izao fiaina-mandalo izao no mampakatra sy ampakarina.

³⁵ Fa ireo nataon'Andriamanitra mendrika hitsangana velona avy any amin'ny maty sy handray anjara amin'ny fiainan-ko avy dia tsy mba mampakatra na ampakarina:

³⁶ tsy mety maty intsony manko fa tahaka ny anjely; sady zanak'Andriamanitra satria olona efa nataony mendrika hitsangana velona.

³⁷ Ny amin'ny hoe hitsangana velona ny maty dia efa nambaran'i Mosesy ao amin'ny toko momba ny Roimemy izany, fony izy niantso ny Tompo hoe: Andriamanitr'i Abrahama sy Andriamanitr'i Itsehaka ary Andriamanitr'i Jakoba.

³⁸ Ny Tompo dia tsy Andriamanitry ny maty fa Andriamanitry ny velona, satria ny Tompo no ahaveloman'izy rehetra.

³⁹ Dia niteny ny sasany tamin'ny mpahay lalana nanao hoe: Mpampianatra o, marina ny filazanao!

⁴⁰ Ary tsy nisy olona sahy nanontany an'i Jesoa intsony.

⁴¹ Hoy kosa i Jesoa tamin'ireto mpahay lalana: Ahoana no ilazana fa hoe Zanak'i Davida ny Mesia?

⁴² Ny tenan'i Davida manko no milaza ao amin'ny bokin'ny Salamo hoe: Ny Tompo Andriamanitra dia niteny hentitra tamin'ny Mpanjaka Tompoko hoe: Mipetraha amin'ny sezafiandrianana eto ankavanako;

⁴³ Izaho kosa hanao ny fahavalonao ho fitoeran-tongotrao.

⁴⁴ Antsoin'i Davida hoe Tompoko ny Mesia araka izany, ka ahoana no maha Zanany Azy?

⁴⁵ Raha mbola mihaino Azy eo ny vahoaka rehetra, dia hoy i Jesoa tamin'ny mpianany:

⁴⁶ Mitandrema amin'ireo mpahay lalana. Ny tiany dia ny mandehandeha eny amin'ny lala-mitafon'ny tempoly, ny ankamamiany dia ny arahabaina eny an-kianja sy ny mipetraka eny aloha ao amin'ny sinagoga ary ny maka ny toeram-boninahitra any amin'ny fanasana.

⁴⁷ Ataony tapitra ny fananan'ny mpitondratena ary vavaka lavareny no mody ataony hisehosehoana: ireny olona ireny dia hohelohina mafimafy kokoa.

Toko faha-21

¹ Ary nanopy ny masony i Jesoa ka nahita ireo mpanankarena nandrotsa-bola teo amin'ny vata fitoeran-drakitra.

² Ary hitany koa ity vehivavy mpitondratena mahantra nandrotsaka ariary anankiroa.

³ Ka hoy i Jesoa hoe: Lazaiko marina aminareo fa io mpitondratena io no nandrotsaka be indrindra tamin'izy rehetra.

⁴ Satria ireo rehetra ireo dia nandrotsaka ny ambim-bavany ho fanatitra; fa ravehivavy io kosa, na fadiranovana toy inona aza, dia ny fivelomany manontolo no narotsany.

⁵ Nisy mpianatra niresaka momba ny tempoly, amin'izy voaravaka vato saro-bidy sy fanatitra fanalam-boady. Ka hoy i Jesoa:

⁶ Ho avy ny andro handravana ireo zavatra banjininareo ireo ary tsy havela hisy vato mifanongoa eo ka tsy harodana.

⁷ Ary nanontanian'ireo indray i Jesoa hoe: Mpampianatra o, oviana no hahatongavan'izany ary inona no hamantarana fa madiva ho avy izany?

⁸ Dia novaliany hoe: Tandremo sao voafitaka ianareo. Fa maro no ho avy hisandoka ny anarako sady hanao hoe: Izaho no Mesia, ary Tonga ny fotoana! Aza mba manaraka an'ireny.

⁹ Raha mandre ady sy korontana ianareo, aza taitra; eny, tsy maintsy ho tonga aloha izany, nefa tsy dia miaraka amin'izay akory ny farandro.

¹⁰ Ary hoy koa i Jesoa taminy: Hisy firenena hitsangana hamely firenena ary koa fanjakana hitsangana hamely fanjakana.

¹¹ Amin'ny toerana samihafa, hisy horohorontany mahery vaika mbamin'ny mosary sy areti-mandringana; ary avy eny amin'ny habakabaka dia hisy zava-mahatahotra sy famantarana lehibe.

¹² Kanefa alohan'izany rehetra izany, dia hosamborina sy hoenjehina ianareo, hatolotra hotsaraina any amin'ny sinagoga ary hatao am-ponja, hoentina eo anatrehan'ireo mpanjaka sy mpifehy noho ianareo miandany amiko.

¹³ Ho tonga aminareo izany mba hijoroanareo ho vavolombelona manambara Ahy.

¹⁴ Koa ataovy latsaka ao am-ponareo fa tsy tokony hihevitra mialoha izay hiarovanareo tena ianareo;

¹⁵ satria Izaho ihany no hampiteny anareo sy hanome fahendrena anareo, ka tsy hahatohitra sady tsy haharesy lahatra anareo izay rehetra miampanga anareo.

¹⁶ Hanolotra anareo na dia ny ray aman-dreny sy ny mpiray tampo ary ny havana aman-tsakaiza aza, ka hovonoin'olona ny sasany aminareo.

¹⁷ Ho halan'ny olon-drehetra ianareo satria miandany amiko,

¹⁸ nefa tsy hisy very na dia singam-bolo iray amin'ny lohanareo aza.

¹⁹ Aoka ho amim-paharetana no hahazoanareo famonjena ny ainareo.

²⁰ Rehefa hitanareo voahodidina miaramila i Jerosalema, dia fantaro fa antomotra ny fandravana azy.

²¹ Amin'izany, izay any Jodea aoka handositra any an-tendrombohitra; izay ao an-tananan'i Jerosalema aoka hilefa any ivelany; ary izay any an-tsaha aoka tsy hiverina ao an-tanana.

²² Satria andro nataon'Andriamanitra ho famaizana izany andro izany, mba hahatanterahan'izay rehetra voalazan'ny Soratra Masina.

²³ Loza no hanjo ny bevohoka sy ny mitaiza kely amin'izany andro izany, satria hisy fahoriana lehibe amin'ity tany ity ary hihatra amin'ity vahoaka ity ny fahatezeran'Andriamanitra.

²⁴ Ny mponina haringan'ny lelan-tsabatra na hoentin-ko babo any amin'ny firenena rehetra any, ary i Jerosalema hohitsakitsahin'ny hafa firenena mandrapahafenon'ny andro natao hanjakan'ny hafa firenena.

²⁵ Hisy famantarana koa eny amin'ny masoandro sy ny volana ary ny kintana; ary ety an-tany dia ho ory sy ho very hevitra ny firenena noho ny ranomasina hikotrokotroka sy hanonja izaitsizy.

²⁶ Hisy olona ho fatin'ny tahotra sy ny fanahiana izay hanjo ny tany tontolo, satria hihozongozona ny herin'ny habakabaka.

²⁷ Amin'izay no hahitana ny Zanak'olona tamy voahodidin-drahona sady omban-kery sy voninahitra lehibe.

²⁸ Raha vao miantomboka anefa izany zavatra izany, dia mitraka ianareo ary andrandrao ny lohanareo fa efa antomotra ny fanavotana anareo.

²⁹ Dia nilaza fanoharana tamin'ny mpihaino Azy i Jesoa nanao hoe: Jereo ny aviavy sy ny hazo rehetra.