Lioka
Toko faha-17
5 Ary hoy ny apostoly tamin'ny Tompo: Mba ampitomboy ny finoanay!6 Ka novalian'ny Tompo hoe: Raha manam-pinoana hoatra ny voan-tsinapy ianareo dia ho afa-milaza amin'ity voaroihazo ity hoe: Miongota, ary aoka haniry any an-dranomasina; dia hanoa anareo izy.
7 Aoka hatao hoe misy aminareo manana mpanompo, mpiasa tany na mpiandry biby fiompy. Raha mody avy any an-tsaha ve ilay mpanompo, dia hilazana hoe: Avia faingana hisakafo?
8 Tsia, fa izao no hatao aminy: Anamboary sakafo aho; ary misikina hampihinana ahy mandritra ny isakafoanako. Aorian'izany vao hisakafo ianao.
9 Ary ankasitrahina ve ilay mpanompo, rehefa vitany izay nasaina hataony? Tsia!
10 Torak'izany koa ianareo, rehefa vitanareo izay rehetra nasain'Andriamanitra hatao, dia milaza hoe: Mpanompo tsy mendrika sitraka izahay, fa izay nataonay dia adidinay rahateo!
11 Raha nizotra ho any Jerosalema i Jesoa, dia namaky faritany miolotra amin'i Samaria sy i Galilea.
12 Raha niditra tao amin'ny tanana anankiray Izy, dia nisy marary hoditra folo lahy nitsena Azy. Nijanona lavidavitra ihany izy folo lahy
13 sady niantsoantso hoe: Ry Jesoa Mpampianatra o, mamindra fo aminay!
14 Nahita azy ireo i Jesoa ka nanao taminy hoe: Ndeha miseho amin'ny mpisorona ianareo! Raha mbola teny an-dalana izy folo lahy, dia sitrana.
15 Ny anankiray, raha vao nahita fa sitrana, dia niverina ka niantsoantso nanome voninahitra an'Andriamanitra,
16 niankohoka teo an-tongotr'i Jesoa sady nisaotsaotra Azy; ary Samaritanina ralehilahy.
17 Dia niteny i Jesoa nanao hoe: Tsy folo lahy ve no sitrana? Ka aiza ny sivy?
18 Tsy nisy nahalala niverina nanome voninahitra an'Andriamanitra ve afa-tsy ity olona hafa firenena ity?
19 Ary dia hoy i Jesoa taminy: Mitsangana ka modia, ny finoanao no nahasitrana anao!
20 Ireo Farisianina indray kosa no nanontany an'i Jesoa hoe: Rahoviana no ho avy ny Fanjakan'Andriamanitra? Dia novaliany hoe: Tsy talaky maso ny fiavian'ny Fanjakan'Andriamanitra.
21 Tsy holazaina hoe: Inty eto izy, na hoe Iry ery, satria indro efa eo afovoanareo ny Fanjakan'Andriamanitra.
22 Ary hoy i Jesoa tamin'ny mpianany: Ho avy ny fotoana hanirianareo hahita anankiray amin'ny andro hiavian'ny Zanak'olona, kanefa tsy hahita ianareo.
23 Hisy hilaza aminareo hoe: Iry ery izy! na hoe Inty eto!, saingy aza mitotototo mankany.
24 Fa tahaka ny tselatra manelatra sady mahazava hatramin'ny faravodilanitra iray ka hatramin'ny faravodilanitra andaniny, ho toy izany ny Zanak'olona amin'ny androny hiaviany.
25 Alohan'izany anefa, dia tsy maintsy hijaly mafy Izy ary holavin'ny olona ankehitriny.
26 Toy izay nitranga tamin'ny andron'i Noa no ho tonga amin'ny andro hiavian'ny Zanak'olona.
27 Nihinana sy nisotro ary nampaka-bady sy nampakarina ny olona tamin'izay, mandra-pigadon'ny andro nidiran'i Noa tanatin'ny sambofiara: tonga ny safodrano ary nandringana azy rehetra.
28 Toy izay nitranga tamin'ny andron'i Lota ihany koa. Nihinana sy nisotro ny olona tamin'izay, nividy sy nivarotra, ary namboly sy nanorin-trano;
29 nefa tamin'ny andro nialan'i Lota tao Sodoma, dia nilatsaka toa oram-baratra avy any an-danitra ny afo aman-tsolifara ka nandevona azy rehetra.
30 Toy izany no ho tonga amin'ny andro hisehoan'ny Zanak'olona.
31 Amin'izany andro izany, izay eny an-tampon-trano, aoka tsy hidina hamory ny entany ao an-trano; ary toy izany koa izay any an-tsaha, aoka tsy hiverina any an-trano.
32 Tsarovy ny vadin'i Lota!
33 Izay mitady hitsitsy ny ainy no hahavery azy; fa izay manao vy very ny ainy no hahatahiry azy.
34 Lazaiko aminareo fa amin'izany alina izany, dia hisy roa lahy miara-misakafo: ka ny iray halaina, ny iray havela;
35 hisy roa vavy miara-mikoso-bary: ka ny iray halaina, ny iray havela; [
36 hisy roa lahy tafaraka eny an-tsaha: ka ny iray halaina, ny iray havela.]
37 Dia nanontanian'ny mpianany i Jesoa ka nataony hoe: Aiza moa, ry Tompo, no hitrangan'izany? Ka novaliany hoe: Izay misy ny faty no hifamotoanan'ny voromahery!
Toko faha-18
1 Nanaovan'i Jesoa fanoharana avy eo ny mpianany hanehoana fa tsy maintsy mivavaka lalandava, ka tsy tokony ho kivy na oviana na oviana.2 Hoy Izy hoe: Nisy mpitsara tsy nanan-tahotra an'Andriamanitra na hena-maso olona tao an-tanana anankiray izay.
3 Nisy koa tao amin'io tanana io vehivavy anankiray mpitondratena, niverimberina tao amin'ilay mpitsara nanao hoe: Omeo rariny amin'ilay miady amiko aho!
4 Elabe ilay mpitsara tsy niraika; nefa nony farany, dia nanao anakampo hoe: Marina tokoa fa raha izaho dia tsy manan-tahotra an'Andriamanitra na hena-maso olona.
5 Kanefa mandreraka ahy ny ataon-dravehivavy ity, ka homeko rariny izy mba tsy hiverimberina foana hanorisory ahy!
6 Ary hoy ny Tompo: Henoy kely ny ambaran'ilay mpitsara ratsy fanahy!
7 Ka dia Andriamanitra indray ve no tsy hanome rariny ny olom-boafidiny mitaraina andro aman'alina aminy? Ary hampiandry lava azy ireo ve Izy?
8 Lazaiko aminareo fa hanome rariny azy faingana Andriamanitra. Kanefa rahatrizay tonga ny Zanak'olona, moa hahita finoana eto an-tany ve Izy?
9 Nanao izao fanoharana izao kosa i Jesoa ho an'ireo olona natoky tena ho marina ka nanaratsy ny sasany:
10 Nisy olona roa lahy niakatra hivavaka teo an-kianjan'ny tempoly: ny anankiray Farisianina ary ny anankiray mpamory hetra.
11 Naka toerana ilay Farisianina ka nivavaka anakampony hoe: Andriamanitra o, misaotra Anao aho fa tsy mba tahaka ny olona sasany izay mpangalatra, tsy marina sady mpaka vadin'olona, na tahaka io mpamory hetra io aza.
12 Mifady hanina indro isan-kerinandro aho ary manolotra ny ampahafolon'izay azoko rehetra.
13 Ilay mpamory hetra kosa nijanona tery lavidavitra, tsy sahy niandrandra ny lanitra akory, fa nandondona ny tratrany matetika sady nanao hoe: Andriamanitra o, mba iantrao re aho, fa mpanota!
14 Izao no lazaiko aminareo: ity faharoa ity, fa tsy ilay voalohany, no nahazo fahamarinana avy tamin'Andriamanitra nony nody. Satria izay rehetra manandra-tena, dia haetrin'Andriamanitra; fa izay manetry tena, dia hasandratr'Andriamanitra.
15 Na ny zazakely mbola trotroina aza dia nentin'ny olona teo amin'i Jesoa mba hametrahany tanana. Hitan'ny mpianatra ireto olona ireto ka noteneniny mafy.
16 Nefa dia nasain'i Jesoa ho entina eo aminy ny zazakely sady hoy izy hoe: Avelao ny zazakely hanatona Ahy ary aza rarana, satria an'ny toa azy ireny ny Fanjakan'Andriamanitra.
17 Lazaiko marina aminareo fa na iza na iza tsy mandray ny Fanjakan'Andriamanitra toy ny andraisan'ny zazakely azy, dia tsy ho tafiditra ao.