Levitîka

Toko faha-8

⁵ dia nolazain'i Mosesy azy ny raharaha nasain'ny TOMPO hataon'ny tenany.

⁶ Ary nampanatonin'i Mosesy i Aharona sy ny zanany ka nampandroiny tamin'ny rano.

⁷ Dia nampiakanjoiny an'i Aharona ny akanjo lava anatiny sady noetrany fehikibo; avy eo nampiakanjoiny azy ny akanjo lava ivelany ary ny efoda no nataony teo amboniny, efoda izay nogiaziny tamin'ny fatorany ka natafiny azy.

⁸ Dia napetany taminy koa ny saron-tratra ka nasitriny tao ny Orima sy ny Tomima.

⁹ Napetrany teo an-dohany kosa ny lamba satro-doha; ary napetrany teo anoloan'ilay satro-doha ny takela-bolamena, marika famantarana fa voatokana ho an'ny TOMPO i Aharona, araka izay efa nandidian'ny TOMPO an'i Mosesy.

¹⁰ Ary naka ny menaka fanosorana i Mosesy, dia nanosotra sy nanokana ny Fonenan'Andriamanitra mbamin'ny zavatra rehetra tao anatiny.

¹¹ Namafazany menaka impito teo ambonin'ny alitara ary nohosorany menaka avokoa ny alitara sy ny fanaka momba azy ary ny fitobian-drano boribory mbamin'ny tongony mba ho voatokana ho an'Andriamanitra.

¹² Ary nandrotsahany menaka fanosorana teo amin'ny lohan'i Aharona; ka nohosorany i Aharona mba ho voatokana ho an'Andriamanitra.

¹³ Dia nampanatonin'i Mosesy koa ireo zanakalahin'i Aharona ka nampiakanjoiny akanjo lava sy noetrany fehikibo ary nametrahany satroboninahitra, araka izay efa nandidian'ny TOMPO azy.

¹⁴ Avy eo nasain'i Mosesy nentina ny ombilahy hatao sorona fanalana ny ota; ka i Aharona sy ny zanany no nametra-tanana teo amin'ny lohan'ilay ombilahy.

¹⁵ Novonoin'i Mosesy io ary nangalany ny ra ka notentenany tamin'ny fanondro ny tandroky ny alitara mba ho fanadiovana ny alitara manontolo; ary ny ra sisa dia naidiny teo am-pototry ny alitara: toy izany no nanokanan'i Mosesy ny alitara mba hahazoana manao fombam-pivavahana famelan-keloka eo amboniny.

¹⁶ Dia nalain'i Mosesy avokoa ny jaboran-tsinain'ilay ombilahy sy ny ila-atiny ary ny voany mbamin'ny fonomboany; ka nodorany hanetona teo ambonin'ny alitara.

¹⁷ Fa ny tenan'ny ombilahy kosa, izany hoe ny hodiny sy ny nofony ary ny dikin-drorohany, dia nodorana tany ivelan'ny toby, araka izay efa nandidian'ny TOMPO an'i Mosesy.

¹⁸ Dia nasain'i Mosesy nampanatonina koa ny ondrilahy hatao sorona dorana manontolo; ka i Aharona sy ny zanany no nametra-tanana teo amin'ny lohan'ny ilay ondrilahy.

¹⁹ Novonoin'i Mosesy io, ary ny rany dia nafafiny manodidina tamin'ny rindrin'ny alitara.

²⁰ Rehefa izany, nataony rasa vaventy ilay ondrilahy, ka nodorany hanetona ny lohany sy ny hena voarasa ary ny taviny;

²¹ nodorany hanetona koa ny tsinainy sy ny tongony rehefa avy nosasany. Indray nodorany hanetona teo ambonin'ny alitara ilay ondrilahy: sorona dorana manontolo izany, dia sorona levonina amin'ny afo ho hanitra ankasitrahina ho an'ny TOMPO, araka izay efa nandidiany an'i Mosesy.

²² Farany, nasain'i Mosesy nampanatonina ny ondrilahy faharoa, dia ilay ondrilahy hanaovana ny sorona fanokanana; ka i Aharona sy ny zanany no nametra-tanana teo amin'ny lohan'ilay ondrilahy.

²³ Novonoin'i Mosesy io, ary nangalany ny rany ka nanentenany ny tendron'ny ravin-tsofin'i Aharona ankavanana sy ny ankiben-tanany ankavanana sy ny ankiben-tongony ankavanana.

²⁴ Nasain'i Mosesy nanatona koa ny zanakalahin'i Aharona, ka samy notentenany ra ny tendron'ny ravin-tsofiny ankavanana sy ny ankiben-tanany ankavanana ary ny ankiben-tongony ankavanana; ny ra sisa kosa nafafin'i Mosesy manodidina tamin'ny lafin'ny alitara.

²⁵ Dia nalainy ny tavin-kenan'ilay ondrilahy, izany hoe ny hofany sy ny jaboran-tsinainy rehetra ary ny ila atiny sy ny voany mbamin'ny fanomboany, ary nalainy koa ny feny ankavanana.

²⁶ Ilay harona nasiany mofo tsy misy leviora, harona izay napetraka teo anatrehan'ny Toeramasin'ny TOMPO, dia nangalan'i Mosesy mofomamy anankiray tsy misy leviora, sy mofomamy anankiray voaisy menaka, ary mofo manify anankiray; ka nataony teo ambonin'ny tavin-kenan'ilay ondrilahy mbamin'ny feny ankavanana ireo mofo ireo.

²⁷ Dia napetrak'i Mosesy teo an-tanan'i Aharona sy ny zanany ireo rehetra ireo ary nasainy hatolony amin'ny TOMPO ka hahevaheva eo anatrehany no fomba fanolotra azy.

²⁸ Dia nalain'i Mosesy avy teo an-tanany indray ireo zavatra ireo ka nodorany hanetona teo ambonin'ny alitara niaraka tamin'ny sorona dorana manontolo: sorona fanokanana ho mpisorona izany, dia sorona levonina amin'ny afo ho hanitra ankasitrahina ho an'ny TOMPO.

²⁹ Dia nalain'i Mosesy koa ny tratran'ilay ondrilahy ary natolony tamin'ny TOMPO ka nahevahevany teo anatrehany no fomba fanolotra azy: anjaran'i Mosesy, avy amin'ilay ondrilahy nanaovana ny sorona fanokanana, io tratran-kena io araka izay efa nandidian'ny TOMPO azy.

³⁰ Ary nangalan'i Mosesy ny menaka fanosorana sy ny ra izay teo ambonin'ny alitara, dia nafafiny tamin'i Aharona sy ny zanany ary koa tamin'ny fanamiany ka samy voatokana ho an'Andriamanitra i Aharona sy ny zanany mbamin'ny fanamiany.

³¹ Ary hoy i Mosesy tamin'i Aharona sy ny zanany: -Andrahoy eo anoloan'ny varavaran'ny Tranolay fihaonana ny henan'ilay ondrilahy faharoa; ary eo no hihinananareo azy mbamin'ny mofo izay ao anatin'ny harona misy ny fanati-panokanana, araka izay nandidiako anareo.

³² Izay sisa tsy lany amin'ny hena sy ny mofo dia hodoranareo amin'ny afo.

³³ Ary tsy hiala eo anoloan'ny varavaran'ny Tranolay fihaonana ianareo mandritra ny fito andro, izany hoe mandra-pahatapitry ny andro fanokanana anareo, satria haharitra fito andro ny fanokanana anareo.

³⁴ Tahaka ny efa natao androany no voadidin'ny TOMPO hatao, mba hahazoanareo famelan-keloka.

³⁵ Eny, hitoetra fito andro aman'alina eo anoloan'ny varavaran'ny Tranolay fihaonana ianareo. Avy eo dia hanao ny fanompoana ny Tompo ianareo kanefa tsy ho faty. Izany no didy nomen'ny TOMPO ahy.

³⁶ Dia notanterahin'i Aharona sy ny zanany avokoa ny fepetra efa nandidian'ny TOMPO azy tamin'ny alalan'i Mosesy.

Toko faha-9

¹ Tamin'ny andro fahavalo, dia nampanalain'i Mosesy i Aharona sy ny zanany ary ny loholon'i Israely,

² ka hoy izy tamin'i Aharona: -Maka ianao ombilahikely anankiray hatao sorona fanalana ny ota sy ondrilahy anankiray hatao sorona dorana manontolo, dia ombilahikely sy ondrilahikely izay samy tsy misy kilema, ka atero eo anatrehan'ny Toeramasin'ny TOMPO.

³ Avy eo dia ny Israelita no ilazao hoe: Maka ianareo osilahy anankiray hatao sorona fanalana ny ota; maka ombilahikely sy ondrilahikely anankiray avy, samy iray taona sady tsy misy kilema, mba hatao sorona dorana manontolo;

⁴ ary maka ombilahy sy ondrilahy anankiray avy mba hovonoina ho sorom-pihavanana eo anatrehan'ny Toeramasin'ny TOMPO, miaraka amina fanatitra lafarinina voaharo menaka; fa anio no hisehoan'ny TOMPO aminareo.

⁵ Rehefa nentina teo anoloan'ny Tranolay fihaonana ny zavatra nandidian'i Mosesy, dia nanatona ny Fiangonan'ny Israelita tsivakivolo ka nijanona teo anatrehan'ny Toeramasin'ny TOMPO.

⁶ Ary hoy i Mosesy hoe: -Izao no zavatra nandidian'ny TOMPO anareo, ka ataovy; dia hiseho aminareo ny voninahitry ny Tompo.

⁷ Avy eo i Mosesy nilaza tamin'i Aharona hoe: -Manatona ny alitara, dia atolory ny anao ny sorona fanalana ny ota sy ny sorona dorana manontolo, ka ataovy ny fombam-pivavahana famelan-keloka ho an'ny tenanao sy ho an'ny vahoaka: atolory koa ny soron'ny vahoaka ary anaovy ny fombam-pivavahana famelan-keloka izy, araka izay nandidian'ny TOMPO.

⁸ Dia nanatona ny alitara i Aharona ka namono ny ombilahikely hatao fanalana ny ota ho an'ny tenany.

⁹ Ary nentin-janany ho eo amin'i Aharona ny ran'ilay ombilahikely; dia nanatsoboka ny fanondrony tamin'ny ra i Aharona, ka notentenany ny tandroky ny alitara; ary ny ra sisa dia naidiny teo am-pototry ny alitara.

¹⁰ Ny jaborany kosa sy ny voany roa ary ny ila atiny, avy tamin'ilay sorona fanalana ny ota, dia nodorany hanetona teo ambonin'ny alitara, araka izay nandidian'ny TOMPO an'i Mosesy;

¹¹ fa ny hena sy ny hoditra kosa nodorany tamin'ny afo teny ivelan'ny toby.

¹² Dia novonoin'i Aharona koa ny ondrilahy hatao sorona dorana manontolo; ka rehefa natolotr'ireo zanany azy ny ra, dia nafafiny tamin'ny lafin'ny alitara.

¹³ Ary ny sorona dorana manontolo voarasa sy ny lohany dia natolotr'ireo azy tsirairay, ka nodorana hanetona teo ambonin'ny alitara.

¹⁴ Rehefa voasasan'i Aharona koa ny tsinainy sy ny tongony, dia nodorany hanetona teo ambonin'ny alitara niaraka tamin'ny sorona dorana manontolo.

¹⁵ Avy eo dia natolotr'i Aharona tamin'ny TOMPO ireo soron'ny vahoaka; ka nalainy ny osilahy hatao sorona fanalana ny otan'ny vahoaka, dia novonoiny ary natolony ho fanalana ny ota, tahaka ny nataony tamin'ilay ombilahikely teo aloha.

¹⁶ Natolony koa ny ombilahikely sy ondrilahikely ho sorona dorana manontolo ka nataony araka ny fomba fanao.

¹⁷ Avy eo dia natolony ny fanatitra lafarinina ka nangalany eran-tanan'ila izay nodorany hanetona teo ambonin'ny alitara ankoatra ny sorona dorana manontolo fanolotra isa-maraina.

¹⁸ Farany, novonoin'i Aharona ny ombilahy sy ondrilahy izay nentin'ny vahoaka hatao sorom-pihavanana; dia natolotry ny zanany azy ny ra, ka nafafiny manodidina tamin'ny lafin'ny alitara.