Matio
Toko faha-18
26 Dia niantoraka sy niankohoka teo anoloan'ny mpanjaka ilay mpanompo sady nanao hoe: Mba omeo andro re aho fa haloako avokoa ny anao!27 Onena azy kosa ilay tompony ka namoy ny trosa taminy ary nandefa azy.
28 Vao tafavoaka anefa ilay mpanompo, dia tojo ity mpanompo namany izay nananany trosa denary zato. Noraisin'ilay mpampitrosa teo am-bozona izy, ka nokendainy sady nataony hoe: Aloavy izay trosako aminao.
29 Dia niantoraka teo anoloan'ilay mpampitrosa izy sady nifona taminy nanao hoe: Mba omeo andro re aho, fa haloako ny anao!
30 Tsy nety anefa ilay mpampitrosa fa lasa nampanao azy am-ponja mandra-pandoany ny trosa.
31 Nalahelo mafy ireo mpanompo namany nony nahita ny zava-nitranga, ka lasa nitantara izany rehetra izany tamin'ny tompony.
32 Dia nampanalain'ny tompony tamin'izay ilay mpanompo nananany trosa be ka noteneniny hoe: Mpanompo ratsy fanahy ianao! Efa nafoiko avokoa ny trosako taminao, noho ianao nifona tamiko.
33 Ka moa tsy tokony mba hamindranao fo koa ve ilay mpanompo namanao tahaka ny namindrako fo taminao?
34 Dia tezitra ny tompony ka nanolotra an'ilay mpanompo ratsy fanahy mba hatao am-ponja sy hampijalina mandra-pandoany ny trosany manontolo.
35 Dia nofaranan'i Jesoa hoe: Ho tahaka izany koa no hataon'ny Raiko Izay any an-danitra aminareo, raha tsy samy mamela ny havanareo amin'ny fonareo tokoa ianareo.
Toko faha-19
1 Rehefa nahavita izany anatranatra izany i Jesoa, dia niala tao Galilea ary nankany amin'ny faritra antsisin'i Jodea, eny andafin'ny ony Jordana.2 Vahoaka maro no nanaraka Azy ary nahasitrana ny marary teo i Jesoa.
3 Dia nisy Farisianina nanatona Azy mba hamandrika Azy ka nanontany hoe: Azon'ny lehilahy atao ve ny manary vady na inona na inona antony?
4 Dia izao no navalin'i Jesoa: Tsy mbola novakinareo tao amin'ny Soratra Masina ve fa ilay Mpahary, hatrany am-piandohana, dia nanao ny olona ho lahy sy vavy,
5 sady niteny hoe: noho izany, dia handao ny ray aman-dreniny ny lehilahy ka hikambana amin'ny vadiny, ary dia ho tena iray ihany izy roroa.
6 Koa tsy roa intsony rehefa mpivady fa tena iray ihany; noho izany, izay nakamban'Andriamanitra dia aoka tsy hosarahin'olombelona.
7 Fa hoy ireo Farisianina tamin'i Jesoa: Koa nahoana ary no nandidian'i Mosesy ny lehilahy hanome taratasy fisaraham-panambadiana ho an'ny vadiny rehefa hanary azy?
8 Dia novalian'i Jesoa hoe: Noho ianareo mafy fo no namelan'i Mosesy anareo hanary vady, fa tsy toy izany hatrany am-piandohana.
9 Izao kosa no lazaiko aminareo: na iza na iza lehilahy manary vady, afa-tsy noho ny fifandraisana mamoafady, ka mampakatra vehivavy hafa, dia manitsakitsaka ny vadiny teo aloha.
10 Ary ny mpianatra kosa niteny tamin'i Jesoa hoe: Raha izany no takina amin'ny lehilahy manoloana ny vadiny, dia aleo tsy manambady!
11 Fa novaliany hoe: Tsy ny olona rehetra no mandray izany fampianarana izany, fa izay nomen'Andriamanitra fahasoavana ihany.
12 Eny, misy olona tsy hanambady noho ny antony samihafa: ao ny tsy manambady, satria manan-kilema hatrany an-kibon-dreniny; ao ny tsy manambady, satria noterena hahazo takaitra; ary ao ny tsy manambady an-tsitrapo noho ny Fanjakan'ny lanitra. Izay afa-mandray izany, aoka handray!
13 Tamin'izay dia nisy ankizy madinika maro nentin'ny olona teo amin'i Jesoa hametrahany tanana sy hivavahany. Notenenin'ny mpianatra mafy ireo olona ireo,
14 fa hoy kosa i Jesoa: Avelao ny ankizy madinika hanatona Ahy, fa aza rarana, satria an'ny toa azy ireny ny Fanjakan'ny lanitra.
15 Dia nametra-tanana tamin'ireo ankizy madinika ireo i Jesoa vao niala teo.
16 Ary indro nisy tovolahy nanatona an'i Jesoa ka nanao taminy hoe: Mpampianatra o, inona no tsara tokony hataoko hahavelona aina ahy mandrakizay?
17 Dia hoy i Jesoa taminy: Nahoana Aho no anontanianao ny amin'izay tsara? Tokana no tsara tapitra ohatra. Raha te hiroso amin'ny fiainana kosa ianao, dia tandremo ny didy!
18 Fa hoy ilay zatovo taminy: Didy sahala amin'inona moa izany? Ka izao no navalin'i Jesoa: Ny didy sahala amin'ny hoe: Aza mamono olona, aza maka vadin'olona, aza mangalatra, aza manao vavolombelona tsy marina;
19 hajao ny rainao sy ny reninao, ary tiavo ny namanao tahaka ny itiavanao ny tenanao!
20 Dia hoy ilay zatovo taminy: Izany rehetra izany dia efa voatandriko; ka inona no mbola tsy ampy amiko?
21 Ary i Jesoa nanao taminy hoe: Raha te ho velona aina tanteraka ianao, ndeha amidio ny fanananao ka zarao amin'ny mahantra ny vidiny, dia hanana rakitra any an-danitra ianao; raha efa izany, dia avia hiaraka amiko!
22 Nony nandre izany teny izany ilay zatovo, dia lasa nandeha tamin'alahelo, satria nanan-karem-be.
23 Tamin'izay i Jesoa dia niteny tamin'ny mpianany hoe: Lazaiko marina aminareo fa sarotra amin'ny mpanankarena ny hiditra ao amin'ny Fanjakan'ny lanitra.
24 Ary hoy koa Aho aminareo: moramora kokoa ny hidiran'ny rameva ao amin'ny vodifanjaikely noho ny hidiran'ny mpanankarena ao amin'ny Fanjakan'Andriamanitra!
25 Talanjona tokoa ny mpianatra raha nandre izany ka vaky vava hoe: Iza ary no mety ho voavonjy?
26 Fa nojeren'i Jesoa tsara ireto mpianany sady nataony hoe: Raha amin'ny olombelona, dia zavatra tsy hainy izany; fa raha amin'Andriamanitra, dia hainy avokoa ny zavatra rehetra.
27 Tamin'izay i Petera dia niteny tamin'i Jesoa hoe: Indro izahay efa nahafoy ny zavatra rehetra, ary dia izao miaraka aminao izao; ka inona ary no ho azonay?
28 Dia hoy i Jesoa tamin'ny mpianany: Lazaiko marina aminareo fa rehefa hohavaozina tanteraka izao tontolo izao ka hipetraka eo amin'ny sezafiandrianany be voninahitra ny Zanak'olona, ianareo 12 lahy niaraka tamiko dia samy hipetraka amina sezafiandrianana mba hitsara ny foko 12 amin'i Israely.
29 Ary izay rehetra mahafoy trano na mpiray tampo na ray aman-dreny na zanaka na tany noho ny fitiavana Ahy dia hahazo injato henin'izany ary hanana anjara amin'ny fiaina-maharitra mandrakizay.
30 Maro amin'ireo voalohany no ho farany, ary maro amin'ireo farany no ho voalohany.
Toko faha-20
1 Fa ny Fanjakan'ny lanitra dia tahaka ny amin'ity lehilahy anankiray tompona tanimboaloboka. Niainga vao maraina be ralehilahy hanakarama mpiasa ho any an-tanimboalobony.2 Ka rehefa nifanekeny denary anankiray avy isan'andro ireo mpiasa, dia nirahiny hiasa any an-tanimboalobony.
3 Niainga indray izy tamin'ny sivy maraina ka nahita mpiasa hafa nidonana-poana teo an-kianja
4 ary niteny taminy hoe: Ndeha koa ianareo miasa any an-tanimboaloboko fa homeko izay karama ara-drariny. Dia nankany ireo.
5 Niainga koa izy tamin'ny 12 antoandro sy tamin'ny telo tolakandro, ary dia nanao toy izany.
6 Niainga farany izy tamin'ny dimy hariva ka mbola nahita mpiasa hafa nidonana-poana ary nanontany azy hoe: Nahoana ianareo no midonana-poana eto mandritra ny andro tontolo?
7 Fa hoy ireo taminy: Satria tsy nisy nanakarama anay! Dia hoy ralehilahy taminy: Ndeha koa ianareo miasa any amin'ny tanimboaloboko.
8 Nony hariva ny andro, dia hoy ny tompon'ilay tanimboaloboka tamin'ny mpitandrim-pananany hoe: Antsoy ny mpiasa ary aloavy ny karamany, ka aseseo avy amin'ireo nilatsaka farany ka hatramin'ireo nilatsaka voalohany.
9 Dia tonga ireo nilatsaka tamin'ny dimy hariva ka nandray denary anankiray avy.
10 Tonga kosa ireo nilatsaka voalohany ary nanampo handray bebe kokoa, kanjo denary anankiray avy ihany koa no voarainy.