Matio

Toko faha-15

²⁰ Izany no mahaloto ny olona; fa ny mihinana tsy misasa tanana, tsy mba mahaloto ny olona.

²¹ Dia niala teo i Jesoa ary nankany amin'ny faritanin'i Tiro sy i Sidona.

²² Ary indro nisy vehivavy kanahanita, avy amin'izany faritany izany, tonga teo amin'i Jesoa sady niantsoantso mafy hoe: Mamindra fo amiko, ry Tompo, Zanak'i Davida o; fa ampahorin'ny demony mafy loatra ny zanako vavy!

²³ Tsy namaly teny azy i Jesoa, ka nohatonin'ny mpianany ary nangatahany hoe: Omeo an-dramatoa io izay tadiaviny, satria miantsoantso mafy manjohy antsika izy.

²⁴ Fa novalian'i Jesoa hoe: Tsy nirahina Aho afa-tsy amin'ireo ondry very, dia ny vahoaka Israely!

²⁵ Tonga niankohoka teo anatrehan'i Jesoa anefa ravehivavy ka nanao hoe: Tompo o, ampio re aho!

²⁶ Dia novalian'i Jesoa hoe: Tsy mety raha mofon-jaza no alaina ka atsipy ho an'ny amboakely.

²⁷ Fa hoy kosa ravehivavy: Marina izany, Tompoko, kanefa na ny amboakely aza dia mba mihinana ny sombintsombiny latsaka avy amin'ny latabatry ny tompony ihany.

²⁸ Tamin'izay dia niteny i Jesoa nanao taminy hoe: Lehibe ny finoanao, ramatoa; aoka ho tonga aminao araka izay irinao. Ary nanomboka tamin'io ora io dia sitrana ilay zanany vavy.

²⁹ Niainga avy teo i Jesoa dia lasa nankany amoron'ny farihin'i Galilea, ary niakatra nankeo an-tendrombohitra ka nipetraka teo.

³⁰ Ary nisy vahoaka betsaka nanatona Azy sady nitondra ny mandringa, ny jamba, ny kilemaina, ny moana, mbamin'ny maro hafa koa; napetraka teo an-tongotr'i Jesoa ireo marary ireo ka nositraniny.

³¹ Gaga ny vahoaka raha nahita ny moana niteny, ny kilemaina nanjary tomady, ny mandringa nandeha tsara sy ny jamba nahiratra, ka dia nanome voninahitra an'ilay Andriamanitr'i Israely.

³² Dia nantsoin'i Jesoa ny mpianany hankeo aminy ka nilazany hoe: Mahonena Ahy ireto vahoaka, satria efa telo andro izao no teto amiko, ka tsy manan-kohanina intsony; ary tsy tiako halefa mody tsy misakafo, fandrao reraka eny an-dalana.

³³ Dia hoy ny mpianatra taminy: Aiza no hahitantsika mofo hahavoky vahoaka be toy izao aty an-taniefitra aty?

³⁴ Hoy kosa i Jesoa tamin'ny mpianany: Misy mofo firy any aminareo? Dia novaliany hoe: Fito, ary koa trondro madinika vitsivitsy!

³⁵ Dia nasain'i Jesoa nipetraka tamin'ny tany ireto vahoaka.

³⁶ Ary noraisin'i Jesoa ny mofo fito sy ny trondro; ka rehefa avy nisaotra an'Andriamanitra Izy, dia nanapaka ny mofo sy ny trondro ary nanome azy ny mpianatra; ny mpianatra kosa nandroso izany tamin'ny vahoaka.

³⁷ Dia samy nihinana avokoa izy rehetra ka voky. Ary nangonina ny tapa-mofo aman-trondro ambiny ka nahafeno harona fito.

³⁸ Nefa dia efatra arivo ny vatan-dehilahy nihinana teo, afa-tsy ny zaza amam-behivavy.

³⁹ Dia nalefan'i Jesoa hody ny vahoaka. Avy eo niondrana an-tsambokely Izy ary lasa nankany amin'ny faritany atao hoe Magadana.

Toko faha-16

¹ Dia nohatonin'ny Farisianina sy ny Tsadoseanina i Jesoa. Te hamandrika Azy ry zareo ka nangataka Azy hanao famantarana ho porofo fa avy amin'Andriamanitra ny fahefany.

² Izao kosa no tenin'i Jesoa taminy: [ Nony hariva ny andro, dia hoy ianareo hoe: Ho tsara ny andro fa mena midorehitra ny lanitra.

³ Ary nony maraina ny andro, dia hoy ianareo hoe: Ho ratsy ny andro anio fa mena antitra ny lanitra. Hainareo vinavinaina ny toetoetry ny lanitra, ka tsy hainareo vinavinaina ve ireo famantarana momba izao andro diavintsika izao?]

⁴ Ratsy fanahy sady mpivadika amin'Andriamanitra ny olona ankehitriny: fatra-pitady famantarana nefa tsy homena famantarana afa-tsy ilay momba an'i Jona mpaminany! Dia nandao azy ireo i Jesoa ka lasa nandeha.

⁵ Raha niainga hiampita ny rano ireo mpianatra, dia nanadino ny nitondra mofo;

⁶ ary hoy i Jesoa taminy: Mba malina ka mitandrema tsy ho voan'ny levioran-dry zareo Farisianina sy Tsadoseanina.

⁷ Fa iretsy mpianany kosa niady hevitra nifampilaza hoe: Noho isika tsy nitondra mofo angaha izany!

⁸ Tsikaritr'i Jesoa izany ka hoy Izy: Ry kely finoana, nahoana ianareo no miady hevitra ny amin'ny tsy nitondranareo mofo?

⁹ Mbola tsy takatrareo foana ve? Tsy tsaroanareo ve ny mofo dimy ho an'ny vatan-dehilahy dimy arivo ary ny hamaroan'ireo sobika feno nentinareo nody?

¹⁰ Tsy tsaroanareo ve ny mofo fito ho an'ny vatan-dehilahy efatra arivo ary ny hamaroan'ireo harona feno nentinareo nody?

¹¹ Ka ahoana no tsy ahatakaranareo fa tsy mofo no tiako hambara, fony Izaho nilaza taminareo hoe: Mitandrema tsy ho voan'ny levioran-dry zareo Farisianina sy Tsadoseanina?

¹² Izay vao azon'ny mpianatra fa tsy ny leviora fampiasa amin'ny mofo no nasain'i Jesoa hitandremany tena fa ny fampianaran-dry zareo Farisianina sy Tsadoseanina.

¹³ Dia lasa nankany amin'ny faritany manodidina ny tanana atao hoe Kesaria-Filipo ry i Jesoa; ary nanontany ny mpianany Izy nanao hoe: Iza moa ny Zanak'olona, araka ny filazan'ny olona Azy?

¹⁴ Dia novalian'ny mpianany hoe: Misy manao hoe i Johany Mpanao batisa; ny sasany kosa manao hoe i Elia; ary ny hafa indray manao hoe i Jeremia na anankiray amin'ireo mpaminanin'Andriamanitra. Ary hoy i Jesoa taminy:

¹⁵ Fa ianareo kosa, Iza moa Aho aminareo?

¹⁶ Dia novalian'i Simona Petera hoe: Ianao no ilay Mesia, ny Zanak'ilay Andriamanitra velona!

¹⁷ Ary niteny tamin'i Petera i Jesoa nanao hoe: Sambatra ianao, ry Simona zanakalahin'i Jona, satria tsy olombelona nofo aman-dra no nanambara izany taminao fa ny Raiko Izay any an-danitra.

¹⁸ Izaho koa milaza aminao fa ianao no Vato, ary eo ambonin'izany vatolampy izany no hanorenako ny Fiangonako; ary ny herin'ny fahafatesana tsy hahatohitra ny Fiangonako.

¹⁹ Homeko anao ny fanalahidin'ny Fanjakan'ny lanitra: ka na inona na inona hofehezinao ety an-tany dia ho voafehy koa any an-danitra; ary na inona na inona hovahanao ety an-tany dia ho voavaha koa any an-danitra.

²⁰ Tamin'izay dia nofeperan'i Jesoa ny mpianany mba tsy hilazalaza na amin'iza na amin'iza fa hoe Izy no ilay Mesia.

²¹ Hatramin'io fotoana io i Jesoa dia nanomboka nilaza mazava tamin'ny mpianany hoe: Tsy maintsy hankany Jerosalema Aho ka hataon'ny loholona sy ny lohandoha-mpisorona ary ny mpahay lalana mijaly mafy tokoa, dia hovonoina ho faty; nefa hitsangana velona amin'ny andro fahatelo.

²² Fa i Petera kosa nitondra an'i Jesoa hihataka kely sady niteny Azy mafy hoe: Sanatria aminao izany, ry Tompo! Tsy hihatra aminao velively izany!

²³ Dia nitodika i Jesoa ary nanao tamin'i Petera hoe: Miala amiko, ry Satana! Ndeha atsy aoriako! Mitarika Ahy amin'ny ratsy ianao, satria tsy hevitr'Andriamanitra no ao an-tsainao fa hevitr'olombelona.

²⁴ Avy eo dia hoy i Jesoa tamin'ireo mpianany: Raha misy te hiara-dia amiko, dia aoka izy handa ny tenany ka hitondra ny hazofijaliany ary hiaraka amiko.

²⁵ Fa izay te hamonjy ny ainy no hahavery azy; ary izay hahafoy ny ainy noho ny fitiavany Ahy kosa no hahavonjy azy.

²⁶ Fa inona no soa azon'ny olona raha eo am-pelatanany avokoa izao tontolo izao, kanefa ny ainy mitondra faisana? Ary inona no azon'ny olona omena ho takalon'ny ainy?

²⁷ Eny, rahatrizay ny Zanak'olona ho avy omban'ny voninahitra homen'ny Rainy sady otronin'ireo anjeliny, dia samy hovaliany araka ny nataony avy ny isam-batan'olona.

²⁸ Lazaiko marina aminareo fa ny sasany amin'izay manatrika eto dia tsy ho faty raha tsy efa mahita ny Zanak'olona tonga amin'ny maha mpanjaka Azy.

Toko faha-17

¹ Enina andro taorian'izay, dia nalain'i Jesoa niaraka taminy ry i Petera mbamin-dry i Jakoba sy i Johany mirahalahy, ka nentiny nitokana tany an-tendrombohitra avo anankiray.

² Dia niova tarehy teo anatrehan'izy telo lahy i Jesoa: namirapiratra tahaka ny masoandro ny tavany ary tonga fotsy tahaka ny hazavana ny fitafiany.