Matio

Toko faha-20

¹¹ Teo am-pandraisana izany, dia nimonomonona tamin'ny tompon'ilay tanimboaloboka ireto mpiasa ireto

¹² nanao hoe: Ireo nilatsaka farany ireo dia ora iray monja no niasany, kanefa nampitovinao karama aminay nisasatra nandritra ny andro sady niaritra ny hafanana.

¹³ Dia novalian'ilay tompon'ny tanimboaloboka ny anankiray tamin'ireo ka nilazany hoe: Ry sakaiza, tsy manao zavatra tsy an-drariny aminao aho. Moa tsy denary anankiray ve no nifanekenao tamiko?

¹⁴ Raiso ny anao, dia mandehana; fa ilay nilatsaka farany dia tiako homena toraka ny anao koa.

¹⁵ Tsy azoko anaovana izay tiako ve ny fananako? Sa mialona ianao satria mazava fo aho?

¹⁶ Dia nofaranan'i Jesoa hoe: Dia toy izany, ny farany ho voalohany ary ny voalohany ho farany!

¹⁷ Tamin'i Jesoa niakatra ho any Jerosalema dia nalainy nitokana ny mpianatra 12 lahy ka teny am-pandehanana no nilazany hoe:

¹⁸ Indro miakatra ho any Jerosalema isika. Ary ny Zanak'olona dia hatolotra an'ireo lohandoha-mpisorona sy mpahay lalana ka hohelohiny ho faty;

¹⁹ ry zareo kosa hanolotra Azy amin'ny hafa firenena mba hoesoiny sy hokapohiny ary hohomboany amin'ny hazofijaliana. Kanefa hitsangana velona Izy amin'ny andro fahatelo.

²⁰ Tamin'izay dia nanatona an'i Jesoa ny vadin'i Zebedeo mbamin'ireo zanany lahy. Sady niankohoka nanoloana Azy ravehivavy no nangata-javatra taminy.

²¹ Ka hoy i Jesoa tamin-dravehivavy: Inona no irinao? Dia novaliany hoe: Omeo teny ireto zanako roa lahy ireto fa hipetraka eo ankavananao ny anankiray ary eo ankavianao ny anankiray, rehefa tonga mpanjaka Ianao.

²² Fa hoy i Jesoa: Tsy fantatrareo mirahalahy izay angatahinareo; vitanareo ve ny hiaritra fijaliana tahaka ny hiaretako? Dia novalian'izy mirahalahy hoe: Vitanay!

²³ Ary hoy i Jesoa tamin'izy roa lahy: Ny fijaliana hiaretako, dia hiaretanareo tokoa; fa izany hoe hipetraka eo ankavanako sy eo ankaviako izany kosa dia tsy miankina amiko, fa ho an'izay nanomanan'ny Raiko azy!

²⁴ Nony nandre izany izy folo lahy, dia tezitra tamin'i Jakoba sy i Johany.

²⁵ Fa nantsoin'i Jesoa izy rehetra ka nilazany hoe: Fantatrareo fa, eo amin'ny hafa firenena, ny filoha dia manjakazaka; ary ny lehibe dia manampatra fahefana.

²⁶ Tsy mba toy izany kosa eo aminareo; fa na iza na iza te ho lehibe eo aminareo dia ho mpanomponareo;

²⁷ ary na iza na iza te ho voalohany eo aminareo dia ho mpiasanareo.

²⁸ Dia tahaka ny Zanak'olona izany: tsy hotompoina manko no nahatongavany fa hanompo ary hanolotra ny ainy ho fanavotana ny besinimaro!

²⁹ Nony niala tao Jerikao i Jesoa mbamin'ny mpianany, dia nisy vahoaka betsaka nanaraka an'i Jesoa.

³⁰ Ary indreo nisy jamba roa lahy nipetraka teo amoron-dalana. Reny fa hoe i Jesoa no nandalo, ka niantsoantso mafy izy roa lahy nanao hoe: Ry Tompo, Zanak'i Davida o, mamindra fo aminay!

³¹ Norahonan'ny vahoaka izy roa lahy hangina, kanefa vao mainka koa niantsoantso mafy hoe: Ry Tompo, Zanak'i Davida o, mamindra fo aminay!

³² Dia nijanona i Jesoa sady niantso azy roa lahy ka nanao hoe: Inona no tianareo hataoko aminareo?

³³ Ary hoy ireo taminy: Tompo o, ny mba hampahiratra ny masonay!

³⁴ Onena i Jesoa ary nikasika ny mason'ireto jamba. Dia nahiratra niaraka tamin'izay izy roa lahy, ka lasa nanaraka an'i Jesoa.

Toko faha-21

¹ Ary nanakaiky an'i Jerosalema i Jesoa mbamin'ny mpianany sy ny vahoaka tafaraka taminy, ka tonga teo anilan'ny tanana Betifage, eo amin'ny tendrombohitra atao hoe Analanoliva. Dia naniraka roa lahy tamin'ny mpianany i Jesoa ka nanao taminy hoe:

² Mankanesa amin'itsy tanana manoloana anareo itsy. Vantany vao migadona ao ianareo, dia hahita boriky vavy mifatotra sy ny zanany miaraka aminy: vahao ilay boriky vavy dia ento aty amiko omban-janany.

³ Ary raha misy olona manontany anareo, dia valio hoe: Misy ilan'ny Tompo azy! Dia havelany hoentinareo miaraka amin'izay ny boriky vavy sy ny zanany.

⁴ Izany dia tonga mba ho tanteraka ilay voalazan'ny Tompo tamin'ny alalan'ny mpaminany hoe:

⁵ Izao lazaina amin'ny mponina ao Tsiona: Indro ny mpanjakanareo fa tonga eo aminareo, feno halemem-panahy sady mitaingina boriky vavy dia boriky vavy omban-janany, zanaky ny mitondra zioga.

⁶ Dia nandeha ireto mpianatra ka nanao araka ny nandidian'i Jesoa azy.

⁷ Nentin'izy roa lahy ny boriky vavy omban-janany; ary ny mpianatra rehetra dia samy nametraka ny lambany teo ambonin'ny boriky vavy omban-janany, ka tambony lamba i Jesoa no nitaingina.

⁸ Be tokoa ny vahoaka namelatra ny lambany teny amin'ny lalan'i Jesoa; ny sasany kosa rantsan-kazo tinapaka no naparitany teny amin'ny lalan'i Jesoa.

⁹ Ary ny vahoaka izay nialoha Azy sy izay nanaraka dia samy niantsoantso hoe: Dera anie ho an'ny Zanak'i Davida! Hombam-pitahiana amin'ny anaran'ny Tompo anie Ilay avy! Dera anie ho an'Andriamanitra any amin'ny avo indrindra!

¹⁰ Ary nony efa tafiditra tao Jerosalema i Jesoa, dia nihotakotaka avokoa ny iray tanana ka nanontany hoe: Iza moa io lehilahy io?

¹¹ Dia novalian'ny vahoaka hoe: Io no Jesoa mpaminany, Izay avy any Nazareta tananan'i Galilea!

¹² Dia namantana tao an-kianjan'ny tempoly i Jesoa; ka ireo mpivarotra sy mpividy teo dia noroahiny avokoa, ny latabatr'ireo mpanakalo vola sy ny sezan'ireo mpivaro-boromahailala nazerany;

¹³ ary hoy i Jesoa tamin'ireo olona ireo: Izao no voalazan'ny Soratra Masina: Ny tranoko dia hantsoina hoe trano fivavahana. Nefa he ity izy ataonareo zohy fieren'ny mpangalatra!

¹⁴ Ary nisy jamba sy mandringa nanatona an'i Jesoa tao an-kianjan'ny tempoly ka dia nositraniny.

¹⁵ Fa tezitra mafy kosa ireo lohandoha-mpisorona sy ireo mpahay lalana nony nahita ny zava-mahagaga nataony sy nahita ny ankizy madinika niantsoantso tao an-kianjan'ny tempoly hoe: Dera anie ho an'ny Zanak'i Davida!

¹⁶ Ka hoy ry zareo tamin'i Jesoa: Renao ve izay lazain'ireo? Dia novaliany hoe: Eny, reko tokoa! Sady tsy mbola novakinareo ve ny andinin'ny Soratra Masina hoe: Ny vavan'ny ankizy madinika aman-jaza minono avy no nataonao hahazoan-dera?

¹⁷ Dia nilaozan'i Jesoa ry zareo; ary niala tao an-tanana Izy hankany Betania, ka nandry tany.

¹⁸ Dia niverina maraina ho any an-tanana i Jesoa ary nahatsiaro noana.

¹⁹ Nahatazana aviavy anankiray teo amoron-dalana Izy, dia lasa nankeo; kanjo tsy nahita na inona na inona teo aminy afa-tsy raviny fotsiny. Dia hoy i Jesoa tamin'ilay aviavy: Tsy hamoa intsony ianao na oviana na oviana! Ary vetivety foana dia maina ilay aviavy.

²⁰ Gaga ny mpianatra nahita izany ka vaky vava hoe: Ahoana re no nahamaina vetivety io aviavy io?

²¹ Dia novalian'i Jesoa hoe: Izao no lazaiko marina aminareo; raha manam-pinoana ianareo ka tsy misalasala, dia tsy izao nataoko tamin'ny aviavy izao ihany no ho vitanareo, fa na itsy tendrombohitra itsy aza hitenenanareo hoe: Miala eo ary mianjera any an-dranomasina, dia ho tonga izany.

²² Raha mino ianareo, na inona na inona hangatahinareo amin'ny fivavahana dia ho azonareo avokoa.

²³ Nony tafiditra tao an-kianjan'ny tempoly i Jesoa, dia nampianatra. Ary nanatona Azy ny lohandoha-mpisorona sy ny loholon'ny vahoaka jiosy ka nanontany Azy hoe: Fahefana ahoana moa no anaovanao an'izao? Ary iza no nanome anao izany fahefana izany?

²⁴ Dia novalian'i Jesoa hoe: Izaho koa mba hanontany anareo zavatra anankiray monja; ka raha omenareo valiny Aho, dia holazaiko anareo koa ny fahefana anaovako an'izao zavatra izao.

²⁵ Iza no naniraka an'i Johany hanao batisa, Andriamanitra sa olombelona? Dia velona ady hevitra ry zareo ka nifampiresaka hoe: Raha lazaintsika hoe: Andriamanitra no naniraka azy, dia isika no hataony hoe: Koa nahoana no tsy ninoanareo i Johany?

²⁶ Raha lazaintsika hoe: Olombelona no naniraka azy, dia ny vahoaka no atahorantsika satria nankatoavin'izy rehetra ho mpaminanin'Andriamanitra i Johany.