Bena-Siràka

Toko faha-46

¹⁹ Talohan'ny fotoanandron'ny torimasom-pahafatesana dia nanao fanambarana ampahibemaso i Samoela teo anatrehan'ny Tompo sy ilay mpanjaka voahosony; ka hoy izy hoe: "Tsy mba nisy olona na iza na iza nakako zavatra, na dia ny kapany ihany aza. "Tsy nisy rahateo olona nanome tsiny an'i Samoela.

²⁰ Rehefa nodimandry aza izy, dia mbola naminany ihany ka nilaza tamin'ny mpanjaka ny hahafatesany; avy any an-kibon'ny tany koa izy no nanandra-peo ka naminany mba hamongorana ny heloky ny vahoaka.

Toko faha-47

¹ Manaraka an'i Samoela, dia niseho i Natana mba ho mpaminany tamin'ny andron'i Davida.

² Toy ny fanavahana ny jabora tamin'ny sorom-pihavanana no nanavahana an'i Davida teo amin'ny Israelita.

³ Kilalao ho azy ny miatrika liona na orsa moa va tsy ny mandray osikely na ondrikely.

⁴ Mbola tanora izy no namono ilay lehilahy goavana, ka nanaisotra ny latsa tamin'ny vahoaka israelita; nahodiny mirimorimo ny antsamotady nisy vato ka nahalavo an'i Goliata mpirehaka.

⁵ Nantsoin'i Davida ny TOMPO Avo Indrindra ka nanome tanjaka ny tanany ankavanana mba hamono hahafaty an'ilay mpiady kinga sy hanandratra ny herin'ny fireneny.

⁶ Izany no nanomezam-boninahitra an'i Davida tamin'ny famonoany fahavalo an'alinalina; tao anatin'ny fisaorana ny Tompo no niderana azy, ary dia natolotra azy ny diademam-piandrianana.

⁷ Nataony ringana hatraiza hatraiza ny fahavalo ary nomontsaniny ny Filistinina mpanohitra azy ka nopotehiny mandraka androany ny heriny.

⁸ Tamin'ny asa rehetra nataon'i Davida, dia teny fiderana no nanolorany haja an'ilay Masina sady Avo Indrindra; tamin'ny fony manontolo no nihirany salamo sy nitiavany an'Ilay Mpahary azy.

⁹ Nanendry antoko-mpihira teo anoloan'ny alitara izy, ka feon-kira mahafinaritra no nampandrenesin'ireny.

¹⁰ Nomeny endrika manetriketrika ny fety ary narindrany ho tapitra ohatra ny fankalazana mba hideran'ny olona ny anara-masin'ny Tompo sy hampanakoako ny Toeramasina dieny vao maraina.

¹¹ Ny Tompo kosa namela ny fahotan'i Davida sy nanandratra ny fahefany ho mandrakizay ary nanome azy ny taranaka ho mpanjaka mifanesy mbamin'ny sezafiandrianana be voninahitra eo amin'i Israely.

¹² Manaraka an'i Davida, dia niseho ilay zanany hendry izay niaina tanaty faritra malalaka, noho ny amin-drainy.

¹³ Nanjaka tamin'ny androm-piadanana i Salomona satria nomen'Andriamanitra fitsaharana izy teo amin'ny sisin-tany rehetra manodidina, mba hanaovany trano voatokana ho an'ny anarany sy hanamboarany Toeramasina mandrakizay.

¹⁴ Endrey ny fahendrenao, ry Salomona, fony ianao mbola tanora; endrey izato ianao feno fahalalana tahaka ny ony feno rano!

¹⁵ Nitatra manerana ny tany ny fahiratan-tsainao; nofenoinao ohabolana sy ankamantatra ny sehatra rehetra.

¹⁶ Ny lazanao tonga hatrany amin'ny nosy lavitra; ary ny fiadanana omenao no nitiavan'ny olona anao.

¹⁷ Nigagan'ny tany samihafa ianao noho ny hiranao masina sy ny ohabolanao ary ny fanoharanao sy ny valin-teninao.

¹⁸ Araka ny anaran'Andriamanitra mendri-kaja izay nantsoina tamin'ny vahoaka Israely no nanomezana anarana anao. Nanangona volamena tahaka ny fanangona fira-potsy ianao ary nanavosa volafotsy tahaka ny fanavosa firaka.

¹⁹ Kanefa nanaram-po tamin'ny vehivavy ianao ary nitolo-batana handevozin'izy ireny.

²⁰ Izany no nanisy pentina ny voninahitrao sy nandotoanao ny voninahitr'ireo taranakao ka nahatonga ny fahatezeran'Andriamanitra taminy. Nampangirifiry azy tokoa ny fahadalanao,

²¹ satria lasa nivaky roa ny fanjakanao; ka avy amin'ny fokon'i Efraima no nipoiran'ilay fanjakana nikomy.

²² Kanefa ny TOMPO tsy nampitsahatra ny famindrampony ary tsy namela ny fampanantenany ho foana; tsy namongotra ny taranak'ilay voafidiny Izy, ary tsy nahalany tamingana an'ilay tia Azy. Nisy sisa velona navelany teo amin'ny taranak'i Jakoba, toy izany koa no nanomezany an'i Davida solofo avy aminy.

²³ Dia nodimandry i Salomona ka tafaraka amin'ny razany; ary ny mpanjaka nanarakaraka azy dia anankiray tamin'ireo zaza navelany, dia i Rehabohama izay nampikomy vahoaka tamin'ny fanapahan-kevitra nataony. Manam-be izy io ny amin'ny fahadalana fa mahantra ny amin'ny fahiratan-tsaina. Tao kosa i Jerobohama, zanakalahin'i Nebata. Notarihiny hanota ny foko israelita tavaratra ary lalam-pahotana no natorony ho an'ny fanjakan'i Efraima.

²⁴ Dia nitombo aoka izany ny fahotan'ireo ka nentin-ko babo lavitra ny taniny izy;

²⁵ haratsiana isan-karazany no nivarinany ambara-piavin'ny famaizan'Andriamanitra taminy.

Toko faha-48

¹ Taorian'izany no nisehoan'i Elia, ilay mpaminany mirehidrehitra hoatra ny afo; nandoro tahaka ny harendrina ny teniny.

² Nantsoiny ny mosary hamely ireo foko tavaratra; ary fatratra tokoa ny fitiavany ny Tompo, hany ka nahavitsy isa ny vahoaka izy.

³ Tamin'ny baikon'ny TOMPO no nisakanany ny orana ary koa nampilatsahany afo intelo avy any an-danitra.

⁴ Voninahitra manao ahoana, ry Elia, no azonao tamin'ny zava-mahagaga vitanao! Iza no afaka hihambo ho mitovy aminao?

⁵ Tamin'ny baikon'ilay Avo Indrindra no nampitsangananao ny maty anankiray hiala amin'ny fahafatesana indray sy ho afaka amin'ny toeran'ny maty.

⁶ Ny mpanjaka navarinao ho amin'ny faharavana ary ny manamboninahitra nampidininao avy eo am-pandriany mba ho any am-pasana.

⁷ Tany Sinay, teo amin'ny tendrombohitra Horeba, no nandrenesanao ny Tompo nanome tsiny anao sy namoaka didim-pitsarana hamaizana olona.

⁸ Ianao no nanosotra mpanjaka ho solon'ny hafa sy nanokana mpaminany handimby anao.

⁹ Ianao no voapaoka tamin'ny tadio afo tao anaty kalesy tarihin-tsoavaly afo.

¹⁰ Araka ny voalazan'ny Soratra Masina, dia ianao no voatendry ho an'ny vaninandro ho avy mba hampitsahatra ny fahatezeran'Andriamanitra alohan'ny fotoana hirehetan'izany; ianao no hampody ny fon'ny ray ho amin'ny zanaka sy hampiverina ireo fokon'i Jakoba amin'ny toerany.

¹¹ Sambatra izay hahita anao ka hodimandry homban'ny fitiavan'Andriamanitra! Fa izahay koa dia ho velona aina tokoa.

¹² Rehefa nosaronan'ny tadio i Elia, dia i Elisa no nanjary feno ny Fanahiny. Nandritra ny andro niainan'i Elisa, dia tsy nisy filoha izay nihorohoroany; tsy nisy olona afaka naneritery azy.

¹³ Tsy nisy zavatra tsy azony natao; ary ny vatany tafandry tao am-pasana aza dia mbola afaka naneho ny maha mpaminany azy.

¹⁴ Fony mbola velona i Elisa, dia nanao zava-mahagaga; ary rehefa maty izy, dia nahavita zava-mahatalanjona.

¹⁵ Kanefa, na dia teo aza izany rehetra izany, dia tsy niverina tamin'Andriamanitra ny vahoakany ary tsy niala tamin'ny fahotana fanaony mandra-pitondra azy lavitra ny taniny ary mandra-pieliny eran'ny tany tontolo. Nisy vahoaka vitsy tavela ihany ho an'ny fokon'i Joda ary mpanjaka iray tao amin'ny fianakavian'i Davida.

¹⁶ Ireo mpanjakan'i Joda nifanesy indray kosa, ny sasany nanao izay sitrak'Andriamanitra fa ny sasany nampiavosa ny fahotana.

¹⁷ I Hezekia dia nanamafy an'i Jerosalema renivohiny sady nitarika rano hankao anatiny; nampandavaka vatolampy tamin'ny vy fihadiana izy ary nampanao dobo fitahirizan-drano.

¹⁸ Tamin'ny androny no niakaran'i Saneheriba mba hamely ny tananan'i Jerosalema; dia nirahin'i Saneheriba ny komandin-tafiny, izay nanangan-totohondry hiady amin'i Tsiona ary nirehaka fatratra nentanim-piavonavonana.

¹⁹ Fa nihorohoro kosa tamin'izay ny fo aman-tanan'ny mponina tao Jerosalema; nanaintaina toy ny vehivavy miteraka ireo.

²⁰ Ny TOMPO be indrafo no nantsoin'izy rehetra sy nanandratany tanana hivavahana , ary hatrany an-danitra ilay Masina no namaly azy niaraka tamin'izay ka nanafaka azy tamin'ny alalan'i Isaia.

²¹ Nasian'ny TOMPO ny tobin'ny Asirianina ka naringan'ny anjeliny tokoa ireny ;

²² satria nanao izay sitraky ny TOMPO i Hezekia ary nifikitra mafy tamin'ny lalana izay nizoran'i Davida razambeny, araka ny nandidian'i Isaia mpaminany lehibe, dia ilay mpaminany nahatoky tamin'ny fahitany.

²³ Tamin'ny andron'i Hezekia koa no nampihemoran'i Isaia ny masoandro sy nanalavany ny fiainan'ny mpanjaka.