Bena-Siràka

Toko faha-44

¹⁷ I Noa dia hitan'Andriamanitra manana toetra lavorary sady marina. Rehefa nihatra ny fahatezeran'Andriamanitra, dia izy no nanjary solon'ny olombelona fahagola; koa izy no anton'ny namelana ireo olona sisa velona teto an-tany tamin'ny nahatongavan'ny safodrano.

¹⁸ Dia nisy fanekem-pihavanana mandrakizay nataon'Andriamanitra tamin'i Noa mba tsy handringanana ny miaina rehetra amin'ny safodrano toy izany intsony.

¹⁹ I Abrahama dia razambe malaza ho an'ny firenena maro, ary tsy nisy hita ho tahaka azy amin'ny voninahitra.

²⁰ Nitandrina ny lalanan'ilay Avo Indrindra izy sady nanaovany fanekem-pihavanana; ka tamin'ny famorana ny nofon'i Abrahama mihitsy no nanamafisany an'izany fanekem-pihavanana izany. Ary tamin'ny fizahan'Andriamanitra toetra azy dia hitany ho mahatoky tokoa izy.

²¹ Noho izany, dia tamim-pianianana mihitsy no nanomezan'Andriamanitra toky azy fa ny taranany no hitahiana ireo firenena; nomeny toky fa ho hamaroiny toy ny vovoky ny tany izy ary hasandrany ho avo toy ny kintana ny taranany ka handray ho fananany ny tany anankiray, manomboka amin'ny Ranomasina Maty ka hatrany amin'ny Ranomasina Mediteranea ary manomboka amin'ny ony Eofrata ka hatrany amin'ny faran'ny tany.

²² - 23 I Itsehaka koa, noho ny amin'i Abrahama rainy, dia nomen'Andriamanitra toky toy izany. Avy eo dia nankininy tamin'i Jakoba ny fanekem-pihavanana sy ny fitahiana ny olona rehetra; dia nohamafisiny tamin'ny tsodranony izy sady nomeny ny tany ho fananan

Toko faha-45

¹ izay nahazo sitraka tamin'ny besinimaro fa notiavin'Andriamanitra sy ny olombelona. Hisaorana an'Andriamanitra anie ny fahatsiarovana azy!

² Notoloran'ny TOMPO voninahitra sahala amin'ny voninahitry ny anjely izy, ary koa nataony nanan-daza satria nampatahotra ny fahavalo.

³ Ny tenin'ny TOMPO no nahatontosa faingana ireo famantarana ka nanomezany voninahitra an'i Mosesy teo imason'ny mpanjaka. Natolony azy koa ny didy ho an'ny vahoakany ary nasehony azy ny ampahan'ny voninahiny.

⁴ Ny toetra mahatoky sy halemem-panahy nananan'i Mosesy no nanokanan'ny Tompo azy sy nifidianany azy hiavaka anivon'ny olombelona rehetra.

⁵ I Mosesy dia nampandrenesin'ny TOMPO izany feony sy nampidiriny tao anatin'ny rahona matevina; nifanatrika taminy izy no notolorany ny didiny, dia ny lalana manome fiainana sy fahalalana: izany no nampianarany ny fanekem-pihavanany sy ny fitsipiny tamin'ireo taranak'i Jakoba, dia ny vahoaka israelita.

⁶ Nasandratry ny Tompo koa i Aharona izay lehilahy voatokana tahaka an'i Mosesy sady rahalahiny avy amin'ny fokon'i Levy.

⁷ Najorony araka ny fandaminana maharitra hatrany izy ary nomeny ny fisoronana teo amin'ny vahoakany; nataony finaritra tamin'ny fanamiana tsara tarehy izy, nampiakanjoiny akanjo rebareba mamirapiratra,

⁸ nampitafiny haingo marevaka ary nametrahany ny satroboninahitra sy ireo mariky ny fahefana ananany: dia ny pataloha sy ny akanjo lava ary ny efoda.

⁹ Manodidina ny moron-tongotr'ilay akanjo rebareba dia nasiany sahondra miendrika ampongabendanitra sy lakolosy madinika volamena betsaka tokoa mba hikorintsana rehefa mamindra i Aharona; namoaka feo nanako tao an-tempoly ireo mba ho fampahatsiarovana an'Andriamanitra ny amin'ireo olona anisan'ny vahoakany.

¹⁰ Io akanjo masina rebareba fitondran'i Aharona io dia voatenona kofehy volamena sy volomparasy ary mena, asan'ny mpanao amboradara izany. Teo ambonin'izany kosa ny akanjo saron-tratra. izay fanaovana fitsarana sady fanambarana ny marina :

¹¹ io akanjo saron-tratra io dia voatenona kofehy jaky, asan'ny mpahay taozavatra izany; voahaingo vatosoa nosokirina toy ny tombokase ilay izy sady ao amin'ny tranony volamena misy anarana voasoratra araka ny isan'ireo fokon'ny vahoaka Israely mba ho fampahatsiarovana an'Andriamanitra ny aminy: asan'ny mpahay vatosoa izany.

¹² Nasiana firavaka volamena teo amin'ny fehilohan'i Aharona, dia firavaka mirakitra teny voasokitra hoe: "Voatokana ho an'ny Tompo! "Mari-boninahitra izany, taozavatra voakaly tokoa, hafinaretan'ny maso mijery satria tena tsara voatra.

¹³ Tsy nisy fitafiana fatratra toy izany, talohan'i Aharona; tsy nisy olon-kafa nisalotra izany afa-tsy ny zanany lahy ihany mbamin'ny lehilahy taranany hatrany hatrany.

¹⁴ Ny sorona fanolotr'i Aharona, indroa isan'andro tsy tapaka, dia tokony ho dorana manontolo.

¹⁵ I Mosesy no nanao ny fanokanana an'i Aharona ka nandraraka menaka masina teo an-dohany: Fandaharana maharitra izany ho an'i Aharona sy ny taranany, raha mbola misy koa ny habakabaka. Hanao ny fanompoam-pivavahana amin'ny Tompo sy hanefa ny raharaha fisoronana izy ireo ary koa hitsodrano ny vahoakany amin'ny anaran'Andriamanitra.

¹⁶ Nofidin'ny TOMPO tamin'ny olombelona rehetra i Aharona mba hanolotra ho Azy ny fanatitra eo amin'ny alitara, dia ny emboka sy ny vovo-javamanitra hahatsiahivan'ny Tompo an'ireo olony ary mba hanao ny fombam-pivavahana famelan-keloka ho fitsimbinana ny vahoakan'Andriamanitra.

¹⁷ Ao amin'ny didiny dia nomen'ny TOMPO an'i Aharona ny fahefana hitsara araka ny voatondron'ny lalana sy hampianatra ireo taranak'i Jakoba ny baikony ary hanazava ny vahoaka Israely amin'ny lalanany.

¹⁸ Nisy olon-kafa nialona azy tany an-taniefitra ka nioko hanohitra azy tamin-katezerana sy havinirana, dia i Datana sy i Abirama miaraka amin'ny olony ary i Kora miaraka amin'ny antokony.

¹⁹ Hitan'ny TOMPO izany ka tsy sitrany velively, dia nirehitra ny hatezerany handringana an'ireo; nanao zava-mahagaga Izy hamelezana ny mpikomy, dia ny fandevonana azy tamin'ny afomiredareda.

²⁰ Mbola nampian'ny TOMPO indray ny voninahitr'i Aharona ka nomeny anjara fananana izy, dia ny santa-bokatra atao fanatitra; ary voalohany indrindra dia ny mofo no nataony voaomana betsaka hamokisana azy.

²¹ Ny zavatra natao sorona ho an'ny TOMPO no sakafo niveloman'ireo mpisorona, ka nomeny an'i Aharona sy ny taranany.

²² Tsy mba nisy zaratany nananany kosa teo amin'ny tanin'ny mpiray firenena aminy; tsy nisy anjara ho azy teo anivon'ny vahoaka israelita, satria hoy ny Tompo tamin'i Aharona: "Izaho no anjaranao sy fanananao."

²³ I Pinehasa, zanakalahin'i Elehazara, no fahatelo amin'ny voninahitra satria nazoto nanaja ny Tompo izy; rehefa nikomy tamin'Andriamanitra ny vahoaka, dia nijoro tamin-kerimpo fatratra izy ka nahazo famelana ho an'i Israely.

²⁴ Izany no nanaovan'ny TOMPO fanekem-pihavanana taminy ka nahatonga azy ho lehiben'ny Toeramasina sy ho solotenan'ny vahoakany eo anatrehany; dia lasan'i Pinehasa sy ny lehilahy taranany ny andraikitra maha mpisorombe hatrany hatrany.

²⁵ Nisy fanekem-pihavanana koanataon'ny Tompo tamin'i Davida, zanakalahin'i Jisay anisan'ny fokon'i Joda; nampanantenana izy fa ny fandovana fahefana hanjaka dia hifindra amin'ny taranany lahy anankiray hatrany; fa ny fandovana ny fisoronan'i Aharona kosa dia natao ho an'ny lehilahy rehetra taranany.

²⁶ Ianareo mpisorombe, enga anie ny fahendrena no hapetraky ny Tompo ao am-ponareo mba hitsaranareo ny vahoakany ara-drariny, ka tsy ho foana ny fanambinana anareo sy ny voninahitrareo amin'ny taranaka mifandimby!

Toko faha-46

¹ I Josoa, zanakalahin'i Nona, dia olona nahery an'ady sy nandimby an'i Mosesy tamin'ny maha mpaminany; koa, araka ny anarany, dia niseho ho lehibe izy tamin'ny famonjena an'ilay vahoaka voafidin'ny Tompo sy tamin'ny famaizana ireo fahavalo nanohitra azy mba hahatonga ny vahoaka Israely handray ny zarataniny.

² Endrey izany voninahitra azony, rehefa nanainga tanana izy ka naninjitra ny sabany mba hamely ireo tanana.

³ Tsy nisy olona talohany nahery fo tahaka azy, satria izy mihitsy no nisahana ireo adin'ny Tompo.

⁴ Moa tsy baikony ve no nihemoran'ny masoandro ary naharetan'ny andro iray ho toa andro roa?

⁵ Rehefa noporetin'ny fahavalo hatraiza hatraiza izy, dia ilay Avo Indrindra sady Mahery no nantsoiny; ary nihaino azy ilay Tompo lehibe ka nandefa vongan-kavandra vaventy dia vaventy.

⁶ Dia niantorahan'i Josoa ny tafika nanohitra ary teo amin'ilay fidinana no naripany ny fahavalo mba hahalalan'ny hafa firenena izay niady nanohitra ny Tompo ireo fitaovam-piadiana rehetra fampiasan'i Josoa, satria nizotra nanaraka an'ilay Mahery izy.

⁷ Tamin'ny andron'i Mosesy koa i Josoa no efa naneho toetra mahafatra-po, dia izy sy i Kaleba zanakalahin'i Jefone fony izy roa lahy nanohitra ny vahoaka tafangona ka nisakana azy tsy hanao fahotana ary nampangina ny fimonomononan-dratsy.

⁸ Ka dia izy roa lahy ireo no hany voatahiry tamina miaramila nisy andiany eninjato, mba hampiditra ireo mpiray firenena aminy ao amin'ny tany natao ho fananany, dia ilay tany tondra-dronono sy tantely

⁹ Ary nanome hery an'i Kaleba tokoa ny TOMPO, dia hery naharitra hatramin'ny fahanterany ka nahazoany an'ilay faritra be havoana izay mbola voatanan'ny taranany ho fananany.

¹⁰ Izany no nahatsapan'ny Israelita rehetra fa tsara ny mizotra manaraka ny Tompo.

¹¹ Ny amin'ny Mpitsara koa, dia samy nanana ny lazany avy. Tsy mba voasodokan'ny fanompoan-tsampy izy rehetra ary tsy mba nihataka niala tamin'ny Tompo. Hisaorana an'Andriamanitra anie ny fahatsiarovana azy!

¹² Na dia efa ao am-pasana aza ny taolambalony, dia hampijoro olona handimby azy anie ny Tompo! Enga anie ny laza nananan'ireo olomanga ireo ho velona indray eo amin'ny taranaka amam-parany!

¹³ I Samoela dia notiavin'ny TOMPO sady mpaminany nampiorina ny fitondra-mpanjaka ary nanosotra filoha ho mpanjakan'ny vahoakany.

¹⁴ Araka ny lalanan'ny TOMPO no nitsaran'i Samoela an'ireo mpiray firenena tafangona; ka notsinjovin'ny Tompo ireo taranak'i Jakoba.

¹⁵ Ny toetrany mahatoky ny nisehoany ho mpaminany marina; ny hafatra nampitainy no niekena azy ho mpahita azo antoka tokoa.

¹⁶ Rehefa noporetin'ny fahavalo hatraiza hatraiza izy, dia niantso vonjy tamin'ilay Tompo mahery sady nanao sorona Zanak'ondry mbola minono.

¹⁷ Dia nandefa kotrokorana avy tany an-danitra ny TOMPO sy nampandre ny feony nirefodrefotra mafy;

¹⁸ ka nataony ringana ireo filoham-pahavalo , dia ireo rehetra mpanapaka ny Filistinina.