Bena-Siràka
Toko faha-27
9 Ny vorona mitovy karazana no miray akany; toy izany koa ny toetra mahatoky no hasetry an'ireo olona mahatoky.10 Manotrika mikendry remby ny liona; toy izany koa no ikendren'ny fahotana an'ireo olona mampihatra ny tsy rariny.
11 Fahendrena mandrakariva no resaky ny olona tia vavaka; fa miovaova hoatra ny volana kosa ny olona adala.
12 Lanjalanjao ny fotoana mety raha hankeo anivon'ny tsy manan-tsaina ianao; fa mijanona maharitra kosa raha eo anivon'ny olona mpandinika ianao.
13 Maharikoriko ny resaky ny olona adala ary fanaranam-po amin'ny fahotana ny hehiny.
14 Mampitsangam-bolo ny fitenin'izay fatra-mpingoso ary mampanentsin-tadiny ny fifandirany.
15 Fandatsahan-dra no iafaran'ny fifandiran'ny mpiavonavona; ary mankararirary ny mihaino ny fifanebatebahany.
16 Izay manambara ny tsiambara telo dia tsy azo itokiana ary tsy mba hahita sakaiza mahafa-po azy intsony.
17 Tiavo ny sakaizanao ary anehoy toetra mahatoky; fa raha manambara ny tsiambaratelony ianao, dia aza mba midodododo any aminy intsony.
18 Tahaka ny olona namoy hava-maty no namoizanao ny fitiavan'ilay namanao ;
19 ary tahaka ny nandefasanao ny vorona efa teo an-tananao no namelanao ny sakaizanao handeha, ka tsy hahatratra azy intsony ianao.
20 Aza manjohy azy intsony, fa efa lasa lavitra izy sady mandositra tahaka ny gazela afa-pandrika.
21 Azo asiana fehim-pery ny ratra ary azo ampihavanina ny mpifanaratsy; fa tsy misy fanafana antenaina intsony ho an'izay nanambara ny tsiambara telo.
22 Izay manakimpikimpy maso dia mamoron-teti-dratsy; fa izay mahalala azy kosa hanalavitra azy.
23 Eo imasonao izy hanao resaka mamy sady ho talanjona amin'ny teninao; fa ao ambadika kosa dia hivadi-bolana izy ka hampiasa ny teninao hamandrihana anao.
24 Misy zavatra maro ankahalaiko fa indrindra io karazan-toetra io; ary ny Tompo koa dia hankahala azy.
25 Izay manipy vato savoan-danitra dia hitoraka ny lohany ihany; toy izany koa ny famelezana am-pitaka dia handratra ny nanao azy.
26 Izay mihady lavaka no hilatsaka ao; ary izay mamela-pandrika no ho voan'izany.
27 Izay manao ratsy no hifoterany ka tsy ho fantany akory izay fiavian-doza.
28 Ny mpiavonavona dia mananihany sy manesoeso; fa toy ny liona manotrika mikendry remby kosa no iandrasan'ny famalian-dratsy azy.
29 Ho voa ao anatin'ny vela-pandrika ireo mifaly amin'ny fahavoazan'ny mpivavaka; ka hokikisan'ny fijaliana izy alohan'ny hahafatesany.
30 Zavatra maharikoriko ihany koa ny lolom-po amam-pahatezerana, ka ny mpanota no anjakazakany.
Toko faha-28
1 Izay mamaly ratsy ny hafa dia hahita famaliana avy amin'ny Tompo, fa hosarotsarotiny tokoa Izy amin'ny fahotan'izany olona izany.2 Avelao ny tsy rariny nataon'ny namanao; dia havela heloka ianao, rehefa mivavaka.
3 Akory ity olona mitahiry fahatezerana amin'olon-kafa, nefa mangataka amin'ny Tompo fanasitranana ho an'ny tenany;
4 tsy mba mamindrafo amin'ny olombelona tahaka azy izy, ka ahoana no mivavaka hamelan-keloka ny tenany ?
5 Izy nofo osa sy malemy aza mitahiry lolom-po, ka iza indray no hahazoany famelan-keloka?
6 Tsarovy ny hiafaranao ka atsaharo ny fankahalana; tsarovy ny fahafatesana amam-pahalovana ary dia tandremo ny didin'Andriamanitra.
7 Tsarovy ny didy ka aza manao lolom-po amin'ny namana; tsarovy ny fanekem-pihavanan'ilay Avo Indrindra, ary ataovy odian-tsy hita ny hadisoan'olona taminao.
8 Halaviro ny fifandirana, dia hihavitsy ny fahotanao, satria ny olona saro-po no hampirehitra ny fifandirana;
9 mampikorontana ny mpisakaiza kosa ny mpanota sady mampisy saritaka eo anivon'ny mpihavana.
10 Arakaraka ny kitay amelomana azy no hirehetan'ny afo; ary arakaraka ny ikirina mafy hifanditra no hirehetan'ny fifandirana. Arakaraka ny fahatanjahan'ny olona no hahatezerany, ary arakaraka ny harena ananany no hahavinirany.
11 Fifanolanana tsy ampoizina no mampirehitra ny afo; ary fifandirana tampoka no mampandriaka ny ra.
12 Raha tsofinao ny vainafo dia hirehitra, ary raha roranao kosa izy dia ho faty, kanefa samy nivoaka avy tao am-bavanao izany.
13 Ho voaozona anie ny mpitakoritsika sy mpiroa lela, fa maro ny mpihavana izay efa simbany !
14 Efa nampihozongozona olona maro tokoa ny sahoan-dresaka naely momba azy sady efa nandroaka azy hifindrafindra firenena; efa nandoza tanana mimanda koa izany ary efa nampikorontana ny ankohonan'ireo lehibe.
15 Efa nampandroaka vehivavy mahery fo ny sahoan-dresaka naely momba azy, sady efa nahafoana ny vokatry ny asany.
16 Izay mihaino ny sahoan-dresaka dia tsy mba hahita ny fitsaharana ary tsy hitoetra hombam-piadanana intsony.
17 Mampisy mangana ny famelezan'ny karavasy, fa manapa-taolana ny famelezan'ny sahoan-dresaka.
18 Maro no efa lavon'ny lelan-tsabatra, kanefa vitsy noho ny efa lavon'ny sahoan-dresaka.
19 Sambatra izay voaaro tsy tratry ny sahoan-dresaka, dia izay tsy voatolotra hiharan'ny fisafoahany sady tsy mitondra ny ziogany no tsy voagejan'ny fatorany.
20 Zioga vy tokoa ny ziogan'ny sahoan-dresaka, ary fatorana varahina ny fatorany;
21 fahafatesana mahatsiravina ny fahafatesana afitsony, ka aleo ny toeran'ny maty noho ny sahoan-dresaka.
22 Tsy mba voafehin'ny sahoan-dresaka ny olona tia vavaka ary tsy mba handoro azy ny firedaredan'ny afony.
23 Izay mahafoy ny TOMPO no ho lavo amin'ny famelezan'ny sahoan-dresaka hirehitra tsy mety maty eo aminy; fa halefa hamely azy tahaka ny liona izany ary hamiravira azy tahaka ny biby leoparda.
24 Jereo fa hodidininao fefy tsilo ny taninao, ary fehezinao mafy ny volafotsinao sy volamenanao;
25 b- toy izany koa asio varavarana voahidy tsara ny vavanao, 25a ary imasoy fatratra ny handanjalanjanao ny teninao.
26 Tandremo mba tsy ho diso amin'ny teny ianao, fandrao ho potraka eo anoloan'izay mitily anao.
Toko faha-29
1 Izay mampisambotra amin'ny namany dia manao asa fiantrana; ary izay manohana azy amin'ny fanampiana dia mitandrina ny didin'Andriamanitra.2 Ampisambory vola ny namanao amin'ny fotoam-pahasahiranany; kanefa avereno amin'ny fotoana nifanarahanareo ny vola nampisamboriny anao.