Bena-Siràka

Toko faha-21

¹⁵ Raha ny olona manampahaizana no mandre teny miraki-pahendrena, dia sady mankato izany izy no manamafy lanja azy; fa raha ny mpanaram-batana kosa no nandre io teny io, dia maharikoriko azy izany ary hariany any ivohony.

¹⁶ Ny lahateny ataon'olona adala dia mavesa-poana tahaka ny entana fitondra mivahiny; fa ny teny aroson'ny mahira-tsaina kosa no ahitana ny fahafinaretana hatrany.

¹⁷ Ilaina ho heno eo am-pivoriam-bahoaka ny zavatra lazain'ny olon-kendry; ary ao am-po no hisaintsainana ny teniny.

¹⁸ Ny fahendrena, ho an'ny olona adala , dia tahaka ny trano ravarava, ary ny fahalalan'ny tsy manan-tsaina dia teny tsy misy fifandraisany akory.

¹⁹ Ny fitaizana, ho an'ny olona adala, dia tahaka ny parapaingo amin'ny tongotra ary tahaka ny gadra mangeja eo amin'ny tanana ankavanana.

²⁰ Ny olona adala, rehefa mihomehy, dia mitokelakelaka mafy ery; fa ny olona tsara ofana kosa dia mitsiky mora sy am-pitandremana.

²¹ Ny fitaizana ho an'ny olona misaina, dia tahaka ny firavaka volamena fehin-tanana entiny eo amin'ny sandriny ankavanana.

²² Ny olona adala dia dodododona ny hiditra ao an-tranon'ny hafa; fa ny olona efa mahay miaina kosa miahotra amim-pahamaotinana.

²³ Ny olona tsy manan-tsaina dia hatreo am-baravarana no hanarangarana ny ao anaty trano; fa ny olona tsara taiza kosa mijanona eo ivelany.

²⁴ Ny olona tsy voataiza no mihaino eo am-baravarana; fa ny misaina kosa dia hovesaran-kenatra manao izany.

²⁵ Ny molotry ny olona be resaka dia mamerina ny voalazan'ny hafa; fa ny tenin'ny olona misaina kosa dia toa voalanjalanja tamin'ny mizana.

²⁶ Ny olona adala dia miteny, vao mieritreritra; fa ny olon-kendry kosa mieritreritra, vao miteny.

²⁷ Raha manozona an'i Satana ny tsy mpivavaka, dia ny tenany ihany no ozoniny.

²⁸ Manala baraka tena ny mpanaratsy olona sady hankahalain'ireo mpiara-monina aminy.

Toko faha-22

¹ Sahala amin'ny vato feno diky maloto ny kamo, ka akorain'ny besinimaro izy satria afa-baraka.

² Sahala amin'ny avosan-jezika ny kamo, ka izay mandray izany hanifikifi-tanana.

³ Ny zazalahy ratsy taiza dia henatra ho an-drainy; ny zazavavy izay toy izany koa dia teraka hanome fatiantoka azy.

⁴ Ny zazavavy misaina dia hahazo vady; fa ny zazavavy ahazoan-kenatra kosa dia mampalahelo ny ray niteraka azy.

⁵ Ny vehivavy tsy valahara dia henatra na ho an'ny rainy na ho an'ny vadiny; ka samy hanamavo azy izy roa tonta.

⁶ Ny fananarana dia tsy sahaza azy velively toy ny mozikam-pifaliana eo anivom-pisaonana; fa ny mampiasa tsora-kazo sy famaizana kosa no fahendrena amin'ny fotoan-drehetra.

⁹ Ny mampianatra olona adala dia toy ny mamitrana vilany tany vaky na toy ny mamoha mpatory rendrika lalina amin'ny torimaso.

¹⁰ Toy ny miteny amin'olona rendremana ny miresaka amin'olona adala, ka farany izy vao hanao hoe: "Ahoana ange?"

¹¹ Itomanio ny maty, satria very fahazavana izy; itomanio koa ny olona adala satria very saina izy; itomanio moramora kokoa ny maty satria nahazo fitsaharana izy; fa ny fiainan'ny olona adala kosa dia ratsy noho ny fahafatesana.

¹² Ny fisaonana ny maty dia maharitra fito andro ihany; fa ny fisaonana ny olona adala na ny tsy mpivavaka kosa dia maharitra mandritra ny andro rehetra iainany.

¹³ Aza lava resaka amin'olona adala ary aza miara-dalana amin'ny tsy manan-tsaina; mitandrema tena aminy mba tsy ho sahirana ianao ary tsy ho voatolony rehefa mihifikifika izy; ihodiviro izy, dia hahita fitsaharana ianao sady tsy hotsiravina mahita ny hafokany.

¹⁴ Inona moa no zavatra mavesatra noho ny firaka? Tsy inona akory izany fa ny olona adala.

¹⁵ Na ny fasika iray kitapo na ny sira iray gony na ny vongam-by dia mora entina kokoa noho ny olona tsy manan-tsaina.

¹⁶ Ny hazo voarafitra mafy eo amin'ny taon-trano dia tsy mba ho ravan'ny horohoron-tany; toy izany koa ny olona miraiki-po mafy amina fikasana voahevitra tsara dia tsy mba hanan-tahotra akory na dia ao anatin'ny fotoan-tsarotra aza.

¹⁷ Ny olona miankim-po tsara amin'ny fotokevitra voasaintsaina dia mitana mafy toy ny lalotra voaharo fasika izay mandravaka rindrina malambolambo.

¹⁸ Tsy mahatanty ny rivotra mitsoka mahery ny vatokely apetraka ambonin'ny tamboho; toy izany koa tsy mahatoha ny tahotra mianjady ny fo ampihorohoroin'ny hevitra adaladala.

¹⁹ Izay manindrona ny maso hampilatsa-dranomaso; ary izay manindrona ny fo hampamoaka alahelo.

²⁰ Mampandositra ny vorona ny mitora-bato azy, ary mandrava fisakaizana ny manome tsiny sakaiza.

²¹ Raha nanatsoaka antsy hanambana sakaiza ianao, dia aza manary toky fa mety hisy ihany ny hiverenany.

²² Raha niloa-bava hifanditra amin-tsakaiza ianao, dia aza matahotra fa azo atao ny mihavana aminy indray; fa ny fandatsana aman'avonavonana ny fanambarana tsiambaratelo na ny famelezana atao am-pitaka no mampandositra ny sakaiza rehetra. 23. Aoka ianao hahatoky ny namanao raha mbola ao anaty fahantrana izy, mba hahazoanao tombontsoa miaraka aminy rehefa mby amin'ny fanambinana izy; aza mandao azy amin'ny andro fitsapana azy, mba hanananao anjara rehefa handray lova izy.

²⁴ Ny setroka na ny etona avy amin'ny memy dia misondrotra alohan'ny afo; toy izany koa ny teny manala baraka dia mipoaka alohan'ny fandatsahan-dra.

²⁵ Tsy hahamenatra ahy ny miaro sakaiza ary tsy hiery velively hanalavitra azy aho;

²⁶ fa raha misy kosa loza manjo ahy avy amin'ny ataony, dia hitandrin-tena aminy avokoa izay mandre izany.

²⁷ Iriko hisy fiambenana eo amin'ny vavako sy tombokasem-pahamalinana eo amin'ny molotro mba hisakana azy tsy hahasolafaka ahy ary hisakana ny teniko tsy hahavery ahy.

Toko faha-23

¹ TOMPO o, Ray sady Mpiandraikitra ny fiainako Ianao; aoka aho tsy havelanao hanaraka ny fironan'ireo taovam-pitenenako ary aoka tsy havelanao hahalavo ahy ireo !

² Aoka ny fisainako hampiharanao karavasim-pamolahana ary aoka ny foko hampiharanao fifehezam-pahendrena, ka tsy hitsitsy ahy amin'ny hadalako Ianao ary tsy hamela ahy ho afa-poana ny fahotako !

³ Dia tsy hampiavosa ny hadisoako aho ary tsy hampitombo isa hatrany ny fahotako, ka ho afa-mijoro eo anoloan'ny mpanohitra ahy ary koa tsy hifalian'ilay fahavaloko.

⁴ TOMPO o, Ray sady Andriamanitry ny fiainako Ianao; aza avela hanana fijery tsy maotina aho

⁵ ary avilio hiala amiko ny fitsiriritan-dratsy;

⁶ tsy ho azon'ny filam-pijangajangana sy ny fanaranam-pahalotoana anie aho ary tsy havelanao hirona velively amin'ny fiontanam-po mamoafady !

⁷ Rey anaka, henoy ny fomba fifehezam-bava; izay mitandrina izany tsy mba ho voasingotra.

⁸ Ny mpanota no ho voafandriky ny teny ataony; eo koa no hahalavo ny mpaniratsira sy mpiavonavona.

⁹ Aoka ny vavanao tsy ho zarinao hanao fianianana, na koa hanonontonom-poana ny anaran'ilay Masina !

¹⁰ Toy ny mpanompo narahi-maso hatrany ka tsy maintsy hitondra diam-kapoka eo aminy, toy izany koa izay manao fianianana sy manonontonon-dava ny anaran'ilay Masina dia tsy hialam-pahotana na oviana na oviana.

¹¹ Ny olona fatra-pianiana dia mampitombo hadisoana ka tsy hialan'ny karavasy hamaizana azy ao an-tranony. Raha mianiana tsy nahy izy, dia hianjeran'ny fahotany; raha mianina maivan-doha izy, dia manota roa heny; raha nianiana tsy marina izy, dia hiharam-panamelohana ary ho tototry ny famaizana mafy kosa ny ankohonany.

¹² Misy fomba fiteny masiaka tahaka ny fahafatesana: tsy handrenesana izany anie eo amin'ny zaratanin'i Jakoba! Hofadin'ny olona tia vavaka manko izany rehetra izany ka tsy mba hihosinkosina amin'ireny fahotana ireny izy.