Bena-Siràka
Toko faha-25
4 Saha zato koa ho an'ny fotsy volo ny fahaiza-mitsara ara-drariny, ary ho an'ny loholona ny mahay manoro hevitra.5 Tandrify tokoa ho an'ny anti-panahy ny fahendrena ary ho an'ny manankaja ny fandinihana amam-pisainana.
6 Satroboninahitra ho an'ny anti-panahy ny efa nisedrany toe-javatra maro; fa ny tena reharehany dia ny fanajana ny Tompo.
7 Misy zavatra sivy heveriko ho fahasambarana fa mbola misy anankiray fahafolo izay hambarako: Sambatra ny lehilahy mifaly amin'ny zanany ary koa izay mbola velona aina no mahita ny fahapotrahan'ireo fahavalony.
8 Eny, sambatra ny lehilahy miara-mitoetra amina vady mahira-tsaina; ary koa izay tsara rindra amin'ny vadiny mihoatra noho ny firindran'ny omby sy ny boriky. Sambatra ny lehilahy tsy nanota tamin'ny teniny ary koa izay tsy nanompo olona bado noho ny tenany.
9 Sambatra ny lehilahy nahazo famalinana ary koa izay havanana amin'ny lahateny ka mahalian-tsofina an'ireo mpihaino.
10 Lehibe tokoa ny lehilahy nahazo fahendrena; kanefa tsy misy mihoatra noho izay manaja ny Tompo !
11 Ny fanajana ny TOMPO dia mihoatra noho ny zava-drehetra, ka iza moa no hampitahaina amin'izay manana izany ?
13 Aleo ratra hafa isan-karazany toy izay ny ratram-po; aleo haratsiam-panahy hafa isan-karazany toy izay ny haratsiam-panahin'ny vehivavy.
14 Aleo voina hafa isan-karazany toy izay ny voina afitsok'ireo mpankahala; aleo famaizana hafa isan-karazany toy izay ny famaizana ataon'ireo fahavalo.
15 Tsy misy poizina ratsy noho ny poizina menarana, ary tsy misy fahatezerana ratsy noho ny fahatezeram-behivavy.
16 Aleoko miara-monina amin'ny lionana ny dragona toy izay miara-monina amina vehivavy ratsy fanahy.
17 Ny faharatsiam-panahin'ny vehivavy no mampiova endrika azy ka mampanjombona ny tarehiny ho tahaka ny an'ny orsa.
18 Mba mandeha ny lahy haka toerana eo afovoan'ireo mpifanila trano aminy, ary dia hisento fatratra mandre izany.
19 Maivan-danja ny haratsian-toetra hafa isan-karazany, miolotra amin'ny haratsian-toetran'ny vehivavy; aoka ny anjaran'ny mpanota no hiantefa aminy!
20 Manahirana ho an'ny tongotry ny antitra ny fiakarana mandrevo fasika; manahirana toy izany koa ny vehivavy vavana ho an'ny vadiny bonaika.
21 Aza mety sodokan'ny vehivavy bikana, ary aza mitsiriritra azy noho izy manan-karena.
22 Fahatezerana sy fahafaham-baraka ary henatra goavana no hihatra amin'ny lehilahy velomin'ny vadiny.
23 Ny vehivavy ratsy fanahy dia mandrera-po sy mampalahelo endrika ary mandratra fo; ny vehivavy izay tsy mahasambatra ny vadiny dia mampiraviravy tanana sy mampalemy lohalika azy.
24 Vehivavy iray no niandohan'ny fahotana sady anton'ny ahafatesantsika rehetra.
25 Aoka ny rano tsy havela ho very fotsiny, ary aoka ny vehivavy ratsy fanahy tsy homem-pahefana hiteny akory!
26 Raha tsy mandeha araka ny itondranao azy izy, dia aoka hisarahanao sy ho roahinao!
Toko faha-26
1 Sambatra ny vadin'ny vehivavy tsara fanahy, ary hampitomboina roa heny ny andro iainany.2 Ny vehivavy mahery fo dia fifalian'ny vadiny, ka hiadana ny lahy mandritra ny taona iainany.
3 Anjara soa ny vehivavy tsara fanahy: izany indrindra no anjara homena an'ireo lehilahy manaja ny Tompo;
4 na manankarena na mahantra ny lehilahy toy izany, dia ho faly fo sy ho mirana endrika mandrakariva.
5 Misy zavatra telo mampanahy ny foko fa misy zavatra fahefatra tena atahorako: dia ny sahoan-dresaka aelin'ny mpiray tanana sy ny fivorivoriam-bahoaka ary ny fanendrikendrehana; samy ratsy noho ny fahafatesana ireo rehetra ireo.
6 Fa ny fahoriam-po tena mampiferinaina dia ny mahita vehivavy mialona vehivavy hafa; ka loza no afitsoky ny teniny fa mitsabatsabaka amin'ny zava-drehetra.
7 Ny vehivavy ratsy fanahy dia mitera-doza tahaka ny ziogan'omby mihilangilana; ary izay te hamolapolaka azy dia tahaka ny misambotra maingoka.
8 Ny vehivavy mpidoroka dia zava-mahatezitra tokoa, fa tsy afaka hanafina ny tokony hahamenatra azy izy.
9 Ny vehivavy mpijangajanga dia mora fantarina amin'ny fijeriny sahisahy sy amin'ny hodimasony.
10 Raha misy zanakavavy maditra dia hamafiso ny fiambenanao azy; fa raha mahita anao manao tsirambina izy, dia hanaram-po amin'ny filibana.
11 Tandremo koa ny fijeriny tsy mahalala menatra; ary aza gaga raha mamitaka anao izy.
12 Toy ny ataon'ny mpivahiny mangetaheta misoka-bavaka misotro amin'izay karazan-drano sendra azy, toy izany koa no hipetrahan'ny vehivavy janga eo anoloan'ny tsimaday rehetra sy hanokafany ny fitoeran-jana-tsipikany amin'ny zana-tsipika rehetra.
13 Ny hasoan'ny vehivavy no hampifaly ny vadiny, ary ny haitao ananany no hampahery tena azy.
14 Ny vehivavy mahatam-bava dia fanomezan'ny TOMPO, sady tsy azo tombanam-bidy izy raha nobeazina tsara.
15 Soa anampy soa ny vehivavy maotina, ary tsy azo tombanana izy raha mahonon-tena.
16 Tahaka ny masoandro misandratra ho eny amin'ny habakabaka ambony eny no isehoan'ny bikan'ny vehivavy soa ao an-tranony voaravaka tsara.
17 Tahaka ny jiro mirehitra eo ambonin'ilay fitoeran-jiromasina no isehoan'ny hatsaran-tarehy eo ambonin'ny toe-batana mirindra.
18 Tahaka ny andry volamena eo ambonin'ny fototra volafotsy no fijery ny ranjo tsara tefy eo ambonin'ny faladia tomady.
28 Misy zavatra roa mampalahelo ny foko, ary anankiray fahatelo manetsika ny hatezerako: dia ny mpanankarena nanjary ory satria niharan'ny fahantrana; ny olona mahira-tsaina kanefa tevatevaina; ary indrindra ny miala amin'ny fahamarinana mba hivarilavo amin'ny fahotana: omanin'ny Tompo ho fatin'ny sabatra izy.
29 Sarotra ho an'ny mpandranto ny miaro tena tsy hanota; ary tsy ialam-pahotana hatrany ny mpivarotra.
Toko faha-27
1 Maro no nanota mba hahazoana tombony; ary izay maniry hangoron-karena dia tsy te hahalala zavatra hafa.2 Tahaka ny itsofohan'ny tsimaday eo anelanelan'ny vato anankiroa no isisihan'ny fahotana eo anelanelan'ny mpivarotra sy mpividy.
3 Izay olona tsy mifahatra mafy amin'ny fanajana ny Tompo dia ho rava faingana ny tranony.
4 Rehefa misy zavatra tantavanina, dia tavela ny faikany; toy izany koa no isehoan'ny kileman'olona, rehefa misy famelaran-kevitra ataony.
5 Ny fatana no isedrana ny tefin'ny mpanao vilany; ary ny fiadian-kevitra no izahan-toetra ny olona.
6 Ny voa vokariny no mampiseho izay fomba nanolokoloana ny hazo; toy izany koa ny lahatenin'ny olona no mampiseho ny hevitry ny fony.
7 Aza mba midera olona ianao alohan'ny famelaran-kevitra ataony, satria izany no izahan-toetra ny olona.
8 Raha zohinao ny fahamarinana, dia hahatratra azy tokoa ianao ka hitafy azy toy ny akanjom-boninahitra.