Bena-Siràka
Toko faha-8
11 Aza mifanandrina amin'olona be rehaka ianao, fandrao izy mitady haningotra anao amin'ny teninao.12 Aza mampisambotra vola an'izay mahery noho ianao; ary raha nisy nampisamborinao, dia ataovy anisan'ny very.
13 Aza manao antoka mihoatra noho izay zakanao; ary raha miantoka ianao, dia manahia ny hanefa bebe kokoa.
14 Aza manana ady amin'ny mpitsara,fa ny hajany no hanomezan-drariny azy.
15 Aza miara-dalana amin'olona sahisahy foana, fandrao hovesarany fahasahiranana ianao; ny haitraitrany manko no hanaovany zavatra, ka hiara-maty aminy ianao noho ny hadalany.
16 Aza mifanditra amin'olona mahery setra ary aza mamaky toera-mangina miaraka aminy; fa tsinontsinona eo imasony ny mandatsa-dra, ka eo amin'ny tsy ahazoanao miantso vonjy no hiantorahany hamotraka anao.
17 Aza miara-midinika amin'olona adala, satria tsy mba mahatam-bava izy.
18 Aza manao zavatra an-kiafinafina eo imason'ny vahiny, satria tsy fantatrao izay fihetsika hasetriny an'izany.
19 Aza mamboraka ny fonao amin'izao olona rehetra izao, sady tsy hankasitrahana anao velively izany.
Toko faha-9
1 Aza mba saro-piaro ny amin'ny vady lalainao, fandrao hianatra ny ho ratsy fihetsika aminao izy.2 Aza dia mitolo-tena amina vehivavy, ka ny fahefanao no ho hitsakitsahiny.
3 Aza minia hihaona amina vehivavy janga ianao, fandrao ho tafalatsaka amin'ny famandrihany.
4 Aza mijanona ela miaraka aminavehivavy mpitendry valiha, fandrao ho voafandriny amin'ny fahaizany manodoka ianao.
5 Aza liam-pijery tovovavy ianao, fandrao hiharan-tsazy noho ny aminy.
6 Aza mitolo-tena amina vehivavy janga ianao, fandrao hahavery ny fanananao izany.
7 Aza mijerijery etsy sy eroa eny an-dalamben'ny tanana, ary aza isodisodiana ny toerana mangingina ao aminy.
8 Avilio ny masonao tsy hifantoka amina vehivavy bikana, ary aza liam-pijery ny hatsaran-tarehim-behivavy hafa; maro ny lehilahy efa voasodokan'ny hatsaran-tarehim-behivavy fa hoatra ny afo mampirehitra ny fitiavany azy izany.
9 Aza mipetraka na oviana na ovianamiaraka amina vehivavy vadin'olona;ary aza manao fihinanam-besy misotro divay miaraka aminy, fandrao ny fonao hirom-pitia mankany aminy ka ho voatariky ny filandratsinao ho very ianao.
10 Aza mahafoy ny sakaiza tranainy fa tsy mahaleo azy ny vaovao; ny sakaiza vaovao dia toy ny divay vaovao: ho sotroinao an-kafaliana izy rehefa miha-antitra.
11 Aza mitsiriritra ny voninahitry ny mpanota, fa tsy fantatrao akory izay ho faharavany.
12 Aoka tsy hankatoavinao ny fahombiazan'ny tsy mpivavaka; tsarovy fa tsy ho afa-maina izy, hatrany amin'ny toeran'ny maty.
13 Mitoera lavitry ny olona manam-pahefana hamono, dia tsy hanan-tahotra ny fahafatesana ianao; ary raha manatona azy ianao, dia aoka tsy hanao hadisoana, fandrao dia halany ny ainao! Fantaro fa mandeha eo afovoam-pandrika ianao ary mora asiana toy ny mitety ny mandan'ny tanana.
14 Tombano araka izay azo atao ny namanao, ka maka torohevitra amin'ny olon-kendry.
15 Mifanakaloza hevitra amin'ny mahira-tsaina, ary aoka ny lalanan'Ilay Avo Indrindra no hiompanan'ny resakao rehetra !
16 Aoka ny olo-marina no hiara-misakafo aminao; ary ny fanajana an'Andriamanitra no ataovy reharehanao!
17 Ny asan'ny mpahay taozavatra no hiderana ny hakingany; ary ny lahatenin'ny mpitondra vahoaka no hilazana azy ho hendry.
18 Ny olona mitsaontsaom-bava dia atahorana eo an-tananany; ary ny olona be resaka loatra koa dia hiharan'ny fankahalana.
Toko faha-10
1 Ny mpifehy hendry dia hananatra ny vahoakany, ka hirindra ny fitondrany noho izy mahira-tsaina.2 Araka ny toetry ny mpifehy vahoaka no ho toetry ny mpandraharahany; araka ny toetry ny mpitondra tanana ihany no ho toetry ny mponina rehetra ao aminy.
3 Ny mpanjaka tsy nanam-panabeazana no hahavery ny vahoakany; ny fahiratan-tsain'ireo andriana no hampiorina mafy ny tanana.
4 Ny fahefana hitondra ny tany dia eo am-pelatanan'ny Tompo, ka amin'ny fotoanandro mety no hananganany olona sahaza izany.
5 Ny fahombiazan'ny olona dia eo am-pelatanan'ny Tompo, ka Izy no hametraka ny voninahiny eo amin'ny tenan'ny mpahay lalana.
6 Na inona na inona tsy rariny natao taminao, dia aza mitahiry lolom-po amin'ny namanao; ary aza manao na inona na inona ianao, raha mbola entanin'ny fo mandroatra.
7 Ny fiavonavonana dia zavatra ankahalaina na amin'Andriamanitra na amin'olombelona; ary eo anatrehan'izy roa tonta dia fahadisoana ny tsy rariny.
8 Ny ifindran'ny fiandrianam-panjakana avy amin'ny firenena iray ho amin'ny firenen-kafa dia noho ny tsy rariny sy ny herisetra ary koa noho ny fitiavan-karena.
9 Vovoka sy lavenona ihany ny olombelona; koa nahoana no miavonavona izy, kanefa dieny mbola fahavelony aza no fahalovana sahady ny tsinainy?
10 Aretina tsy maharitra ela akory dia mampilofika ny dokotera; na izay mpanjaka anio aza mbola ho faty rahampitso.
11 Rehefa maty ny olona, dia izao no anjarany: ny trambo sy ny bibikely ary ny kankana.
12 Ny iantombohan'ny fiavonavonan'ny olona dia amin'izay isarahany amin'ny Tompo sy ikomian'ny fony amin'Ilay nanao azy:
13 ny fahotana manko no fiantombohan'ny fiavonavonana, ka izay mikiribiby no hitosahan'ny toetra maharikoriko; izany no nahatonga ny Tompo hampiharihary ny fahorian'ireo ary hamely azy amin'ny faharinganana tanteraka.
14 Naongan'ny TOMPO ireo mpanapaka mba tsy ho eo amin'ny sezafiandrianana, ka ny olona malemy fanahy no napetrany handimby toerana azy.
15 Nofongoran'ny TOMPO ireo mpiavonavona, ka ny manetry tena no nasolony handimby azy.
16 Noravan'ny TOMPO ireo tanin'ny hafa firenena, ka naringany hatramin'ny fototra iorenany.
17 Nongotan'ny TOMPO teo amin'ny olona sy naringany ireo; ary nokosehiny ho foana eto an-tany ny fahatsiarovana azy.
18 Tsy mba nataon'Andriamanitra hiavonavona ny olona; tsy natao hisafoaky ny hatezerana ireo natera-behivavy.
19 Taranak'iza no mendrika ho hajaina? Ny taranak'olombelona izay manaja ny Tompo. Taranak'iza no mendrika ho tsiratsiraina? Ny taranak'olombelona izay mandika ny didy.
20 Hajaina eo amin'ny olom-peheziny ny mpitondra azy;
21 fa hajaina eo imason'ny mpitondra kosa ireo manaja ny Tompo.
22 Ny prozelita sy ny vahiny ary ny mahantra dia ny fanajana ny Tompo no reharehany.
23 Tsy rariny ny maniratsira ny mahira-tsaina nefa mahantra, ary diso toerana ny manome voninahitra ny mpanota.