Jodita

Toko faha-3

⁸ Nandrava ny trano fivavahana i Holoferna sady nanapatapaka ny hazo masina. Baiko nomena azy manko ny hamongotra ny andriamanitra rehetra eran'ny tany noteteziny, hany ka hitsaoka an'i Nebokadnetsara irery ihany ny firenena rehetra, ary hiantso azy ho andriamanitra ny fiteny sy ny foko rehetra.

⁹ Avy eo i Holoferna dia tonga teo anoloan'i Jizrehela , tao akaikin'i Dotana izay manatrika ny tandavan-tendrombohitr'i Jodea.

¹⁰ Niorin-toby teo anelanelan'i Geba sy i Sitopoly izy, ka nijanona iray volana teo mba hanangona ny vatsy rehetra ilain'ny tafiny.

Toko faha-4

¹ Ren'ireo Israelita nonina tao Jodea ny zavatra rehetra nafitsok'i Holoferna, filohan-tafik'i Nebokadnetsara mpanjakan'i Asiria, tamin'ny firenen-kafa, indrindra ny nandrobany sy nandravany ny trano fivavahana rehetra.

² Raiki-tahotra mafy tokoa ny Israelita hiatrika io Holoferna io ary nitebiteby ny amin'i Jerosalema sy ny tempolin'ny TOMPO Andriamaniny.

³ Vao tsy ela akory no niverenany avy any an-tsesitany; ary vao haingana no nahatafavory azy tao Jodea sy nanokanany indray ny tempoly sy ny fanaka mbamin'ny alitara fisoronana, taorian'ny fanimbazimbana nihatra taminy.

⁴ Nandefa iraka tany amin'ny faritr'i Samaria manontolo ny Israelita, izany hoe tao Kona sy Bety-Horona ary Abela-Maima; nandefasany koa hatrany Kola sy Hatsora ary tao amin'ny lohasahan'i Salema;

⁵ notazoniny ny tampon-tendrombohitra rehetra ary nohamafisiny ny tanana teny an-kavoana. Nanao tahirin-tsakafo izy ho an'ny famatsiana mandritra ny ady, satria vao tsy ela no nijinjany ny sahany.

⁶ I Joakima, tamin'izany andro izany, no mpisorombe tao Jerosalema. Nanoratan'io Joakima io ny mponina tao Betoka sy tao Betomestaima, izay tanana teo anoloan'i Jizrehela sady tandrifin'ny lemak'i Dotana.

⁷ Nodidian'ilay mpisorombe izy hitazona ireo lalana mianika ny tendrombohitra, satria ireo lalana ireo no fidirana mankany Jodea. Mora sakanana izay te handalo, satria tery dia tery ny lalana ka olona roa ihany no omby azy.

⁸ Ny Israelita koa dia nanao araka ny notakin'ilay mpisorombe sy ny antenimieran'ireo loholom-bahoaka, izay tao Jerosalema no foibeny.

⁹ Tamin-kafanampo lehibe no niantsoan'ny lehilahy israelita tsirairay vonjy tamin'Andriamanitra; ary tamin-kafanampo lehibe no nanaovany fifadian-kanina,

¹⁰ dia ny tenany sy ny vady aman-janany ary ny biby fiompiny. Ny vahiny tao aminy sy ny mpiasany ary ny mpanompony kosa dia samy nitafy lambam-pisaonana.

¹¹ Ny mponin'i Jerosalema, na lehilahy na vehivavy na ankizy dia samy niankohoka teo anoloan'ny Toeramasina, ka nihosin-davenona ny lohany ary lambam-pisaonana no nitafiany, fony izy niatrika ny TOMPO;

¹² ary nanodidina ny alitara koa dia namelarany lasaka hialany sasatra. Samy nafana fo izy indray niantso vonjy tamin'ilay Andriamanitr'i Israely mba tsy hamela ny fahavalo hipaoka ny ankizy na haka an-kery ny vehivavy na handrava ireo tanana izay nomeny ho lovan'ny vahoakany. Niantso vonjy taminy koa izy mba tsy hamela ny hafa firenena hanimbazimba sy haniratsira ny Toeramasina.

¹³ Dia nihaino ny tarainan'ireo Israelita ny TOMPO ary nahita ny fahoriany. Mbola nifady hanina hatrany ny vahoaka nandritra ny andro maro eran'i Jodea ary koa tao Jerosalema teo anoloan'ny Toeramasin'ilay TOMPOn'izao rehetra izao.

¹⁴ I Joakima mpisorombe mbamin'ny mpisorona rehetra ary ny olona rehetra nanao fanompoana ny TOMPO dia samy nanao akanjom-pisaonana no nanolotra tamin'Andriamanitra ny sorona dorana manontolo fanao isan'andro sy ny fanatitra ary ny fanomezana an-tsitrapo avy amin'ny vahoaka.

¹⁵ Nasian'izy rehetra lavenona ny fehiloha ary ny heriny manontolono niantsoany vonjy tamin'ny TOMPO mba hirotsahany hanasoa ny vahoaka Israely tsivakivolo.

Toko faha-5

¹ Nilazana i Holoferna, komandy faratampon'ny tafika asirianina, fa mivonon-kiady ny Israelita: nohidiany ny lalana mankany amin'ny faritra be tendrombohitra, nasiany manda ny tampon-tendrombohitra rehetra, ary nametrahany fandripandrika teny amin'ny lemaka.

² Nirehi-pahatezerana mafy dia mafy i Holoferna; ary niantso ny lehibe moabita rehetra sy ny mpitari-tafika hamonita mbamin'ny governora rehetra tamin'iny morontsiraka iny izy,

³ ka niteny taminy hoe:-Ry Kanahanita, lazao ahy: Iza izao vahoaka monina ao amin'ny faritra be tendrombohitra ao izao? Inona no tanana itoerany? Ahoana ny hamaroan'ny tafiny? Ahoana ny hery sy tanjaka ananany? Iza no mpanjaka mifehy ny miaramilany?

⁴ Nahoana no izy ireo ihany, amin'ny mponina rehetra andrefan'i Eofrata , no tsy nanaiky hitsena ahy?

⁵ Dia i Akiora, mpifehy ny Hamonita, no namaly an'i Holoferna hoe:-Raha sitrakao, Tompoko, ny hihaino ahy mpanomponao miteny, dia holazaiko aminao ny momba io vahoaka monina ao amin'ny faritra be tendrombohitra io sady akaikin'ny tobinao. Tsy hisy diso na dia iray aza ny teniko.

⁶ Io vahoaka io dia taranak'olona kaldeanina.

⁷ Tsy te hanompo intsony ireo andriamanitry ny razany tafaorina tao Kaldea izy ary niala tamin'ny fombam-pivavahana nentim-paharazana, ka nanompo an'ilay Andriamanitry ny lanitra, izay hany nankatoaviny ho Andriamanitra.

⁸ Izany no nandroahana azy ho lavitr'ireo andriamaniny fahiny ireo; ka lasa izy aloha nandositra tany Mezopotamia avaratra sy niorim-ponenana elaela teo.

⁹ Avy eo nodidian'ilay Andriamaniny izy mba handao izany faritra izany sy handeha any Kanahana; dia niorim-ponenana teo izy ka nampitombo ny volamena sy volafotsy ary andiam-biby fiompy nananany.

¹⁰ Taty aoriana, dia nisy mosary nihanaka eran'i Kanahana. Ka voatery nidina tany Ejipta sy niorim-ponenana tao ry zareo, satria tao no nisy sakafo hivelomany; dia nanjary vahoaka marobe izy, ka tsy tambo isaina ny taranany.

¹¹ Fa nitsangan-kanohitra azy ny mpanjakan'i Ejipta, ka nampiasa hevi-petsy hambotriana azy tamin'ny asa mafy fanaovam-biriky. Nampietrena izy ary nentina tahaka ny mpanompo.

¹² Niantsoany vonjy koa ilay Andriamaniny, ka namely an'i Ejipta manontolo tamin'ny loza tsy nisy fanafana. Dia nandroaka azy ny Ejiptianina;

¹³ fa Andriamanitra kosa nanamaina ny Ranomasina Mena teo anoloany

¹⁴ ary nitari-dalana azy ho any Sinay sy Kadesy-Barnea. Dia nampandositra ny olona rehetra nonina tany an-taniefitra io vahoaka io

¹⁵ ary nanan-kery handringanana ny Hesbonita rehetra, ka nisy niorim-ponenana teo amin'ny tanin'ny Amorita. Avy eo izy dia nita ny ony Jordana ary naka ny faritra be tendrombohitra ho fananany,

¹⁶ ka nandroaka teo anoloany ny Kanahanitra sy ny Perizita mbamin'ny Jebosita sy ny Sekemita ary ny Girgasita rehetra; dia niorim-ponenana ela izy tao amin'io tany io.

¹⁷ Raha mbola tsy nanota tamin'ilay Andriamaniny izy, dia nombam-panambinana, satria Andriamanitra tsy tia ratsy io miaraka aminy io.

¹⁸ Fa rehefa nihatahany kosa ny sori-dalana nomeny azy, dia ringana olona betsaka tokoa izy tamin'ny ady maro, ary nentina ho babo any an-tany hafa. Rava ny tempolin'ilay Andriamaniny ary nalaim-pahavalo ireo tananany.

¹⁹ Izao kosa, rehefa nody indray tamin'Andriamaniny io vahoaka io ka tafaverina avy tany amin'ny toerana nielezany , dia notanany hipetrahana indray i Jerosalema izay misy ny Toeramasiny ary nonenany indray ny faritra be tendrombohitra izay tavela ho taniefitra.

²⁰ Ankehitriny ary, Tompoko, raha misy hadisoana eo amin'io vahoaka io ka nanota tamin'ilay Andriamaniny izy sady hitantsika fa nisy zavatra nahasolafaka azy tokoa, dia ndeha isika hiakatra hiady aminy.

²¹ Fa raha tsy misy fandikan-dalana eo amin'io firenena io, Tompoko, dia avelao izy ho eo, fa hiaro azy ny TOMPO Andriamaniny ka ho afa-baraka eo anatrehan'ny tany tontolo isika.

²² Vao nitsaha-niteny i Akiora, dia nimonomonona ny olona rehetra nanodidina ny trano lain'ny komandy faratampony; ireo manamboninahitr'i Holoferna sy ireo governora rehetra avy amin'iny morontsiraka iny sy avy any Moaba dia nomba ny hamonoana ho faty an'i Akiora sady niteny hoe:

²³ -tsy hatahorantsika velively ny Israelita. Jereo fa tsy manana hery na fitaovana izy hiatrehana ady mangotraka.

²⁴ Noho izany, ndeha isika hiakatra hamely azy, Tompoko, fa mora foana no handresen'ny tafikao manontolo azy, ry Holoferna.

Toko faha-6

¹ Rehefa nitsahatra ny sahotaka tamin'ireo vatan-dehilahy manodidina ny filan-kevitry ny samy manam-pahefana, dia i Akiora no nitenenan'i Holoferna komandy faratampon'ny tafika asirianina, ka teo anatrehan'ny olona vahiny sy moabita no nanaovany hoe:

² -Zovy moa ianao, ry Akiora, ary zovy moa ianareo voavidin'ny Israelita? Mihamboho mpaminany miteny aminay ianao raha tahaka iny androany iny; ary lazainao fa tsy tokony hiady amin'ny Israelita izahay satria ilay Andriamaniny no hiaro azy. Fa iza no andria

³ Izahay kosa dia mpanompon'i Nebokadnetsara; ka hataonay indray mamely fotsiny ny Israelita tsy ho voatohitr'ireo ny fivatravatran'ny mpitaingin-tsoavalinay.

⁴ Hasainay ho dorana velona izy; hamonto ny tendrombohitra ny rany ary handrakotra ny lemaka ny fatiny. Tsy ho afa-kijoro hanohitra izy eo anoloanay, fa dia haringana tanteraka, araka ny andidian'i Nebokadnetsara mpanjaka, ilay mpifehy ny tany tontolo. Efa niteny ny mpanjaka; ary tsy maintsy hihatra ny baiko nataony.

⁵ Ny aminao kosa, ry Akiora, ry ilay Hamonita voavidy ity, dia araka ny maha mpamadika anao no nitenenanao teo. Koa tsy hahita ny salovan-tavako intsony ianao manomboka anio, mandra-pamaizako an'ireo olona nitsoaka avy tany Ejipta ireo.

⁶ Rehefa hiverina aho, dia ny miaramilako sy ny manamboninahitro no hanatrobaka sabatra sy lefona ny tehezanao; ka ho faty eo anivon'ny Israelita voavono ianao.

⁷ Ho entin'ireo mpanompoko any amin'ny faritra be tendrombohitra ianao izao, ary havelany ao amin'ny tanana anankiray eny amin'ny kisolosolo eny;

⁸ ka tsy ho faty ianao, raha tsy efa hofongorana miaraka amin'ny Israelita.