Jodita

Toko voalohany

² Nanodidina an'i Ekbatana dia nampanorenan'i Arfaksada manda tamin'ny vato vaventy voapaika efa-joro, dia vato mirefy telo metatra ny lavany ary iray metatra sy sasany ny sakany. Io manda io kosa dia nirefy 35 metatra ny haavony ary 25 metatra ny sakany.

³ Teo akaikin'ny vavahadin'ny tanana dia nampanangana ny tilikambo izay nahatratra dimampolo metatra ny haavony ary telopolo metatra ny hatevin'ny fanorenany.

⁴ Ireo vavahady ireo kosa nahatratra 35 metatra ny haavony ary roapolo metatra ny sakany, satria nokendrena handalovan'ireo tafika matanjaka sy ireo antoko miaramila an-tongotra.

⁵ Tamin'izany taona faha-12 nanjakany izany ary i Nebokadnetsara no niady tamin'io Arfaksada mpanjaka io, teo amin'ny tany lemaka anatin'ny faritr'i Ragao.

⁶ Ny mponina rehetra tany an-tendrombohitra sy ny mponina rehetra teo amoron'ny ony Eofrata sy Tigra ary Hidaspa dia nitambatra tamin'i Nebokadnetsara; nomba azy koa ny mponina teo an-tany lemaka sy nofehezin'i Arioka mpanjakan'i Elimaida. Tafika avy amin'ny firenena maro no vory hiandany amin'ny Babilonianina.

⁷ I Nebokadnetsara, mpanjakan'i Asiria, dia nandefa iraka hatraiza hatraiza: na tany amin'ny mponina rehetra any Persia; na tany amin'ny mponina rehetra teo amin'ny faritra andrefana, izany hoe tao Silisia sy Damasy ary Libano sy Antilibano ka hatrany amin'ny morontsiraky ny Ranomasina Mediteranea;

⁸ na tany amin'ny vahoaka teo amin'ny tendrombohitra Karmela sy tao amin'ny faritr'i Gilehada ary tao Galilea ampatrana sy tao Jizrehela izay lemaka midadasika;

⁹ na tany amin'ireo tananan'i Samaria sy ny faritra ampita atsinanan'i Jordana ka hatrany Jerosalema sy Batanea ary Kelosy sy Kadesa. Nandefasan'i Nebokadnetsara iraka koa hatrany amin'ny lohasahan-driakan'i Ejipta sy hatrany Tapanesa sy Ramsesa ary hatrany amin'ny faritr'i Gosena manontolo;

¹⁰ nandefasany koa aza hatrany ankoatran'i Tanisy sy i Memfisa, tany amin'ireo olona hafa rehetra mponin'i Ejipta, ary hatrany amin'ny sisintanin'i Etiopia.

¹¹ Kanefa ny mponina rehetra tamin'ireo faritra isan-tokony ireo dia tsy niraharaha ny hafatra nalefan'i Nebokadnetsara, mpanjakan'i Asiria, ka tsy mba nivory hiady miaraka aminy; tsy natahorany manko i Nebokadnetsara izay toy ny olona tsotra fotsiny ihany teo imasony. Koa nitondra tanam-polo sy rakotry ny henatra ireo iraky ny mpanjaka ireo, rehefa niverina.

¹² Nisafoaky ny hatezerana tamin'ireo faritra isan-tokony ireo kosa i Nebokadnetsara; ka ny seza fiandrianany sy ny fahefana maha mpanjaka azy no antoka nianianany fa hamaly ratsy ny olona rehetra amin'ny faritr'i Silisia sy i Damasy ary Siria izy, sady hamono hahafaty ny mponina rehetra amin'ny faritr'i Moaba sy i Hamona ary koa i Jodea manontolo mbamin'ny mponina rehetra any Ejipta nany eo amoron'ny Ranomasina Mediteranea na ny eo amoron'ny Ranomasina Mena.

¹³ Tamin'ny taona faha-17 nanjakany koa i Nebokadnetsara dia nandahatra ny tafiny hiady amin'i Arfaksada, ka nandresy azy ary nampandositra ny tafik'io Arfaksada io mbamin'ny mpitaingin-tsoavaliny sy ny kalesiny rehetra;

¹⁴ dia nalain'i Nebokadnetsara ireo tananany, ary tafapaka tao Ekbatana izy ka nahazo ny tilikambony sy nandroba ny kianjany ary nandrava izany tanana kanto izany.

¹⁵ Tany an-tendrombohitr'i Ragao no nisamboran'i Nebokadnetsara an'i Arfaksada, ka notsatotsatohany lefom-pohy izy ary nataony fongotra teo tsy hisy intsony.

¹⁶ Dia niverina tany Ninive i Nebokadnetsara niaraka tamin'ny tafiny manontolo nisy miaramila mpiady tsy tambo isaina; ary indray nijanona teo izy rehetra ka niala sasatra sy nanao lanonana nandritra ny 125 andro.

Toko faha-2

¹ Tamin'ny taona faha-18 nanjakan'i Nebokadnetsara mpanjakan'i Asiria, fony andro faha-22 tamin'ny volana voalohany, no niadian-kevitra tao an-dapa ny amin'ny valifaty izay efa nianianan'ny mpanjaka hafitsoka amin'ireo vahoaka rehetra nikomy.

² Dia nantsoin'i Nebokadnetsara hivory ny minisitra rehetra sy ny loholona rehetra; ary nanaovany fiaraha-midinika ireo, ka vavany mihitsy no namoaka ny fanapahan-kevitra momba ny sazy isan-karazany hafitsoka amin'ny tanin'iretsy vahoaka nikomy.

³ Nankatoavin'ireto mpanolotsaina azy fa tokony hofongorana avokoa ny olona rehetra izay nitsipaka ny baiko navoakan'i Nebokadnetsara.

⁴ Rehefa vita ny fiaraha-midinika, dia nantsoin'i Nebokadnetsara i Holoferna, izay filohan'ireo komandin-tafika sady olona faharoa eo amin'ny fanjakana, ka nilazany hoe:

⁵ -Izaho ilay mpanjaka lehibe, mpifehy ny taniko manontolo, no milaza ireto teny ireto: Ndeha ianao maka ireo miaramila azo antoka ho matanjaka; dia ataovy tsy latsaky ny antokony 120 ireo miaramila an-tongotra ary tsy latsaky ny antokony 12 ireo mpitaingin

⁶ Avy eo hiainga ianao hamely an'ireo tany rehetra any andrefan'i Eofrata, izay tsy nanaiky ny baiko navoakako;

⁷ ary hotakinao amin'ireo vahoaka ny tolotra tany sy rano ho mariky ny fanoavany ahy. Ampahafantaro azy fa mirehi-katezerana aho ka mandefa izao tafika izao hamely azy. Hanenika ny vohon-taniny manontolo ny miaramilako ka avelako handroba azy.

⁸ Ireo olona voaratra dia hameno ny hantsana; ka ny lohasahan-driaka sy ny ony dia hotototra faty hihoatra ny morony.

⁹ Ireo babo kosa hasaiko ho entina any am-paran'ny tany.

¹⁰ Hotazoninao amin'ny anarako ny faritaniny rehetra.

¹¹ Ka rehefa nilavo lefona izy, dia hambenanao ho an'ny andro hitsarana azy; ireo mbola hanohitra ihany, eo amin'ny tany isan-tokony efa azonao, dia tsy hanananao antra fa ampamonoy ho faty ary asaovy robaim-pananana.

¹² Ny aiko sy ny fahefana maha mpanjaka ahy no nianianako fa hampihatra hery aho hanatanterahako izany.

¹³ Ianao kosa, ry Holoferna, aza misy dikainao ireo baiko nomeko anao ireo na iray aza; fa tanteraho antsakany sy andavany sady tsy misy hataka andro; araka ny nandidiako anao.

¹⁴ Dia niala teo anatrehan'ny mpanjaka i Holoferna, ary niantso ireo andriana mbamin'ireo komandy sy manamboninahitry ny tafika asirianina.

¹⁵ Araka ny nandidian'ny mpanjaka azy, dia namory miaramila voafantina hiantafika izy, ka nisy antokony 120 ireo miaramila an-tongotra ary antokony 12 ireo mpitaingin-tsoavaly.

¹⁶ Dia nalahatr'i Holoferna ireo ka voarindra ho tahaka ny tafika goavana efa hiady.

¹⁷ Naka rameva sy boriky ary mole marobe io filoha io mba hitondra entana; naka ondry aman'osy ary omby tsy tambo isaina koa izy mba ho tohan'aina ara-tsakafo.

¹⁸ Teo ny vatsy ho an'ny miaramila tsirairay avy; teo koa ny volafotsy amam-bolamena betsaka hanaramana azy.

¹⁹ Dia niainga i Holoferna mbamin'ny tafiny manontolo hialoha an'i Nebokadnetsara mpanjaka sy handrakotra ny vohon-tany, ao andrefana ao, amin'ny kalesy sy ny mpitaingin-tsoavaly ary ny miaramila an-tongotra izay voafantina.

²⁰ Nisy mpiantafika hafa niaraka taminy, ka tsy tambo isaina toy ny valala na toy ny fasika any an-taniefitra ireo.

²¹ Niala tao Ninive izy rehetra ireo, ka telo andro ihany dia tonga tao amin'ny lemak'i Bektileta, ary avy teo dia lasa nitoby akaikin'ny tendrombohitra avaratr'i Silisia am-patrana.

²² Tamin'izay no nentin'i Holoferna ny tafiny manontolo, na miaramila an-tongotra na mpitaingin-tsoavaly na kalesy, ka nihanaka tany amin'ny faritra be tendrombohitra.

²³ Nataony resy i Poto sy iLoda, ary norobainy avokoa ireo taranak'i Rasy na ireo taranak'i Jismahela izay samy niorim-ponenana teo akaikin'ny taniefitra, tao atsimon'i Keleona.

²⁴ Avy eo nita ny ony Eofrata i Holoferna, dia namakivaky an'i Mezopotamia sy nandrava ny tanana mimanda rehetra teny amoron'ny ranon-driaka Habrona ary tafapaka hatrany amin'ny Ranomasina Mediteranea.

²⁵ Voatanany koa ny faritr'i Silisia ka nofongorany avokoa ny mpanohitra; ary nianatsimo izy ka tafapaka hatrany amin'ny ny faritanin'i Jafeta, izay mifanila amin'i Arabia.

²⁶ Voahodidin'i Holoferna ny Midianita rehetra, nodorany ny tobim-pilasiany ary nataony babo ny biby fiompiny.

²⁷ Tamin'ny fotoana fijinjam-bary no namakivakiany ny lemak'i Damasy, ka nodorany avokoa ny vokatra, nataony ringana ny biby fiompy na omby na ondry aman'osy, norobainy ny tanana, nosimbany ny saha, ary nofongoriny tamim-tsabatra ny zatovo rehetra.

²⁸ Tahotra sy horohoro no nianjady tamin'ny mponina rehetra amoron-tsiraka, dia izay nonina tao Tsidona sy Tiro mbamin'izay tao Soro sy okina ary Jamnia. Raiki-tahotra mafy koa ny mponin'i Azota sy i Askelona.

Toko faha-3

¹ Nandefa iraka ho any amin'i Holoferna ireo mponina amoron-tsiraka ireo mba hitondra tenim-pihavanana manao hoe:

² -Indreto izahay mpanompon'i Nebokadnetsara mpanjaka lehibe fa tonga manatrika anao. Ataovy izay tianao hatao aminay.

³ Ny toby fambolenay sy fiompianay, ny sahanay, ny tanimbarinay, ny omby sy ondry aman'osinay ary ny tanimbilona rehetra anananay dia samy azonao anaranam-po. Ataovy izay hataonao aminy.

⁴ Anao ny tanananay, ary mpanomponao ny mponina ao aminy. Tongava amin'ireo tanananay ireo araka izay sitrakao.

⁵ Tonga teo anatrehan'i Holoferna ireo iraka ireo ka niteny taminy araka ireo tenim-pihavanana ireo.

⁶ Tamin'izay no nandroso nanaraka ny morontsiraka i Holoferna sy ny tafiny. Nametrahany miaramila mpiambina ireo tanana mimanda ary narotsany ho anisan'ny mpiantafika miaraka aminy kosa ireo vatan-dehilahy voafantina.

⁷ Manerana izany faritany izany, dia olona miravaka fehiloha sy mandihy omban'amponga tapaka no nandray azy.