Daniela

Toko faha-5

¹⁴ Efa reko ny momba anao fa entanin'ny fanahin'ireo andriamanitra ianao ary hita ao aminao ny fahazavan-tsaina sy ny fahalalana ary fahendrena tena fatratra.

¹⁵ Ary vao teo no nentina teto anatrehako ny olon-kendry sy ny mpisikidy mba hamaky io soratra io sy hampahafantatra ahy ny heviny, nefa tsy nahalaza izany ireo.

¹⁶ Nandre ny momba anao aho, fa ianao no mahalaza hevi-javatra sy mamaha olana; ankehitriny raha mahay mamaky io soratra io sy mampahafantatra ahy ny heviny ianao, dia hampiakanjoina jaky; sady hasiana volamena ny vozonao ary ho isan'ny telo lahy mpiara-mitantana eto amin'ny fanjakana ianao.

¹⁷ Dia namaly i Daniela ka nanao teo anatrehan'ny mpanjaka hoe: Ry mpanjaka o, aoka ho anao ihany ny fanomezanao, ary omeo ny hafa ny valim-pitianao; fa ny soratra dia hovakiko aminao ihany ary hampahafantariko anao koa ny heviny.

¹⁸ Ry mpanjaka o, Andriamanitra Avo Indrindra no efa nahatonga an'i Nebokadnetsara rainao ho mpanjaka lehibe heni-boninahitra sy laza.

¹⁹ Ary noho io fahalehibiazana izay nomen'Andriamanitra azy io dia natahotra sy nangovitra avokoa teo anatrehany ny foko sy firenena ary ny olona samy hafa fiteny rehetra; fa nahafaty izay tiany ho faty izy ary namelona izay tiany ho velona, nanandratra izay tiany hasandratra izy ary nampietry izay tiany haetry.

²⁰ Kanjo nony niavonavona ny fony ary feno fireharehana ny fanahiny, dia naongana teo amin'ny seza fiandrianany izy ary nesorina taminy ny voninahiny.

²¹ Noroahina hiala teo amin'ny olombelona izy, nanam-pironana tahaka ny an'ny biby, niara-nonina tamin'ny borikidia ary nihinana ahitra toy ny omby; sady kotsan'ny ando ny tenany, ambara-piekeny fa Andriamanitra Avo Indrindra no manapaka amin'ny fanjakan'ny olombelona ary manendry izay tiany hanjaka aminy.

²² Ary ianao Belsatsara zanany lahy dia tsy mba nampietry ny fonao na dia efa fantatrao aza izany rehetra izany.

²³ Fa nihantsy ny Tompon'ny lanitra ianao, raha nampaka ny tsatokaty voababo tao an-tempoliny ho eo anatrehanao; ka ny tenanao sy ny olo-manan-kajanao ary ireo vadinao mbamin'ny vaditsindranonao no nisotro divay taminy. Nankalazainao ireo andriamanitra volafotsy sy volamena, halimo sy vy ary vato aman-kazo izay tsy mahita na mandre na mahalala akory, fa ilay Andriamanitra Izay mihazona ny ainao sy miahy ny lalanao rehetra kosa tsy mba nomenao voninahitra.

²⁴ Noho izany dia Andriamanitra no niavian'ny rantsan-tanana izay nanoratra io soratra io.

²⁵ Ary izao no teny voasoratra: MENE MENE TEKELA sy PARSINA.

²⁶ Izao no hevitry ny teny: MENE: Voaisa, voaisan'Andriamanitra ny nanjakanao ka taperiny amin'izao;

²⁷ TEKELA: Voalanja, voalanja tamin'ny mizana ianao ka hita fa maivan-danja;

²⁸ PERESA: Voazara, voazara ny fanjakanao ka omena ny Medianina sy ny Persianina.

²⁹ Niaraka tamin'izay dia nanome baiko i Belsatsara mba hampiakanjoina jaky i Daniela sady hasiana rojo volamena ny vozony. Ary nasainy nambara am-pahabemaso koa fa i Daniela dia isan'ny telo lahy mpiara-mitantana eo amin'ny fanjakana.

³⁰ Tamin'io alina io ihany dia novonoina ho faty i Belsatsara mpanjakan'i Babilona.

Toko faha-6

¹ Ary i Dariosa, ilay Medianina, no nandray ny fanjakana teo amin'ny faha-62 taonany.

² Sitrak'i Dariosa ny hanendry solotenan'andriamanjaka 120 izay hanapaka manerana ny fanjakana.

³ Ary teo ambonin'ireo dia nisy telo lahy mpitantan-draharaha, ka i Daniela ny anankiray; izy telo lahy no hanaovan'ireo solotenan'andriamanjaka tatitra mba tsy hisy hanimba ny tombon-tsoan'ny mpanjaka.

⁴ Ary nihoaran'io Daniela io avokoa ireo mpitantan-draharaha anankiroa sy ireo solotenan'andriamanjaka tamin'ny fananany fanahy tena fatratra, koa nokasain'ny mpanjaka hatao lehibe eo amin'ny fanjakana manontolo izy.

⁵ Noho izany ireo mpitantan-draharaha ambony sy ireo solotenan'andriamanjaka dia nikaroka izay hiampangana an'i Daniela momba ny raharaham-panjakana; kanefa tsy nahita izay fahadisoany na tsininy akory ireo, satria nahatoky izy, fa tsy nisy mihitsy lesoka na tsiny teo aminy.

⁶ Tamin'izay dia hoy ireo lehilahy ireo: Tsy ho hitantsika mihitsy izay hiampangantsika io Daniela io raha tsy zavatra momba ny lalanan'ny Andriamaniny ihany.

⁷ Dia dodona nankany amin'ny mpanjaka ireo mpitantan-draharaha ambony sy solotenan'andriamanjaka, ary nanao taminy hoe: Ho ela velona anie ianao, ry Dariosa mpanjaka!

⁸ Ny mpitantan-draharaha ambony ato amin'ny fanjakana sy ny mpanapaka sy ny solotenan'andriamanjaka sy ny mpanolotsaina ary ny governora dia nifanaraka fa tokony hamoaka lalam-panjakana ianao, ry mpanjaka, fa ato anatin'ny telopolo andro, na iza na iza manao fivavahana na amin'Andriamanitra na amin'olona, afa-tsy aminao ihany, ry mpanjaka o, dia hatsipy ao an-davaky ny liona izy.

⁹ Ankehitriny, ry mpanjaka o, avoahy ny didy ka asio sonia mba tsy ho azo ovana, araka ny lalanan'ny Medianina sy ny Persianina izay tsy azo foanana.

¹⁰ Koa dia nosoniavin'i Dariosa mpanjaka izany didy aman-dalana izany.

¹¹ Ary nony fantatr'i Daniela fa nosoniavin'ny mpanjaka ny didy, dia nody tany an-tranony izy; ary novohany ny varavarankeliny tany ambony rihana nanandrify an'i Jerosalema. Intelo isan'andro izy no nandohalika nivavaka sy nidera an'ilay Andriamaniny satria efa fanaony hatry ny taloha izany.

¹² Dodona ery ireo lehilahy ireo nitsikilo ka nahita an'i Daniela nivavaka sy nitalaho tamin'ny Andriamaniny;

¹³ dia nanatona ny mpanjaka izy ary niteny teo anatrehany momba ilay didy ka nanao hoe: Ry mpanjaka o, moa tsy nisy didy nosoniavinao va fa ato anatin'ny telopolo andro, na zovy na zovy no hanao fivavahana na amin'Andriamanitra na amin'olona, afa-tsy aminao ihany, dia hatsipy ao an-davaky ny liona? Dia namaly kosa ny mpanjaka nanao hoe: Marina tokoa izany, dia araka ny lalanan'ny Medianina sy ny Persianina izay tsy azo foanana.

¹⁴ Fa niteny indray ireo ka nanao teo anatrehan'ny mpanjaka hoe: I Daniela, isan'ireo babo avy any Joda, dia tsy mba miraharaha anao na ny didy izay nosoniavinao, ry mpanjaka o; fa intelo isan'andro izy no manao fivavahana amin'ny Andriamaniny.

¹⁵ Nalahelo mafy ny mpanjaka raha nandre izany zavatra izany; dia nisaintsaina ny hanavotra an'i Daniela izy ary nitady izay hamonjena azy mandra-pilentiky ny masoandro.

¹⁶ Fa dodona niverina tany amin'ny mpanjaka ireo lehilahy ireo ka nanao taminy hoe: Aoka ho fantatrao, ry mpanjaka, fa araka ny lalanan'ny Medianina sy ny Persianina, ny didy aman-dalana izay navoakan'ny mpanjaka dia tsy azo ovana.

¹⁷ Tamin'izay dia nanome baiko ny mpanjaka mba halaina i Daniela ka hatsipy ao an-davaky ny liona. Dia niteny kosa ny mpanjaka ka nanao tamin'i Daniela hoe: Andriamanitrao, Izay tompoinao fatratra, no hany hamonjy anao!

¹⁸ Dia nisy vato natampina ny vavan-davaka; ary ny mpanjaka nanomboka izany tamin'ny tombokaseny sy tamin'ny an'ireo olo-manan-kajany mba tsy hisy hovana ny amin'i Daniela.

¹⁹ Dia nody tany an-dapany ny mpanjaka ary tsy nihinan-kanina nandritra ny alina sady tsy nampiditra vehivavy teo anatrehany, na dia tsy nahita tory aza.

²⁰ Fa raha vao nangiran-dratsy ny andro, dia nifoha ny mpanjaka ka nandeha faingana nankany amin'ny lavaky ny liona.

²¹ Ary raha nanatona ny lavaka izy, dia niantso an'i Daniela tamin'ny feo malahelo hoe: Ry Daniela mpanompon'Andriamanitra velona o, moa Andriamanitrao Izay tompoinao fatratra va afaka namonjy anao tamin'ny liona?

²² Dia niteny tamin'ny mpanjaka i Daniela hoe: Ho ela velona anie ianao, ry mpanjaka!

²³ Ny Andriamanitro efa naniraka ny anjeliny hanakombona ny vavan'ny liona tsy handratra ahy, satria hita tsy manan-tsiny teo anatrehany aho; ary tsy nanao ratsy teo anatrehanao koa aho, ry mpanjaka.

²⁴ Tamin'izay dia faly tokoa ny mpanjaka, ka nasainy nakarina avy ao an-davaka i Daniela; rehefa tafakatra izy, dia tsy nahitana ratra akory satria natoky an'ilay Andriamaniny.

²⁵ Ary nanome baiko ny mpanjaka mba halaina ireo lehilahy izay niampanga an'i Daniela ka hatsipy ao an-davaky ny liona izy mbamin'ny vady aman-janany. Fa raha tsy mbola nipaka tamin'ny vody lavaka akory izy mianakavy, dia nifandrombahan'ny liona ka nopotipotehiny ny taolany rehetra.

²⁶ Taorian'izany i Dariosa mpanjaka dia nanoratra ho an'ny vahoaka avy amin'ny foko sy firenena ary samy hafa fiteny rehetra izay monina ambonin'ny tany tontolo hoe: Hitombo anie ny fiadananareo!

²⁷ Mamoaka izao didy izao aho mba hangovitan'ny olona sy hatahorany eo anatrehan'ny Andriamanitr'i Daniela manerana ny fanjakako. Fa Izy no Andriamanitra velona sady maharitra mandrakizay; ny fanjakany tsy mety rava ary ny fanapahany haharitra tsisy farany.

²⁸ Izy no mamonjy sy manafaka ary manao famantarana sy zava-mahagaga any an-danitra sy ety an-tany; Izy no namonjy an'i Daniela ho afaka tamin'ny vahohon'ny liona.

²⁹ Ary izany Daniela izany dia nitana toerana ambony tamin'ny nanjakan'i Dariosa sy tamin'ny nanjakan'i Kirosa ilay Persianina.

Toko faha-7

¹ Tamin'ny taona voalohany nanjakan'i Belsatsara tao Babilona dia nanonofy i Daniela ary nahazo fahitana teo am-pandriany. Nosoratany ny nofy ary notantarainy araka izao manaraka izao:

² Hitako tamin'ny fahitana tamin'ny alina, fa indro ny rivotra avy amin'ny vazan-tany efatra nibosesika hampisamboaravoara ny ranomasina midadasika.

³ Ary nisy biby efatra lehibe samy hafa niakatra avy tao amin'ny ranomasina.

⁴ Ny voalohany dia tahaka ny liona ary nanana elatry ny voromahery; saingy raha mbola nijery aho dia nesorina taminy ny elany, ary ningaina avy amin'ny tany izy ka nitsangana tamin'ny tongony tahaka ny olona, sady nomena fisainan'olombelona.