Ezekiela

Toko faha-19

¹ Ary ny TOMPO niteny tamiko mba hivetso izao tononkiram-palahelovana izao ny amin'ireo andrianan'i Israely

² ka hanao hoe: "Ny reninareo ve? Toy ny liom-bavy izy no namitsaka teo afovoan'ireo lion-dahy! Teo anivon'ny liona tanora izy no nitorovoka nampinono ny zanany.

³ Nanabe ny anankiray tamin'ireo izy; ka nony liona tanora matanjaka io, dia nianatra namiravira haza sady nihinana olona.

⁴ Nahare ny lazany ny hafa firenena dia namandrika azy hatao anaty lavaka, ary nanisy farango vy tamin'ny orony sy nitondra azy nankany Ejipta.

⁵ Rehefa tsapan'ilay liom-bavy fa foana sy levona ny fanantenany, dia nalainy ny iray hafa tamin'ireo zanany ka notezainy ho tonga liona tanora matanjaka.

⁶ Niriaria teo anivon'ny lion-dahy izy io, ka nony tonga liona tanora matanjaka, dia nianatra namiravira haza ihany koa sady nihinana olona.

⁷ Namotika ny lapan'ireo izy ary nandrava ny tananany. Raiki-tahotra ny mponina teo amin'ny tany, raha vao nandre ny fieronerony.

⁸ Koa ireo hafa firenena manodidina, avy amin'ny faritra samihafa, dia nivondrona hamely azy ka namelatra harato hahazoana azy ary namandrika azy hatao anaty lavaka.

⁹ Nasiany farango vy tamin'ny orony izy, dia nohidiny tao anaty vata makarakara ary nentiny tany amin'ny mpanjakan'i Babilona ; dia nataony an-tranomaizina izy mba tsy ho re mieronerona intsony eny amin'ny tendrombohitr'i Israely."

¹⁰ "Ny reninareo dia tahaka ny voaloboka iray nambolena teo amoron-drano. Nilonjehitra voa sy nanaroka izy noho ny rano be nanondraka azy,

¹¹ ka nisy rantsana mafy azo atao tehim-pahefan'ny mpifehy; dia nisondrotra avo nitehi-drahona izy, ka nikoizana noho ny haavony mbamin'ny hamaroan'ireo rantsany.

¹² Kanefa nongotana an-katezerana izy ka natsipy tamin'ny tany. Ny rivotra avy atsinanana no nahamaina ny voany ka nampihintsana azy. Nihamaina koa ny rantsany mafy ka natao levon'ny ao.

¹³ Ankehitriny izany voaloboka izany dia voavoly any an-taniefitra ao amin'ny tany maina sy karankaina.

¹⁴ Nisy afo nivoaka avy tao amin'ny tahony ka nandevona ny rantsany sy ny voany; dia tsy misy intsony rantsana mafy azo atao tehim-pahefan'ny mpifehy.Tononkiram-palahelovana izany ka tokony hohiraina amin'alahelo. "

Toko faha-20

¹ Tamin'ny taona fahafito taorian'ny fahababoana, nony andro fahafolon'ny volana fahadimy , dia tonga nanatona ahy ireo loholona israelita vitsivitsy mba hanontany ny TOMPO, ka nipetraka teo anatrehako.

² Dia nisy tenin'ny TOMPO tamiko nanao hoe:

³ Ry ilay taranak'olombelona, ambarao amin'ireo loholon'i Israely fa izao no lazain'ny TOMPO ANDRIANANAHARY: Moa hanontany Ahy ve no nahatongavanareo? Velona Izaho TOMPO ANDRIANANAHARY ka manao teny hentitra sy mianiana fa tsy hanaiky hanontanianareo mihitsy!"

⁴ "Ary ianao, ry ilay taranak'olombelona, miomana hitsara azy; eny, tsarao mihitsy izy. Ampahafantaro azy ny asa maharikoriko nataon'ny razany.

⁵ Ambarao aminy fa izao no lazain'ny TOMPO ANDRIANANAHARY: Tamin'ny andro nifidianako ny vahoaka Israely, dia izy rehetra no nianianako. Niseho taminy Aho tany Ejipta ary nampanantena azy mafy ho TOMPO Andriamaniny."

⁶ Tamin'izany andro izany no nianianako fa hampamoaka azy hiala any Ejipta Aho mba hitondra azy ho amin'ny tany nomaniko ho azy manokana, dia tany izay tondra-dronono sy tantely sady mahafinaritra noho ny tany hafa rehetra.

⁷ Ary nibaiko azy Aho samy hiala amin'ny sampy maharikoriko izay manintona azy, ka tsy handoto tena amin'ny fanompoana ireo sampy ejiptianina. Izaho no TOMPO Andriamaniny."

⁸ "Kanjo nikomy tamiko izy, ary tsy nanaiky hihaino Ahy. Tsy nisy nanary ireo sampy maharikoriko izay nanintona azy izy, ary tsy nisy nandao ny sampy ejiptianina. Koa nihevitra Aho ny hampihatra sy hampitosaka ny fahavinirako amam-pahatezerako aminy tao Ejipta ihany.

⁹ Kanefa notandroviko ny lazako mba tsy hozimbazimbain'ny firenen-kafa niarahany nonina. Fa teo imason'ireo firenena ireo no nanaovako izay hahafantaran'ny Israelita Ahy tamin'ny namoahako azy hiala tany Ejipta.

¹⁰ Eny, nentiko niala tany Ejipta izy ary notarihiko hankany an-taniefitra.

¹¹ Nomeko azy ny lalanako ary nampahafantariko azy ny fitsipiko, izay mahavelona ny olona manatanteraka ireny.

¹² Nomeko azy koa ny andro sabatako mba ho mariky ny fifandraisany amiko sy mba hiekeny fa Izaho TOMPO no nanokana azy Israelita ho Ahy.

¹³ Kanjo nikomy tamiko tany an-taniefitra ireo! Tsy noraharahainy ny lalanako ary nohamavoiny ny fitsipiko izay mahavelona ny olona manatanteraka ireny. Nozimbazimbainy mihitsy ny andro sabatako. Koa nihevitra indray Aho ny hampitosaka ny fahatezerako aminy tany an-taniefitra mba hahalany ringana azy.

¹⁴ Kanefa notandroviko ny lazako mba tsy hozimbazimbain'ireo firenen-kafa nahita ny namoahako ny Israelita hiala tany Ejipta.

¹⁵ Ary nianiana taminy koa Aho tany an-taniefitra fa tsy hitondra azy hiditra ao amin'ny tany efa nomeko azy, dia tany izay tondra-dronono sy tantely sady mahafinaritra noho ny tany hafa rehetra;

¹⁶ ny nanaovako izany fianianana izany dia satria nanamavo ny fitsipiko izy sady tsy nanaraka ny lalanako ary nanimbazimba ny andro sabatako, noho izy niraiki-po tamin'ny sampiny.

¹⁷ Saingy niantra fijery azy ihany Aho ka tsy nandringana azy na nandevona azy tany an-taniefitra. "

¹⁸ Fa hoy Aho tamin'ireo zanany tany an-taniefitra: Aza manaraka ny fanaon-drazanareo ianareo na mitandrina ny fitsipiny na mandoto tena amin'ny fanompoana ny sampiny.

¹⁹ Izaho no TOMPO Andriamanitrareo! Koa araho ny lalanako ary tandremo ny fitsipiko.

²⁰ Atokany ho Ahy ny andro sabatako mba ho mariky ny fifandraisanareo amiko ary mba hiekenareo fa Izaho no TOMPO Andriamanitrareo."

²¹ Kanjo nikomy tamiko koa ireo zanany. Tsy narahiny ny lalanako ary tsy notandroviny ho tanterahina ny fitsipiko izay mahavelona ny olona manatanteraka ireny, sady nozimbazimbainy ny andro sabatako. Koa nihevitra Aho ny hampihatra sy hampitosaka ny fahavinirako amam-pahatezerako aminy any an-taniefitra.

²² Nefa tsy nanao izany Aho ary nitandro ny lazako mba tsy ho zimbazimbain'ny firenen-kafa izay nahita ny namoahako ny Israelita niala tany Ejipta.

²³ Ary nianiana taminy tany an-taniefitra indray Aho fa hampiely azy any amin'ireo hafa firenena ary hampiparitaka azy any an-tany samy hafa;

²⁴ ny nanaovako izany fianianana izany dia satria tsy nanatanteraka ny fitsipiko izy fa nanamavo ny lalanako sady nanimbazimba ny andro sabatako, ary voasinton'ny sampin'ireo razany.

²⁵ Ankoatra izany, dia nomeko lalana tsy nahasoa azy sy fitsipika tsy nahavelona azy izy.

²⁶ Navelako handoto tena tamin'ny fanolorana ny voalohan-terany rehetra hovonoina ho faty izy mba hampivarahontsana azy ka hiekeny fa Izaho no TOMPO."

²⁷ Noho izany, ry ilay taranak'olombelona, ambarao amin'ny Israelita fa izao no lazain'ny TOMPO ANDRIANANAHARY: Ny razanareo dia nanamavo Ahy hatrany hatrany tamin'ny fivadihany tamiko.

²⁸ Nitarika azy ho ao amin'ny tany izay nianianako homena azy Aho. Nefa nony nahita ireo tendron-kavoana misy hazo matevina izy, dia nanolotra sorona teo. Nanolotra fanatitra sy zava-manitra fampitoniana izy sady nandraraka divay teny ka nampirongatra ny hatezerako.

²⁹ Dia nanontany azy Aho hoe: Inona ireo toeram-panasinana izay alehanareo ireo? Koa nanomboka teo no niantsoana ireny toerana ireny hoe toeram-panasinana"

³⁰ Noho izany, ambarao amin'ny Israelita fa izao no lazain'ny Tompo ANDRIANANAHARY: "Nahoana no manaraka ny fanaon-drazanareo ianareo, ka ny fanompoana ireo sampiny maharikoriko ireo no andotoanareo tena sy ivadihanareo amiko?

³¹ Ary mandraka ankehitriny dia mbola mandoto tena ihany ianareo fa mitondra fanatitra sy manao sorona ny zanakareo amin'ny sampinareo. Manoloana izany ve Aho, ry Israelita, dia mbola hanaiky hanontanianareo ihany? Velona Izaho TOMPO ANDRIANANAHARY ka manao teny hentitra sy mianiana fa tsy hanaiky hanontanianareo Aho.

³² Mihevitra angaha ianareo fa ho afaka hanompo ireo vato aman-kazo tahaka ny hafa firenena, dia ireo vahoakan'ny tany hafa? Tsia, tsy ho tanteraka mihitsy izany.

³³ Velona Izaho TOMPO ANDRIANANAHARY ka manao teny hentitra sy mianiana fa hampihatra hery mafonja sy fahefana tsy hay tohaina Aho ary hampitosaka ny hatezerako mba hanjakako aminareo.

³⁴ Hery mafonja sy fahefana tsy hay tohaina ary fahatezerana mitosaka no hamoahako anareo avy any amin'ny firenena sy hamoriako anareo avy any amin'ny tany izay nampielezana anareo.

³⁵ Hoentiko any an-taniefitra hihataka amin'ny firenen-kafa ianareo , ka any no hitsarako anareo mifanatrika amiko.

³⁶ Tahaka ny nanamelohako ny razanareo tany an-taniefitra akaikin'i Ejipta no hanamelohako anareo koa. Teny hentitra avy amiko TOMPO ANDRIANANAHARY izany.