Jeremià

Toko faha-52

⁴ Koa tonga tao Jerosalema niaraka tamin'ny tafiny manontolo i Nebokadnetsara. Nitoby manoloana ny tanana ireo miaramilany, ary nanao tovon-tany manodidina an'i Jerosalema. Taona fahasivy nanjakan'i Tsedekia tamin'izay, ary andro fahafolon'ny volana fahafolo.

⁵ Naharitra hatramin'ny taona faha-11 nanjakan'i Tsedekia ny fanaovana fahirano.

⁶ Mafy dia mafy ny mosary tao an-tanana fa tsy nanan-kohanina ny mponina. Ary tamin'ny andro fahasivin'ny volana fahefatra ,

⁷ dia nisy noloahan'ireo Babilonianina ny mandan'ny tanana. Koa nony alina dia nitsoaka nandositra ny miaramila jodeanina rehetra. Na dia voahodidin'ny Babilonianina aza ny tanana, dia niala tao Jerosalema ihany ireo, ka nandalo ny vavahady tanelanelan'ny manda roa sady takaikin'ny sahan'ny mpanjaka , ary nihazo ny lalana mankany amin'ny lohasahan'i Jordana.

⁸ Kanjo nenjehin'ny miaramila babilonianina i Tsedekia mpanjaka ary tratrany teo amin'ny lemak'i Jerikao; dia nihahaka nandao an'i Tsedekia ny tafiny manontolo.

⁹ Rehefa voasambotra ny mpanjaka, dia nentina tany amin'ny mpanjakan'i Babilona izay tao Ribla anatin'ny faritr'i Hamata ; ary namoahan'i Nebokadnetsara didim-pitsarana tao izy.

¹⁰ Novonoina ho faty teo imason-drainy ireo zanakalahin'i Tsedekia; ary tao Ribla koa no namonoana ho faty ireo mpiasam-panjakana jodeanina.

¹¹ Avy teo dia nasain'i Nebokadnetsara nopotsirina ny mason'i Tsedekia; ary nasainy nafatotra gadra halimo sy nentina ho any Babilona izy mba hatao an-tranomaizina ka nahibony tao ambara-pahafatiny.

¹² Tamin'ny taona faha-19 nanjakan'i Nebokadnetsara, nony andro fahafolon'ny volana fahadimy , dia tafiditra tao Jerosalema i Nebozaradana, filohan'ny mpiambina sady manamboninahitry ny mpanjakan'i Babilona.

¹³ Izy no nandoro ny tranon'ny TOMPO sy ny lapan'ny mpanjaka ary ireo trano tao an-tanana, indrindra ny an'ny olona ambony rehetra.

¹⁴ Ny manda manodidina an'i Jerosalema dia narodan'ny miaramila babilonianina rehetra izay niaraka tamin'ny filohan'ny mpiambina.

¹⁵ Ary nentin'i Nebozaradana ho babo ireo mponina sisa tao an-tanana, dia ireo fianakaviana mahantra vitsivitsy sy ireo olona nitolo-batana tamin'ny mpanjakan'i Babilona ary ny sisa tamin'ireo mpahay taozavatra.

¹⁶ Kanefa dia nisy ampahan'ny vahoaka mahantra navelany mba hamboly ny tanimboaloboka sy ny saha.

¹⁷ Nopotehin'ny Babilonianina ireo andry halimo tao an-tranon'ny TOMPO mbamin'ireo kalesy ary ilay fitobian-drano halimo goavana teo an-kianja ; dia nentiny nankany Babilona avokoa ny halimo.

¹⁸ Nalainy koa ny fanaka halimo rehetra fampiasa tamin'ny fanompoam-pivavahana, dia ny vilany fasian-davenona sy ny sotron'afo mbamin'ny antsy sy ny tsatokaty famafazana ary ireo lovia madinika.

¹⁹ Nentin'ny filohan'ny mpiambina koa ny fitaovana volamena sy volafotsy rehetra: ny lovia, ny fandoroana zava-manitra, ny tsatokaty famafazana, ny fandrao fan-davenona, ny fitoeran-jiro ary ny kaopy sy ny tavoara.

²⁰ Tsy hita lanja ny halimo tamin'ireo fanaka rehetra izay namboarin'i Salomona ho an'ny tranon'ny TOMPO: dia ireo andry anankiroa sy ilay fitobian-drano goavana miaraka amin'ireo ombilahy halimo 12 mitondra azy, ary ireo kalesy.

²¹ Ny andry tsirairay dia sivy metatra ny haavony ary enina metatra ny manodidina. Poakaty izy nefa misy valo santimetatra ny hatevin'ny metaly.

²² Misy lohany halimo tsirairay avy ny andry ka mahatratra roa metatra sy sasany ny haavony sady voaravaka harato sy ampongabendanitra halimo ny manodidina azy. Mitovy ireo andry roa sy ny ravaka natao taminy.

²³ Miisa 96 ireo ampongabendanitra teo amin'ny lafiny efatra, izany hoe ampongabendanitra zato no tontaliny tamin'ny manodidina ny harato.

²⁴ Nosamborin'ny filohan'ny mpiambina i Seraia mpisorombe sy i Tsefania lefiny ary ireo mpisorona telo lahy mpiandry varavarana.

²⁵ Nosamboriny koa ny mpiasam-panjakana iray mpiandraikitra ny miaramila sy ny olona fito lahy mpanolotsainan'ny mpanjaka, sy ny mpitantsoratr'ilay manamboninahitra misahana ny fiantsoana ho miaramila, ary ny teratany jodeanina miisa enimpolo lahy; fa samy hitany tao Jerosalema avokoa ireo.

²⁶ Nentin'i Nebozaradana ho any amin'ny mpanjakan'i Babilona tao Ribla anatin'ny faritr'i Hamata izy rehetra

²⁷ ary nasain'ny mpanjakan'i Babilona novonoina ho faty tao ihany. Toy izany no nitondrana ny vahoaka jodeanina ho babo lavitry ny taniny.

²⁸ Ireto no isan'ireo olona nasain'i Nebokadnetsara nentina ho babo: tamin'ny taona fahafito nanjakany , Jodeanina 3023;

²⁹ tamin'ny taona faha-18 nanjakany , olona 832 avy tao Jerosalema.

³⁰ Tamin'ny taona faha-23 nanjakany , dia mbola nitondra Jodeanina 745 ho baboihany i Nebozaradana filohan'ny mpiambina. Koa ny tontalin'izy rehetra dia 6400.

³¹ Fony 37 taona taorian'ny fanaovana sesitany an'i Joiakina mpanjakan'i Joda, dia i Evila-Merodaky no tonga mpanjakan'i Babilona. Koa tamin'ny volana faha-12 tao anatin'io taona io, nony andro faha-27, dia nomeny famotsoran-keloka i Joiakina ka nasainy navoaka ny trano maizina.

³² Dia nanaovany teny mamy izy, ary nomeny toerana ambony kokoa noho ny an'ireo mpanjaka niaraka taminy tao Babilona.

³³ Tsy navela hanao ny fitafian'ny mpigadra intsony i Joiakina; ary niara-nisakafo isan'andro tamin'ny mpanjakan'i Babilona izy nandritra ny andro sisa rehetra niainany.

³⁴ Izany koa no nahazoan'i Joiakina tamin'ny mpanjakan'i Babilona ny zavatra nilainy araka ny sahaza azy isan'andro mandra-pahafatiny.

Fitomaniana

Toko voalohany

¹ Indrisy! Mitoetra manirery izao ilay tanana feno olona fahiny! Tonga toy ny mpitondratena ilay nalaza tamin'ireo hafa firenena; manao ny asan'ny mpanompo izao ilay andriambavy nifehy faritany maro!

² Mitomany foana izy amin'ny alina, mirotsa-dranomaso eny an-takolany; izay rehetra tia azy dia tsy misy mampionona azy. Nanary azy avokoa ny sakaizany, ary tonga fahavalony ankehitriny.

³ Difotry ny fahoriana sy vesaram-panompoana no lasan-ko babo ny fokon'i Joda. Mitoetra any amin'ny hafa firenena izy izao kanefa tsy mahita hifaharana. Izay rehetra mpanenjika azy dia nahatratra azy an-katerena.

⁴ Misaona ny lalana mankany Tsiona satria tsy misy miakatra amin'ny fety. Mangina avokoa ny kianjany ary sentom-pahakiviana no ataon'ny mpisorony. Ory fatratra ireo tovovaviny, ka mangidy amin'i Tsiona izany!

⁵ Ny fahavalony no lasa ambony ary ny mpiady aminy no miadana; satria ny TOMPO no mampahory an'i Tsiona noho ireo fahadisoany maro. Atosi-pahavalo ireo zanany madinika no lasa ho any an-tsesitany.

⁶ Miala avy ao Tsiona izay rehetra nireharehany; ary ny mpitondrany dia toy ny diera tsy mahita ahitra hiraofana, ka tsy manan-kery no mandositra eo anoloan'ny mpihaza azy.

⁷ Amin'izany androm-pahoriana irenireneny izany no ahatsiarovan'i Jerosalema ireo zava-tsarobidy rehetra izay nananany hatry ny ela. Ireo vahoakany eo an-tanam-pahavalo kosa dia tsy misy mamonjy; ka rehefa mahita an'i Jerosalema ny fahavalony, dia mihomehy ny amin'ny faharavany.

⁸ Efa nanota dia nanota i Jerosalema, ka izany no mahatonga azy ho fako maharikoriko. Izay rehetra nanaja azy mamingavinga satria mahita azy mitanjaka. Na ny tenany aza dia misento sady lasa nihodina.

⁹ Ny lotony dia eo amin'ny akanjony; tsy nahatsinjo ny hoavy izy ka gaga noho ny fietreny toy izao, tsy misy mampahery azy akory. TOMPO o, jereo ity fahoriako, hoy izy, fa mirehareha ny fahavaloko!

¹⁰ Naninji-tanana ireo mpandresy haka ny zava-tsarobidiny rehetra. Hitan'i Jerosalema aza fa ny hafa firenena dia nitsofoka tao amin'ny Toeramasina; nefa noraranao ireny, Tompo o tsy hiditra ao amin'ny fiangonanao.

¹¹ Sentom-pahakiviana no ataon'ny vahoaka rehetra eo am-pitadiavana izay hohaniny. Efa nanome izay zava-tsarobidy indrindra izy mba hatakalo hanina hampodina hery. Hoy izy hoe: TOMPO o, jereo ka diniho fa efa voavingavinga loatra aho.

¹² Avia ianareo rehetra mpandalo eto, diniho sy jereo raha mba misy fijaliana tahaka ny fijaliana mihatra amiko, dia ilay nampahorian'ny TOMPO ahy tamin'ny andro firehetan'ny fahatezerany.

¹³ Nandefa afo avy tany an-danitra Izy mba haninteraka ny taolako. Namela-pandrika haningotra ny tongotro Izy ka nampitsinkasina ahy. Nataony lao mihitsy aho, ka mararirary isan'andro.

¹⁴ Arahiny maso ny fahotako izay toy ny vona eo an-tanany; mitambesatra eo am-bozoko ny ziogan'ny Tompo, ka nampiketraka ny heriko; natolony eo an-tanam-pahavalo aho ka tsy afa-manohitra ireny.

¹⁵ Nailikiliky ny Tompo ireo maheriko rehetra. Nanainga andian-tafika iray Izy hamely ahy mba afaka hanamontsana ireo zatovoko. Nohosihosen'ny Tompo toy ny voaloboka am-pamiazana aho, dia izaho Tsiona, ilay tsara tarehin'i Joda.

¹⁶ Izany no loza itomaniako, sy mahatonga ahy hamarin-dranomaso; fa lavitra ahy ilay mpampionona izay afaka hamelombelona ny aiko. Ringana ny zanako, fa nahery ny fahavalo.

¹⁷ Mananty tanana miangavy i Tsiona, nefa tsy misy mampionona azy. Nobaikoin'ny TOMPO ireo firenena manodidina ho fahavalon'ny taranak'i Jakoba; i Jerosalema, eo afovoan'ireo, dia tonga fako maharikoriko.

¹⁸ Rariny ny nataon'ny TOMPO, satria efa nanohitra ny baikony aho. Mihainoa tsara, rey olona rehetra eto ka jereo ny fijaliako: ny tovovaviko sy ny tovolahiko dia samy lasa ho any an-tsesitany.

¹⁹ Niantso ireo tia ahy taloha aho, nefa nilaozany fotsiny. Niala aina tao an-tanana ny mpisoroko sy loholoko raha iny mbola nitady hanina hampodina hery iny.