Jeremià

Toko faha-51

¹⁷ Ketrina avokoa ny olona rehetra ka tsy mahatakatra ny hevitr'izany. Ireo mpandasitra sarivongan-tsampy dia menatra avokoa tamin'ny nataony; satria fitaka ireo sarivongana ireo fa tsy manam-pofonaina akory.

¹⁸ Zava-poana sy asa mahatsikaiky ireny; fa amin'ny andro hamaizana azy, no hahalevona ny sarivongan-tsampy.

¹⁹ Fa tsy mitovy amin'ireo ny TOMPO, ilay Anjaran'i Jakoba, satria Izy no mpamorona ny zava-drehetra; ary ny vahoaka Israely dia fananany. Ilay TOMPOn'izao rehetra izao no anarany.

²⁰ "Ry Babilona, hoy ny TOMPO, kanonta sy fitaovam-piadiana ho Ahy ianao. Ianao no nampiasaiko hanorotoroana firenena sy hanapotehana fanjakana maro.

²¹ Ianao no nampiasaiko hanorotoroana ny soavaly sy ny mpitaingina azy.

²² Ianao no nampiasaiko hanorotoroana lehilahy sy vehivavy, na antitra na tanora na ankizy.

²³ Ianao no nampiasaiko hanorotoroana ny mpiandry ondry sy ny andian' ondriny, ny mpamboly sy ny ombiny mizioga, ary ny governora sy ny lefiny."

²⁴ "Hoy ny teny hentitry ny TOMPO: Ho hitanareo kosa izao fa hatsingeriko amin'i Babilona sy ny mponina rehetra any Babilonia ny ratsy rehetra nataony tamin'iTsiona.

²⁵ Indro mamely anao Aho, ry Babilona mpampiavosa fandravana, ianao ilay nandrava izay rehetra tamin'ny tany, hoy ny teny hentitra avy amikoTOMPO. Maninji-tanana hamely anao Aho, ka manjera anao avy eny ambony harambato. Hataoko vainafo miavosa ianao,

²⁶ ka tsy ho azo akana vato intsony hatao vato fehizoro na vato fanorenana. Ho toerana mahonena mandrakizay ianao, hoy ny teny hentitra avy amikoTOMPO."

²⁷ Atsangano ny fanevam-panairana eo amin'ny tany, tsofy any amin'ny firenen-kafa ny anjomara; entano ny firenena rehetra hamely an'i Babilona, antsoy hamely azy ny fanjakana any Ararata sy Meny ary Askenaza. Manendre mpifehy hamory miaramila; soavaly marobe no alefaso hanafika toy ny valala manao andiany.

²⁸ Entano ny firenena maro hamely azy, indrindra fa ny mpanjakan'i Medianina, ny governora rehetra sy ny lefiny ary ny faritany manontolo izay iadidiany.

²⁹ Mihorohoro sy mihovitrovitra ny tany fa tanteraka amin'i Babilona ny fikasan'ny TOMPO hamelezana azy mba hahatonga an'i Babilonia ho tany mahonena tsy misy mponina intsony.

³⁰ Tsy mety hiady intsony ny miaramila kalazan'i Babilona, fa lasa niery any amin'ny trano fiarovana. Lefy herim-po izy, ka nalemy toy ny vehivavy. Nodorana ny fonenany, potika ny hidim-baravarany.

³¹ Mifampita vaovao ny iraka mpihazakazaka mba hampandre ny mpanjakan'i Babilona, fa azom-pahavalo ny tananany manontolo.

³² Voatazona ny toeram-pitana, voadoro ny volotara eny an-kady fiarovana, kivy ny miaramila babilonianina.

³³ Izao no lazain'ny TOMPOn'izao rehetra izao sady Andriamanitr'i Israely: "Voahosihosy ilay Babilona fadiranovana toy ny famoloana omanina hivelezam-bary; fa ho avy tsy ho ela ny fotoam-pijinjana azy. "

³⁴ "Nandripaka sy nitsentsitra ahy i Nebokadnetsara mpanjakan'i Babilona; dia napetrany toy ny vilia nahalaniana aho. Tahaka ny fitelin'ny mamba no nitelemany ahy, ka ny tsokako no namenoany ny kibony; izay aho vao naloany.

³⁵ Aoka ny mponin'i Tsiona hiteny hoe: Hanody an'i Babilona anie ny herisetra nataony tamiko! Aoka i Jerosalema hiteny hoe: Hanody ny Babilonianina anie ny heloka nataony tamin'ny nandatsahany ny rako!"

³⁶ Izao ary no lazain'ny TOMPO amin'i Jerosalema: "Horaisiko an-tanana ny momba anao ka Izaho no hamalifaty anao: hataoko maina ny oniny ary horitiko ny loharanony.

³⁷ Ho tonga korontam-bato i Babilona, ka ho fonenan'ny amboadia, ho toerana tsy hisy olona intsony fa mahonena sy mampivarahontsana.

³⁸ Miara-mierona toy ny liona tanora ny mponina ao Babilona ankehitriny ary mikonainaina toy ny zana-diona.

³⁹ Raha mbola eo am-pilendalendana izy, dia efa manomana fanasana ho azy Aho: Homamoiko izy mba hiravoravo, dia hatory mandrakizay , ka tsy hifoha intsony. Teny hentitra avy amiko TOMPO izany.

⁴⁰ Any amin'ny toeram-pamonoana no hitondrako azy toy ny zanak'ondry sy toy ny ondrilahy aman'osilahy. "

⁴¹ Andray! Nalaza eran-tany ny tananan'i Sesaka nefa azo sy voatazona izy izao! Andray! Tonga toerana mahonena i Babilona eo anivon'ny firenena maro!

⁴² Tafakatra hatrany aminy ny ranomasina, nandrakotra azy ny onjany misafoaka.

⁴³ Tonga aolo ny tananany; karankaina sy ngazana ny taniny sady tsy misy olona monina intsony ary tsy misy olona mandalo azy.

⁴⁴ Hoy ny TOMPO hoe: "Hirotsaka an-tsehatra hanafay an'i Bela andriamanitr'i Babilona Aho, hasaiko haloany izay nateliny. Hitsahatra tsy hitanjozotra ho any aminy ireo firenen-kafa. Nirodana ny mandan'i Babilona!

⁴⁵ Koa ilaozy ny tananany, ry vahoakako, ary samia manavo-tena ianareo mba tsy hiharan'ny fahatezerako mirehitra!

⁴⁶ "Tandremo tsy ho kivy na hatahotra ianareo noho ny tsaho izay taterina ao amin'ny tany. Fa hifandimby ny tsaho samihafa arakaraky ny taona: herisetra ao amin'ny tany, fanonganan'ny mpanao didy jadona an'izay talohany...

⁴⁷ Ho avy ny andro hirotsahako an-tsehatra hanafay ireo sarivongan-tsampin'i Babilona. Ho afa-baraka ny taniny manontolo; hiampatrampatra ao an-tanana ny maty rehetra.

⁴⁸ Ny lanitra sy ny tany sy izay rehetra ao aminy dia hanao hobim-pandresena noho ny amin'i Babilona, rehefa tonga avy any avaratra ireo tsy maintsy handrava azy. Izany no teny hentitry ny TOMPO."

⁴⁹ Nahatonga fahafatesan'olona maro i Babilona teo amin'ny tany manontolo; koa anjarany indray izao ny ho faty noho ireo Israelita izay novonoiny.

⁵⁰ Koa ianareo izay afaka tamin'ny ady, mandehana fa aza mijanona eo. Avy any lavitra any no tsarovy ny TOMPO ary ataovy ao an-tsainareo i Jerosalema.

⁵¹ Afa-baraka izahay nandre fandatsana! Rakotry ny henatra ny endrikay fony nidiran'ireo hafa firenena ny Toeramasina tao an-tranon'ny TOMPO.

⁵² Noho izany, hoy ny teny hentitry ny TOMPO, dia ho avy ny andro hirotsahako an-tsehatra hanafay ireo sarivongan-tsampin'i Babilona. Ho re manerana ny taniny ny tolokon'ireo maratra.

⁵³ Na dia hisondrotra any an-danitra aza i Babilona ka hanao ny fiarovany ho avo tsy azo anihina, dia ny baikoko no hahatraran'ny mpandrava azy hoy ny teny hentitry ny TOMPO.

⁵⁴ Misy feo miampita avy any Babilona: fandringanana goavana no re avy ao amin'ny taniny.

⁵⁵ Fa ny TOMPO no mandrava an'i Babilona, sy mampangina ny horakorany. Mamelona akoran'ady ny fahavalo ka toy ny feon'onjan-dranomasina ao anaty kotro-baratra izany.

⁵⁶ Tonga hanafika an'i Babilona ny mpandrava, ka hanao sambo-belona ireo maherifony, sy hanapotika ny tsipikany. Fa ny TOMPO dia Andriamanitra mamaly ny natao ka mampihatra tokoa ny valifatiny.

⁵⁷ Homamoiko ireo mpitondra azy sy ny olon-kendriny, ireo governorany sy ny lefiny ary ireo maherifony. Hatory mandrakizay ireny ka tsy hifoha intsony, hoy ny teny hentitr'ilay Mpanjaka, izay antsoina hoe TOMPOn'izao rehetra izao.

⁵⁸ Dia nampian'ny TOMPOn'izao rehetra izao hoe: "Rava tanteraka ny manda matevin'i Babilona, ary voadoro ny vavahadiny avo; ka dia sahiram-poana ny vahoaka, zavatra ho kilan'ny afo no isasaran'ireo firenena."

⁵⁹ I Seraia, zanakalahin'i Neria sady zafikelin'i Mahaseia, no lehiben'ny tobin'i Tsedekia mpanjakan'i Joda. Koa ny taona fahefatra nanjakan'i Tsedekia dia nanaraka ny mpanjaka tany Babilona izy. Nosoratan'i Jeremia tamin'ny horonan-taratasy ny loza rehetra izay hamely an'i Babilona, dia ireo fanambarana rehetra momba izany! Dia nanome baiko an'i Seraia i Jeremia hoe:

⁶¹ "Rehefa tonga any Babilona ianao, dia imasoy ny hamaky mafy ireo teny rehetra ireo;

⁶² avy eo dia milaza hoe: Ny tenanao mihitsy, TOMPO o, no niteny taminay fa handringana ity tanana ity ka tsy hisy hitoetra eto intsony na olona na biby fa honenana mandrakizay izy."""

⁶³ Rehefa vitanao ny famakiana ny horonan-taratasy, dia afatory amin'ny vato iray izy, ary atsipazo ao amin'ny ony Eofrata;

⁶⁴ sady ataovy hoe:"Tahaka an'izao no hilentehan'i Babilona ka tsy hipoirany intsony noho ny loza hataon'ny TOMPO mihatra aminy. " Mifarana eto ny tenin'i Jeremia.

Toko faha-52

¹ Feno 21 taona i Tsedekia fony tonga mpanjakan'i Joda; ary naharitra 11 taona no nanjakany tao Jerosalema. Ny anaran-dreniny dia Hamotala zanakavavin'i Jeremia avy ao Libna.

² Ary nanao izay ratsy eo imason'ny TOMPO izy tahaka izay rehetra nataon'i Joiakima.

³ Fa ny fahatezeran'ny TOMPO no nahatonga izany loza izany tamin'i Jerosalema sy tamin'i Joda, ka niafara tamin'ny fandroahany an'ireo Jodeanina hiala teo anatrehany. Ary nikomy tamin'i Nebokadnetsara mpanjakan'i Babilona i Tsedekia.