Genesỳ

Toko faha-6

¹³ Dia hoy Andriamanitra tamin'i Noa: Tapa-kevitra aho handringana ny olombelona. Fa noho ny aminy dia feno herisetra ny tany, koa hofongorako eto an-tany izy.

¹⁴ Noho izany, manaova fiara ho anao, mitovy amin'ny sambo lehibe vita amin'ny hazo kipreso, dia asio efitrefitra ka hosory dity ao anatiny sy eo ivelany.

¹⁵ Izao no hanaovanao azy: 150 metatra ny halavany, 25 metatra ny sakany ary 15 metatra ny haavony.

¹⁶ Tafoy izy, ka asio elanelany antsasa-metatra eo amin'ny tafo sy ny rindrin-kazo; voleo varavarana amin'ny lafiny iray, ary asio rihana telo ny sambofiara.

¹⁷ Indro Aho hahatonga safo-drano lehibe mba hamongorana izay rehetra manana aina aty ambany lanitra, ka ho levona avokoa izay rehetra eny ambonin'ny tany.

¹⁸ Fa hajoroko kosa ny fanekempihavanako aminao, ka hiditra ao amin'ny sambofiara ianao sy ny vadinao mbamin'ireo zanakao lahy sy ny vinantovavinao.

¹⁹ Itondray tsiroaroa avy ny zava-mananaina rehetra isan-karazany, dia lahy sy vavy; ka ampidiro ao an-tsambofiara mba hovelomina miaraka aminao.

²⁰ Ny vorona isan-karazany ary ny biby hafa rehetra isan-karazany eto an-tany, na lehibe na kely, no hankeo aminao tsiroaroa mba hovelomina.

²¹ Ianao kosa, maka amin'ny karazan-tsakafo rehetra mety ho fihinana, ka angony eo aminao mba ho sakafonao sy ho sakafon'izy ireo koa.

²² Dia notanterahin'i Noa izany; ka araka izay rehetra efa nandidian'Andriamanitra azy no nataony.

Toko faha-7

¹ Hoy ny TOMPO tamin'i Noa: -Midira ao anatin'ny sambofiara ianao sy ny ankohonanao, satria ianao irery no hitako fa marina teo anatrehako tamin'izao taranaka izao.

² Maka biby madio mpivady fito isaky ny karazany avy, ary biby maloto mpivady iray ihany kosa isaky ny karazany avy, ka ento miaraka aminao;

³ toy izany koa ny amin'ny voro-manidina, maka mpivady fito isaky ny karazany avy: dia mba samy hamelona taranaka eo amin'ny velaran'ny tany tontolo ireny.

⁴ Fa herinandro sisa dia hampilatsaka ranonorana mandritra ny efapolo andro sy efapolo alina amin'ny tany Aho, ka hofoanako eo amin'ny velaran'ny tany ireo zava-mananaina rehetra nataoko.

⁵ Dia nataon'i Noa izay rehetra nandidian'ny TOMPO azy.

⁶ Feno 600 taona i Noa raha tonga ny safo-drano lehibe teto ambonin'ny tany.

⁷ Niditra tao anaty sambofiara izy mbamin'ny vady aman-janany ary ireo vinantovaviny mba tsy ho tratry ny safo-drano.

⁸ Ny biby madio sy ny biby maloto ary ny voro-manidina sy ireo bibikely mihetsiketsika ambonin'ny tany koa

⁹ dia tonga tsiroaroa, lahy sy vavy, nankao amin'i Noa tao amin'ny sambofiara araka izay efa nandidian'Andriamanitra an'i Noa.

¹⁰ Nony afaka herinandro dia safotry ny ranobe ny tany.

¹¹ Iny faha-600 taona niainan'i Noa iny, tamin'ny volana faharoa, andro faha-17, dia niboiboika be ny rano avy any ambanin'ny tany tamin'ireo loharano rehetra, ary nivoha nidanadana ny varavaran'ny lanitra.

¹² Dia avy be ny orana teny ambonin'ny tany nandritra ny efapolo andro sy efapolo alina.

¹³ Tamin'io andro io no niditra tao amin'ny sambofiara i Noa sy ny vadiny ary koa i Sema sy i Hama ary i Jafeta zanany lahy mbamin'ireo vinantovaviny telo;

¹⁴ niditra tao koa ireo bibidia amam-biby fiompy rehetra isan-karazany sy ireo bibikely rehetra isan-karazany mihetsiketsika ambonin'ny tany mbamin'ireo voro-manidina rehetra isan-karazany sy ireo bibikely rehetra manana elatra.

¹⁵ Samy tonga tsiroaroa teo amin'i Noa tao anatin'ny sambofiara ireo voaary rehetra manam-pofonaina.

¹⁶ Lahy sy vavy tamin'ireo zava-mananaina rehetra ireo no niditra tao, araka izay efa nandidian'Andriamanitra an'i Noa. Avy eo dia nohidin'ny TOMPO ny varavarana.

¹⁷ Naharitra efapolo andro ny safo-drano teny ambonin'ny tany. Rehefa nitombo ny rano, dia nanainga ny sambofiara, hitsinkafona hiala amin'ny tany.

¹⁸ Ary nihanahery ny rano sady nitombo be dia be, ka dia nandeha teny ambony rano ny sambofiara.

¹⁹ Ary nitombo be izaitsizy ny rano tety ambonin'ny tany ka naharakotra hatramin'ireo tendrombohitra avo indrindra taty ambanin'ny lanitra.

²⁰ Tafakatra fito metatra sy sasany ambonin'ny tendrombohitra ny haavon'ny rano.

²¹ Dia maty ny nofo rehetra izay nihetsiketsika tambonin'ny tany, izany hoe ny voro-manidina sy ny biby fiompy mbamin'ny bibidia, ny bibikely mihahohaho tambonin'ny tany, ary ny olombelona rehetra.

²² Maty avokoa izay rehetra nanam-pofonaina tamin'ny vavorona teny an-tanety.

²³ Dia nofoanan'Andriamanitra ny zava-mananaina rehetra teny ambonin'ny tany, nanomboka tamin'ny olona ka hatramin'ny biby lehibe sy kely mbamin'ny voro-manidina; dia nofoanan'Andriamanitra tsy ho amin'ny tany ireny, fa i Noa irery ihany mbamin'izay niaraka taminy tao anatin'ny sambofiara no sisa tavela.

²⁴ Naharitra 150 andro ny fahatondrahan'ny rano teny ambonin'ny tany.

Toko faha-8

¹ Rehefa afaka izany, dia notsarovan'Andriamanitra i Noa sy ny bibidia rehetra ary ny biby fiompy rehetra izay niaraka taminy tao anatin'ny sambofiara; ka nampandalo rivo-mahery teny ambonin'ny tany Izy, dia niharitra ny rano.

² Nihidy ny loharano niboiboika avy any ambanin'ny tany sy ny varavaran'ny lanitra, ary nitsahatra ny ranonorana.

³ Niala tsikelikely ny rano teny ambonin'ny tany, ary nihena nony afaka 150 andro.

⁴ Ary tamin'ny volana fahafito, andro faha-17, dia niantsona teo an-tendrombohitr'i Ararata ny sambofiara.

⁵ Dia mbola nihena hatrany ihany ny rano hatramin'ny volana fahafolo. Ka tamin'ny andro voalohan'ny volana fahafolo, dia tazana ny tampon'ireo tendrombohitra.

⁶ Nony afaka efapolo andro, dia novohan'i Noa ny varavarankelin'ny sambofiara izay nataony.

⁷ Dia nandefa goaika anankiray izy, nefa niverimberina nivoaka sy niditra io mandra-paharitran'ny rano teny ambonin'ny tany.

⁸ Dia nandefa voromahailala iray koa izy mba hahitany na efa nihena ny rano teny ambonin'ny tany na tsia.

⁹ Kanefa tsy nahita izay hametrahany ny tongony ilay voromahailala, ka niverina tany amin'i Noa teny an-tsambofiara, satria mbola feno rano tambonin'ny tany tontolo. Dia naninjitra ny tanany i Noa ka nandray ilay voromahailala ary nampiditra azy tao anaty sambofiara.

¹⁰ Mbola niandry herinandro izy vao nandefa ilay voromahailala fanindroany.

¹¹ Fa niverina tany amin'i Noa ilay voromahailala, nony hariva, ka hita nitondra ravin'oliva maitso teny am-bavany. Dia fantatr'i Noa tamin'izany fa efa nihena ny rano tambonin'ny tany.

¹² Dia mbola niandry herinandro indray izy vao nandefa ilay voromahailala izay tsy niverina intsony kosa.

¹³ Fa tamin'ny andro voalohan'ny volana voalohany, nony feno 601 taona i Noa, dia ritra ny rano teo ambonin'ny tany. Nesorin'i Noa ny tafon'ny sambofiara ka hitany fa efa maina ny velaran'ny tany.

¹⁴ Ary fony andro fahafito amby roapolo tamin'ny volana faharoa dia maina tanteraka ny tany.

¹⁵ Dia hoy Andriamanitra tamin'i Noa:

¹⁶ Mivoaha tao amin'ny sambofiara ianao sy ny vadinao ary ireo zanakalahinao mbamin'ireo vinantovavinao.