Genesỳ

Toko faha-2

²⁰ Dia nomen-draolombelona anarana ny biby fiompy rehetra sy ny voro-manidina rehetra ary ny bibidia rehetra, kanefa tsy hitany izay mpanampy sahaza azy.

²¹ Ary ny TOMPO Andriamanitra nahatonga an-draolombelona ho sondrian-tory sy ho renoka, dia nalainy ny taolana iray tamin'ny tehezany ka nosoloany nofo.

²² Izany taolan-tehezana nalainy tamin-draolombelona izany no namboarin'ny TOMPO Andriamanitra ho vehivavy izay nentiny teo amin-draolombelona.

²³ Tamin'izay dia hoy raolombelona hoe: Ity ahay mba mitovy amiko, fa taolana avy amin'ny taolako ity sady nofo avy amin'ny nofoko; hatao hoe vehivavy ity, satria lehilahy no nanalana azy.

²⁴ Izany no handaozan'ny lehilahy ny rainy sy ny reniny ka hifikirany amin'ny vadiny, ary hanjary tena iray ihany izy roa.

²⁵ Ary nitanjaka ny lehilahy sy ny vadiny nefa tsy nahalala henatra.

Toko faha-3

¹ Ary ny bibilava no fetsy indrindra, tamin'ny bibidia rehetra nataon'ny TOMPO Andriamanitra. Hoy izy tamin-dravehivavy: -Marina ve fa noraran'Andriamanitra tsy hihinana ny voan'ny hazo rehetra ao an-jaridaina ianareo?

² Dia namaly ny bibilava ravehivavy hoe: -Azonay hanina ihany ireo voankazo ao an-jaridaina,

³ afa-tsy ny voan'ny hazo eo afovoan'ny zaridaina izay efa nandraran'Andriamanitra anay tsy hohanina na hokasihina akory, fandrao mahafaty anay.

⁴ Hoy kosa ny bibilava taminy: -Tsy ho faty tsy akory ianareo!

⁵ Saingy fantatr'Andriamanitra fa amin'ny andro hihinananareo azy dia hahiratra ny masonareo, ary ho tonga tahaka an'Andriamanitra ianareo ka hahalala ny tsara sy ny ratsy.

⁶ Ary hitan-dravehivavy fa maha te hihinana ny voan'ilay hazo sady mahasarika ny maso no mampitsiriritra hahazoana fahiratan-tsaina. Dia nitoazany ny voany ka nohaniny; ary nomeny koa ny vadiny izay niaraka taminy ka nihinana.

⁷ Dia nahiratra ny mason'izy mivady ka fantany fa mitanjaka izy. Ary nanjaitra ravin'aviavy izy roa ka nataony sikina ho azy.

⁸ Ary nony hariva, rehefa nitsoka ny rivotra, dia nandre ny feon'ny TOMPO Andriamanitra nitsangantsangana tao an-jaridaina ralehilahy sy ny vadiny ka niery ny tavany tao anaty hazo.

⁹ Niantso an-dralehilahy ny TOMPO Andriamanitra ka nanao taminy hoe: -Aiza moa ianao?

¹⁰ Dia namaly izy hoe: -Nandre ny feonao tao an-jaridaina aho, dia natahotra fa mitanjaka, koa dia niery.

¹¹ Fa hoy ny TOMPO hoe: -Iza no nampahafantatra anao fa mitanjaka ianao? Moa nihinananao va ny voan'ny hazo izay norarako tsy hohaninao?

¹² Dia namaly ralehilahy hoe: -Ny vehivavy izay nomenao ho namako no nanome ahy ny voan'io hazo io, ka dia nihinana aho.

¹³ Ary hoy ny TOMPO Andriamanitra tamin-dravehivavy: -Nahoana ianao no nanao izany? Fa namaly kosa ravehivavy hoe: -Voafitaky ny bibilava aho ka nihinana.

¹⁴ Dia hoy ny TOMPO Andriamanitra tamin'ny bibilava: -Satria nanao izany ianao, dia ozoniko. Amin'ny biby fiompy sy ny bibidia rehetra, dia ianao ihany no handeha amin'ny kibonao, sady hihinana vovo-tany amin'ny andro rehetra hiainanao.

¹⁵ Hampifankahalaiko ianao sy ny vehivavy, ary ny taranakao sy ny taranany. Ny tarana-behivavy no hanorotoro ny lohanao, ary ianao kosa hanorotoro ny ombalahitongotry ny taranany.

¹⁶ Avy eo dia hoy ny TOMPO Andriamanitra tamin-dravehivavy: -Hampitomboiko ny fanaintainanao rehefa bevohoka ianao, ary fahoriana no hiterahanao ny zanakao; ny vadinao no hifatraran'ny fanirianao, nefa izy no hifehy anao.

¹⁷ Farany ralehilahy na i Adama dia nilazan'ny TOMPO Andriamanitra hoe: -Satria nihaino ny feom-badinao ianao ka nihinana tamin'ny voan-kazo izay efa nandrarako anao tsy hohanina, dia voaozona ny tany noho ny fahadisoanao; tsy maintsy hiasa mafy ianao mba hahazoanao hanina mandritra ny andro rehetra hiainanao.

¹⁸ Fa tsilo sy songosongo no hovokarin'ny tany ho anao; ary anana no hohaninao.

¹⁹ Ny hatsembohan'ny tavanao no hihinananao hanina mandra-piverinao amin'ny tany izay nanalana anao. Fa vovo-tany ianao, ka hiverina ho vovo-tany.

²⁰ Ary ralehilahy nanao ny anaran'ny vadiny hoe Eva, izany hoe Aina, satria izy no renin'ny olombelona rehetra.

²¹ Ary ny TOMPO Andriamanitra nanamboatra akanjo hoditra ho an'i Adama sy ny vadiny ka nampiakanjo azy.

²² Dia hoy ny TOMPO Andriamanitra hoe: Indro ny olombelona fa efa tonga tahaka ny iray amintsika momba ny fahalalana ny tsara sy ny ratsy; koa ankehitriny, aoka izy tsy haninjitra ny tanany haka ny voan'ny hazon'aina ka hihinana amin'izany, dia ho velona mandrakizay!

²³ Noho izany, dia noroahin'ny TOMPO Andriamanitra hiala tao an-jaridainan'i Hedena ny olombelona mba handeha hiasa ny tany izay nanalana azy.

²⁴ Rehefa avy nandroaka ny olombelona Izy, dia nametraka teo atsinanan'ny zaridaina ireo kerobima, izay mitondra sabatra misy lelafo midedadeda mba hiambina ny lalana mankany amin'ny hazon'aina.

Toko faha-4

¹ Niraisan'i Adama i Eva vadiny, ka nitoe-jaza. Dia niteraka an'i Kaina izy, ary nanao hoe: Nahazo zazalahy noho ny amin'ny TOMPO aho.

² Dia mbola niteraka an'i Abela rahalahiny koa izy. Ary i Abela dia mpiandry ondry, fa i Kaina kosa mpamboly.

³ Nony tonga ny fotoam-pahavokarana, dia nitondran'i Kaina fanatitra ho an'ny TOMPO ireo vokatry ny tany.

⁴ I Abela koa nitondra ireo voalohan-teraky ny ondriny hatao sorona ka nanolotra ny jaborany ho an'ny TOMPO. Ary ny Tompo nankasitraka an'i Abela sy ny fanatiny,

⁵ fa tsy nankasitraka kosa an'i Kaina sy ny fanatiny; koa tezitra mafy i Kaina sady nanjombona tarehy.

⁶ Ary hoy ny TOMPO tamin'i Kaina: -Nahoana no tezitra sady manjombona tarehy ianao? Raha manao ny tsara ianao, moa tsy hahatraka?

⁷ Fa raha tsy izany, dia toy ny biby mamitsaka eo am-baravaranao ny ota. Te hanapaka anao izy, kanefa ianao no tokony hifehy azy.

⁸ Dia hoy i Kaina tamin'i Abela rahalahiny: -Andeha isika ho any an-tsaha. Nony mby tany an-tsaha izy ireo, dia niantoraka teny amin'i Abela rahalahiny i Kaina ka namono nahafaty azy.

⁹ Ary ny TOMPO nanontany an'i Kaina hoe: -Aiza moa i Abela rahalahinao? Dia hoy i Kaina hoe: -Tsy fantatro! Moa mpitandrina ny rahalahiko va aho?

¹⁰ Fa hoy kosa ny TOMPO hoe: -Inona ity nataonao? Ny feon'ny ran'ny rahalahinao mitaraina amiko avy ao amin'ny tany.

¹¹ Ankehitriny dia manozona anao ny tany izay misokatra hitelina ny ran'ny rahalahinao.

¹² Raha hamboly ny tany ianao, dia tsy hanome vokatra ho anao intsony izy; ka dia ho mpitsoa-ponenana sy ho mpirenireny eny ambonin'ny tany ianao.

¹³ Dia niteny tamin'ny TOMPO i Kaina hoe: -Mavesatra loatra ny heloko!

¹⁴ Indro roahinao hiala eo amin'ny tany mahavokatra aho ankehitriny, ka tsy maintsy hiery lavitra Anao; ho mpitsoa-ponenana sy ho mpirenireny eny ambonin'ny tany aho, ka izay rehetra mahita ahy dia hamono ahy ho faty!

¹⁵ Fa namaly azy ny TOMPO hoe: -Tsia, fa na iza na iza mamono anao ho faty, dia hovaliana impito heny. Dia nametrahan'ny TOMPO famantarana teo amin'i Kaina mba tsy hisy hamono azy ho faty izay mifanena aminy.

¹⁶ Ary niala teo anatrehan'ny TOMPO i Kaina, ka nonina tao amin'ny tanin'i Noda, any atsinanan'i Hedena.

¹⁷ Niraisan'i Kaina ny vadiny, dia nitoe-jaza ka niteraka an'i Henoka. Dia nanorina tanana i Kaina, ka nampitondrainy ny anaran'i Henoka zanany lahy.

¹⁸ I Henoka no ray niteraka an'i Hirada; i Hirada no ray niteraka an'i Mehojaela; i Mehojaela no ray niteraka an'i Metosaela; ary i Metosaela kosa no ray niteraka an'i Lameka.

¹⁹ Nanambady anankiroa i Lameka: ny voalohany dia natao hoe Hada, ary ny faharoa nantsoina hoe Tsila.

²⁰ I Hada dia niteraka an'i Jabala: io no razamben'ireo mpitoetra an-day miaraka amin'ny biby fiompy.