Isaià

Toko faha-43

¹⁸ "Aza tsaroanareo intsony ny zava-niseho voalohany , aza itodihana intsony ny lasa.

¹⁹ Fa hanao zavatra vaovao Aho; ary ankehitriny efa mipoitra sahady izany, ka ho hainareo fantarina tokoa. Eny, hisava lalana any an-taniefitra Aho sady hampandriaka ony an-tany karakaina.

²⁰ Dia hanome voninahitra Ahy ny bibidia mbamin'ny amboahaolo sy ny vorombe, satria manisy rano any an-taniefitra Aho sy nampandriaka ony an-tany karakaina mba hampisotroako ny vahoaka nofidiko,

¹ dia ilay vahoaka noforoniko ho Ahy ka hitantara ny antony hiderany Ahy. "

²² Dia izao koa no lazain'ny TOMPO: "Tsy Izaho no nantsoinao, ry firenen'i Jakoba; ary efa sasatra tamiko aza ianao, ry vahoaka Israely.

²³ Tsy ho Ahy no nitondranao zanak'ondry hatao sorona dorana manontolo, ary tsy ho fanomezam-boninahitra Ahy ny soronao. Tsy nampanompo anao tamin'ny fitakiana fanatitra Aho na nanasatra anao tamin'ny fitakiana vovo-javamanitra.

²⁴ Tsy ho Ahy no namoizanao volafotsy mba hividianana veromanitra; ary tsy Izaho no novokisanao tamin'ny jaboran'ny soronao. Fa ianao no nampanompo Ahy tamin'ny fahotanao sy nanasatra Ahy tamin'ny helokao.

²⁵ Kanefa Izaho dia Izaho mihitsy no mamela ny fahadisoanao noho ny amin'ny tenako ihany, ka tsy ho tsarovako intsony ny fahotanao.

²⁶ Ampahatsiarovy Ahy hoe ny fanakiananao Ahy, dia avia hifandahatra momba izany isika; ka ianao no aoka hanao famisavisana mba hahitana ny mahamarina anao!

²⁷ Ilay razanao voalohany efa nanota, ary ireo mpitondra teninao efa nikomy tamiko.

²⁸ Koa dia nataoko afa-baraka ireo mpiandraikitra ny Toeramasina, natolotro haringana ny firenen'i Jakoba ary navelako ho latsaina ny vahoaka Israely.

Toko faha-44

¹ Fa ankehitriny kosa mihainoa, ry firenen'i Jakoba mpanompoko, ry vahoaka Israely izay nofidiko.

² Izaho TOMPO izay mpanao anao, ka namorona anao hatrany am-bohoka sy manampy anao no indro milaza aminao hoe: Aza matahotra, ry firenen'i Jakoba mpanompoko ilay Jesorona izay nofidiko.

³ Fa hanosaka rano amin'izay mangetaheta Aho sy hampandriaka renirano amin'ny tany mangentana. Hatosako amin'ny zanakao ny Fanahiko ary amin'ny taranakao ny fitahiako.

⁴ Handrobona toy ny solofom-bolotara na toy ny hazo malahelo eny amoron-drano izy.

⁵ Ny anankiray hanao hoe: "An'ny TOMPO aho"; ny iray hafa te hitondra ny anaran'i Jakoba. Ny anankiray kosa dia eo amin'ny sandriny no hanoratany hoe: "Fananan'ny TOMPO" sady ny anaran'i Israely no hireharehany."

⁶ Izao no lazain'ny TOMPO dia ilay TOMPOn'izao rehetra izao sady Mpanjakan'i Israely sy Mpanavotra azy: "Izaho no voalohany ary Izaho no farany , ka tsy misy Andriamanitra afa-tsy Izaho.

⁷ Raha misy mihambo ho mitovy amiko, aoka izy hiteny sy handahatra momba izany! Ho hazavainy amiko hoe iza, hatry ny fahagola, no nampandre ny zavatra tsy maintsy tonga; ary hambarany amintsika koa ny zavatra ho avy.

⁸ Aza mangovitra na matahotra ianareo, ry vahoakako. Tsy Izaho ve no nampandre anareo ka nanambara izany taminareo hatry ny ela? Ianareo tokoa no vavolombeloko fa tsy misy Andriamanitra afa-tsy Izaho. Eny, tsy misy vatolampy hafa, tsy misy fantatro na iray aza."

⁹ Zava-poana avokoa ny mpanao sarivongan-tsampy ary tsy mahasoa akory ny zavatra lalainy: Ny sarivongan-tsampy no vavolombelona ho azy, kanefa vavolombelona tsy mahita akory, ary tsy mahalala na inona na inona ka handiso fanantenana azy.

¹⁰ Iza no hanamboatra andriamani-tsiizy, handrendrika sarivongana tsy mahasoa akory?

¹¹ Indreo ho menatra izay rehetra mpomba azy fa olombelona ihany no namboatra ireny! Avelao hivory sy hiseho izy rehetra, fa hatahotra sy ho safo-kenatra avokoa.

¹² Ny mpanefy manapaka takela-by, dia mandefa azy ao anaty afo sy mamolavola azy amin'ny tantanana ka miasa amin'ny sandriny mahery; avy eo dia noana sy ketraka izy, tsy misotro rano ka reraka.

¹³ Ny mpandrafitra kosa mandrefy hazo amin'ny tady sy manamarika azy amin'ny tsaoka, manamboatra azy amin'ny vankona, manamarika azy amin'ny kompa ary manome azy endrik'olona, dia endrik'olona tsara tarehy izay hapetraka ao amin'ny tempoly anankiray.

¹⁴ Avahana ny hazo sedera ho kapaina, fidina ny hazo terebinta na oaka, dia avela ho lehibe any an'ala. Na ny hazo kesika volena koa, dia ny ranonorana no mampaniry azy.

¹⁵ Ireny no ampiasain'ny olona ho kitay ka angalany hamindroana na handrahoan-tsakafo. Ireny ihany koa no anaovany andriamanitra hiankohofany sy sarivongan-tsampy hivavahany.

¹⁶ Araka izany ny antsasaky ny vatan-kazo dia dorana amin'ny afo ka itonoany hena; manatsatsika hena ny olona ka voky, na mamindro koa izy ka manao hoe: "Andray! Mafana aho izany! Nahita afo aho!"

¹⁷ Ny antsasaky ny vatan-kazo kosa anamboarany andriamanitra ho sampiny. Dia izany no iondrehany sy iankohofany sady ivavahany ataony hoe: "Vonjeo aho fa ianao no andriamanitro."

¹⁸ Tsy mahalala na inona na inona sady tsy misaina ireny olona ireny, voatampina ny masony ka tsy mahita sady donto rahateo koa ny fony.

¹⁹ Tsy misy mieritreritra ao am-pony na mba mahalala handini-tena hoe: "Ny antsasak'ity vatan-kazo ity dia nodorako tamin'ny afo; ka ny vainafony no nanendasako mofo sy nanatsatsihako hena ho haniko. Ny antsasaky ny vatan-kazo kosa dia hanaovako sampy mamoafady, ka tapa-kazo no indro hiankohofako."

²⁰ Mifikitra amin-javatra lasan-kolavenona ireny; ny fony voafitaka no nampivily azy. Tsy mahafaka azy ny andriamaniny, kanefa ny tenany koa tsy mahateny hoe: "Hay moa ka andriamani-tsiizy ity eto an-tanako ankavanana ity! "

²¹ Ry firenen'i Jakoba, ry vahoaka Israely, aoka ho tsarovanao izao: "Mpanompoko ianao! Izaho no namolavola anao hanompo Ahy. Tsy hohadinoiko ianao, ry vahoaka Israely!

²² Nofafako toy ny rahona ny fahadisoanao ary nolevoniko toy ny zavona ny fahotanao. Koa miverena amiko ianao fa efa navotako."

²³ Miasa ny TOMPO ka mihobia, ry lanitra, ary miravoravoa, ry fanambanin'ny tany. Ataovy manako ny hoby, ry tendrombohitra mbamin'ny ala sy ny hazo rehetra ao, fa ny TOMPO efa nanavotra ny firenen'i Jakoba ary efa naneho voninahitra tamin'ny vahoaka Israely.

²⁴ Ry vahoaka Israely, ny TOMPO Izay nanavotra anao, Ilay namorona anao hatrany am-bohoka, dia indro milaza aminao hoe: "Izaho TOMPO no nanao ny zavatra rehetra, Izaho irery ihany no nanenjana ny lanitra sy namelatra ny tany fa tsy nisy nanampy.

²⁵ Koa hataoko tsy misy vokany ny famantarana vitan'ny mpimasy ary hataoko mirediredy ny mpisikidy; hataoko mianotra ny olon-kendry ka hody fahadalana ny fahalalany.

²⁶ Fa homeko lanja ny ny tenin'ireo mpanompoko ary hataoko tanteraka ny fikasan'ireo irako. Ka hoy Aho amin'i Jerosalema:"Aoka honenana indray ianao"ary amin'ny tananan'i Joda hoe:"Aoka haorina indray ianareo ". Eny, hatsangako izay efa rava.

²⁷ Hoy Aho amin'ny ranomasina lalimbe:"Aoka ho maina ianao, fa horitiko ny ranobenao".

²⁸ Hoy Aho ny amin'i Kirosa:"Izy no mpiandry ondriko. Hotanterahiny izay sitrako rehetra, ka dia hanome baiko izy mba haorina indray i Jerosalema ary hamboarina indray ny tempoly ".

Toko faha-45

¹ Izao no lazain'ny TOMPO amin'ilay nohosorany , dia i Kirosa: "Tohanako ianao mba handresy ny firenen-kafa sy hanaisotra ny fahefan'ny mpanjaka ka hivoha eo anatrehanao ireo vavahadin'ny tanana nihidy.

² Izaho mihitsy no handeha eo anoloanao mba handravona ny mikitoantoana sy hanamontsana ny varavarana halimo ary hanapatapaka ny hidy vy.

³ Homeko anao ny raki-tsoany napetrany tao amin'ny toerana maizina sy ny harena nafeniny tao amin'ny mangingina, mba hahafantaranao fa Izaho no TOMPO Izay miantso anao amin'ny anaranao; Izaho no Andriamanitr'i Israely.

⁴ Noho ny fitiavako ny firenen'i Jakoba mpanompoko sy ny vahoaka Israely voafidiko no niantsoako anao tamin'ny anaranao; ary nomeko izany laza izany ianao, na dia tsy mahalala Ahy akory aza.

⁵ Izaho no TOMPO fa tsy misy hafa; tsy misy Andriamanitra afa-tsy Izaho. Nampisikiniko hery ianao hiasa na dia tsy mahalala Ahy akory aza,

⁶ mba hahafantarana eran-tany hatrany atsinanana ka hatrany andrefana fa ankoatra ny tenako dia zava-poana. Izaho no TOMPO fa tsy misy hafa.

⁷ Izaho no mamorona ny mazava sy mahary ny maizina. Izaho no manome fahasambarana sy mahary ny loza. Izaho TOMPO no manao izany rehetra izany.

⁸ Aoka ny lanitra handrotsaka ando avy any ambony ary aoka ny rahona handatsaka rariny! Aoka hisokatra ny tany hampivelatra ny famonjena sy hampitsimoka ny fahamarinana! Izaho TOMPO no nahary io lehilahy io.

⁹ Lozan'izay sahy manome tsiny ny mpanao azy, kanefa ny tenany dia siny tanimanga toy ny siny tanimanga rehetra ihany! Ny tanimanga ve hanontany ny mpanefy azy hoe:"Inona ity ataonao?"na ny asa vitany hanao aminy hoe: "Tsy mahay ianao !"

¹⁰ Lozan'izay sahy milaza amin'ny rainy hoe: "Inona ity naterakao?" na sahy miteny amin'ny reniny hoe: "Inona ity naloaky ny kibonao?"

¹¹ Izao kosa no lazain'ny TOMPO, dia ilay Masin'i Israely sady mpamorona azy: "Izaho ve no anontanianareo ny amin'ireo zanako sy homenareo baiko ny amin'izay tokony hataoko?