Isaià

Toko faha-37

¹⁹ ary nodorany tamin'ny afo sy nosimbany aza ny andriamanitr'ireny firenena ireny satria tsy tena Andriamanitra ireo fa zavatra nataon-tanan'olona, eny, vato aman-kazo ihany.

²⁰ Fa ankehitriny kosa, ry TOMPO Andriamanitray o, vonjeo tsy ho azon'ny tanan'i Saneheriba izahay mba hahafantaran'ny fanjakana rehetra ety an-tany fa Ianao irery ihany no TOMPO."

²¹ Ary i Isaia, zanakalahin'i Amotsa, dia naniraka hankany amin'i Hezekia nanao hoe: "Izao no lazain'ny TOMPO Andriamanitr'i Israely ho valin'ny vavaka nataonao ny amin'i Saneheriba mpanjakan'i Asiria.

²² Izao no teny tononin'ny TOMPO hamelezana azy: Manao tsinontsinona sy maneso anao ny tanana kanton'i Tsiona, ry Saneheriba; mihifikifi-doha ho fanamavoana anao ny tananan'i Jerosalema.

²³ Fa iza moa no voatevatevanao sy nompanao?Ary iza no nanaovanao lela miakatra sy niandranandranan'ny masonao? Tsy iza fa Izaho Ilay Masin'i Israely!

²⁴ Tamin'ny alalan'ny mpanomponao no nanevatevanao Ahy Tompo. Hoy ianao hoe: "Izaho Saneheriba dia ny kalesiko marobe no niakarako teny an-tampon-tendrombohitra hatreo afovoan-tanin'i Libano mba hikapa ny sedera mijoalajoala sy ny kipreso voafantina eo aminy. Hiakarako ao ny tendrombohitra faran'izay avo sy ny tahirin'ala ny matevina indrindra.

²⁵ Izaho no efa nihady vovo fantsakana sy nisotro ny ranon'ny firenen-kafa ; ary horitiko ny sakeli-drano rehetra any Ejipta raha vao migadona any ny faladiako!"

²⁶ Moa tsy fantatrao va, ry Saneheriba, fa efa hatry ny ela no nanomanako an'izao zava-nitranga tato ho ato izao? Efa hatramin'ny ela be no namolavolako azy, ary ankehitriny dia manatanteraka azy Aho. Voatendriko handrava ireo tanana mimanda ianao ka hahatonga azy ho korontam-bato.

²⁷ Dia miraviravy tanana ny mponina ao aminy, sady raiki-tahotra no safo-kenatra; toy ny vilona any an-tsaha izy ireo sy tahaka ny ahi-maitso eny an-jaridaina ary tahaka ny zava-maniry eny an-tampon-trano ka main'ny rivotra avy any atsinanana.

²⁸ Fantatro avokoa ny momba anao, ry Saneheriba, na mipetraka ianao na mitsangana, na mivoaka ny trano ianao na miditra, sy rehefa tezitra misafoaka amiko.

²⁹ Eny, efa tezitra nisafoaka tamiko tokoa ianao ary efa tafakatra an-tsofiko ny fireharehanao; koa hasiako farango ny oronao ary hasiako lamboridy ny vavanao,dia hampivereniko any an-taninao ianao amin'izay lalana niavianao ihany.

³⁰ Izao kosa no famantarana ho anao, ry Hezekia: Amin'ity taona ity dia hihinana izay vary maniry ho azy ny olona; ary amin'ny taona manaraka dia mbola ho toy izany koa. Fa amin'ny taona fahatelo kosa dia hamafy vary sy hijinja ianareo ary hamboly voaloboka sy hihinana ny vokatra avy aminy.

³¹ Ary izay sisa velona amin'ny taranak'i Joda dia ho toy ny hazo hamaka lalina indray ary ho feno voa ny rantsany;

³² satria ao Jerosalema no hipoiran'ny sisa tavela, ary ao an-tendrombohitra Tsiona no hiarenan'ny sisa velona. "Dia hoy ihany i Isaia hoe: "Izany no hataon'ny TOMPOn'izao rehetra izao noho ny fitia miredareda manesika Azy.

³³ Izao kosa no lazain'ny TOMPO ny amin'ny mpanjakan'i Asiria: "Tsy hiditra amin'ity tanana ity izy, na handefa zana-tsipika hamelezana azy na hiady aminy omban'ny ampinga na hanangana tovon-tany hanafihana azy.

³⁴ Ny lalana izay niaviany ihany no hiverenany, fa tsy hiditra amin'ity tanana ity izy. Izany no teny hentitra avy amiko TOMPO.

³⁵ Harovako i Jerosalema ary ho vonjeko noho ny amin'ny tenako sy i Davida mpanompoko"

³⁶ Dia niainga hankao an-tobin'ny Asirianina ilay anjelin'ny TOMPO ka nisy 185 ny antoko-miaramila naripany; ary raha vao nifoha ny sisa velona tamin'ny maraina, dia nahita fa efa maty avokoa ireo.

³⁷ Koa niainga teo i Saneheriba mpanjakan'i Asiria mba handeha hiverina any Ninive ary nijanona tany.

³⁸ Kanjo raha iny izy niankohoka tao amin'ny tempolin'i Nisroka andriamaniny iny indrindra, no avy namono azy tamin'ny sabatra ny zanany roa lahy, dia i Adrameleka sy i Saretsera; avy eo lasa nandositra any amin'ny tany Ararata izy mirahalahy fa i Esara-Hadona zanakalahin'i Saneheriba no nanjaka nandimby azy.

Toko faha-38

¹ Tamin'izany andro izany, dia narary efa ho faty i Hezekia. Tonga nitsidika azy i Isaia mpaminany, zanakalahin'i Amotsa, ary nilaza taminy ny tenin'ny TOMPO hoe: "Ataovy ny fara hafatrao amin'ny ankohonanao, satria efa ho faty ianao fa tsy ho velona."

² Dia nitodika tany amin'ny rindrina i Hezekia ka nivavaka tamin'ny TOMPO,

³ ary nanao hoe: "TOMPO o, tsarovy fa nitondra tena tamim-pahamarinana sy tamin-kitsimpo teo anatrehanao aho ary nanao izay tsara eo imasonao! " Dia nitomany nanao ranomaso havozona i Hezekia.

⁴ Ary nisy tenin'ny TOMPO tamin'i Isaia nandidy

⁵ handeha hilaza amin'i Hezekia hoe: "Izao no lazain'ny TOMPO Andriamanitr'i Davida razambenao: Reko ny vavakao ary hitako ny ranomasonao, ka hampiako15 taona ny andro hiainanao.

⁶ Ny tenanao sy i Jerosalema dia hafahako eo an-tanan'ny mpanjakan'i Asiria; ary ity tanana ity dia harovako noho ny amin'ny tenako sy i Davida mpanompoko."

⁷ Dia novaliany hoe: "Izao no famantarana omen'ny TOMPO anao mba hahalalanao fa hotanterahiny tokoa izay nolazainy.

⁸ Ny tohatr'i Ahaza , izay azon'ny masoandro anikeheo, dia efa nidinan'ny aloka; indro fa hampihemorin'ny TOMPO ambaratonga folo izany aloka izany. "Dia azon'ny masoandro indray ny ambaratonga folo izay efa nidinan'ny aloka teo.

⁹ Ity tononkalo ity dia nosoratan'i Hezekia mpanjakan'i Joda, rehefa avy narary izy ka sitrana tamin'ny aretiny:

¹⁰ Hoy aho anakampo hoe: Amin'izao andro mbola iadanako izao no tsy maintsy hahalasanako! Eo am-baravaran'ny fonenan'ny maty no hamaranako ny taonako sisa rehetra.

¹¹ Hoy koa aho hoe: Tsy hahita ny TOMPO intsony aho eto amin'ny tanin'ny velona; ary any amin'ny fiafaran'ny zavatra rehetra dia tsy hahita endrik'olona intsony aho.

¹² Fa nongotanao ny fonenako ka nafindranao lavitra ahy toy ny lain'ny mpiandry ondry. Ahoronao toy ny tenona ny fiainako ka efa ho tapaka ny haraka. -Indray andro monja, TOMPO o no anaperanao ny aiko;

¹³ ka alohan'ny maraina, dia ho vita ny amiko.-Toy ny liona mihitsy ny TOMPO nanapatapaka ny taolako rehetra. -Indray andro monja, TOMPO o, no anaperanao ny aiko.-

¹⁴ Koa mikiakiaka toa sidintsidina aho ary mitoloko toa voromahailala. Tsy mahajery lanitra intsony ny masoko,-Tompo o, tena trotraka aho, ka aoka mba hiantohanao.-

¹⁵ Inona ary no holazaiko sy hoteneniko amin'ny TOMPO? Eny, Izy no nanao an'izao. Handeha mijoretra aho amin'ny taonako sisa rehetra fa mangidy amiko loatra izao.

¹⁶ -TOMPO o, fantatrao izay nanjo ahy ka namelona ahy indray Ianao; naverinao ny heriko ary notahirizinao ny aiko.

¹⁷ Indro niova ho fahasambarana ilay fahoriako nangidy dia nangidy. Fatra-pitia ahy Ianao ka tsy namela ahy ho faty; fa narianao any ivohonao ny heloko rehetra.

¹⁸ Any amin'ny toeran'ny maty tokoa dia tsy misy afaka midera Anao; ireo nindaosin'ny fahafatesana tsy mba afaka mankalaza Anao; izay tafidina any am-pasana tsy hanantena ny toetranao mahatoky.

¹⁹ Ny velona ihany no afaka hidera Anao, dia tahaka ahy izao anio izao sy tahaka ireo ray aman-dreny izay hampahalala ny zanany fa tena mahatoky tokoa Ianao.

²⁰ TOMPO o, efa namonjy ahy Ianao. Koa hankalaza Anao izahay miaraka amin'ny feon-dokanga ao an-tranonao, TOMPO o , amin'ny androm-piainanay rehetra.

Toko faha-39

¹ Tamin'izany fotoana izany i Merodaky-Baladana, zanakalahin'i Baladana sady mpanjakan'i Babilona, no nandre fa narary i Hezekia ary efa sitrana. Dia nandefa iraka hitondra taratasy sy fanomezana ho azy izy.

² Ary faly i Hezekia tamin'ny fahatongavan'ireto iraka; dia nasehony azy ny trano fitahirizana zava-tsoa, dia volafotsy sy volamena ary zava-manitra sy menaka mamerovero; nasehony azy koa ny trano fitobian'ny fitaovam-piadiana rehetra mbamin'ny zavatra hafa isan-karazany tao amin'ny fitoeran-drakiny. Tsy nisy zavatra nafeniny azy na ny tao an-dapany na ny tao amin'ny fanjakany manontolo.

³ Taorian'izany dia nankany amin'i Hezekia mpanjaka i Isaia mpaminany ka nanontany azy hoe:-Inona no nolazain'ireny olona ireny? Avy aiza hono izy no nankaty aminao? Dia novalian'i Hezekia hoe:-Avy any Babilona lavitra any izy no nankaty amiko.

⁴ Ka hoy indray i Isaia:-Inona avy anefa no hitany tato an-dapanao? Dia hoy ny navalin'i Hezekia:-Izay rehetra ato an-dapako dia hitany avokoa. Tsy nisy zavatra nafeniko azy ny tao amin'ny fitoeran-drakitro manontolo.

⁵ Dia hoy i Isaia tamin'i Hezekia: "Henoy ny tenin'ny TOMPOn'izao rehetra izao:

⁶ Indro ho avy ny andro hitondrana any Babilona izay rehetra ato an-dapanao sy izay rehetra nangonin'ireo razanao hatramin'izao.Tsy hisy tavela eto na inona na inona, hoy Izaho TOMPO.

⁷ Ary na dia ny sasany amin'ireo taranakao aza dia ho entina any koa ho mpanompo hanao raharaha ao an-dapan'ny mpanjakan'i Babilona ".

⁸ Ary hoy i Hezekia tamin'i Isaia: "Tsara ny tenin'ny TOMPO izay nambaranao." Fa hoy izy manko anakampo hoe: "Hisy fiadanana sy fandriampahalemana izany amin'ny androko."

Toko faha-40

¹ Ampaherezo, ampaherezo ny vahoakako, hoy ilay Andriamanitrareo.

² Omeo toky i Jerosalema ka antsoantsoy aminy fa tapitra ny asa an-terivozona sady vita ny sazy nahatra taminy; ary efa nandray indroa heny tamin'ny tanan'ny TOMPO izy ho avotry ny fahotana rehetra nataony."