Isaià
Toko faha-32
12 Aoka handondon-tratra ianareo; malahelova amin'ny saha mahafinaritra sy amin'ny voaloboka mahavokatra;13 malahelova amin'ny tanin'ny vahoakako izay rakotry ny kirihitra tsilo; eny, malahelova tokoa ianareo; ny amin'ny korana fanao isan-trano eto amin'ity tanana revon-danonana ity.
14 Nilaozana ny lapan'ny mpanjaka, nangina ilay tanana naresaka; ny faritr'i Hofela sy ny tilikambo fitiliana dia nanjary toera-malalaka lalandava izay fikarenjen'ny borikidia sy firaofan'ny andiam-biby fiompy.
15 Indray andro any, dia hatosaka ny Fanahy avy amin'ny Tompo ao ambony; ka hanjary saha mahavokatra ny taniefitra ary ny saha mahavokatra hanana ny lanjan'ny ala.
16 Honina any amin'ny taniefitra ny rariny ary hanjaka ao amin'ny saha mahavokatra ny hitsiny.
17 Fiadanana no ho vokatry ny hitsiny; ary filaminana sy fandriampahalemana no haterany hatrany hatrany.
18 Ny vahoakako hitoetra ao amin'ny faritra miadana, ao amin'ny fonenana misy fandriampahalemana sy ao amin'ny fialan-tsasatra feno fitoniana.
19 Amin'izay kosa ho ripaka ny ala noho ny havandra ary harodana hilamaka tokoa ny tanana.
20 Kanefa ho sambatra ianareo afaka mamafy eny amoron-drano na aiza na aiza sady mamela ny omby sy ny boriky hiriaria!
Toko faha-33
1 Lozanao , ry ilay tsy norobaina nefa mandroba sy ry ilay tsy nofitahina nefa mamitaka. Rehefa mitsahatra mandrava ianao, dia mba horavana koa; ary rehefa mitsahatra mamitaka, dia mba hofitahina koa.2 TOMPO o, iantrao izahay fa manantena Anao. Aoka Ianao no ho herinay isa-maraina sady ho mpamonjy anay amin'ny androm-pahoriana!
3 Mandositra ny vahoaka isan-tokony, rehefa mandre ny firotsahanao an-tsehatra; miparitaka ny hafa firenena, vantany vao miseho ny fahambonianao.
4 Miavosa toa fiavosam-balala ny remby; ary toa firohotr'andiam-balala no hirohotana mankeo aminy.
5 Manerinerina tokoa ny TOMPO, satria mitoetra any ambony any Izy. Nofenoiny rariny sy hitsiny aoTsiona.
6 Hiaina am-pahatokiana ianao, ry vahoakan'ny TOMPO. Ny fahendrena amam-pahalalana no harem-pamonjena ho anao; ary ny fanajana ny TOMPO no raki-tsarobidy ho anao.
7 Indreo ny mponin'i Ariela fa miantsoantso eny an-dalambe, satria ny iraka mpanambara fiadanana dia niveri-maina mitomany mafy.
8 Foana tanteraka ny arabe, tsy misy mpandeha intsony eny an-dalana. Nivadihan'ilay firenena mpanjakazaka ny fifanekena natao taminy; nolaviny ny vavolombelon'izany, ary tsy nasiany hasina ny olona.
9 Misaona ny tany ka milofika, menatra ny tendrombohitr'i Libano ka malazo, nanjary tany hay ny lemak'i Sarona, ringitra i Basana sy i Karmela.
10 "Ankehitriny, hoy ny TOMPO, no hirotsaka an-tsehatra Aho; ankehitriny no hitraka Aho ary haneho ny fahalehibiazako.
11 Toy ny torontoronina vilona ianareo, ka miteraka mololo; koa ny fofonaiko no tahaka ny afo izay handevona anareo.
12 Ny firenen-kafa kosa hataon'ny afo lasa lavenon-tsokay; ho toy ny kirihitra tsilo voatomboka no handripahan'ny afo azy.
13 Ianareo lavitra, mihainoa izay nataoko; ianareo akaiky, fantaro ny heriko."
14 Raiki-tahotra ny mpanota ao Tsiona, mangovitra ireo mpihatsaravelatsihy: "Iza amintsika, hoy izy, no hahajanona eo anilan'izao afo mandevona izao? Iza amintsika no hahatanty an'izao afo tsy misy farany izao?"
15 -Izay mandeha araka ny rariny ka miteny tsy misy olakolaka, izay manda ny tombontsoa azo an-keriny sy manakifika ny tanany tsy handray tsolotra, izay manampin-tsofina tsy hihaino ny teny mampirisika hamono olona, izay manakimpy ny masony mba tsy hijery ny
16 Izany olona izany no honina eny amin'ny toerana avo tsy hay anihina; ny harambato mafy no ho fialofany, homena hanina sahaza azy izy ary hiantohana rano hosotroiny.
17 Ny masonao no hijery ny mpanjaka ao anatin'ny famirapiratany, ary koa hahita ny tany araka ny velarany faran'izay midadasika;
18 hahatsiaro ilay natahoranao ianao ka ho velom-panontaniana hoe: "Nankaiza ary ilay mpanisa sy mpanamarina ny hetra? Nankaiza ilay mpanao fisafoana eny amin'ny tilikambo?"
19 Tsy ho hitanao intsony ilay firenena misetrasetra sy mampiasa fiteny tsy fantatra sady miboredika tsy misy ahazoana azy.
20 Ndeha topazonao maso i Tsiona, fankalazantsika ny fety firavoravoana, dia ho hitanao i Jerosalema, fonenana tony tokoa toy ny lay tsy hahorona intsony, ka ny tsimatra aminy tsy hongotana ary ny kofehiny tsy hovahana intsony.
21 Eo no hanehoan'ny TOMPO ny fahalehibiazany amintsika. Ho faritra hisy renirano sy ony be velarana izany, kanefa tsy handehanan'ny sambo mpiady na hivezivezen'ny sambo vaventy.
22 Ny TOMPO no ho mpitarika antsika, izy no ho mpanao lalana ho antsika; ny TOMPO no ho mpanjakantsika sy ho mpamonjy antsika.
23 Efa mivaha ny tadin-tsambonao, ka tsy mahatana ny andry intsony ary tsy ahazoana mampiakatra famantarana. Amin'izay no hifampizarana ny zavatra betsaka nobaboina, ka na ny mandringa aza dia hahazo anjara.
24 Tsy hisy intsony amin'ny mponin'i Jerosalema hiteniteny hoe: "Marary aho! " Ny vahoaka mitoetra ao amin'io tanana io dia ho voavela heloka.
Toko faha-34
1 Manatona handre, ry firenen-kafa, ary mihainoa, ry vahoaka isan-tokony. Aoka handre ny tany sy izay rehetra mameno azy; aoka handre izao tontolo izao sy ny vokatra rehetra avy aminy!2 Tezitra amin'ny firenen-kafa rehetra ny TOMPO sady misafoaka amin'ny tafiny manontolo; nasainy naringana ireny ka natolony hovonoina.
3 Izay voavono dia hariam-potsiny ka hamofona maimbo ny fatiny; ary handriaka ra ny tendrombohitra.
4 Ny andian-tafiky ny kintana dia ho potika hiraraka avokoa; hihorona toy ny horonan-taratasy ny habakabaka; ary toy ny fihintsan'ny ravim-boaloboka maina na toy ny fihintsan'ny ravin'aviavy malazo no hihintsanan'ny planeta aman-kintana.
5 Eny ana habakabaka ilay sabatry ny TOMPO no mandihindihy toa mamo, ka indro miantonta hamely an'i Edoma , dia ilay firenena voatendry haringana mba ho famaizan'ny TOMPO azy.
6 Feno ra ilay sabatry ny TOMPO sady mihosina menaka, dia ran'ny zanak'ondry sy osilahy ary koa menaka avy amin'ny fonom-boany; satria misy sorona ataon'ny TOMPO ao Botsera ary fandringanana goavana ao amin'ny tany Edoma.
7 Voaripaka miaraka amin'ireo koa ny ombimanga mbamin'ny vantotr'omby sy ny ombilahy ka vonton-dra ny tanin'ny Edomita ary mihosi-menaka ny vovo-taniny.
8 Eny, andron'ny valifaty izany ho an'ny TOMPO sady taona famaliana ho an'Ilay mpiaro an'i Tsiona.
9 Hanjary toy ny dity ny ranon-driakan'i Edoma, hiova ho solifara ny vovo-taniny. Hanjary sahan-dity mirehitra io tany io;
10 ka tsy ho faty na andro na alina izany, ary hiakatra tsy an-kijanona ny setroka ; hijanona ho tany hay hatrany hatrany i Edoma ary tsy hisy handalo eo intsony mandrakizay.
11 Ho kianjan'ny tararaka sy ny sokina izy ary honenan'ny vorondolo sy ny goaika. Hohenjanin'ny Tompo eo aminy ny famolaina fandravana sy ny pilao fandrodanana.
12 Tsy hisy andriana intsony hifidy mpanjaka sady ho foana avokoa ny filohany rehetra.
13 Haniry tsilo ny lapan'ny mpanjaka; ary songosongo sy voaroy no hanenika ny trano fiarovany. Ho fonenan'ny amboadia sy sehatry ny vorombe ireo,
14 ho fihaonan'ny bibidia sy ny kary; any no hifampitaona ireo osidia, any no hiato sy hiala sasatra ny lilita mpandehandeha amin'ny alina.
15 Any koa no hanao lavaka ny bibilava ka hametraka ny atodiny sy hikotrika azy ary hanara-maso ny fahafoizany. Any koa no hivondronan'ny papango samy araka ny andiany avy.
16 Raha mitady ao amin'ny bokin'ny TOMPO ianareo, dia ho afaka hamaky izao teny izao: Tsy misy tsy ao ireo biby ireo na iray aza, ary tsy misy sahirana mitady ny andiany satria ny baikon'ny Tompo no nandidy izany ary ny Fanahiny no nanangona azy.
17 Antsapaka no nanendreny ny anjaran'ny tsirairay, noraisiny ny famolaina hizarana ny tany ho azy; ireo no ho tompony hatrany hatrany ka honina ao hatramin'ny taranaka mifandimby.