Kôheleta
Toko faha-6
1 Nahita zava-dratsy hafa mampahory aho teto ambonin'ny tany, ary mitambesatra amin'ny olombelona izany:2 dia olona omen'Andriamanitra vola aman-karena sy voninahitra ka manana izay rehetra iriny; kanefa tsy avelan'Andriamanitra hihinana amin'ny fananany izy fa olon-kafa no mitavana izany. Zava-poana sy zava-dratsy mampahory koa izany.
3 Afaka miteraka zazalahy zato sy miaina an-taona maro ny olona iray. Saingy, na dia miaina an-taona maro aza izy, kanefa tsy mba voky fahasambarana sy tsy mahazo levenana, dia hoy aho hoe: ny zazarano aza sambatra kokoa noho izy.
4 Fa na dia zava-poana aza ny nahatongavan'io zazarano io ka tao anaty haizina no nahalasanany ary tsy hotsarovana intsony izy;
5 na tsy hitany na fantany akory aza izay masoandro, dia miadana kokoa noho ilay ela velona teo izy.
6 Tsy ilaina akory ny miaina, na dia ho tratra arivo taona indroa aza, raha tsy mahita fahasambarana. Satria fahafatesana no fiafaran'ny fiainana rehetra.
7 Miasa ny olona mba hampitony ny filany saingy tsy mety afa-po izy.
8 Fa inona no soa azon'ny hendry miohatra amin'ny adala? Inona no soa azon'ny olo-mahantra izay mahay miavo-tena eo amin'ny fiainana?
9 Aleo mifaly amin'izay ananana hitan'ny maso toy izay manaiky harebirebin'ny faniriana, satria zava-poana sy manenji-drivotra koa izany.
10 Izay rehetra misy dia efa voalaza anarana hatry ny ela ary iaraha-mahalala ny atao hoe olombelona; kanefa tsy azony atao ny mifandahatra amin'izay mahery noho izy.
11 Fa arakaraka ny mahabe ny teny no mahabe ny zava-poana. Koa inona no soa azon'ny olona amin'izany?
12 Mamakivaky ny fiainana toy ny fihelin'ny aloka ny olona. Iza no mahafantatra izay mahasoa ny olona amin'izao fiainana izao mandritra ny fotoana fohy iainany? Tsy misy hahalaza amin'ny olona izay zavatra hitranga eto ambonin'ny tany aorian'ny fahalasanany.
Toko faha-7
1 Aleo manana laza tsara toy izay manana ilomanitra lafo vidy; ary aleo ny andro hahafatesan'ny olona toy izay ny andro nahaterahany.2 Aleo miditra amin'ny trano misy fisaonana toy izay mankany amin'ny trano misy fanasana. Ny fahafatesana no fiafaran'ny olona rehetra ka tsara ny hahatsiarovan'ny velona izany.
3 Aleo ny fijaliana toy izay ny fihomehezana; fa na dia manjombona aza ny tarehy, dia mety sambatra ihany ny fo.
4 Ao amin'ny toerana misy fisaonana no ahitana ny fon'olon-kendry ary ao amin'ny toerana misy fifaliana no ahitana ny fon'olona adala.
5 Aleo mihaino ny anatry ny hendry toy izay ny hiran'adala.
6 Fa ny fihomehezan'ny adala dia toy ny fipoapoaky ny tsilo mirehitra ao ambany vilany; zava-poana koa izany.
7 Fa mety hahalasa adala ny hendry ny fahazoa-mampahory; ary mety hahasimba toetra azy ny fandraisan-kolikoly.
8 Aleo ny mamarana asa toy izay ny manomboka azy; aleo olona mahari-po toy izay ny miavonavona.
9 Aoka tsy ho mora tezitra ianao fa ny adala ihany no malaky tezitra.
10 Aza manontany hoe: Nahoana no tsara ny taloha noho ny ankehitriny? Fa tsy fahendrena ny anontanianao izany.
11 Tsara tahaka ny lova ny fahendrena ka mahasoa ny olon-drehetra.
12 Ny fahendrena dia toy ny vola ka miaro amin'ny loza maro; manalava ny andron'izay manana azy izy, ka mahasoa ny fahalalana azy.
13 Hevero ny asan'Andriamanitra, fa izay nataony mibiloka tsy misy afa-manitsy.
14 Amin'ny androm-pahasambarana dia aoka ho sambatra; fa amin'ny androm-pahoriana kosa dia mieritrereta. Samy nataon'Andriamanitra na ny fahasambarana na ny fahoriana mba tsy hahafantaran'ny olona akory izay hitranga amin'ny hoavy.
15 Nandritra ny androm-piainako mihelina no nahatsapako fa mety hitranga ny zava-drehetra. Misy olo-marina maty, satria olo-marina izy; kanefa misy olon-dratsy ela velona, satria ratsy toetra izy.
16 Aoka tsy ho marina loatra na diso hendry koa. Nahoana no manimba tena ianao?
17 Aza dia ratsy fanahy loatra na mitondra tena toy ny adala koa. Nahoana ianao no ho faty alohan'ny fotoanandronao?
18 Tsara ny manaraka ireo torohevitra roa ireo, fa izay manaja an'Andriamanitra no hiala amin'ny toetra mihoa-pampana.
19 Ny fahendrena dia mahatarika ny hendry mihoatra noho ny mpitondra folo mifehy tanana iray.
20 Eto ambonin'ny tany manko dia tsy misy olo-marina izay manao ny tsara kanefa tsy diso.
21 Aza henoina avokoa izay rehetra lazain'ny olona, fandrao handre ny mpanomponao hiteny ratsy anao ianao amin'ny farany.
22 Fantatrao koa fa matetika ny tenanao no miteny fanaratsiana ny hafa.
23 Nodinihiko tamim-pahendrena izany rehetra izany, ka hoy aho anakampoko: Mba ho hendry aho. Nefa ambony ho ahy io tanjona io.
24 Ambony noho ny zava-misy izany sady lalina dia lalina! Iza no hahatakatra azy?
25 Koa dia nifantoka tamin'ny fianarana sy ny fikarohana aho. Notadiaviko ny atao hoe fahendrena sy ny antom-pisian-javatra. Nofantariko fa fahadalana, eny, fahadalana maha very saina ny haratsiam-panahy.
26 Hitako fa mangidy noho ny fahafatesana ny vehivavy izay toy ny fandrika. Ny fitiavany dia toy ny harato ary ny sandriny toy ny fatorana. Izay lehilahy sitrak'Andriamanitra dia afa-mandositra azy, fa ny mpanota kosa: ho azony.
27 Nodinihiko tsirairay ny zava-drehetra mba hahitako ny dikany, nefa ela nikarohana tsy nahita valiny aho. Izao no hitako, hoy i Koheleta: Lehilahy iray ao anatin'ny arivo no mendrika io anarana io; nefa amin'ny vehivavy maro dia tsy nisy hitako mendri-panajana na dia iray aza.
29 Izao no zavatra hany mba fantatro: Andriamanitra dia nanao ny olombelona mahitsy fo, saingy ireo no nampananosarotra zavatra maro.
Toko faha-8
1 Tsy misy olona tena hendry ary tsy misy koa mahafantatra ny tena dikan-javatra. Kanefa ny fahendren'ny olona manazava ny tarehiny ary manalefaka ny endriny.2 Tandremo ny baikon'ny mpanjaka. Efa nianiana taminy teo anatrehan'Andriamanitra ianao,
3 ka aoka tsy halaky hiendaka aminy. Aoka tsy hikiry amin'ny zavatra ratsy ianao, fa azon'ny mpanjaka atao avokoa izay sitrany.
4 Tsy refesi-mandidy ny teniny ary tsy misy olona afaka manontany azy ny anton'ny zavatra ataony.
5 Izay mitandrina ny didin'ny mpanjaka tsy idiran-doza na inona na inona. Nefa fantatry ny hendry fa hisy fotoam-pitsarana.
6 Eny, ny asa rehetra dia hisy fotoam-pitsarana azy, satria lehibe ny faharatsian'ny olona.
7 Tsy fantany akory izay zavatra ho avy. Iza no hampahafantatra azy ny ho fitrangan'izany?
8 Tsy misy olona manam-pahefana hitazona ny ainy ary tsy misy olona afaka hampihemotra ny andro hahafatesany. Rehefa tonga ny ady, dia tsy misy hevitra hialana aminy; ary ny ratsy fanahy tsy ho voaavotry ny faharatsiany.
9 Efa voajeriko tsara avokoa izay rehetra miseho eto ambonin'ny tany; misy fotoana izay anjakazakan'ny olona amin'ny namany, ka ampahoriny azy.
10 Hitako ny nandevenana olon-dratsy. Ireo olona ireo dia mpandeha ao an-Toeramasina; kanefa nohadinoina tao Jerosalema ny fitondrantenany. Zava-poana koa izany.