Kôheleta

Toko faha-3

⁹ Inona no tombontsoa azon'ny mpiasa amin'izay isasarany?

¹⁰ Nodinihiko ny asa asain'Andriamanitra hilofosan'ny olona;

¹¹ fa nataon'Andriamanitra ho tsara amin'ny fotoany avy ny zava-drehetra. Nomeny antsika koa ny fanirian-kahafantatra ny lasa sy ny hoavy. Nefa tsy ho fantatry ny olombelona ny asan'Andriamanitra ankapobe hatramin'ny voalohany ka hatramin'ny farany.

¹² Fantatro araka izany fa ny mifaly sy ny manao izay hahasoa finaritra azy ihany no tsara ho an'ny olona, raha mbola velona koa izy.

¹³ Ary koa, raha mihinana sy misotro ka mahatsiaro sambatra amin'ny asany rehetra ny olona, dia fanomezan'Andriamanitra izany.

¹⁴ Fantatro fa izay rehetra ataon'Andriamanitra dia haharitra mandrakizay; tsy misy anampiana na anesorana izany fa nataony mba hanajan'ny olona Azy.

¹⁵ Izay rehetra mitranga amin'izao fotoana izao sy izay mbola ho avy dia efa nisy tamin'ny lasa. Ataon'Andriamanitra miverimberina ny zava-mitranga.

¹⁶ Izao koa no zavatra hitako teto ambonin'ny tany: ny toerana tokony hampiharana ny rariny sy ny fahamarinana no anjakan'ny faharatsiana.

¹⁷ Hoy aho anakampoko: Samy hotsarain'Andriamanitra avy ny olo-marina sy ny olon-dratsy, satria misy fotoany avokoa ny zava-drehetra mbamin'ny asa rehetra.

¹⁸ Ny amin'ny olombelona dia nihevitra aho fa ampandalovin'Andriamanitra fitsapana izy mba hahitany fa raha ny tenany ihany, dia tsy mifankaiza amin'ny biby izy akory.

¹⁹ Mitovy amin'ny fiafaran'ny biby ihany ny fiafaran'ny olona. Fofonaina mitovy no mamelona ny olona sy ny biby ka tsy maintsy ho faty izy roa tonta. Tsy manana hamboniana eo anatrehan'ny biby ny olona, satria zava-poana ny zava-drehetra.

²⁰ Mitovy avokoa ny fiafaran'ny mananaina rehetra fa samy hody vovoka izy satria vovoka no nanaovana azy.

²¹ Tsy misy afaka manamarina fa ny fofonain'ny olona dia miakatra any ambony ary ny an'ny biby kosa dia midina any ambany, ao anaty tany.

²² Tsapako fa tsy misy tsara ho an'ny olombelona afa-tsy ny mifaly amin'ny vokatry ny asany. Tokony hionona amin'izany anjarany izany izy, satria tsy misy hampahita azy izay hitranga any aoriany.

Toko faha-4

¹ Hitako koa ny tsy rariny rehetra atao eto ambonin'ny tany. Miantsoantso ireo voan'ny tsindry hazo lena, fa tsy mba misy afa-manampy azy. Eo am-pelatanan'ny mpamoritra manko ny fahefana, hany ka tsy mba misy afa-manampy azy.

² Ataoko fa ireo efa maty dia sambatra noho izay velona mbola miaina.

³ Nefa sambatra kokoa noho izy roa tonta ireo aza ny tsy mbola ary akory, satria tsy hahita ny asa ratsy atao eto ambonin'ny tany.

⁴ Hitako fa matoa ny olona misasatra sy milofo amin'ny asany dia ny hahomby kokoa noho ireo namany. Nefa mbola zava-poana manenji-drivotra koa izany.

⁵ Mazava ho azy fa ny adala izay mipetra-potsiny dia mamono tena ho fatin-kanoanana.

⁶ Nefa aleo fiadanana eran-tanan'ila toy izay fisasarana eran-tanan-droa izay manenji-drivotra ihany.

⁷ Ary izao koa no zava-poana hitako tety ambonin'ny tany:

⁸ indro lehilahy iray mitoetra irery tokoa tsisy namana na rahalahy na zanaka ary nisasatra mafy. Naniry hanan-karena betsaka izy ka nanao anakampo hoe: Ho an'iza no isasarako sy tsy ahatsiarovako fahasambarana? Zava-poana sy raharaha ratsy koa izany.

⁹ Sambatra kokoa ny olon-droa noho ny mandeha irery fa mahatsara ny valin-kasasarana izany.

¹⁰ Raha lavo ny iray, dia misy mpanarina. Fa loza kosa ny an'ny singany raha lavo, satria tsy hisy mpanarina azy.

¹¹ Mafana kokoa raha olon-droa no miara-matory; fa ahoana kosa no hampahafana ny matory irery?

¹² Manan-kery kokoa ny olon-droa hanoherana izay miady aminy noho ny singany miady irery. Ary ny mahazaka telo olana tsy mora tapahina.

¹³ Aleo tovolahy mahantra nefa hendry toy izay mpanjaka antitra nefa adala tsy azo toroan-kevitra.

¹⁴ Ary na dia tao an-tranomaizina aza no nivoahan'ilay tovolahy mba hanjaka, na koa nateraka ho mpangataka aza izy any amin'izay hanjakany.

¹⁵ Hitako fa ny olon-drehetra tety ambonin'ny tany dia nanotrona ilay tovolahy fony izy nandimby ilay mpanjaka teo alohany.

¹⁶ Nahatarika olona maro izy. Nefa ireo taranaka aty aoriana dia tsy ho faly aminy, satria mbola zava-poana sy manenji-drivotra koa izany.

¹⁷ Aza mankao an-tranon'Andriamanitra tsy amim-pieritreretana, fa mandehana kosa mba hivonon-kihaino. Aleo izay noho ny manolotra sorona toy ny fanaon'ny adala izay tsy mahafantatra akory fa ratsy no ataony.

Toko faha-5

¹ Aza maika ny hiteny ary aza malaky manapa-kevitra hanao voady amin'Andriamanitra; fa any an-danitra Andriamanitra ary ianao kosa ety ambonin'ny tany. Koa lanjalanjao ny teninao.

² Fa izay be ahiahy, mpanonofy ratsy; ary izay be teny mpanao rediredin'adala.

³ Raha manao voady amin'Andriamanitra ianao, dia tanteraho ara-potoana izany, satria tsy sitrak'Andriamanitra ny olona adala. Koa efao ny voady efa nataonao.

⁴ Aleo tsy manome toky toy izay manome toky nefa tsy mahatanteraka.

⁵ Halaviro ireo teny mety hamatotra anao. Aza miteny amin'ny mpisorona voairak'Andriamanitra hoe: Tsy fanahy iniana iny. Fa ho tezitra Andriamanitra ary hopotehiny avokoa izay rehetra ataonao.

⁶ Arakaraka ny mahabe ny teny no mahabe ny nofy sy ny zava-poana. Koa Andriamanitra no hajao.

⁷ Aza atao ho mahagaga ny fahitana ny mahantra ampijalina na ny rariny sy ny fahamarinana voahitsakitsaka eto amin'ny tany. Fa ny olona anankiray ambony dia misy miaro azy ao amboniny ao, ary izy roa tonta ireo aza dia mbola misy ambony kokoa miaro azy.

⁸ Tsara kokoa ho an'ny firenena ny manana mpanjaka izay mampandroso ny asa fambolena.

⁹ Izay tia vola dia tsy ho afa-po mihitsy; ary izay tia harena dia tsy ho vokin'izany mihitsy. Zava-poana koa izany.

¹⁰ Fa arakaraka ny ananan'ny olona no mampitombo ny mpihampitra aminy. Inona no tombontsoan'ny tompom-pananana afa-tsy ny mijery ny hareny?

¹¹ Mahita tory tsara ny mpiasa na kely na be ny harapany. Fa tsy mba mahita tory kosa ny mpanankarena vokatry ny hamaroan'ny fananany.

¹² Nahita zava-dratsy mampahory aho teto ambonin'ny tany, dia ny vola izay notahirizin'ny tompony nefa nampidi-doza azy.

¹³ Very harena tamin-javatra mamohehatra izy ary tsy nanana na inona intsony nony tera-dahy.

¹⁴ Tsy maintsy handao ity tany ity toy izay niaviany izy, dia toy ny nitanjahany fony izy nivoaka avy tao an-kibon-dreniny. Ary tsy hahatondra na inona na inona ho valin-kasasarany izy.

¹⁵ Fahoriana lehibe ho azy fa toy ny nahatongavany teto an-tany no handaozany azy. Inona no tombontsoa azony? Nisasa-poana fotsiny izy.

¹⁶ Ankoatra izany, maloka ny fiainany manontolo noho ny alahelo be sy ny fahasorenana ary ny fijaliana.

¹⁷ Izao no tsapako fa tsara: mety ho an'ny olona ny mihinana sy ny misotro ary ny mifaly amin'ny vokatry ny asany mandritra ny androm-piainana omen'Andriamanitra azy; satria izany no anjarany.

¹⁸ Rehefa misy olona omen'Andriamanitra vola aman-karena sady avelany hihinana sy haka ny anjarany amin'izany ary koa hifaly amin'ny vokatry ny asany, dia fanomezan'Andriamanitra izany.

¹⁹ Hadinon'ny olona kosa amin'izay fa mandalo ny fiainany, satria fenoin'Andriamanitra fahasambarana ny fony.