Salamo
Toko faha-119 (118)
71 Nahasoa ahy ny azom-pahoriana mba hianarako ny lalananao.72 Aleoko ny lalana naloaky ny vavanao toy izay ny volamena amam-bolafotsy miavosa.
73 Nanao sy namboatra ahy ny tananao: ataovy mahira-tsaina aho hianarako ny didinao.
74 Hifaly mahita ahy ireo manaja Anao, satria ny teninao no antenaiko.
75 Ny fitsipikao, TOMPO o, fantatro fa rariny; ka marim-pototra ny nampahorianao ahy.
76 nampionona ahy anie ny fitiavanao, araka ny hafatrao tamiko mpanomponao!
77 Ho tonga ato amiko anie ny indrafonao ka hamelona ahy, satria ny lalananao no firavoako!
78 Aoka ho menatra ny mpirehareha mampahory tsy amin'antony, fa izaho misaintsaina ny fepetranao!
79 Hitodika amiko anie ireo manaja Anao, mba hahafantarany ny baikonao!
80 Ny foko manontolo anie hifikitra amin'ny lalananao, dia tsy ho rakotry ny henatra mihitsy aho!
81 Reraka aho maniry ny famonjenao: ny teninao no antenaiko.
82 Valalanina ny masoko miandry ny hafatrao; rahoviana no hampiononanao ahy?
83 Zary siny hoditra mainan'ny setroka aho, kanefa tsy hadinoko ny lalananao.
84 Hiaritra ela toy izao foana ve izaho mpanomponao? Rahoviana ny mpanenjika ahy no hotsarainao?
85 Mihady longoa hianjerako ny mpirehareha; tsy raharahainy akory izay lalananao.
86 Azo antoka avokoa ny didinao; vonjeo aho fa enjehina tsy amin'antony.
87 Kely sisa dia levona eto an-tany aho, kanefa tsy mba nafoiko ny fepetranao.
88 Noho ny fitiavanao, mba velomy aho hitandremako ny baiko naloaky ny vavanao.
89 Maharitra mandrakizay, TOMPO o, no nanorenanao any an-danitra ny teninao.
90 Mahatoky Ianao, amin'ny taona mifandimby; Naorinao ny tany ka mitoetra mafy.
91 Mandraka androany, araka ny fitsipikao, dia mbola eo ny tontolo satria mpanomponao.
92 Raha tsy ny lalananao no firavoako, toy izay aho efa matin'ny fahoriana.
93 Tsy ho hadinoiko mandrakizay ny fepetranao izay namelomanao ny aiko.
94 Fanananao aho ka vonjeo, satria mikatsaka ny fepetranao.
95 Mikendry hamely ahy ny olon-dratsy, satria ny baikonao no hadihadiko.
96 Izay toa lavorary dia nahitako fetra; ny didinao no tena midadasika.
97 Endrey ny fitiavako ny lalananao; tontolo andro dia izy no saintsainiko.
98 Ny didinao, izay fananako mandrakizay, dia mahatonga ahy ho hendry noho ny fahavaloko.
99 Hendry noho ny mpampianatra ahy rehetra aho, satria misaintsaina ny baikonao.
100 Mahira-tsaina noho ny zokiolona aho, satria ny fepetranao no arahiko.
101 Tsy nisy nekeko ny sori-dalan'ny faharatsiana mba hitandremako ny teninao.
102 Tsy mba miala amin'ny fitsipikao aho, fa Ianao dia Ianao no mampianatra ahy.
103 Mamy tokoa amiko ny hafatrao, eny, manoatra noho ny tantely aza.
104 Ny fepetranao mampahira-tsaina ahy; koa halako rehefa mety ho soritra mamitaka.
105 Fanilon'ny diako ny teninao sy fanazavana ny lalan-kizorako.
106 Hamafisiko ny velirano izay nataoko, dia ny hitandrina ny fitsipikao ara-drariny.
107 Mijaly tsy eran'ny aina aho, TOMPO o: mba velomy indray araka ny fampanantenanao.
108 Mba raiso ny tonom-bavaka atolotro Anao : TOMPO o, ampianaro ahy ny fitsipikao.
109 Hatenda lalandava izao ny aiko, nefa tsy hadinoko ny lalananao.
110 Ny olon-dratsy mitady hamandrika ahy, fa izaho tsy mihataka amin'ny fepetranao.
111 Ny baikonao no fananako mandrakizay: ireo no fifalifalian'ny foko.
112 Aronako hanao ny lalananao ny foko, hatramin'ny antsipiriany ary mandrakizay.
113 Halako ny olona miroa saina, fa ny lalananao kosa no tiako.
114 Ianao no fiereko sy ampingako; ny teninao no antenaiko.
115 Miala amiko, ianareo mpanao ratsy, hanarahako ny didin'Andriamanitra.
116 Tohany araka ny fampanantenanao aho ho velona; aoka tsy hataonao diso fanantenana!
117 Tohany hatrany aho mba ho voavonjy; ny lalananao no firavoako lalandava.
118 Izay rehetra miala amin'ny lalananao aetrinao, satria ny lainga no teti-dratsy ao an-tsainy.
119 Ny olon-dratsy eran-tany taim-by fanarinao: izany no itiavako ny baikonao.
120 Mihorohoro ny nofoko noho ny aminao, fa atahorako tokoa ny fitsipikao.