Salamo
Toko faha-107 (106)
21 Aoka izy hidera ny TOMPO noho ny fitiavany sy ny zava-mahagaga vitany ho an'ny olombelona!22 Aoka izy hanolotra sorom-piderana sy hihoby mitanisa ny asan'Andriamanitra!
23 Tao ireo niainga hiantsambo an-dranomasina sy nanao raharaha teny ambony ranobe,
24 dia indreo nahita ny asan'ny TOMPO sy ny zava-mahagaga nataony an-drano lalina.
25 Fa vao niteny ny Tompo, dia nirongatra ny rivo-mahery ka nampisamboaravoara ny onjan-dranomasina.
26 Ny sambo nisavoana nanakatra ny lanitra, dia nitontona ao an-davaky ny onja; fadiranovana toa miempo ny ain'ny mpiantsambo.
27 Fanina izy sady nivembena toy ny mamo, ka very avokoa izay mba hakingany.
28 Dia niantso vonjy tamin'ny TOMPO izy fa ory ka notsoahany tamin'ny fahatereny.
29 Ny rivo-mahery novany ho tsiotsioka, ary ny onjan-drano nihanalefaka;
30 dia faly ny mpiantsambo fa nisy fitoniana sady nentin'ny Tompo an-tseranana irina.
31 Aoka izy hidera ny TOMPO noho ny fitiavany sy ny zava-mahagaga vitany ho an'ny olombelona!
32 Aoka hanandratra Azy ny vahoaka tafangona ary hidera Azy ny loholona tafavory!
33 Ny TOMPO no manova ny ony ho taniefitra sy ny loharano ho tany mangentana
34 ary ny tany lonaka ho tanin-tsira, noho ny faharatsian'ny mponina eo.
35 Kanefa koa ny taniefitra ovany ho farihy, ny tany karankaina ho feno loharano
36 mba hamponenana ireo noana izay hanorin-tanana honenana,
37 hamafy eny an-tsaha sy hamboly voaloboka ka hanangona ny vokatr'ireny.
38 Tahin'ny TOMPO izy ka mihamaro fatratra; ny biby fiompiny koa tsy avelany hihavitsy.
39 Fa misy kosa firenena mihavitsy sy mietry noho ny fahoriana sy ny loza ary ny alahelo.
40 Ataon'ny TOMPO rakotra henatra ny mpifehy ka mirenireny an-tany foana tsy misy lalana;
41 fa atrakany ho afa-pahoriana kosa ny mahantra ary hamaroiny toy ny andian'ondry ny fianakaviany.
42 Mahita izany ny olo-mahitsy ka mifaly; fa mikombom-bava kosa ny olon-dratsy rehetra.
43 Izay hendry, aoka hisaintsaina izany sy hahatsapa ny fitiavan'ny TOMPO!
Toko faha-108 (107)
1 Tononkira. Salamo nataon'i Davida.2 Andriamanitra o, mitombina dia mitombina ny foko; ka hihira ho Anao aho sy hankalaza Anao amin-tsalamo.
3 Mifohaza, ry fanahiko; mifohaza, ry valiha sy lokanga , fa tiako hofohazina ny mazavatsinanana.
4 TOMPO o, vory vahoaka no hiderako Anao; ary eo anivom-pirenena no hankalazako Anao amin-tsalamo,
5 satria lehibe mihoatra noho ny lanitra ny fitiavanao ary avo tafapaka amin'ny rahona ny toetranao mahatoky.
6 Andriamanitra o, misandrata Ianao ho any an-tampon'ny lanitra; aoka anie ny voninahitrao hamiratra amin'ny tany tontolo!
7 Vonjeo amin'ny herinao aho ary valio vavaka, dia ho afaka ilay vahoaka malalanao.
8 Tao an-Toeramasiny no niteny Andriamanitra hoe: "Faly tokoa Aho fa hizara an'i Sekemasy ny lohasahan'i Sokota ho an'ny vahoakako ;
9 Ahy i Gilehada, Ahy koa i Manase; i Efraima no toy ny satro-by fiarolohako; i Joda no toy ny tehim-piandrianako.
10 I Moaba hampiasaiko toy ny tavy fisasako; i Edoma hanipazako kapa ho fananako ; i Filistia hanaovako horakora-pandresena."
11 Iza no hampiditra ahy ho eo anivon'i Edoma? Zovy no hitondra ahy ho amin'ilay tanana mafy?
12 Moa tsy Ianao ihany ve, Andriamanitra o? Kanefa izahay efa narianao mihitsy ary ny tafikay tsy iarahanao intsony.
13 Ampio re izahay hiady amin'ilay mpandrafy, fa tsy mankaiza ny famonjena ataon'ny olona.
14 Andriamanitra no hahazoanay fahombiazana goavana, satria Izy no hanitsakitsaka ireo mpandrafy anay.
Toko faha-109 (108)
1 Tao amin'ny tahirin-kiran'ny filohan'antoko-mpihira. Salamo nataon'i Davida. Ry Andriamanitra fiderako o, aza dia mangina fotsiny Ianao,2 fa nisoka-bava hamely ahy ny olon-dratsy sy mpamitaka; resaka feno lainga no ataony amiko,
3 teny fankahalana no manemitra ahy ary iadiany tsy amin'antony aho.
4 Ny fitiavako valiany fandrafiana, fa izaho kosa mivavaka ho azy;
5 ratsy no asetriny ny soa ataoko, fankahalana no avaliny ny fitiavako.
6 Hoy izy ny amiko: "Anendreo olon-dratsy hamely azy ; aoka hisy mpiampanga hitsangana eo ankavanany!
7 Rehefa hotsaraina izy, dia aoka ho hita fa meloka; ary na ny fivavahany aza, aoka ho tonga fahotana!
8 Hohafohezina anie ny andro iainany ary ho lasan'olon-kafa ny andraikiny !
9 Aoka ho kamboty ny zanany ary ho mpitondratena ny vadiny!
10 Ho mpirenireny mangataka anie ny zanany ary ho voaroaka lavitra ny fonenany rava!
11 Halain'ny tompon-trosa anie ny fananany rehetra ary ho olon-kafa no hifaoka ny vokatry ny asany!
12 Aoka tsy hisy hamindrafo aminy na koa hiantra ny zanany kamboty!
13 Ho lany tamingana anie izy ary amin'ny taranaka faharoa no aoka hanjavonan'ny lazany!