Genesỳ

Toko faha-48

⁶ Fa ireo zanakao lahy izay ho teraka aorian'ireo kosa dia ho anao ihany. Ao amin'ny faritanin'ireo zokiny ihany no handraisan'izy roa lahy ny anjara lovany.

⁷ Fony aho niverina avy any Mezopotamia ambony, talohan'ny hahatongavana tao Efrata, any amin'ny tany Kanahana, dia maty teo anilako i Rahely ary naleviko teo amoron-dalana; i Efrata dia antsoina hoe Betlehema ankehitriny.

⁸ Tamin'izay dia tazan'i Jakoba ireo zanakalahin'i Josefa ka nanontaniany hoe: -Iza moa ireto?

⁹ Hoy kosa ny navalin'i Josefa azy: -Ireo no zanaka lahy izay nomen'Andriamanitra ahy teto Ejipta. Ka hoy i Jakoba hoe: -Mba ento eto anilako ary ireo, dia hotsofiko rano.

¹⁰ Efa pahina ny mason'i Jakoba noho ny fahanterana ka tsy nahita loatra intsony; dia nampanatonin'i Josefa azy ireto zanany lahy. Ary namihina ireo i Jakoba sady nanoroka azy.

¹¹ Dia hoy izy tamin'i Josefa: -Tsy nanantena hahita anao intsony aho, kanjo indro izao fa navelan'Andriamanitra hahita ny zanakao aza aho.

¹² Nanaisotra azy mirahalahy teo an-dohalik'i Jakoba i Josefa, dia niankohoka tamin'ny tany.

¹³ Noraisiny tamin'ny tanany havanana i Efraima ka narosony ho eo an-kavian'i Jakoba, ary noraisiny tamin'ny tanany havia kosa i Manase mba ho eo an-kavanan'i Jakoba, dia nampanatoniny an-draibeny indray izy mirahalahy.

¹⁴ Fa nampifamadihin'i Jakoba ny tanany, ka ny tanany havanana no napetrany teo amin'ny lohan'i Efraima na dia zandriny aza io; fa ny tanany havia kosa no napetrany teo amin'ny lohan'i Manase, kanefa izy io no lahimatoa.

¹⁵ Toy izao ny tsodrano nomen'i Jakoba an'i Josefa: Antsoiko Andriamanitra hitsodrano, fa teo anatrehany no nizoran'i Abrahama raibeko sy i Itsehaka raiko; antsoiko Andriamanitra Izay nanolokolo ahy hatrizay niainako ka mandraka ankehitriny;

¹⁶ antsoiko ilay Anjely Izay nanavotra ahy tamin'ny loza rehetra; dia hotahiny anie ireto zazalahy ireto! Ka amin'ny alalan'izy roa lahy no hahatsiarovana ny anarako mbamin'ny anaran'i Abrahama raibeko sy i Itsehaka raiko! Hitombo maro dia maro eo anivon'ilay tany anie izy! 17 Hitan'i Josefa fa napetraky ny rainy teo amin'ny lohan'i Efraima ny tanany havanana ka tsy sitrany izany. Dia noraisiny ny tanan-drainy mba hampiala azy amin'ny lohan'i Efraima hankeo amin'ny lohan'i Manase;

¹⁸ sady hoy i Josefa tamin-drainy: -Tsy izao no izy, ry dada; fa ity no lahimatoa, koa apetraho eo an-dohany ny tananao havanana.

¹⁹ Fa nanda i Jakoba ka nanao hoe: -Fantatro dia fantatro, anaka, fa ho tonga firenen-dehibe koa i Manase. Kanefa ny zandriny dia ho lehibe noho izy, ary ny taranany dia ho firenena maro.

²⁰ Tamin'izany andro izany dia nitsodrano azy mirahalahy i Jakoba ka niteny toy izao: -Ny anaranareo no hitsofan'ny Israelita rano ka hilazany hoe: Tahaka ny nataon'Andriamanitra tamin'i Efraima sy i Manase anie no hataony aminao! Araka izany, dia napetrak'i Jakoba alohan'i Manase i Efraima.

²¹ Ary hoy i Jakoba tamin'i Josefa: -Indro ho faty aho, nefa Andriamanitra homba anareo ka hampody anareo ho any an-tanindrazanareo.

²² Ary izaho manome anao zaratany iray fatratra kokoa noho ny an'ireo rahalahinao, dia ny faritr'i Sekema izay azoko tamin'ny sabatro sy ny tsipikako teo an-tanan'ny Amorita.

Toko faha-49

¹ Nantsoin'i Jakoba ireo zanany ka nilazany hoe: -Mivoria ianareo, fa hambarako aminareo izay zavatra hiseho aminareo any aoriana.

² Mivoria ianareo ka mihainoa, ry zanakalahin'i Jakoba, eny, mihainoa an'i Israely rainareo.

³ Ianao, ry Reobena, no lahimatoako, voalohan-terako tao anatin'ny heriko. Ihoaranao ny rahalahinao amin'ny fahamendrehana sy ny hery. 4 Misamboaravoara toy ny ranon-driaka ianao; kanefa tsy ho lohalaharana intsony ianao, satria niakatra teo am-pandriako ka nandoto ny farafarako tamin'ny vadiko.

⁵ I Simehona sy i Levy dia mpirahalahy niray tetika hanao herisetra;

⁶ kanefa tsy te handray anjara amin'ny fiokoany aho ary tsy te hanatrika ny fivoriany, satria nentanim-pahatezerana izy ka namono olona ho faty ary tia setrasetra ka nitraingo ombilahy.

⁷ Ho voaozona anie ny hatezerany tafahoatra ary ny havinirany tsy mifaditrovana. Haparitako ny taranany ka haeliko eran'i Israely.

⁸ Ry Joda, hidera anao ireo rahalahinao; Hofolahinao kosa ny hatok'ireo fahavalonao, ka hiankohoka eo anatrehanao ireo ralahahinao.

⁹ Ry Joda zanako, toy ny liona tanora ianao, dia liona avy niremby ka mamonjy fierena; mitorevaka toy ny lion-dahy i Joda ka matory, ary mamitsaka toy ny liom-bavy, ka iza no hampitsangana azy?

¹⁰ Tsy hiala amin'i Joda ny tehim-panjakana, ary tsy hiala amin'ny taranany ny tehim-pibaikoana mandra-pahatongan'ilay tena tompony izay hankatoavin'ny firenena rehetra.

¹¹ Hihanaka dia hihanaka ny voaloboka, ka hafatony amin'ny tahom-boaloboka ny borikiny ary amin'ny sampam-boaloboka ny zana-borikiny; divay no hanasany akanjo ary ranom-boaloboka no hanasany fitafiana.

¹² Ny divay no hampibaliaka tsara ny masony; ny ronono kosa no hampibotsiaka ny nifiny.

¹³ I Zebolona dia honina eo amoron-dranomasina, dia eo amin'izay hisy seranan-tsambo; hivelatra hatrany Tsidona ny faritaniny.

¹⁴ I Jisakara dia toy ny boriky matanjaka, mandry eo anivon'ny valany izay misy fefy roa sosona.

¹⁵ Hitany fa tsara ny toerana ary mahafinaritra ny tany. Nanongilan-tsoroka hampitondraina entana izy, ka tonga miasa mafy toy ny mpanompo.

¹⁶ I Dana dia hifehy ny vahoakany tahaka ny foko hafa ao amin'i Israely.

¹⁷ Toa bibilava mamitsaka eny an-dalana izy, ary tahaka ny menarana eo amoron-dalana; kaikerin'ny menarana ny traingon-tsoavaly ka mianjera mitsilany ny mpitaingina azy.

¹⁸ Manantena ny famonjenao aho, TOMPO o!

¹⁹ I Gada dia notafihin'andia-mpandroba, koa manao valim-panafihana sy manenjika azy.

²⁰ I Asera dia hanan-tany mahavokatra tokoa, ka hahazoana mofo mendrika mpanjaka.

²¹ I Naftaly dia toy ny osivavy mikarenjy izay manan-janaka tsara tarehy.

²² I Josefa dia toy ny zava-maniry mahavokatra izay mirobona eo akaikin-doharano ka manan-drantsana tafahoatra ny fefy.

²³ Nampahory azy imbetsaka ireo mpitifitra tsipika, ka nandefa zana-tsipika hamelivelezana azy.

²⁴ Kanjo nateza mafy ny tsipikan'i Josefa, ary kinga hatrany ny sandry aman-tanany. Noho ny fiarovan'ilay Andriamanitra maherin'i Jakoba, noho ny anaran'ilay Mpiandry izay vatolampy iankinan'i Israely,

²⁵ amin'ny alalan'ilay Andriamanitry ny rainao izay mamonjy anao, amin'ny alalan'ilay Andriamanitra Tsitoha izay mitahy anao, raiso ny fitahiana avy amin'ny orana izay mirotsaka avy any an-danitra, raiso ny fitahiana avy amin'ny rano izay mihanaka ao amin'ny fanambanin'ny tany ary raiso ny fitahiana izay hahamaro anaka ny vehivavy sy ny biby fiompy.

²⁶ Ny tsodrano omen'ny rainao dia mihoatra noho ny zava-tsoan'ireo tendrombohitra fahagola sy ny zava-tsoan'ireo havoana tranainy. Hirotsaka eo an-dohan'i Josefa anie izany tsodrano izany, dia eo an-dohan'ilay voafidy teo anivon'ny rahalahiny!

²⁷ I Benjamina dia toy ny amboadia masiaka: Ny maraina izy homan-dremby; ny hariva, mizara babo.

²⁸ Izy rehetra ireo no foko israelita roa ambin'ny folo. Izany no teny nolazain-drainy taminy, fony izy nitsodrano azy. Eny, samy nomeny tsodrano manokana ny foko tsirairay avy.

²⁹ Taorian'izany dia nanafatra ireo zanany i Jakoba ka nanao taminy hoe: -Rehefa maty aho, dia aleveno any am-pasan-drazako, dia ilay zohy ao amin'ny sahan'i Hefrona izay hetita,

³⁰ ilay zohy ao Makpela akaikin'i Mamre, any amin'ny tany Kanahana. Novidin'i Abrahama tamin'i Hefrona izay hetita io saha io mba ho tany fandevenana.

³¹ Tao no nalevina i Abrahama sy i Sara vadiny, i Itsehaka sy i Rebeka vadiny, ary tao koa no nandevenako an'i Lea.

³² Ny saha sy ny zohy ao aminy dia novidina tamin'ny Hetita.

³³ Rehefa vitan'i Jakoba ny hafatrafatra farany tamin'ireo zanany lahy, dia nandry teo am-parafara indray izy. Ary niala aina izy ka nakambana tamin'ny razany.

Toko faha-50

¹ Dia nihohoka teo amin'ny tavan'ny rainy i Josefa, ary nitomany sady nanoroka azy.

² Ary nomen'i Josefa baiko ireo dokotera mpanompony mba hanosotra zava-manitra ny rainy; koa notanterahin'ireo ny fanosorana menaka manitra ny fatin'i Jakoba,