Salamo
Toko faha-101 (100)
8 Hataoko fongotra isa-maraina ny olon-dratsy rehetra eto amin'ny tany sy ny fanjakana mba ho foana avokoa ny mpanao ratsy ao amin'ny tananan'ny TOMPO.
Toko faha-102 (101)
1 Vavaky ny ory, rehefa trotraka izy ka mamboraka ny taraina ny amin'ny TOMPO.2 TOMPO o, mba henoy vavaka aho; aoka ho tonga any aminao ny tarainako!
3 Aza lavinao ny hijery ahy amin'ny androm-pahoriako. Anongilano sofina aho ka valio faingana amin'ny andro iantsoako vonjy aminao.
4 Fa levona toy ny setroka ny androm-piainako, ary kila toy ny tapa-porohana ny faraheriko.
5 Toy ny ahitra voakapa ny foko ka malazo; hadinoko mbamin'ny homan-kanina aza.
6 Reraka noho ny fisentoako aho, ka taolana sisa no mipetaka amin'ny hoditro.
7 Sahala amin'ny vorondreo any an-taniefitra aho ary tahaka ny vorondolo an-tanana aolo.
8 Tsy mahita tory aho, fa mitoloko tahaka ny voro-manirery eny an-tafontrano.
9 Tontolo andro aho latsaim-pahavalo sady iozonany amin-karomotana.
10 Lavenona no toy ny sakafo hohaniko, haroiko ranomaso ny zavatra sotroiko.
11 Noho ny fahatezeranao sy ny fahaviniranao, dia ningainao aho ka natsipinao lavitra.
12 Toy ny fandroson'ny aloka ny androm-piainako; ary mihamalazo toy ny ahitra ny tenako.
13 Ianao kosa, TOMPO o, manjaka mandrakizay ary maharitra hatrany hatrany ny lazanao.
14 Hirotsaka an-tsehatra Ianao ka hamindrafo amin'i Tsiona, fa tonga ny fotoana hiantranao azy; eny, izao no fotoana mety amin'izany.
15 Fa sitrakay mpanomponao i Tsiona, na dia rava aza ny rari-vatony; ary mampangorakoraka anay izy, na dia voarodana zary vovotany aza.
16 Aoka ny firenen-kafa rehetra haneho fanajana ny TOMPO; ary aoka hiaiky Azy be voninahitra ny mpanjaka rehetra eto an-tany!
17 Fa rehefa hanangana indray an'i Tsiona izy ka hiseho miharihary amim-boninahitra,
18 dia hitodika ny vavak'ireo norobaina ary tsy hanositosika ny fangatahany.
19 Soraty izany ho an'ny taranaka any aoriana ka hidera ny Tompo ireo vahoaka mbola ho ary.
20 Avy any an-Toeramasiny any ambony ny TOMPO no miondrika mba hijery; avy any an-danitra any Izy no nitazana an'ity tany ity,
21 ka nihaino ny tarainan'ireo voafonja sy namaha ny fatoran'ireo voaheloka ho faty.
22 Dia hambara ao Tsiona ny lazan'ny TOMPO ary hohiraina ao Jerosalema ny fiderana Azy,
23 rehefa ho tafaray ao ireo vahoaka sy ireo fanjakana mba hanao fanompoam-pivavahana ho an'ny TOMPO.
24 Mbola teo antsasa-dalam-piainako aho, TOMPO o, no nahenanao ny heriko ary nohafohezinao ny androko.
25 Ka hoy aho hoe: "Andriamanitra o, aza alainao eny antenatenan'ny androm-piainako aho; fa ny taonanao tsy mba ho tapitra rahoviana."
26 Fahiny ela be no nanorenanao ny tany sy nanamboaranao ny lanitra.
27 Mbola ho levona ireo fa Ianao kosa maharitra. Mihatonta toy ny fitafiana ireo; hosoloanao toa akanjo, dia voasolo;
28 fa Ianao kosa tsy mba miova ary ny taonanao tsy mba hifarana.
29 Ny zanakay hiorim-ponenana feizay ary ny taranakay hateza eo anatrehanao.
Toko faha-103 (102)
1 Nataon'i Davida. Aoka hisaotra ny TOMPO aho, hisaotra eram-po ny anarany masina!2 Eny, aoka hisaotra ny TOMPO aho, ka tsy hisy hohadinoiko ny soa nataony!
3 Fa Izy no mamela ny heloko rehetra ary manasitrana ny aretiko rehetra.
4 Avotany tsy ho any an-davaka ny aiko; rakofany fitiavana sy indrafo aho.
5 Fenoiny fahasambarana ny fiainako, ka tanora sy matanjaka toa voromahery aho.
6 Omen'ny TOMPO rariny sy hitsiny izay rehetra ampahorina.
7 Efa nampahafantatra ny fikasany tamin'i Mosesy Izy ary ny asany mahery tamin'ny vahoaka israelita.
8 Mpamindrafo sy mpiantra ny TOMPO, tsy mora tezitra ary be fitiavana.
9 Tsy mba mandevilevy lalandava Izy, tsy mitahiry fahatezerana mandrakizay.
10 Tsy araka ny otantsika no anafaizany antsika, tsy araka ny helotsika no amaliany antsika.
11 Fa tahaka ny haavon'ny lanitra ambonin'ny tany no haben'ny fitiavany amin'izay manaja Azy;
12 tahaka ny halavitry ny atsinanana amin'ny andrefana no hampanalavirany amintsika ny hadisoantsika.
13 Tahaka ny fangoraky ny ray an'ireo zanany no angorahan'ny TOMPO an'izay manaja Azy.
14 Satria fantany ny namolavolana antsika, ka tsaroany tokoa fa vovoka isika.
15 Toy ny ahitra ny androm-piainan'ny olombelona, toy ny voninkazo eny an-tsaha ny famoniny:
16 rehefa tsofin'ny rivotra izy, dia foana ka tsy mahalala azy intsony ny toerany.
17 Fa ny fitiavan'ny Tompo kosa dia hatrizay ka ho mandrakizay amin'ireo olona manaja Azy; ary ny fahamarinany hihatra amin'ny taranaka mandimby,
18 izay mitandro ny fanekem-pihavanany ka mahatsiaro hanatanteraka ny baikony.
19 Naorin'ny TOMPO any an-danitra ny seza fiandrianany, mifehy an'izao rehetra izao ny fanjakany.
20 Misaora ny TOMPO, ianareo anjeliny izay hery voafantina mpanatanteraka ny teniny ka mankato Azy raha vao mandre ny baikony.