Salamo
Toko faha-75 (74)
11 Hopotehiny avokoa ny fahefan'ny olon-dratsy fa hasandrany kosa ny fahefan'ny olo-marina.
Toko faha-76 (75)
1 Tao amin'ny tahirin-kiran'ny filohan'antoko-mpihira. Hampiarahina amin'ny valiha. Salamo nataon'i Asafa. Tononkira.2 Fantatra eo amin'i Joda Andriamanitra; lehibe eo amin'i Israely ny lazany.
3 Ao Salema ny trano itoerany ary ao Tsiona ny fonenany.
4 Tao no namotehany ny fitaovam-piadiana, dia ny tsipika manelatra sy ny ampinga ary ny sabatra.
5 Andriamanitra o, mahatahotra Ianao, avo manerinerina noho ny tendrombohitra fahagola.
6 Voaroba mbamin'ny miaramila mahery fo, satria renoky ny torimaso ireo; ankona tsy nahahetsika avokoa ireny lehilahy matanjaka ireny.
7 Ry Andriamanitr'i Jakoba o, nandrahona Ianao ka nitsatoka teo ny soavaly sy ny mpitaingina azy.
8 Eny, mahatahotra tokoa Ianao! Ka iza no hahajanona eo anoloanao, rehefa mipoaka ny fahatezeranao?
9 Avy any an-danitra no amoahanao didim-pitsarana; Andriamanitra o, raiki-tahotra ny tany ka mangina,
10 fony Ianao nitsangana hilaza ny fanapahan-kevitrao hamonjy ny malahelo rehetra eto amin'ny tany.
11 Na dia ny fahatezeran'i Edoma aza dia hanjary fiderana Anao; ary ny olona sisa tavela any Hamata dia hataonao manaiky Anao.
12 Manaova voady amin'ny TOMPO Andriamanitrareo, ary efao aminy izany; ianareo firenen-drehetra manodidina, mitondra fanatitra ho an'ilay Andriamanitra mahatahotra;
13 fa Izy no mampiato ny reharehan'ireo andriana sady mampahatahotra an'ireo mpanjakan'ny tany.
Toko faha-77 (76)
1 Tao amin'ny tahirin-kiran'i Jedotona filohan'antoko-mpihira. Salamo nataon'i Asafa.2 Andriamanitra no antsoiko mba hitarainako; eny, Izy no antsoiko mba hihainoany ahy.
3 Ny TOMPO no tadiaviko amin'ny andro fahoriako; tsy an-kitsahatra, nony alina, no anandratako tanana any aminy , kanefa dia tsy mety mionona ny foko.
4 Mahatsiaro an'Andriamanitra aho, ka misento; raha vao mieritreritra aho, dia rera-tsaina.
5 Tsy avelan'ny TOMPO hikimpy ny masoko; mitebiteby aho, ary tsy hitako izay ho lazaina.
6 Vetsoiko ny andro fahiny tsaroako ny taona taloha elabe.
7 Mandinika lalina aho, nony alina, sady mieritreritra ato am-poko; ka ny saiko dia velom-panontaniana hoe:
8 "Dia hanary anay mandrakizay ve ny Tompo? Tsy hiantra anay intsony ve Izy?
9 Dia ho lany tokoa ve ny fitiavany anay? Ho tapitra tsy hisy intsony ve ny teniny?
10 Hadinon'Andriamanitra ve ny miantra anay? Nohidiany tanteraka ve ny fony, satria tezitra Izy? "
11 Dia hoy aho anakampoko hoe: "Ny mampahararirary ahy dia izao: Tsy manao asa mahery ho anay intsony ilay Andriamanitra Avo Indrindra."
12 TOMPO o, tsaroako izay efa nataonao ary tadidiko ny zava-mahagaga vitanao fahiny.
13 Mandinika ireo asanao rehetra aho ary mieritreritra ireo zava-dehibe nataonao.
14 Andriamanitra o, fahamasinana no tanjon'ny lalanao ka tsy misy Andriamanitra lehibe toa Anao.
15 Ianao irery no manao zava-mahagaga; ary nasehonao tamin'ny firenen-kafa ny fahefanao.
16 Ny herinao no nanavotanao ny vahoakanao, dia ny taranak'i Jakoba sy ny taranak'i Josefa.
17 Andriamanitra o, nahita Anao ny ranobe ka raiki-tahotra; eny, nipararetra mbamin'ny fanambanin'ny ranomasina aza.
18 Nandrotsaka oram-be ny rahona, namoaka kotro-baratra ny raho-matevina, ary nifanaretsaka ny zana-tsipikanao.
19 Tamin'ny firohondrohon'ny kotro-baratrao dia nahazava izao rehetra izao ny tselatra, ary nihovotrovotra sy nihorohoro ny tany.
20 Nanao lalana tany an-dranomasina Ianao ary sakeli-dalana tany amin'ny rano lalina , nefa tsy nisy nahalala ny soritry ny dianao.
21 Toy ny fitarihana andian'ondry no nitarihanao ny vahoakanao tamin'ny alalan'i Mosesy sy i Aharona.
Toko faha-78 (77)
1 Tononkalo fananarana nataon'i Asafa. Henoy tsara ny fampianarako, ry mpiray firenena amiko; atongilano ny sofinareo amin'izay teny lazaiko.2 Hisoka-bava hanao fanoharana aho ka hanatsoaka lesona avy amin'ny fahiny.
3 Izay efa renay sy fantatray satria notantarain'ireo razantsika taminay,
4 dia tsy hafeninay amin'ny zanakay koa; eny, hampitainay amin'ny taranaka ho avy ny zavatra tokony hiderana ny TOMPO ary koa ny asa mahery sy mahagaga nataony.
5 Nampijoro fitsipika ho an'ny vahoakany Izy ary nametraka lalana teo amin'i Israely, ka nandidy ny razantsika mba hampianatra izany tantara izany amin'ireo zanany.
6 Amin'izay ny taranaka ho avy, izany hoe ireo zaza mbola hateraka, dia hahafantatra ihany koa ka hijoro hampita amin-janany,
7 mba hahatonga azy hatoky an'Andriamanitra ka tsy hanadino ny asa mahery nataony fa hitandrina kosa ny didiny.
8 Amin'izay ireto tsy hanahaka ireo razany izay taranaka naditra sy nikomy, taranaka nanana fo niovaova sy fanahy tsy natoky an'Andriamanitra.
9 Ny olona tao amin'ny fokon'i Efraima, izay nirongo tsipika sy zana-tsipika, dia nandositra tamin'ny andro fiadiana:
10 Tsy nitandro ny fanekem-pihavanana nifanaovany tamin'Andriamanitra izy, fa tsy nety hanaraka ny lalanany;
11 hadinon'ireo ny asa mahery nataony sy ny zava-mahagaga efa nasehony taminy.
12 Tany Ejipta, tao amin'ny faritr'i Tsohana , teo anatrehan'ireo razany mihitsy no nanaovan'Andriamanitra zava-mahagaga :
13 nosarahiny ny ranomasina mba hampitany azy ireo, nasainy nivangongo ny rano ho tahaka ny fefiloha ;
14 Andry rahona no nitarihany azy tamin'ny antoandro ary ny hazavan'ny afo nandritra ny alina.
15 Namaky vatolampy tany an-taniefitra Izy, ka nampisotro azy tamin'ny loharano nitosaka avy any amin'ny fanambanin'ny tany;