Salamo
Toko faha-73 (72)
12 Jereo ireny olon-dratsy ireny: mahomby mandrakariva, mitombo harena.13 Hay very maina izany ny nanadiovako ny foko sy nanasako ny tanako ho tsy manan-tsiny !
14 Voakapoka tontolo andro aho ary faizina isa-maraina.
15 Raha izay aho no tapa-kevitra hiteny tahaka azy, dia ho lasa mpamadika an'ireo anisan'ny zanakao.
16 Nieritreritra aho ka niezaka hahatakatra; kinanjo sarotra tamiko ny hahita mazava,
17 mandra-piditro tao amin'ny Toeramasinao, ka nahatakarako ny anjara miandry ireo olon-dratsy.
18 Hay ve ka napetrakao amin'ny kisilasila izy ireny mba hanjeranao azy any amin'ny faharavana!
19 Oadray! Fongana indray mipi-maso izy, levona matin'ny horohoro tampoka.
20 TOMPO o, rehefa mifoha homba ahy Ianao, dia ho levona ireny toy ny ahalevonan'ny nofin'ny olona rehefa taitra izy.
21 Fony aho feno alahelo ka tohina mafy tato anatiko,
22 dia ketrina aho fa tsy nahalala na inona na inona; eny, toy ny biby tsy manan-tsaina aho teo anatrehanao.
23 Kanefa niaraka taminao mandrakariva aho, ary notantananao tamin'ny tanako ankavanana.
24 Ny torohevitrao no itarihanao ahy; avy eo aho dia ho raisinao ho any amin'ny voninahitrao.
25 Any an-danitra, iza moa no ahy afa-tsy Ianao? Ety an-tany, inona indray no iriko fa efa miaraka aminao aho?
26 Mety hihareraka ny nofoko sy ny foko, fa Ianao kosa, Andriamanitra o, no aroko sy anjarako mandrakizay.
27 Indro very izay mihataka aminao ary aringanao izay rehetra mandao Anao.
28 Fa izaho kosa, ny mahasambatra ahy dia ny ho eo akaikinao, Andriamanitra o; Ianao Tompo ANDRIANANAHARY no nataoko fialofana hahazoako manambara ny asa rehetra vitanao.
Toko faha-74 (73)
1 Tononkalo fananarana nataon'i Asafa. Andriamanitra o, nahoana izahay no dia narianao tanteraka? Nahoana izahay andian'ondry fiandrinao no irehetan'ny fahatezeranao?2 Tsarovy ilay vahoakanao izay efa azonao hatramin'ny ela, dia ireo foko navotanao ho fanananao; tsarovy ny tendrombohitra Tsiona izay nataonao fonenana.
3 Avia Ianao hijery ireo rava hatry ny ela, fa nosimban'ny fahavalo avokoa ny zavatra tanatin'ny toerana masina.
4 Tao amin'ny faritra fihaonana aminao no nihorakorahan'ireo olona mpandrafy Anao ary nametrahany ny fanevany ho mari-pandresena.
5 Ny fisehony tao dia toy ny mpikapa hazo manainga famaky hitevy ala mikitroka,
6 ary nopotehiny tamin'ny famaky sy ny kanonta avokoa na ny rafitra na ny sokitra tamin'izay.
7 Nodorany ilay Toeramasinao; ary nazerany sy nozimbainy ilay trano anajanay Anao.
8 Hoy izy ireo ny aminay hoe: "Aoka hampahorintsika izy rehetra; ary aoka hodorantsika avokoa ny toeram-pivavahana eto amin'ny tany!"
9 Tsy hitanay intsony ny mariky ny fanatrehanao, tsy misy mpaminany intsony; ary tsy misy aminay mba mahalala izay mbola haharetan'izao toe-javatra izao.
10 Andriamanitra o, mandra-pahoviana no hiteny ratsy Anao ny mpandrafy anay? Ary moa ny fahavalonay ve dia tsy hitsahatra hanamavo Anao?
11 Nahoana ny tananao ankavanana no nahemotrao ary fihininao mafy tsy hamonjy anay?
12 Kanefa Andriamanitra o, Mpanjakanay hatrizay hatrizay Ianao, mpanao famonjena eto anivon'ny tany.
13 Mampisaraka ny ranomasina tamin'ny herinao Ianao, namakivaky ny lohan'ny dragona teny ambony ranobe,
14 nanapotika ny lohan'izany fanany goavana izany ka nanome ny tenabeny ho hanin'ny antsantsa.
15 Nanokafanao lalana ny loharano sy ny sakeli-drano, ary nataonao tankina ny ony tsy mety ritra.
16 Anao ny andro, Anao koa ny alina fa Ianao no nahary ny masoandro amam-bolana.
17 Ianao no nametra ny faritra rehetra amin'ny tany, Ianao koa no nanao ny fahavaratra sy ny ririnina.
18 TOMPO o, izao no mba tsarovy: miteny ratsy Anao ny fahavalo, manamavo Anao io firenena adala io.
19 Aza atolotra an'ireo bibidia ireo ny ain'ilay domohina malalanao; aza hadinoina na oviana na oviana ny fiainan'ireo olo-mahantranao.
20 Hevero ny fanekem-pihavanana nataonao, satria feno olona iharan'ny herisetra ireo fiafenana rehetra ato amin'ny tany.
21 Aza avela hiverina amin-kenatra izay nampahorina; aoka kosa ny mahantra sy ny malahelo hidera Anao!
22 Andriamanitra o, mirotsaha an-tsehatra hiandraikitra ny adinao; tsarovy fa ireo adala ireo dia miteny ratsy Anao isan'andro.
23 Aza hadinoina ny tabataban'ireo mpandrafy Anao, dia ny horakoraka izay ataon'ireo mpanohitra Anao ka tsy mitsahatra miakatra any aminao.
Toko faha-75 (74)
1 Tao amin'ny tahirin-kiran'ny filohan'antoko-mpihira. hohiraina araka ny feon'ny hoe: "Aza ravana... ". Salamo nataon'i Asafa.Tononkira.2 Andriamanitra o, midera Anao izahay; eny, midera Anao tokoa izahay. Ataonay antso avo ny lazanao ary tantarainay ny zava-mahagaga vitanao.
3 Hoy ny TOMPO hoe: "Amin'ny fotoana ho tondroiko dia hanao fitsarana araka ny hitsiny Aho.
4 Hihorohoro ny tany mbamin'ireo mponina eo aminy, nefa Izaho mbola hihazona ny andry iorenany."
5 Hoy aho aminareo mpirehareha hoe: "Aoka izay ny fireharehanareo!"; ary aminareo olon-dratsy hoe: "Aza miandranandrana intsony!
6 Eny, aza miandranandrana intsony; aza mafy hatoka miteniteny foana.
7 Fantaro fa ny didim-pitsarana havoaka dia tsy avy any atsinanana na avy any andrefana, tsy avy any avaratra na avy any atsimo;
8 satria Andriamanitra no mpitsara, ka mampietry ny sasany Izy ary manandratra ny hafa kosa."
9 Misy tsangambava iray eo an-tanan'ny TOMPO, dia tsangambava feno divay mifangaroharo izay tandindon'ny hatezerany mandroatra. Asainy sotroin'ny olon-dratsy rehetra amin'ny tany izany ka tsy maintsy trohin'ireo hatramin'ny faikany.
10 Izaho kosa tsy hitsahatra hanambara izany, ka dia ilay Andriamanitr'i Jakoba no hankalazaiko amin-kira hoe: